Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) SEPTIEMBRE 2015

“Agtakderkayo a Sititibker iti Pammati”

“Agtakderkayo a Sititibker iti Pammati”

“Agtakderkayo a sititibker iti pammati, . . . bumilegkayo.”—1 COR. 16:13.

KANTA: 60, 64

1. (a) Ania ti kapadasan ni Pedro idi nagbagyo iti Baybay ti Galilea? (Kitaen ti ladawan iti rugi ti artikulo.) (b) Apay a nangrugi a lumned ni Pedro?

MARIGRIGATAN ni apostol Pedro ken ti dadduma nga adalan a mangiballasiw iti barangay iti Baybay ti Galilea gapu iti maysa a bagyo iti parbangon. Pagammuan ta nakitada ni Jesus a magmagna iti baybay. Nagpukkaw ni Pedro ken Jesus ket kiniddawna no mabalinna ti magna iti danum a mapan iti Apona. Simmungbat ni Jesus: “Umayka!” Dagus a dimsaag ni Pedro iti barangay ket nagna iti rabaw ti danum a nagturong ken Jesus. Ngem sumagmamano a kanito kalpasanna, nangrugi a lumned ni Pedro. Apay? Nagbuteng idi nakitana ti bagyo. Nagpaarayat ni Pedro ket dagus nga iniggaman ni Jesus ti imana ket kinunana: “Sika a bassitan pammati, apay a nagduaduaka?”—Mat. 14:24-32.

2. Ania ti usigentayo ita?

2 Usigentayo ti tallo a banag iti kapadasan ni Pedro mainaig iti pammati: (1) no kasano nga impakita ni Pedro ti panagtalekna iti tulong ti Dios, (2) no apay a kimmapuy ti pammati ni Pedro, ken (3) no ania ti nakatulong ken Pedro a mangpabileg manen iti pammatina. No usigentayo dagitoy, makatulong kadatayo a  ‘makapagtakder a sititibker iti pammati.’—1 Cor. 16:13.

AGTALEKKA ITI TULONG TI DIOS

3. Apay a dimsaag ni Pedro iti barangay, ken kasano a nakaaramidtayo iti kaasping dayta?

3 Idi dimsaag ni Pedro iti barangay, nakapagna iti danum gapu iti pammati. Idi inayaban ni Jesus, nagtalek ni Pedro a ti pannakabalin ti Dios ti tumulong kenkuana a kas ken Jesus. Iti umasping a pamay-an, idi nagdedikartayo ken Jehova ken nagpabautisartayo, inaramidtayo dayta gapu iti pammati. Inawisnatayo ni Jesus nga agbalin a pasurotna ken mangsurot kadagiti addangna. Masapul a maaddaantayo iti pammati ken Jesus ken iti Dios nga agtalektayo a tulongandatayo iti nagduduma a pamay-an.—Juan 14:1; basaen ti 1 Pedro 2:21.

4, 5. Apay a nakapatpateg ti pammati?

4 Talaga a nakapatpateg ti pammati. Pammati ti timmulong ken Pedro a magna iti danum, isu a pammati met ti tumulong kadatayo a mangaramid iti kasla imposible a banag iti panangmatmat ti tao. (Mat. 21:21, 22) Kas pagarigan, nagdakkel ti nagbalbaliwan ti kababalin ken ugali ti adu kadatayo isu a dandani saandatayon a mailasin dagiti sigud a makaam-ammo kadatayo. Tinulongannatayo ni Jehova gapu ta inaramidtayo dagita gapu iti pammatitayo kenkuana. (Basaen ti Colosas 3:5-10.) Idi nagdedikartayo ken Jehova gapu iti pammati, nagbalintayo a gayyemna, banag a saantayo a maaramid a bukbukodtayo.—Efe. 2:8.

5 Agtultuloy a pabpabilgennatayo ti pammatitayo. Babaen iti pammati, kabaelantayo a labanan ti panangraut ti nakabilbileg a kabusortayo, ti Diablo. (Efe. 6:16) Kasta met, no agtalektayo ken Jehova, saantayo unay nga agdanag no maipasangotayo iti pakarigatan. Inkari ni Jehova a no tignayennatayo ti pammatitayo a mangyun-una iti Pagarian, ipaayna dagiti material a kasapulantayo. (Mat. 6:30-34) Malaksid iti dayta, gapu iti pammatitayo, awatentayto ti sagut a saan a pulos a kabaelan ti tao a gun-oden a bukbukodna—ti agnanayon a biag.—Juan 3:16.

MABALIN A KUMAPUY TI PAMMATITAYO NO SABALI TI NAKAIPAMAYSAANTAYO

6, 7. (a) Ania ti nakayarigan ti angin ken dalluyon iti aglawlaw ni Pedro? (b) Apay a masapul a laglagipentayo a mabalin a kumapuy ti pammatitayo?

