Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN 2009-02-01

Naimpusuan nga Aw-awisendaka

Naimpusuan nga Aw-awisendaka

NALABIT addan nakitam a Kingdom Hall dagiti Saksi ni Jehova iti lugaryo ket pampanunotem no ania ngata ti ar-aramidenda sadiay. Ammom kadi nga iyaw-awisda iti publiko dagiti linawas a gimongda? Dagiti tumabuno ket naimpusuan a mapasangbay.

Ngem nalabit maisaludsodmo: Apay nga aggigimong dagiti Saksi ni Jehova? Ania ti ar-aramidenda kadagita a gimong? Ken ania ti makuna dagiti saan a Saksi ni Jehova a timmabunon kadagita a gimong?

“Ummongem Dagiti Umili”

Sipud pay idi ugma, agtataripnongen dagiti tattao tapno agdayawda iti Dios ken agadalda maipapan kenkuana. Agarup 3,500 a tawenen ti napalabas, naibaga kadagiti Israelita: “Ummongem dagiti umili, ti lallaki ken ti babbai ken dagidiay ubbing ken ti ganggannaet nga adda iti uneg dagiti ruanganmo, tapno makapagimdengda ken tapno makasursuroda, yantangay masapul nga agbutengda ken Jehova a Diosyo ken annadanda nga itungpal ti amin a sasao daytoy a linteg.” (Deuteronomio 31:12) Isu nga iti Israel, dagiti ubbing ken nataengan agpadpada a nasuruanda nga agdayaw ken agtulnog ken Jehova a Dios.

Idi nabuangay ti kongregasion Kristiano kalpasan ti ginasut a tawen, nagtultuloy dagiti gimong kas napateg a paset ti pudno a panagdayaw. Insurat ni apostol Pablo: “Panunotentayo no kasano ti panagtitinnulongtayo iti panagayat ken panagaramid iti naimbag. Ditayo liwayan ti panaggigimongtayo, kas ar-aramiden dagiti dadduma. Ad-adda pay koma ti panagpipinnaregtatayo.” (Hebreo 10:24, 25, Ti Baro a Naimbag a Damag Biblia) No kasano a mapabileg ti singgalut ti pamilia no agkakadua ti agkakapamilia, kasta met ti pannakapabileg ti singgalut ti ayat dagidiay agtarigagay nga agserbi iti Dios no agtataripnong dagiti Kristiano tapno agdayaw.

Maitunos kadagita a pagtuladan a nailanad iti Biblia, mamindua iti makalawas nga aggigimong dagiti Saksi ni Jehova kadagiti Kingdom Hall-da. Dagiti gimong tulonganda dagiti tumabuno tapno maapresiar, matarusan, ken mayaplikarda dagiti prinsipio iti Biblia. Malaksid iti sumagmamano a lugar, agpapada ti programa iti intero a lubong, ken adda panggep ti tunggal gimong. Sakbay ken kalpasan dagiti gimong, dagiti tumabuno ket ‘agsisinnukat iti pammaregta’ babaen ti makapabileg a panagsasarita. (Roma 1:12) Ania ti maar-aramid iti tunggal maysa kadagita a gimong?

Palawag a Naibasar iti Biblia

Ti gimong a damo a matabunuan ti kaaduan ket ti palawag a naibasar iti Biblia ken nairanta nga agpaay iti publiko a kadawyanna a maangay iti ngudo ti lawas. Ni Jesu-Kristo ket masansan idi a nagpalawag iti publiko—a karaman kadagita ti nalatak a Sermon iti Bantay. (Mateo 5:1; 7:28, 29) Nagpalawag met ni apostol Pablo kadagiti lallaki idiay Atenas. (Aramid 17:22-34) Kas panangsurotda iti dayta a pagtuladan, ti gimgimong dagiti Saksi ni Jehova ket mangitampok iti palawag a nairanta nga agpaay iti publiko, a dadduma ket mabalin a damoda pay laeng ti tumabuno.

Marugian ti gimong babaen iti kanta manipud iti libro nga Agkanta ti Daydayaw ken Jehova. * No kayat dagiti dimmar-ay, mabalinda ti tumakder ken makipagkanta. Kalpasan ti ababa a kararag, adda kualipikado nga ispiker nga agpalawag iti 30 a minuto. (Kitaem ti kahon a  “Dagiti Makatulong a Palawag Para iti Publiko.”) Interamente a naibasar iti Biblia ti palawagna. Ti ispiker masansan nga awisenna ti tallaong a mangkita kadagiti maitutop a teksto iti Biblia ken surotenda ti panangibasana kadagiti bersikulo. Isu a nasayaat no itugotmo ti Bibliam, wenno kiddawem iti maysa kadagiti Saksi ni Jehova nga ikkannaka iti Biblia sakbay ti gimong.

