Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) OKTUBRE 2015

“Ikkannakami iti Ad-adu Pay a Pammati”

“Ikkannakami iti Ad-adu Pay a Pammati”

“Tulongannak no sadino a kasapulak ti pammati!”—MAR. 9:24.

KANTA: 81, 135

1. Kasano kapateg ti pammati? (Kitaen ti ladawan iti rugi ti artikulo.)

NAPAMPANUNOTMO kadin, ‘Siak kadi ti kita ti tao a kayat ni Jehova nga ispalen inton dakkel a rigat ken iserrek iti baro a lubong?’ Siempre, ti pannakaisalakan ramanenna ti sumagmamano a banag, ngem impaganetget ni apostol Pablo daytoy a nakapatpateg a kasapulantayo: ‘No awan ti pammati di mabalin nga ay-aywen a naan-anay ti Dios.’ (Heb. 11:6) Kasla simple laeng daytoy, ngem iti kinapudnona, ‘ti pammati ket saan nga ik-ikutan ti amin a tattao.’ (2 Tes. 3:2) Tulongannatayo dagitoy a teksto tapno maawatantayo no kasano kapateg ti panangpabileg iti pammati.

2, 3. (a) Ania ti maadaltayo ken Pedro maipapan iti kinapateg ti pammati? (b) Ania dagiti saludsod nga usigentayo ita?

2 Impaganetget ni apostol Pedro ti kinapateg ti pammati idi imbagana a ti “nasubok a kualidad” ti pammati ket ‘masarakan koma a pakaigapuan ti pannakaidayaw ken dayag ken dayaw inton maipanayag ni Jesu-Kristo.’ (Basaen ti 1 Pedro 1:7.) Tangay umas-asidegen ti dakkel a rigat, saan kadi a kayattayo a siguraduen nga addaantayo iti kita ti pammati a mangiraman kadatayo kadagidiay a ti pammatida ket padayawanto ti natan-ok nga Aritayo inton maipadayag? Sigurado a kayattayo ti agbalin a “kita [ti tao] nga addaan pammati nga agturong iti pannakataginayon a sibibiag ti kararua.” (Heb. 10:39) No sipapanunottayo iti dayta, mabalin nga agpakaasitayo a kas iti lalaki a nangikuna: “Tulongannak no sadino a kasapulak ti pammati!” (Mar. 9:24) Wenno mabalin a  matignaytayo a mangibaga iti imbaga dagiti apostol ni Jesus: “Ikkannakami iti ad-adu pay a pammati.”—Luc. 17:5.

3 Kasapulantayo ti ad-adu a pammati, ngem adda dagiti tumaud a saludsod. Kasano a mapabilegtayo ti pammatitayo? Kasano a maipakitatayo nga addaantayo iti pammati? Apay a masiguradotayo a masungbatan ti kiddawtayo a maaddaan iti ad-adu pay a pammati?

MAAY-AYO TI DIOS NO PABILGENTAYO TI PAMMATITAYO

4. Ania dagiti pagarigan a mabalin a mangtignay kadatayo a mangpabileg iti pammatitayo?

4 “Amin a bambanag a naisurat a nasaksakbay naisuratda a pakasursuruantayo.” Gapuna, makasursurotayo kadagiti pagtuladan iti pammati a nairekord iti Biblia. (Roma 15:4) No mabasatayo ti salaysay maipapan kada Abraham, Sara, Isaac, Jacob, Moises, Rahab, Gideon, Barak, ken adu a sabsabali pay, matignaytayo a mangusig iti pammatitayo. (Heb. 11:32-35) Maysa pay, no mabasatayo ti pakasaritaan dagiti kakabsattayo ita nga addaan iti nabileg a pammati, matignaytayo a mangpabileg iti pammatitayo. *

5. Kasano nga impakita ni Elias a nabileg ti pammatina ken Jehova, ket ti ulidanna tignayennatayo a mangpanunot iti ania?

