Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan —Pagadalan nga Edision

  |  Oktubre 2015

Makitam Kadi ti Ima ti Dios iti Biagmo?

Makitam Kadi ti Ima ti Dios iti Biagmo?

“Ti ima ni Jehova pudno unay a maipakaammonto kadagiti adipenna.”—ISA. 66:14.

KANTA: 65, 26

1, 2. Ania ti pampanunoten ti dadduma maipapan iti Dios?

ADU a tattao ti mangpanunot nga awan pakainaigan ti ar-aramidenda iti aramid ti Dios. Kinapudnona, patien ti dadduma a saan nga interesado ti Dios iti mapaspasamak kadagiti tattao. Idi dinadael ti napigsa a bagyo a Yolanda (Haiyan) ti makintengnga a paset ti Pilipinas wenno Kabisayaan idi Nobiembre 2013, kinuna ti mayor ti maysa a dakkel a siudad: “Sadino ti ayan ti Dios?”

2 Agtigtignay ti dadduma a tattao a kas man la saan a makitkita ti Dios ti ar-aramidenda. (Isa. 26:10, 11; 3 Juan 11) Dagitoy a tattao ket kas kadagiti dinakamat ni apostol Pablo idi kinunana: “Saanda nga inanamongan ti panangbigbig iti Dios buyogen ti umiso a pannakaammo.” Dagita a tattao ket ‘napno iti amin a kinakillo, kinadangkes, kinaagum, ken kinadakes.’—Roma 1:28, 29.

3. (a) Ania dagiti mabalin nga isaludsodtayo iti bagitayo maipapan iti Dios? (b) Ania ti tuktukoyen ti Biblia no masansan a dakamatenna ti “ima” ni Jehova?

3 Datayo ngay? Saan a kas kadagiti immun-unan a nadakamat, ammotayo a makitkita ni Jehova ti amin nga ar-aramidentayo. Ngem makitkitatayo met kadi ti pannakaseknan ken panangtulongna  kadatayo? Maysa pay, karamantayo kadi kadagiti dinakamat ni Jesus a ‘makakita iti Dios’? (Mat. 5:8) Tapno maammuantayo ti kaipapanan dayta, usigentayo nga umuna dagiti pagarigan iti Biblia maipapan kadagiti nakakita iti ima wenno tulong ti Dios ken dagidiay saan a nakakita iti dayta. Kalpasanna, ammuentayo no kasano a nalawag a makitatayo ti ima ni Jehova iti biagtayo babaen iti mata ti pammatitayo. Bayat nga usigentayo dagitoy, laglagipentayo a masansan a dakamaten ti Biblia ti “ima” ti Dios no tukoyenna ti pannakabalin nga us-usarenna a mangtulong kadagiti adipenna ken mangparmek kadagiti kabusorna.—Basaen ti Deuteronomio 26:8.

SAANDA A NAKITA TI IMA TI DIOS

4. Apay a saan a nakita dagiti kabusor ti Israel ti ima ti Dios?

4 Iti pakasaritaan ti Israel, adda idi gundaway dagiti tattao a makakita ken makangngeg no kasano a tinulongan ti Dios ti Israel. Simimilagro nga insalakan ni Jehova ti ilina manipud iti Egipto ken tinulonganna ida a mangparmek iti adu nga ari. (Jos. 9:3, 9, 10) Uray nakita ken nangngeg ti dandani amin nga ari iti makinlaud a paset ti Jordan no kasano nga insalakan ni Jehova ti ilina, ‘naguurnongda latta a sangsangkamaysa tapno agkaykaysada a makigubat ken Josue ken iti Israel.’ (Jos. 9:1, 2) Idi makilablaban dagidiay nga ari iti Israel, adda gundawayda a makakita iti ima ti Dios. Iti bilin ni Jehova, “ti init nagtalinaed a di agkutkuti, ket ti bulan pudno a nagintek, agingga a ti nasion makaibales kadagiti kabusorna.” (Jos. 10:13) Ngem binay-an ni Jehova nga agbalin a natangsit ti puso dagiti kabusor ti Israel tapno ideklarada ti gubat maibusor iti Israel. (Jos. 11:20) Saan a binigbig dagiti kabusor ti Israel a ti Dios ti makilablaban para iti Israel, isu a naabakda.

