Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN 2008-08-01

 Isuroyo Dagiti Annakyo

Sinalimetmetan ni Samuel No Ania ti Umiso

Sinalimetmetan ni Samuel No Ania ti Umiso

ADDA kadi nakitamon a tao a nagaramid iti dakes?— * Adda idi nakita ni Samuel iti mismo a lugar a dimo namnamaen a pakapasamakanna. Agnanaed idi ni Samuel iti tabernakulo ti Dios, ti lugar a pagdayawan, iti siudad ti Silo. Kitaentayo no kasano a nagbalin a pagtaengan ni Samuel ti tabernakulo nasurok a 3,000 a tawen ti napalabasen.

Idi saan pay a naipasngay ni Samuel, il-iliwen unay ti inana a ni Anna ti maaddaan iti anak. Iti naminsan nga ipapanna iti tabernakulo, inkararagna dayta iti Dios. Sipapasnek ti panagkararagna nga uray la agpigerger dagiti bibigna. Gapuna, impagarup ti nangato a padi a ni Eli nga isu ket nabartek. Ngem idi naammuan ni Eli a maigapu dayta iti nakaro a ladingit ni Anna, binendisionanna daytoy, a kunkunana: “Ited koma ti Dios ti Israel ti dawatmo.”—1 Samuel 1:17.

Idi agangay, naipasngay ni Samuel ket naragsakan unay ni Anna isu nga imbagana iti asawana a ni Elcana: ‘Apaman a mapusot ni Samuel, ipankonto idiay tabernakulo tapno agserbi iti Dios.’ Kasta a talaga ti inaramidna! Nalabit nga uppat wenno lima ti tawen idin ni Samuel.

Lakay idin ni Eli, ket dagiti annakna a da Hofni ken Finehas saanda nga agserserbi ken Jehova iti umiso a pamay-an. Makiab-abigda pay kadagiti babbai a mapmapan idiay tabernakulo! Iti panagkunam, ania ti rumbeng nga inaramid ni tatangda?— Wen, rumbeng koma a tinubngarna ida ket dina impalubos nga inaramidda dagita a kinadakes.

Idiay templo ti dimmakkelan ni Samuel ket nalabit nga ammona dagiti dakes nga aramid dagiti annak ni Eli. Tinuladna kadi ti dakes a kababalinda?— Saan, intultuloyna ketdi nga inaramid no ania ti umiso, kas insuro dagiti dadakkelna nga aramidenna. Saan ngarud a pakasdaawan a nakapungtot ni Jehova kenni Eli. Nangibaon pay iti maysa a propeta a mangibaga ken Eli no kasano a dusaen  ti Dios ti sangakabbalayan ni Eli, nangnangruna dagiti dakes nga annakna.—1 Samuel 2:22-36.

Nagtultuloy ni Samuel a nakipagserbi ken Eli idiay tabernakulo. Iti maysa a rabii bayat a matmaturog ni Samuel, adda timek a nangawag iti naganna. Gapuna, napan ken Eli, ngem kinunana a saanna nga inayaban. Idi kuan, naulit manen dayta. Gapuna, kalpasan ti maikatlo a gundaway, imbilin ni Eli kenni Samuel a kastoy ti ibagana: “Agsaoka, Jehova, ta umim-imdeng ti adipenmo.” Idi insawang dayta ni Samuel, kinasarita ni Jehova. Ammom kadi no ania ti imbaga ni Jehova kenni Samuel?—

Impakaammo ni Jehova kenni Samuel ti panggepna a naibagana idin ken Eli a panangdusa iti sangakabbalayanna. Kabigatanna, nagbuteng ni Samuel a mangidanon ken Eli no ania ti kinuna ni Jehova kenkuana. Ngem impakaasi ni Eli kenni Samuel: “Pangngaasim, dika ilimed kaniak.” Gapuna, imbaga met laeng ni Samuel kenni Eli ti amin nga imbaga ni Jehova nga aramidenna—kas impakpakauna idi ti propetana ken Eli. Simmungbat ni Eli: ‘No ania ti naimbag kadagiti mata ni Jehova aramidenna koma.’ Idi agangay, napapatay da Hofni ken Finehas, ken natay met ni Eli.—1 Samuel 3:1-18.

Kabayatanna, “nagtultuloy a dimmakkel ni Samuel, ket ni met laeng Jehova adda idi kenkuana.” Nalabit a tin-edyer idin ni Samuel, maysa a napateg a tiempo iti biag dagiti agtutubo. Panagkunam, iti biang ni Samuel nalaka kadi ti agaramid iti umiso uray no dakes ti ar-aramiden ti dadduma?— Nupay narigat, simamatalek a nagserbi ni Samuel kenni Jehova iti tungpal biagna.—1 Samuel 3:19-21.

Sika met ngay? Tuladem kadi ni Samuel bayat nga agmatmataenganka? Itultuloymo kadi nga aramiden ti umiso? Salimetmetam kadi dagiti pannursuro ti Biblia ken dagiti insuro kenka dagiti dadakkelmo? No aramidem ti kasta, maparagsakmo ni Jehova ken dagiti dadakkelmo.

^ par. 3 No adda ubing a kaduayo nga agbasa, ti uged ket pammalagip nga agsardengkayo biit ken iturongyo kenkuana ti saludsod.