Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN 2009-04-01

 Isuroyo Dagiti Annakyo

Ni Jehoas Pinanawanna ni Jehova Gapu Kadagiti Dakes a Kakadua

Ni Jehoas Pinanawanna ni Jehova Gapu Kadagiti Dakes a Kakadua

NARIRIBUK idi ti Jerusalem, ti siudad nga ayan ti templo ti Dios. Kalkalpas laeng ti pannakapapatay ni Ari Ocozias. Di pay ketdi nakappapati ti inaramid ni nanangna nga Athalia. Impapatayna dagiti annak a lallaki ni Ocozias—dagiti mismo nga apokona! Ammom kadi no apay?— * Tapno isu ti agturay imbes a maysa kadagiti apokona.

Ngem adda apoko ni Athalia a saan a napapatay, ti maladaga a ni Jehoas. Saan nga ammo dayta ni Athalia. Kayatmo kadi a maammuan no apay?— Bueno, ti ubing ket adda ikitna nga agnagan iti Jehoseba, a nangilemmeng kenkuana iti templo ti Dios. Naaramidanna dayta gapu ta asawana ti Nangato a Padi a ni Jehoiada. Isu a siniguradoda a dua a natalged ni Jehoas.

Innem a tawen nga inlemmengda ni Jehoas iti templo. Sadiay a nasursuruan maipapan ken Jehova a Dios ken iti linlintegna. Idi piton ti tawen ti ubing, nagtignay ni Jehoiada tapno pagbalinenna nga ari ni Jehoas. Kayatmo kadi a maammuan no kasano nga inaramid dayta ni Jehoiada ken no ania ti napasamak iti nadangkes a reyna a ni Athalia, ti lola ni Jehoas?—

Bueno, sililimed a pinaayaban ni Jehoiada dagiti nalalaing a guardia dagiti ari ti Jerusalem idi a tiempo. Imbagana kadakuada no kasano nga inispalda ken baketna ti anak ni Ari Ocozias. Kalpasanna, ni Jehoiada impakitana ni Jehoas kadagiti guardia, ket nabigbigda nga isu ti maikari nga agturay. Ket nangaramidda iti maysa a plano.

Ni Jehoiada impakitana ni Jehoas kadagiti tattao sa kinoronaanna. Iti kasta, dagiti tattao “rinugianda a pagtipaten dagiti imada ket kinunada: ‘Agbiag koma ti ari!’” Dagiti guardia pinalawlawanda ni Jehoas tapno masalakniban. Idi nangngeg ni Athalia dayta a panagraragsak, nagal-alisto a rimmuar ket kimmontra. Ngem ni Jehoiada imbilinna kadagiti guardia a papatayenda ni Athalia.—2 Ar-ari 11:1-16.

Iti panagkunam, nagtultuloy ngata ni Jehoas a dimngeg kenni Jehoiada ken nagaramid iti umiso?— Wen, bayat a sibibiag ni Jehoiada. Sinigurado pay ketdi ni Jehoas a mangted dagiti tattao iti kuarta tapno matarimaan ti templo ti  Dios, a binaybay-an ti amana a ni Ocozias, ken ti lolona a ni Jehoram. Ngem kitaentayo no ania ti napasamak idi natay ti Nangato a Padi a ni Jehoiada.—2 Ar-ari 12:1-16.

Naispal ni Jehoas

Agarup 40 ti tawen idin ni Jehoas. Imbes a nagtultuloy a nakikadua kadagiti agserserbi ken Jehova, nakigayyem kadagiti agdaydayaw iti didiosen. Ni Zacarias, nga anak ni Jehoiada, ti dinutokan ni Jehova kas padi idi a tiempo. Ania ngata ti inaramid ni Zacarias idi naammuanna dagiti dakes nga ar-aramiden ni Jehoas?—

Ni Zacarias kinunana ken Jehoas: “Agsipud ta binaybay-anyo ni Jehova, isu, kalpasanna, baybay-annakayto.” Nakapungtot ni Jehoas gapu kadagita a sasao ket imbilinna a maubor ni Zacarias agingga a matay. Agasem—ni Jehoas, a naispal manipud iti mammapatay, ti mismo a nangipapatay ken Zacarias!—2 Cronicas 24:1-3, 15-22.

Ania ti maadalmo iti daytoy a salaysay?— Siempre, ditay pulos kayat a tuladen ti dakes ken naulpit a ni Athalia. Imbes ketdi, rumbeng nga ayatentayo dagiti padatayo nga agdaydayaw ken uray dagiti kabusortayo, a kas iti insuro ni Jesus nga aramidentayo. (Mateo 5:44; Juan 13:34, 35) Ken laglagipentayo a no inrugitayo ti agaramid iti naimbag, a kas ken Jehoas, masapul nga itultuloytayo ti makigayyem kadagidiay agayat kenni Jehova ken mangparegta kadatayo nga agserbi kenkuana.

^ par. 3 No adda ubing a kaduayo nga agbasa, ti uged ket pammalagip nga agsardengkayo biit ken paregtaenyo nga iyebkasna ti kapanunotanna.