Panagadal iti Pagwanawanan

Iti kaaduan a kongregasion dagiti Saksi ni Jehova, ti palawag publiko ket sarunuen ti Panagadal  iti Pagwanawanan, a maysa nga oras a saludsod ken sungbat a panangusig iti maysa a suheto ti Biblia. Dayta a gimong paregtaenna ti tallaong a surotenda ti ulidan dagiti taga-Berea idi kaaldawan ni Pablo nga “inawatda ti sao buyogen ti napalalo unay a kinagagar ti panunot, a siaannad a suksukimatenda ti Kasuratan.”—Aramid 17:11.

Marugian ti Panagadal iti Pagwanawanan babaen iti kanta. Ti impormasion a mausig ken dagiti saludsod nga ibangon ti mangidadaulo ket mabasa iti pagadalan nga edision daytoy a magasin. Mabalinmo ti agkiddaw iti kasta a kopia iti maysa kadagiti Saksi ni Jehova. Dagiti suheto a nabiit pay a napagadalan ket pakairamanan dagiti sumaganad: “Nagannak—Sanayenyo Dagiti Annakyo Buyogen ti Ayat,” “Diyo Subadan ti Dakes iti Dakes iti Asinoman,” ken “No Apay nga Asidegen nga Agpatingga ti Amin a Panagsagaba.” Nupay dayta a gimong ket maikondukta iti pamay-an a saludsod ken sungbat, boluntario ti pannakiraman ti tallaong ken kadawyanna a dagiti agkomento ket dagidiay nasaksakbay a nangbasa ken nangusig iti dayta nga artikulo ken kadagiti teksto a mangsuportar iti dayta. Agngudo ti gimong babaen iti kanta ken kararag.—Mateo 26:30; Efeso 5:19.

Panagadal ti Kongregasion iti Biblia

Iti sabali pay nga aldaw wenno rabii iti tunggal lawas, agtataripnong manen dagiti Saksi ni Jehova iti Kingdom Hall para iti tallo ti pasetna a programa nga agpaut iti 1 nga oras ken 45 a minuto. Ti umuna a paset ket ti Panagadal ti Kongregasion iti Biblia, nga agpaut iti 25 a minuto. Tumulong dayta kadagiti tumabuno tapno agbalinda a mas pamiliar iti Biblia, mabalbaliwanda ti panagpampanunot agraman kababalinda ken rumang-ayda kas ad-adalan ni Kristo. (2 Timoteo 3:16, 17) Kas iti Panagadal iti Pagwanawanan, daytoy a gimong ket saludsod ken sungbat a panangusig iti maysa a suheto ti  Biblia. Mabalin nga agkomento ti siasinoman a mayat. Kadawyanna a maysa a naibasar iti Biblia a libro wenno broshur nga impablaak dagiti Saksi ni Jehova ti mausar iti panagadal.

Apay a mausar ti literatura a naibasar iti Biblia iti daytoy a gimong? Idi panawen ti Biblia, saan nga umdas ti panangbasa laeng iti Sao ti Dios. “Naibinsabinsa dayta, ken adda panangipaay iti kaipapananna; ket intuloyda ti nangipaay iti pannakaawat iti panangbasa.” (Nehemias 8:8) Kadagiti kallabes a tawen, dagiti publikasion a mangisalaysay kadagiti libro nga Isaias, Daniel, ken Apocalipsis tinulonganna dagiti timmabuno iti daytoy a gimong tapno maawatanda dagita a paset ti Biblia.

Teokratiko nga Eskuelaan ti Panagministro

Kalpasan ti Panagadal ti Kongregasion iti Biblia, maangay ti Teokratiko nga Eskuelaan ti Panagministro. Nairanta daytoy a 30-minuto a gimong a tumulong kadagiti Kristiano a rumang-ay iti “arte ti panangisuro.” (2 Timoteo 4:2) Kas pagarigan, adda kadin dinamag kenka ti anakmo wenno gayyemmo maipapan iti Dios wenno iti Biblia ngem dika napnek iti insungbatmo? Maisuronaka ti Teokratiko nga Eskuelaan ti Panagministro no kasano ti mangipaay kadagiti makaparegta ken naibasar iti Biblia a sungbat kadagiti naririgat a saludsod. Iti kasta, mapadasantayo met ti kas iti napadasan ni propeta Isaias idi a kinunana: “Ti met laeng Soberano nga Apo Jehova intedna kaniak ti dila dagidiay nasursuruan, tapno maammuak no kasano a sungbatak iti maysa a sao daydiay nabannog.”—Isaias 50:4.

Ti Teokratiko nga Eskuelaan ti Panagministro ket mangrugi babaen iti palawag a naibasar iti paset ti Biblia a naiparegta iti napalabas a lawas a basaen ti tallaong. Kalpasan ti palawag, ti ispiker awisenna ti tallaong nga agkomento iti ababa maipapan kadagiti naamirisda a makagunggona a punto manipud iti naituding a basaen. Kalpasan dayta, dagiti estudiante a nagpasalista iti Teokratiko nga Eskuelaan ti Panagministro iparangdan dagiti naituding a presentasionda.