6 Ti angin ken dadakkel a dalluyon iti aglawlaw ni Pedro idi nagna iti danum ket mayarig kadagiti pakasuotan ken pakasulisogantayo kas dedikado nga adipen ti Dios. Uray no nakaro dagita, makapagtakdertayo a sititibker babaen iti tulong ni Jehova. Laglagipem a saan a limned ni Pedro gapu iti napigsa nga angin wenno dadakkel a dalluyon. Panunotem ti agsasaganad a napasamak: “Idi kitkitaenna ti allawig [wenno bagyo], nagbuteng.” (Mat. 14:30) Saan nga impamaysa ni Pedro ti panagkitana ken panunotna ken Jesus isu a kimmapuy ti pammatina. Mabalin a mangrugitayo met a lumned no ‘kitaentayo ti allawig’ ken ti bileg dayta ket agduaduatayo a tulongannatayo ni Jehova.

7 Masapul a laglagipentayo a mabalin a kumapuy ti pammatitayo ta dakamaten ti Biblia a ti panagkapuy wenno pannakapukaw ti pammati ket “basol a silalaka a mangsagud kadatayo.” (Heb. 12:1) Kas ipakita ti kapadasan ni Pedro, mabalin a dagus a kumapuy ti pammatitayo no dagiti di umiso a bambanag ti pampanunotentayo wenno ipamaysatayo. Kasanotayo a maibaga nga agpegpeggad ti pammatitayo? Usigentayo ti sumagmamano a saludsod a makatulong kadatayo a mangsukimat iti bagitayo.

8. Kasano nga agbalin a kasla saanen nga agpayso kadatayo dagiti kari ti Dios?

8 Dagiti kadi kari ti Dios ket kasla saanen nga agpayso kaniak ita? Kas pagarigan, inkari ti Dios a dadaelenna ti agdama a sistema dagiti bambanag. Ngem masingatayo kadi iti adu a  paglinglingayan, isu a kumapuyen ti pammatitayo kadagiti kari ti Dios? Mabalin a pagduaduaantayo payen nga asidegen ti panungpalan. (Hab. 2:3) Adda pay maysa a pagarigan. Inkari ti Dios a pakawanennatayo maibatay iti subbot. Ngem no sangkapanunottayo dagiti napalabas a basoltayo, mabalin nga agduaduatayo no talaga a ‘pinunasen’ ni Jehova dagiti basoltayo. (Ara. 3:19) Kalpasanna, mabalin a mapukaw ti rag-otayo nga agserbi iti Dios ket agbalintayo a di aktibo.

9. Ania ti mabalin a mapasamak no ipangpangrunatayo dagiti pagimbagantayo?

9 Naregtaak kadi pay laeng nga agserserbi iti Dios? Impakita ni apostol Pablo a no naregtatayo nga agserbi ken Jehova maaddaantayo iti “naan-anay a pammasiguro iti namnama agingga iti panungpalan.” Ngem ania ti mabalin a mapasamak no ipangpangrunatayo dagiti pagimbagantayo, kas iti panangawat iti trabaho a mangipaay iti nangato a sueldo ngem malapdan met ti panagserbitayo? Mabalin a kumapuy ti pammatitayo ken ‘agbalintayo a nabuntog,’ ket basbassit ti maipaaytayo a panagserbi ken Jehova ngem iti talaga a kabaelantayo.—Heb. 6:10-12.

10. Kasanotayo a maipakita ti pammati ken Jehova no pakawanentayo ti sabsabali?

10 Marigatanak kadi a mamakawan? No adda nakabasol wenno nangpasakit kadatayo, mabalin a pampanunotentayo lattan ti riknatayo ket pagsasawantayo payen wenno saantayon a kasarsarita ida. Ngem no mamakawantayo, ipakpakitatayo ti pammatitayo ken Jehova. Kasano? Dagiti nakabasol kadatayo ket nakautang kadatayo, a kas met kadatayo a nakautang iti Dios gapu kadagiti basoltayo. (Luc. 11:4) No pakawanentayo ti sabsabali, agtalektayo a napatpateg ti anamong ti Dios babaen ti panangaramid iti dayta ngem ti panangpabayad iti utangda kadatayo. Nabigbig dagiti adalan ni Jesus a  kasapulan ti pammati iti panangpakawan ti sabsabali. Idi imbagana a pakawanenda uray dagidiay maulit-ulit nga agbasol kadakuada, impakaasida: “Ikkannakami iti ad-adu pay a pammati.”—Luc. 17:1-5.