5. Ania ti saan a binigbig ti dakes nga ari a ni Acab?

5 Idi agangay, addaan iti adu a gundaway ti dakes nga ari a ni Acab a makita ti ima ti Dios mainaig iti adu a pasamak. Imbaga ni Elias kenkuana: “Awanto ti dumteng a linnaaw wenno uray tudo, malaksid no ibilin ti saok!” (1 Ar. 17:1) Nalawag a ni Apo Jehova ti nangibaga iti dayta, ngem saan a binigbig ni Acab. Idi agangay, nakita ni Acab ti apuy a bimmaba manipud langit idi inkararag ni Elias a mapuoran ti datonna. Kalpasanna, imbaga ni Elias a pagpatinggaen ni Jehova ti tikag idi kinunana ken Acab: “Sumalogka tapno saannaka nga igawid ti bayakabak!” (1 Ar. 18:22-45) Nakita amin ni Acab dagitoy a milagro ngem saanna latta a binigbig a daytoy ket pannakabalin ti Dios. Adda nagpateg a masursurotayo kadagitoy a pagarigan—masapul a makitatayo ti panagtignay ti ima ni Jehova iti biagtayo.

NAKITADA TI IMA NI JEHOVA

6, 7. Ania ti nalawag a nakita ti dadduma idi panawen ni Josue?

6 Saan a kas kadagiti dakes nga ari, nakita ti dadduma ti ima wenno tulong ti Dios. Kas pagarigan, saan a kas iti kaaduan a nasion a nakigubat iti Israel idi panawen ni Josue, nakikappia dagiti Gabaonita iti Israel. Apay? Kinunada: “Iti adayo unay a daga ti naggapuan dagiti adipenmo gapu iti nagan ni Jehova a Diosmo, agsipud ta nangngegmi ti maipapan iti panagdindinamagna ken maipapan iti amin nga inaramidna.” (Jos. 9:3, 9, 10) Umiso ti inaramidda ta binigbigda a ti pudno a Dios ti tumultulong iti Israel.

7 Nakita met ni Rahab ti ima ti Dios kadagiti pasamak idi kaaldawanna. Naammuanna no kasano nga inispal ni Jehova ti ilina, isu nga imbagana iti dua nga espia nga Israelita: “Ammok a ni Jehova sigurado nga itednanto kadakayo ti daga.” Uray no ammona a  napeggad ti inaramidna, impakitana a mamati nga isu ken ti pamiliana ket ispalen ni Jehova.—Jos. 2:9-13; 4:23, 24.

8. Kasano a nakita ti dadduma nga Israelita ti ima ti Dios?

8 Saan a kas iti dakes nga ari ti Israel a ni Acab, nakita ti dadduma nga Israelita ti ima ti Dios idi sinungbatanna ti kiddaw ni Elias. Idi nakitada ti apuy manipud ken Jehova a nangibus iti daton ni Elias, kinunada: “Ni Jehova ti pudno a Dios!” (1 Ar. 18:39) Para kadakuada, nalawag a nakitada ti pannakabalin ti Dios.

9. Kasanotayo a makita ni Jehova ken ti imana ita?

9 Makatulong dagiti nasayaat ken saan a nasayaat a pagarigan nga inusigtayo tapno maawatantayo no ania ti kaipapanan ti pannakakita iti Dios wenno iti imana. Bayat a maam-ammotayo ti Dios, mabalintayo met a makita ti imana gapu ta matarusantayo dagiti kualidad ken ar-aramidna babaen ‘kadagiti mata ti pusotayo.’ (Efe. 1:18) Kayattayo a tuladen dagiti tattao idi ken ita a nalawag a nakakita a tultulongan ni Jehova ti ilina. Ngem adda kadi pammaneknektayo a talaga a tultulongan ti Dios dagiti tattao ita?

PAMMANEKNEK ITI TULONG TI DIOS ITA

10. Ania ti pammaneknektayo a tultulongan ni Jehova dagiti tattao ita? (Kitaen ti ladawan iti rugi ti artikulo.)

10 Adu dagiti pammaneknektayo nga agtultuloy a tultulongan ni Jehova dagiti tattao. Kanayon a makadamagtayo iti kapadasan dagiti indibidual a nagkiddaw iti naespirituan a tulong ket napatgan dayta. (Sal. 53:2) Kas pagarigan, bayat a mangaskasaba ni Allan iti bassit nga isla iti Pilipinas, adda nakasaritana a maysa a babai a bigla a nagsangit. Kinuna ni Allan: “Iti dayta nga agsapa, inkararagna ken Jehova a masarakan koma dagiti Saksi isuna. Idi agtutubo pay, nakipagadal iti Biblia kadagiti Saksi, ngem saannan a nakita ida idi nakiasawa ken immakar iti dayta nga isla. Sinungbatan a dagus ti Dios ti kararagna isu a nagsangit.” Awan pay ti makatawen, indedikarnan ti biagna ken Jehova.