5 Maysa a pagarigan iti Biblia ti propeta a ni Elias. Panunotenyo dagitoy nga eksena a mangipakita a naan-anay ti panagtalekna ken Jehova. Idi impakaammo ni Elias ken Ari Acab ti panggep ni Jehova a mangyeg iti tikag, adda panagtalekna a nangibaga: “Kas sibibiag ni Jehova . . . awanto ti dumteng a linnaaw wenno uray tudo, malaksid no ibilin ti saok!” (1 Ar. 17:1) Namati ni Elias nga ipaay ni Jehova ti kasapulanna ken ti kasapulan ti dadduma bayat ti tikag. (1 Ar. 17:4, 5, 13, 14) Nagtalek a kabaelan a pagungaren ni Jehova ti natay nga ubing. (1 Ar. 17:21) Masiguradona a mangibaon ni Jehova iti apuy a mangibus iti sakripisiona iti Bantay Carmelo. (1 Ar. 18:24, 37) Idi dandanin pagpatinggaen ni Jehova ti tikag, uray idi awan pay ti pagilasinan nga agtudo, imbaga ni Elias ken Acab: “Sumang-atka, mangan ken uminumka; ta adda ti daranudor . . . ti maysa a bayakabak.” (1 Ar. 18:41) Saan kadi a dagita a salaysay tignayennatayo a mangsukimat iti bagbagitayo no nabileg met laeng ti pammatitayo?

KASANOTAYO A PABILGEN TI PAMMATITAYO?

6. Ania ti kasapulantayo manipud ken Jehova tapno bumileg ti pammatitayo?

6 Saantayo a mapabileg a bukodtayo ti pammatitayo. Ti pammati ket maysa nga aspeto ti bunga ti nasantuan nga espiritu ti Dios. (Gal. 5:22) Gapuna, nagsayaat no surotentayo ti balakad ni Jesus maipapan iti panangkiddaw iti ad-adu a nasantuan nga espiritu. Ngamin, impasigurado ni Jesus kadatayo a ti Ama “mangtedto iti nasantuan nga espiritu kadagidiay agdawdawat kenkuana.”—Luc. 11:13.

7. Iyilustrarmo no kasano a mapagtalinaedtayo a nabileg ti pammatitayo.

7 No nabilegen ti pammatitayo, itultuloytayo a taraonan dayta. Mayarig ti pammatitayo iti apuy a masungsungrodan. No simgeden ti apuy, mabalin a gumil-ayab ken dumarang dayta. Nupay kasta, no saanen a masungrodan, maiddep ket agbalinen a beggang ken agbalin a dapo no mabaybay-an. Ngem no kanayon a masungrodan, agtultuloy ti apuyna. Kasta met laeng ti pammatitayo. Agtultuloy a bumileg dayta no regular a mataraonan iti Sao ti Dios. No kanayontayo a basaen ken adalen ti Biblia, mapatanortayo ti napalalo a panangipateg iti dayta ken iti Autorna. Iti kasta, bumileg ti pammatitayo.

8. Ania ti mabalintayo nga aramiden tapno agtalinaed a nabileg ti pammatitayo?

 8 Ania pay ti mabalinmo nga aramiden tapno agtalinaed a nabileg ti pammatim? Saanka koma a mapnek kadagiti nasursuromon sakbay a nabautisaranka. (Heb. 6:1, 2) Utobem dagiti natungpalen a padto iti Biblia ta makatulong dagitoy a mangpabileg iti pammatim. Mabalin met nga usarem ti Sao ti Dios kas pagrukodan tapno makitam no ti pammatim ket kas iti pammati dagiti addaan iti nabileg a pammati.—Basaen ti Santiago 1:25; 2:24, 26.

9, 10. Kasano a makatulong a mangpabileg iti pammati ti: (a) nasayaat a kakadua? (b) gimong iti kongregasion? (c) panangasaba?

9 Imbaga ni apostol Pablo kadagiti padana a Kristiano a mabalinda nga ‘agsisinnukat iti pammaregta iti nagtetengngaanda, iti tunggal maysa babaen ti pammati ti sabali.’ (Roma 1:12) Bayat a makilangentayo kadagiti kapammatiantayo, mapabilegtayo ti pammati ti tunggal maysa, nangruna no kaduatayo dagiti nangipakitan iti “nasubok a kualidad” ti pammatida. (Sant. 1:3) Dagiti dakes a kakadua dadaelenda ti pammatitayo, ngem pabilgen dayta dagiti nasayaat a kakadua. (1 Cor. 15:33) Dayta ti makagapu a nabalakadantayo a saantayo a baybay-an ti “panagtataripnongtayo,” no di ket agtultuloy nga “agpipinnaregtatayo.” (Basaen ti Hebreo 10:24, 25.) Maysa pay, dagiti maad-adaltayo iti gimong ket makaipaay kadagiti makapabileg nga instruksion. Maitunos daytoy iti kinuna ni apostol Pablo: “Ti pammati sumaruno iti banag a nangngeg.” (Roma 10:17) Ar-aramidentayo kadi a paset ti biagtayo ti makilangen kadagiti kakabsat no makigimongtayo?