11. Apay a mabalin a saantayo a magunggonaan iti balakad ti Biblia?

11 Masairak kadi no mabalakadanak? Imbes a panunotentayo a pagsayaatantayo ti naipaay a balakad, mabalin a panunotentayo a saan nga umiso ti balakad wenno adda met pagkapuyan ti nangbalakad kadatayo. (Prov. 19:20) No kasta, mabalin a masayang ti gundaway a maitunostayo ti panagpampanunottayo iti panagpampanunot ti Dios.

12. Ania ti ipakpakita ti maysa a kanayon nga agtanabutob maibusor kadagiti us-usaren ni Jehova a mangidaulo iti ilina?

12 Agtantanabutobak kadi maibusor kadagiti nadutokan a kakabsat iti kongregasion? Idi inimdengan dagiti Israelita ti saan a nasayaat nga impadamag dagiti sangapulo nga espia nga awanan pammati, nagtanabutobda maibusor kada Moises ken Aaron. Gapuna, insaludsod ni Jehova ken Moises: “Kasanonto kabayag nga awananda iti pammati kaniak?” (Num. 14:2-4, 11) Wen, ipakita ti panagtanabutob dagiti Israelita a nakapuy ti panagtalekda iti Dios a nangdutok kada Moises ken Aaron. No kanayon met nga agtanabutobtayo kadagiti us-usaren ti Dios a mangidaulo iti ilina, saan kadi nga ipakita dayta a kimmapuyen ti pammatitayo iti Dios?

13. Apay a saantayo koma a maupay no adda makitatayo a pagkapuyan ti pammatitayo?

13 Saantayo koma a maupay no adda makitatayo a pagkapuyan ti pammatitayo kalpasan nga inusigtayo ti bagitayo. Uray ni Pedro a maysa nga apostol, nagbuteng met ken nagduadua. Kinapudnona, binagbagaan idi ni Jesus ti amin nga apostol gapu ta ‘bassit ti pammatida.’ (Mat. 16:8) Laglagipentayo a ti nagpateg a maadaltayo iti kapadasan ni Pedro ket ti inaramidna kalpasan a limned iti baybay gapu ta kimmapuy ti pammatina.

BUMILEG TI PAMMATIM NO IPAMAYSAM TI PANUNOTMO KEN JESUS

14, 15. (a) Ania ti inaramid ni Pedro idi nangrugi a lumned? (b) Kasano a “kumitatayo a sipapasnek” ken Jesus?

14 Idi nakita ni Pedro ti bagyo ket nangrugi a lumned, mabalinna koma ti agsubli iti barangay. Ammo ni Pedro ti aglangoy isu a mabalin a kasta koma ti inaramidna. (Juan 21:7) Ngem imbes nga agtalek iti bagina, impamaysana manen ti panunotna ken Jesus ket inawatna ti tulongna. No madlawtayo a kumapkapuyen ti pammatitayo, tuladentayo koma ti ulidan ni Pedro. Ngem kasano?

15 No kasano nga impamaysa manen ni Pedro ti panunotna ken Jesus, masapul met a “kumitatayo a sipapasnek iti Kangrunaan nga Ahente ken Manangan-anay iti pammatitayo, ni Jesus.” (Basaen ti Hebreo 12:2, 3.) Siempre, saantayo a literal a makita ni Jesus a kas idi nakita ni Pedro. Ngem sipapasnek a makitatayo ni Jesus babaen ti panangusigtayo kadagiti pannursuro ken inaramidna ken tuladentayo dagita. Usigentayo ti sumagmamano a pamay-an tapno matuladtayo ti ulidan ni Jesus. No iyaplikartayo dagitoy, maawattayo ti tulong a kasapulantayo tapno tumibker ti pammatitayo.

Tumibker ti pammatitayo no sipapanunottayo iti ulidan ni Jesus ken tuladentayo ti inaramidna (Kitaen ti parapo 15)

16. Kasanotayo nga adalen ti Biblia tapno bumileg ti pammatitayo?

16 Pabilgem ti panagtalekmo iti Biblia. Kombinsido ni Jesus a ti Biblia ket Sao ti Dios a mangipaay iti kasayaatan a panangiwanwan. (Juan 17:17) No tuladentayo ni Jesus, masapul nga inaldaw a basaentayo ti Biblia, adalentayo dayta, ken mennamennaentayo dagiti masursurotayo. Bayat ti panagadalmo iti Biblia, sukimatem dagiti topiko a saanmo unay a maawatan. Kas pagarigan, ad-adda a patiem a nakaas-asidegen ti panungpalan no adalem a naimbag dagiti ebidensia nga ibagbaga ti Biblia  nga agbibiagtayon iti maudi nga al-aldaw. Ad-adda nga agtalekka kadagiti kari ti Biblia no sukimatem dagiti natungpalen a padto. Ad-adda nga agtalekka a praktikal ti Biblia no usigem dagiti pagarigan no kasano a binalbaliwan ti Biblia ti biag dagiti tattao. *1 Tes. 2:13.