Matudingan dagiti estudiante a mangbasa iti sumagmamano a bersikulo ti Biblia iti plataporma wenno mangidemostra no kasano nga isuro iti sabali a tao ti maysa a suheto manipud iti Biblia.  Kalpasan ti tunggal paset, ti para balakad nga aduanen iti kapadasan komendaranna ti estudiante iti nasayaat a naaramidanna, nga ibasarna dagiti komentona iti libro a Magunggonaan iti Edukasion nga Ipaay ti Teokratiko nga Eskuelaan ti Panagministro. Kalpasan ti gimong, mabalin a kasaritana iti pribado ti nagpaset nga estudiante tapno maipaayanna iti singasing no kasano a rumang-ay.

Daytoy a paset ti programa nga addaan iti agsasaruno ken abbaba a presentasion ket nairanta a tumulong kadagiti estudiante ken iti amin a tumabuno a mayat a mangparang-ay iti abilidadda nga agbasa, agsao, ken agisuro. Kalpasan nga agngudo ti Teokratiko nga Eskuelaan ti Panagministro, marugian ti Gimong ti Serbisio babaen iti kanta a naibasar iti Biblia.

Gimong ti Serbisio

Ti maudi a paset ti programa ket ti Gimong ti Serbisio. Babaen kadagiti palawag, demostrasion, interbiu, ken pannakipaset ti tallaong, makasursuro dagiti tumabuno no kasanoda a sieepektibo a maisuro ti kinapudno iti Biblia. Sakbay nga imbaon ni Jesus dagiti adalanna a mangasaba, inummong ken inikkanna ida kadagiti detalyado nga instruksion. (Lucas 10:1-16) Yantangay nakasaganadan a naimbag iti trabaho a panagebanghelio, naaddaanda iti adu a makapainteres a kapadasan. Idi agangay, nagreport ken Jesus dagita a pasurotna. (Lucas 10:17) Masansan a nagsasaritaan dagiti adalan ti kapkapadasanda.—Aramid 4:23; 15:4.

Ti 35-minuto a programa para iti Gimong ti Serbisio ket naibalabala iti binulan a pagbasaan a napauluan Ti Ministeriotayo iti Pagarian. Karaman kadagiti topiko a nabiit pay a nausig ket dagiti sumaganad: “Panagdayaw ken Jehova kas Maysa a Pamilia,” “No Apay nga Agkarasublitayo,” ken “Tuladenyo ni Kristo iti Ministerioyo.” Agngudo ti programa babaen iti kanta, ken adda kameng ti kongregasion a natudingan a mangidaulo iti pangserra a kararag.

Ti Makuna Dagiti Timmabunon

Ikagkagumaan dagiti kongregasion nga iparikna a maabrasa ti amin a tumabuno. Kas pagarigan, adun ti nangngeg ni Andrew a dakes a damag maipapan kadagiti Saksi ni Jehova. Ngem iti damo a pannakigimongna, nasdaaw iti panangpasangbayda kenkuana. Kinunana: “Nakaragragsak gayam a lugar dayta. Diak ninamnama a mannakigayyemda ken maseknanda unay kaniak.” Kasta met laeng ti makuna ni Ashel nga agtutubo idiay Canada. “Makapainteres unay ti gimong! Naglaka a masurotan.”

Ni José, nga agnanaed idiay Brazil ket pagaammo a mannakiapa iti lugarda. Uray no kasta, isu ket naawis a tumabuno iti gimong iti maysa a Kingdom Hall sadiay. “Naimpusuan nga inabrasadak dagidiay adda iti Kingdom Hall nupay ammoda ti dati a kababalinko,” kinunana. Malagip met ni Atsushi nga agnanaed idiay Japan: “Admitirek nga idi damo a tumabunoak iti gimong dagiti Saksi ni Jehova, medio alusiisenak. Nupay kasta, naamirisko a gagangayda met la gayam. Talaga nga inkagumaandak a gayyemen tapno diak alusiisen.”

Aw-awisendaka

Kas ipakita dagita a komento, makagunggona unay a kapadasan ti itatabuno kadagiti gimong iti Kingdom Hall. Adu ti maammuam maipapan iti Dios, ken babaen ti naibasar iti Biblia a pannursuro a magun-odam sadiay, maipakaammo kenka ni Jehova a Dios no kasano a “magunggonaam ti bagim.”—Isaias 48:17.

Ti gimgimong dagiti Saksi ni Jehova ket libre, ken awan panagur-or iti kuarta sadiay. Kayatmo kadi a tabunuan ti gimong iti Kingdom Hall nga adda iti lugaryo? Naimpusuan nga aw-awisendaka.

^ par. 10 Impablaak dagiti Saksi ni Jehova ti amin a publikasion a nadakamat iti daytoy nga artikulo.