Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan —Pagadalan nga Edision

  |  Nobiembre 2015

Salsaludsod Dagiti Agbasbasa

Salsaludsod Dagiti Agbasbasa

Ania ti mangipakita nga apagbiit laeng a nasakup ti nagkauna a siudad ti Jerico?

Mabasa iti Josue 6:10-15, 20 a linikmut dagiti Israelita ti siudad ti Jerico iti maminsan iti kada aldaw iti uneg ti innem nga aldaw. Iti maikapito nga aldaw, namimpito a linikmutda ti siudad, ket babaen iti pannakabalin ti Dios, narba ti nalagda a pader ti Jerico. Gapuna, nakastrek dagiti Israelita ket nasakupda ti Jerico. Adda kadi ebidensia ti arkeolohia nga apagbiit laeng a nasakup ti Jerico kas kuna ti Biblia?

Idi un-unana, gagangay a rauten dagiti kabusor ti napaderan a siudad. Kasanoman kapaut ti panangraut, no nasakupdan ti siudad, samsamen dagiti nangraut ti amin a kinabaknangna, agraman dagiti nabati a taraon. Ngem iti rebba ti Jerico, adu a taraon ti nasarakan dagiti arkeologo. Maipapan iti daytoy, kuna ti Biblical Archaeology Review: “Malaksid kadagiti damili, bukbukel ti kaaduan a nasarakan iti rebba. . . . Naisangsangayan daytoy iti pakasaritaan ti arkeolohia iti Palestina. Gagangay a maysa wenno dua laeng a burnay ti masarakan, ngem naidumduma ti makasarak iti kasta kaadu a bukbukel.”

Sigun iti salaysay ti Biblia, adda makagapu no apay a saan a sinamsam dagiti Israelita dagiti bukbukel iti Jerico. Imbilin ngamin ni Jehova dayta. (Jos. 6:17, 18) Rimmaut dagiti Israelita iti primavera (spring), idi kalkalpas ti panagani isu a nakaad-adu ti bukel. (Jos. 3:15-17; 5:10) Ipakita ti nakaad-adu a bukel a nasarakan iti Jerico a ti iraraut dagiti Israelita ket apagbiit laeng kas kuna ti Biblia.