Makitkitam kadi ti pammaneknek a tultulongan ni Jehova dagiti adipenna ita? (Kitaen ti parapo 11-13)

11, 12. (a) Kasano a tultulongan ni Jehova dagiti adipenna? (b) Isalaysay ti kapadasan ti maysa a tinulongan ti Dios.

11 Adu nga adipen ti Dios ti nakakita iti tulongna idi naisardengda dagiti bisioda kas iti panagsigarilio, panagdroga, wenno panagbuya iti pornograpia. Kuna ti dadduma a namin-ano a pinadasda nga isardeng a bukodda dagita a bisio ngem saanda a nagballigi. Ngem idi nagpatulongda ken Jehova, intedna ti “pannakabalin a nalablabes ngem ti gagangay,” isu a naisardengda ti bisioda.—2 Cor. 4:7; Sal. 37:23, 24.

12 Tultulongan met ni Jehova dagiti adipenna a mangsango kadagiti personal a pakarigatan. Kas pagarigan, narigatan ni Amy idi naibaon a tumulong nga agibangon iti Kingdom Hall ken pagtaengan dagiti misionero iti bassit nga isla iti Pasipiko. Kinunana: “Nagnaedkami iti bassit a hotel, ken inaldaw a magnakami kadagiti nalayus a kalsada a mapan iti pagibangonan.” Masapul met a makibagay ni Amy kadagiti kostumbre dagiti tattao sadiay, ken masansan nga awan ti koriente wenno danum. Kinunana pay: “Ad-adda pay a narigatanak idi nabugkawak ti maysa kadagiti kakabsat a babbai a kaduami nga agtrabtrabaho. Maup-upayak a nagawid. Iti nasipnget a kuartok, inyebkasko ken Jehova ti rikriknak ken nagpatulongak.” Idi addan ti koriente, binasa ni Amy ti Pagwanawanan nga addaan iti artikulo maipapan iti panagturpos iti Gilead a nakaisalaysayan dagiti pakarigatan a mapaspasaranna: baro a kultura, iliw iti pamilia, baro a kakadua. Kinunana: “Nariknak a kasarsaritanak ni Jehova iti dayta a rabii. Dayta ti nangpabileg kaniak nga agtultuloy iti annongek.”—Sal. 44:25, 26; Isa. 41:10, 13.

13. Ania ti mangipakita a tultulongan ni Jehova ti ilina a ‘mangidepensa ken legal a mangipasdek’ iti naimbag a damag?

 13 Maysa pay a pammaneknek iti tulong ni Jehova ket ti panagballigi dagiti Saksi ni Jehova a ‘mangidepensa ken legal a mangipasdek’ iti naimbag a damag. (Fil. 1:7) Pinadas ti dadduma a gobierno a mamimpinsan a pasardengen ti trabaho ti ili ti Dios. Ngem no subliantayo ti napalabas, makitatayo a nangabak dagiti Saksi ni Jehova iti 268 a kaso kadagiti nangato a korte, agraman ti 24 a kaso a nagballigi iti European Court of Human Rights manipud laeng idi tawen 2000. Nalawag nga awan ti makalapped iti ima wenno tulong ti Dios.—Isa. 54:17; basaen ti Isaias 59:1.

14. Kasano a makitatayo ti ima wenno tulong ti Dios iti panangasabatayo ken iti tagtagiragsakentayo a panagkaykaysa?

14 Maikaskasaba ti naimbag a damag iti intero a lubong babaen iti tulong ti Dios. (Mat. 24:14; Ara. 1:8) Maysa pay, nagkaykaysa dagiti adipen ni Jehova ita iti intero a daga—banag a saan a matulad ti lubong. Gapuna, makitatayo no apay a kastoy ti makuna dagiti saan nga agdaydayaw ken Jehova: “Ti Dios pudno nga adda iti tengngayo.” (1 Cor. 14:25) Isu nga adu ti pammaneknektayo a tultulongan ti Dios ti ilina. (Basaen ti Isaias 66:14.) Sika ngay? Nalawag kadi a makitam a tultulongannaka ni Jehova?

MAKITAM KADI TI IMA NI JEHOVA ITI BIAGMO?