10 No mangaskasabatayo, saantayo laeng a pabpabilgen ti pammati ti dadduma no di ket bumileg met ti pammatitayo. Kas kadagiti immuna a Kristiano, masursurotayo ti naan-anay nga agtalek ken Jehova ken situtured nga agsao iti aniaman a kasasaad.—Ara. 4:17-20; 13:46.

11. Apay a nabileg ti pammati da Caleb ken Josue, ken kasano a matuladtayo ida?

11 No mariknatayo a tultulongannatayo ni Jehova ken sungsungbatanna dagiti kararagtayo, bumileg ti pammatitayo. Napasamak daytoy kada Caleb ken Josue. Impakitada ti pammati ken Jehova idi nagsimisimda wenno nagpaliiwda iti Naikari a Daga. Iti panaglabas ti tiempo, ad-adda a bimmileg ti pammatida bayat a nakitada no kasano nga iturturong ni Jehova ti biagda. Dayta ti makagapu a kasta unay ti panagtalek ni Josue idi imbagana kadagiti Israelita: “Awan napaay a maysa a sao manipud iti amin a naimbag a sasao a sinao kadakayo ni Jehova a Diosyo.” Kinunana pay idi agangay: “Ket ita agbutengkayo ken Jehova ket agserbikayo kenkuana iti kinaawan pagkurangan ken iti kinapudno . . . No maipapan kaniak ken iti sangakabbalayak, agserbikamto ken Jehova.” (Jos. 23:14; 24:14, 15) No mapasarantayo ti kinaimbag ni Jehova, maaddaantayo met iti kasta a pammati.—Sal. 34:8.

PANANGIPAKITA ITI PAMMATITAYO

12. Sigun ken Santiago, kasanotayo a maipakita a nabiag ti pammatitayo?

12 Kasanotayo a maipakita a nabiag ti pammatitayo? Sungbatan dayta ni adalan a Santiago: “Ipakitak kenka ti pammatik babaen kadagiti aramidko.” (Sant. 2:18) Ipakita ti tigtignaytayo no addaantayo iti pudno a pammati. Kitaentayo ti sumagmamano a pagarigan.

Dagiti mangar-aramid iti amin a kabaelanda a makipaset iti ministerio ipakpakitada a nabileg ti pammatida (Kitaen ti parapo 13)

13. Kasano a ti panangasaba ket maysa a pamay-an ti panangipakita iti pammati?

13 Ti panangasaba ket nagsayaat a pamay-an tapno maipakitatayo ti pammatitayo. Apay? Gapu ta no mangaskasabatayo, ipakpakitatayo a mamatitayo iti tiempo nga inkeddeng ti Dios a dadaelen daytoy a sistema ti bambanag ken “saan a  maladaw” dayta. (Hab. 2:3) Tapno marukodtayo ti kasasaad ti pammatitayo, kitaentayo no kasano ti kinatuloktayo a mangpalawa pay iti ministeriotayo. Ar-aramidentayo kadi ti amin, nalabit agsapsapultayo pay kadagiti pamay-an tapno mapalawatayo pay ti ministeriotayo? (2 Cor. 13:5) Wen, ti panangasaba wenno panangaramid iti “publiko a panangideklara maipaay iti pannakaisalakan” ket nabileg a pamay-an tapno maipakitatayo nga adda pammatitayo.—Basaen ti Roma 10:10.

14, 15. (a) Kasano a maipakitatayo ti pammati iti inaldaw a panagbiagtayo? (b) Mangisalaysay iti kapadasan a mangipakita iti nabileg a pammati.

14 Maipakitatayo met ti pammati bayat nga ib-ibturantayo dagiti inaldaw a pakarigatan iti biag. Agsagsagabatayo man iti sakit, pannakaupay, depresion, kinapanglaw, wenno dadduma a problema, agtalektayo a mangipaay ni Jehova ken ti Anakna iti “tulong iti umiso a tiempo.” (Heb. 4:16) Maipakitatayo ti kasta a panagtalek babaen iti panangikararagtayo saan laeng a maipaay kadagiti naespirituan a kasapulantayo. Imbaga ni Jesus nga ikararagtayo uray dagiti material a kasapulantayo, agraman ti ‘tinapay sigun iti kasapulantayo iti inaldaw.’ (Luc. 11:3) Paneknekan dagiti salaysay iti Biblia a kabaelan ni Jehova nga ipaay ti aniaman a kasapulantayo. Bayat ti nakaro a tikag iti Israel, impaayan ni Jehova ni Elias iti taraon ken danum. Iti bilin ni Jehova, “dagiti met laeng wak nangyegda kenkuana iti tinapay ken karne iti bigat ken tinapay ken karne iti rabii, ket immin-inum manipud naapres a ginget.” (1 Ar. 17:3-6) Mamatitayo a maiturong wenno maimaniobra ni Jehova dagiti bambanag tapno mapaadda met dagiti kasapulantayo.

