Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

TI PAGWANAWANAN 2008-04-01

 Isuroyo Dagiti Annakyo

Ni Timoteo—Sisasagana ken Situtulok nga Agserbi

Ni Timoteo—Sisasagana ken Situtulok nga Agserbi

“NAKASAGANAKA kadi?” Naisaludsod kadin dayta kenka?— Nalabit a ti kayat a sawen ti tao a nagsaludsod ket: ‘Adda kadi libro a pagadalam? Nabasam kadin dagiti leksionmo?’ Kas makitatayo, nakasagana ni Timoteo.

Situtulok met ni Timoteo. Ammom kadi no ania ti kayat a sawen dayta?— Idi naawis ni Timoteo nga agserbi iti Dios, ti kababalinna ket kas iti maysa nga adipen ti Dios, a nagkuna: “Adtoyak! Ibaonnak.” (Isaias 6:8) Nakaragragsak ti biag ni Timoteo agsipud ta sisasagana ken situtulok nga agserbi. Kayatmo kadi a maammuan ti maipapan iti dayta?—

Nayanak ni Timoteo idiay Listra, a ginasut a kilometro manipud Jerusalem. Napasnek nga agad-adal iti Kasuratan ti lolana a ni Loida ken ti nanangna a ni Eunice. Uray idi maladaga pay ni Timoteo, rinugiandan nga insuro kenkuana ti Sao ti Dios.2 Timoteo 1:5; 3:15.

Ania ti napasamak?

Idi a nalabit tin-edyer pay ni Timoteo, simmarungkar da apostol Pablo ken Bernabe idiay Listra, ti damo nga adayo a lugar a nangasabaanda. Mabalin nga iti daytoy a tiempo a nagbalin a Kristiano ti lola ken nanang ni Timoteo. Kayatmo kadi a maammuan ti parikut a nakaipasanguan da Pablo ken Bernabe?— Bueno, dagiti tattao a bumusbusor kadagiti Kristiano inuborda ni Pablo agingga a natuang, ken inulodda iti ruar ti siudad. Impagarupda a natayen.

Dagiti mamati iti isursuro ni Pablo inaribungbonganda ket timmakder. Iti simmaganad nga aldaw, pimmanaw da Pablo ken Bernabe, ngem di nagbayag, nagsublida idiay Listra. Idi nagsublida, nagpalawag ni Pablo ket imbagana kadagiti adalan: “Masapul a sumrektayo iti pagarian ti Dios babaen iti adu a rigat.” (Aramid 14:8-22) Ammom kadi ti kayat a sawen ni Pablo?— Ibagbagana a dadduma ti mangriribuk kadagiti agserserbi iti Dios. Idi agangay, nagsurat ni Pablo kenni Timoteo: ‘Amin dagidiay agtartarigagay nga agbiag buyogen ti nadiosan a debosion maidadanesdanto.’2 Timoteo 3:12; Juan 15:20.

 Manipud idiay Listra, nagawid da Pablo ken Bernabe. Sumagmamano a bulan kalpasanna, ni Pablo inkuyogna ni Silas nga agdaliasat ket nagsublida a nangparegta kadagiti kabbaro nga adalan kadagiti lugar a binisita idi ni Pablo. Idi simmangpetda idiay Listra, naragsakan la ketdi ni Timoteo a nakakita manen ken Pablo! Ad-adda manen a naragsakan ni Timoteo idi inawis ni Pablo a makikadua kadakuada ken Silas. Inawat ni Timoteo ti awis. Nakasagana ken situtulok a kumuyog kadakuada.Aramid 15:40–16:5.

Nagkakadua dagiti tallo a nagdaliasat, a nagnagna iti adu a kilometro, ken nagluganda iti barko. Idi simmangladda, nagnada a nagturong iti Tesalonica idiay Grecia. Adu ti nagbalin a Kristiano sadiay. Ngem makapungtot ti dadduma ket nangbuangayda iti bunggoy dagiti managderraaw. Nagpeggad ti biag da Pablo, Silas, ken Timoteo, isu a napanda idiay Berea.Aramid 17:1-10.

Madanagan ni Pablo kadagiti kabbaro a manamati idiay Tesalonica, isu nga imbaonna manen ni Timoteo sadiay. Ammom kadi no apay?— Inlawlawag ni Pablo kalpasanna kadagiti Kristiano idiay Tesalonica: ‘Tapno patibkerennakayo ken liwliwaennakayo tapno awan koma ti maupay.’ Ammom kadi no apay a ti agtutubo a ni Timoteo ti imbaon ni Pablo iti kasta a narigat nga annongen?— Ni Timoteo ngamin ket situtulok a mapan ken saan unay nga am-ammo dagiti bumusbusor. Agkalikagum dayta iti kinatured! Ania ti resulta ti ibibisitana? Idi nagsubli ni Timoteo iti ayan ni Pablo, impadamagna ti maipapan iti kinamatalek dagiti taga-Tesalonica. Gapuna, nagsurat kadakuada ni Pablo: “Naliwliwakami kadakayo.”1 Tesalonica 3:2-7.

Nagserbi ni Timoteo a kadua ni Pablo iti simmaganad a sangapulo a tawen. Kalpasanna, naibalud ni Pablo idiay Roma ket ni Timoteo, a nabiit pay a nawayawayaan iti pagbaludan, kinaduaanna ni Pablo. Bayat ti pannakaibaludna, nagsurat ni Pablo kadagiti taga-Filipos, a nalabit ni Timoteo ti sekretariona. Kinuna ni Pablo: ‘Mangin-inanamaak nga ibaonko kadakayo ni Timoteo, ta awanen kaniak ti sabali pay a matalek unay ken nasaysayaat ti panagserbina kadakayo.’Filipos 2:19-22; Hebreo 13:23.

Naragsakan la ketdi ni Timoteo kadagita a sasao! Ni Pablo inay-ayatna unay ni Timoteo agsipud ta sisasagana ken situtulok nga agserbi. Namnamaenmi a kastaka met koma.