15. Ilawlawagmo no apay a no dadduma saantayo a makita ti tulong ni Jehova iti biagtayo.

15 No dadduma, mabalin a saantayo a makita ti ima wenno tulong ti Dios iti biagtayo. Apay? No adu ti problematayo, mabalin a malipatantayo a tinulongannatayo idin ni Jehova. Idi impangta ni Reyna Jezebel ti biag ni propeta Elias, apagbiit a nalipatanna ti panangtulong ti Dios kenkuana. Kuna ti Biblia maipapan ken Elias: ‘Kiniddawna a matay koman.’ (1 Ar. 19:1-4) Ania ti solusion ti problema ni Elias? Masapul nga agpannuray ken Jehova tapno maparegta.—1 Ar. 19:14-18.

16. Ania ti mabalintayo nga aramiden tapno makitatayo met ti Dios kas ken Job?

 16 Nasikoran ni Job kadagiti bukodna a pakaseknan isu a saanna a nakita dagiti bambanag sigun iti panangmatmat ti Dios. (Job 42:3-6) Kas ken Job, mabalin a masapul met nga ikagumaantayo a makita ti Dios. Kasano? Babaen iti tulong ti Biblia, masapul nga utobentayo dagiti mapaspasamak iti aglawlawtayo. No ad-adda a makitatayo no kasano a tultulongannatayo ni Jehova, ad-adda a mamatitayo kenkuana. No kasta, maibagatayo met ti kinuna ni Job: “Nangngegko ti maipapan kenka, ngem ita ti bukodko a mata makitanaka.”

Us-usarennaka kadi ni Jehova tapno makita ti dadduma ti imana? (Kitaen ti parapo 17, 18)

17, 18. (a) Kasano a maammuantayo a tultulongannatayo ni Jehova? (b) Mangisalaysay iti kapadasan a mangipakita no kasano a tultulongannatayo ti Dios ita.

17 Kasano a makitatayo ti ima ni Jehova? Dagitoy dagiti pagarigan: Nalabit mariknam a naammuam ti kinapudno gapu iti panangiwanwan ti Dios. Adda kadin gundaway a nakigimongka ket nangngegam ti maysa a paset ket kinunam: “Dayta ti talaga a kasapulak”? Wenno mabalin a nasungbatan ti kararagmo. Mabalin nga inkeddengmo a palawaen ti ministeriom ket nakitam a tinulongannaka ni Jehova. Wenno napadasam kadin ti immikkat iti trabaho para iti panagserbim iti Dios ket nakitam a pudno ti karina: “Saankanto a pulos baybay-an”? (Heb. 13:5) No kanayon nga alertotayo iti naespirituan, makitatayo no kasano a tultulongannatayo ni Jehova iti nagduduma a pamay-an.

18 Insalaysay ni Sarah a taga-Kenya: “Inkararagko ti maysa nga iyad-adalak a saan a mangap-apresiar iti panagadalna iti Biblia. Dinamagko ken Jehova no masapul nga isardengkon nga iyadalan. Kalpasan la unay nga imbagak ti ‘Amen,’ naguni ti selponko. Immawag ti iyad-adalak ket damdamagenna no mabalin a kumuyog kaniak a mapan makigimong! Nasdaawak!” No alertoka, makitam met dagiti gundaway a tultulongannaka ti Dios. Kinuna ni Rhonna a maysa a kabsat a taga-Asia: “Masapul a sursuruem a makita no kasano nga iwanwanwan ni Jehova ti biagmo. No maaramidam dayta, masdaawka a makaammo a kasta unay ti pannakaseknanna kadatayo.”

19. Ania pay ti masapul nga aramidentayo tapno mairamantayo kadagiti makakita iti Dios?

19 Kinuna ni Jesus: “Naragsak dagiti nasin-aw ti pusoda, yantangay makitadanto ti Dios.” (Mat. 5:8) Kasano nga agbalin a ‘nasin-aw ti pusotayo’? Masapul a nadalus ti makin-uneg a kinataotayo ken isardengtayo dagiti dakes nga aramid. (Basaen ti 2 Corinto 4:2.) Bayat a pabpabilgentayo ti espiritualidadtayo ken aramidentayo ti umiso, mairamantayo kadagiti makakita iti Dios. Mausig iti sumaruno nga artikulo no ania ti makatulong tapno ad-adda a nalawag a makitatayo ti tulong ni Jehova iti biagtayo—ti pammatitayo.