Ipakpakitatayo ti pammati no ib-ibturantayo dagiti inaldaw a pakarigatan iti biag (Kitaen ti parapo 14)

15 Agtalektayo a makatulong kadatayo ti panangyaplikar kadagiti prinsipio ti Biblia tapno maipaaytayo ti kasapulan ti pamiliatayo. Ni Rebecca, maysa a naasawaan a kabsat a babai a taga-Asia, napaneknekanna a pudno dayta iti pamiliana. Inyaplikarda ti Mateo 6:33 ken Proverbio 10:4 iti biagda babaen ti panangyun-unada iti Pagarian ken panagbalinda a nagaget. Kinuna ni Rebecca nga imbaga ni lakayna a mabalin nga agpeggad ti espiritualidadda gapu iti trabahona, isu a nagikkat. Ngem adda uppat nga annakda a suportaranda. Imbaga ni Rebecca ti napasamak: “Nagaramid ken naglakokami kadagiti  kankanen. Adu a tawen a kastoy ti pagsapulanmi, ket nariknami a saannakami a binaybay-an ni Jehova. Saankami a pulos limmangan a nangan.” Naipakitam kadi metten a mamatika a ti Biblia ti mangipaay iti kasayaatan a panangiwanwan kadagiti tattao ita?

16. Ania ti resultana no agtalektayo iti Dios?

16 Masapul a saantayo a pulos nga agduadua a pagsayaatantayo no surotentayo ti panangiwanwan ti Dios. Kinotar ni Pablo dagiti naipaltiing a sasao ni Habakuk idi insuratna: “Ti nalinteg agbiagto gapu iti pammati.” (Gal. 3:11; Hab. 2:4) Nasken ngarud a mamatitayo iti Daydiay talaga a makatulong. Ipalagip ni Pablo kadatayo a ti Dios ket “daydiay makabalin, maitunos iti pannakabalinna nga agtigtignay kadatayo, a mangaramid a nawadwadwad unay a lab-awanna ti amin a bambanag a dawaten wenno panunotentayo.” (Efe. 3:20) Ar-aramiden dagiti adipen ni Jehova ti amin a kabaelanda a mangaramid iti pagayatan ti Dios, ngem gapu ta ammoda dagiti limitasionda, agtalekda a bendisionan ni Jehova ti pagbanagan dagiti aramidda. Saantayo kadi a maragsakan ta adda kadatayo ti Diostayo?

NASUNGBATAN TI PANAGKIDDAWDA ITI PAMMATI

17. (a) Kasano a nasungbatan ti panagkiddaw dagiti apostol iti pammati? (b) Apay a manamnamatayo a masungbatan ti panagkiddawtayo iti ad-adu pay a pammati?

17 Gapu kadagiti nausigtayon, mabalin a mariknatayo met ti kas iti narikna dagiti apostol idi kinunada iti Apo: “Ikkannakami iti ad-adu pay a pammati.” (Luc. 17:5) Nasungbatan ti kiddawda idi Pentecostes 33 C.E. idi naiparukpok ti nasantuan nga espiritu kadakuada ken ad-adda a naawatanda ti panggep ti Dios. Daytoy ti nangpabileg iti pammatida. Kas resultana, inrugida ti nasaknap a panangasaba idi a tiempo. (Col. 1:23) Manamnamatayo met kadi a masungbatan ti panagkiddawtayo iti ad-adu pay a pammati? Ipasigurado kadatayo ti Biblia a masungbatan dayta no “dawatentayo maitunos iti pagayatan [ti Dios].”—1 Juan 5:14.

18. Kasano a bendisionan ni Jehova dagiti mangpabpabileg iti pammatida?

18 Nalawag a maay-ayo ni Jehova kadagidiay naan-anay nga agtalek kenkuana. Sungbatan ni Jehova ti panagkiddawtayo iti ad-adu pay a pammati. Iti kasta, bumileg ti pammatitayo, ket ‘maibilangtayo a maikari iti pagarian ti Dios.’—2 Tes. 1:3, 5.

^ par. 4 Para iti sumagmamano a pagarigan, kitaen ti pakasaritaan ti biag da Lillian Gobitas Klose (Hulio 22, 1993, Agriingkayo!), Feliks Borys (Pebrero 22, 1994, Agriingkayo!), ken Josephine Elias (Septiembre 2009, Agriingkayo!).