17. Apay a nakapagmatalek ni Jesus uray iti nakaro a pannubok, ket kasanotayo a matulad ti ulidanna?

17 Ipamaysam ti panunotmo kadagiti bendision nga inkari ni Jehova. Gapu ta sipapanunot ni Jesus “iti rag-o a naikabil iti sanguananna,” nakapagmatalek uray iti nakaro a pannubok. (Heb. 12:2) Saan a pulos a naallukoy kadagiti material a bambanag iti lubong. (Mat. 4:8-10) Matuladmo ni Jesus no panunotem dagiti nagsasayaat a kari ni Jehova para kenka. Panunotem nga addaka idiay baro a lubong. Isurat wenno idrowingmo ti kayatmo nga aramiden kalpasan a dadaelen ti Dios daytoy dakes a sistema. Ilistam dagiti segseggaam a makita inton agungarda ken dagiti kayatmonto nga estoriaen kadakuada. Panunotem dagitoy a kari ti Dios a saan laeng a para iti sangatauan no di ket para kenka.

18. Kasano a makatulong ti kararag tapno bumileg ti pammatim?

18 Ikararagmo a tumibker ti pammatim. Insuro ni Jesus kadagiti adalanna a dumawatda ken Jehova iti nasantuan nga espiritu. (Luc. 11:9, 13) Bayat nga ar-aramidentayo dayta, ikararagmo a tumibker ti pammatim ta maysa dayta nga aspeto ti bunga ti espiritu. Espesipiko koma ti dawatmo, a kiddawem iti Dios a tulongannaka a mangikkat iti aniaman nga ugali a mangipakita a kumapkapuy ti pammatim, kas iti saan a panangpakawan.

19. Siasino dagiti pilientayo a gagayyem?

19 Makikaduaka kadagiti nabileg ti pammatina. Pinili a naimbag ni Jesus dagiti gagayyemna nangruna dagiti kasingedna. Dagiti apostol, a kasisingedan a gagayyemna, pinaneknekanda ti pammati ken kinamatalekda babaen ti panagtulnogda kadagiti bilinna. (Basaen ti Juan 15:14, 15.) Gapuna, makigayyemka laeng kadagiti mangipakpakita iti pammatida babaen ti panagtulnogda ken Jesus. Laglagipem a maysa a pagilasinan ti nasayaat a panaggayyem ti nasayaat a komunikasion, uray no kasapulan a mangbalakadka wenno mabalakadanka.—Prov. 27:9.

20. Ania ti magunggonatayo no tulongantayo ti sabsabali a mangpabileg iti pammatida?

20 Tulongam ti dadduma a mangpabileg iti pammatida. Iti sao ken aramid, pinabileg ni Jesus ti pammati dagiti adalanna. (Mar. 11:20-24) Masapul a tuladentayo ti ulidanna gapu ta bumileg ti pammatitayo no tulongantayo ti sabsabali a mangpabileg iti pammatida. (Prov. 11:25) No mangasaba ken mangisuroka, ipaganetgetmo nga adda Dios, nga isu ket maseknan kadatayo, ket ti Biblia ti naipaltiing a Saona. Tulongam dagiti kakabsat a mangpabileg iti pammatida. No adda makitam a kabsat a kumapkapuy ti pammatina, ket mangrugi nga agtanabutob kadagiti nadutokan a kakabsat, saanmo a dagus a liklikan. Imbes ketdi, siaanus a tulongam tapno bumileg manen ti pammatina. (Jud. 22, 23) No estudianteka ket mapagsasaritaan ti ebolusion idiay eskuelaanyo, situtured nga ikalintegam ti pammatim iti panamarsua. Mabalin a masdaawka iti reaksion ti sabsabali iti panangilawlawagmo iti patpatiem.

21. Ania ti inkari ni Jehova iti tunggal maysa kadatayo mainaig iti pammatitayo?

21 Babaen ken Jesus, tinulongan ti Dios ni Pedro a mangparmek iti buteng ken panagduaduana, ket naibilang kadagiti immuna a Kristiano a nabileg ti pammatina. Kasta met, tultulongannatayo ni Jehova tapno tumibker ti pammatitayo. (Basaen ti 1 Pedro 5:9, 10.) Saan a sayang ti panagreggettayo a mangpabileg iti pammatitayo gapu ta awan ti umasping kadagiti gunggona a magun-odtayto.

^ par. 16 Kas pagarigan, kitaen ti serye a “Ti Biblia Balbaliwanna ti Biag” iti publiko nga edision ti Pagwanawanan.