Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan—Pagadalan nga Edision  |  Septiembre 2015

Ragragpatem Kadi ti Kinanataengan ti Kristo?

Ragragpatem Kadi ti Kinanataengan ti Kristo?

‘Makagtengtayo koma iti kinanaan-anay ti Kristo.’—EFE. 4:13.

KANTA: 69, 70

1, 2. Ania nga irarang-ay ti masapul nga ikagumaan a gun-oden ti tunggal Kristiano? Iyilustrarmo.

NO GUMATANG ti maysa a masirib nga ina iti kappuros a prutas, saan a kanayon a dagiti kadadakkelan wenno kalalakaan ti pilienna. Imbes ketdi, pilienna dagiti naluom. Kayatna ti naimas, nabanglo, ken nasustansia a prutas. Wen, pilienna ti natangkenan ken naluom a prutas.

2 Kalpasan a nagdedikar ken nagpabautisar ti maysa, masapul nga agtultuloy a rumang-ay. Kalatna ti agbalin a nataengan nga adipen ti Dios, saan nga iti pisikal no di ket iti naespirituan. Nagsurat idi ni apostol Pablo kadagiti Kristiano iti Efeso a masapul a rumang-ayda iti naespirituan. Pinaregtana ida a ‘dumtengda iti panagmaymaysa iti pammati ken iti umiso a pannakaammo iti Anak ti Dios, iti nataenganen a tao, iti kinanaan-anay ti Kristo.’—Efe. 4:13.

3. Ania ti nagpadaan ti kongregasion ti Efeso ken ti ili ni Jehova ita?

3 Idi nagsurat ni Pablo, sumagmamano a tawenen a nabuangay ti kongregasion ti Efeso. Adu nga adalan sadiay ti nagbalinen a nataengan iti naespirituan. Ngem masapul nga ikagumaan latta ti dadduma ti agmataengan. Kasta met laeng  ti kasasaad dagiti Saksi ni Jehova ita. Adu a kakabsat ti nabayagen nga agserserbi iti Dios ken nagbalinen a nataengan iti naespirituan. Ngem saan nga amin. Kas pagarigan, rinibu ti mababautisaran iti kada tawen, isu a masapul nga ikagumaan pay ti dadduma ti agmataengan. Sika ngay?—Col. 2:6, 7.

NAESPIRITUAN A PANAGRANG-AY

4, 5. Ania ti nagdudumaan dagiti nataengan a Kristiano, ngem ania ti pagpapadaanda? (Kitaen ti ladawan iti rugi ti artikulo.)

4 No kitaem dagiti naluom a prutas iti paglakuan, madlawmo a saanda nga agpapada. Ngem adda dagiti pagpapadaanda a mangipakita a naluomdan. Iti umasping a pamay-an, mabalin a nagduduma ti nasionalidad, naggapuan, salun-at, edad, kapadasan, personalidad wenno kultura dagiti nataengan a Kristiano. Ngem amin a rumangrang-ay iti naespirituan mapatanorda dagiti kababalin a mangipakita a nataenganda. Kasano?

5 Ituntunos ti nataengan iti naespirituan nga adipen ni Jehova ti biagna iti ulidan ni Jesus, a nangibati kadatayo iti pagtuladan ‘tapno sisisinged a surotentayo dagiti addangna.’ (1 Ped. 2:21) Ania ti impaganetget ni Jesus a kapatgan? Isu ti panangayat ken Jehova iti intero a puso, kararua, ken panunot, ken ti panangayat iti pada a tao kas iti bagi. (Mat. 22:37-39) Pagregreggetan ti maysa a nataengan iti naespirituan a Kristiano ti agbiag a maitunos iti dayta a balakad. Makita iti wagas ti panagbiagna nga ipangpangrunana ti relasionna ken Jehova ken ipakpakitana ti managsakripisio nga ayat kadagiti sabsabali.

Maipakita dagiti nataengan a Kristiano ti kinapakumbaba a kas ken Kristo no makitunosda kadagiti ub-ubing a mangidadaulo ita (Kitaen ti parapo 6)

6, 7. (a) Ania dagiti kualidad a mangipakita a nataengan iti naespirituan ti maysa a Kristiano? (b) Ania ti isaludsodtayo iti bagitayo?

6 Ngem ammotayo a ti ayat ket maysa laeng nga aspeto ti bunga ti espiritu nga ipakpakita ti maysa a Kristiano a nataengan iti naespirituan. (Gal. 5:22, 23) Napateg met ti dadduma nga aspeto kas iti kinaalumamay, panagteppel, ken kinaanus. Makatulong dagitoy tapno kabaelanna a sanguen dagiti narigat a kasasaad a saan a marurod ken maibturanna dagiti pakaupayan a saan a maaw-awanan iti namnama. Iti personal a panagadalna, agtultuloy a sukimatenna dagiti prinsipio ti Biblia a makatulong kenkuana a mangilasin iti umiso ken di umiso. Gapuna, no agaramid kadagiti desision, makita nga isu ket nataengan iti naespirituan no ipangagna ti nasanay iti Biblia a konsiensiana. Napakumbaba ti nataengan a Kristiano ta bigbigenna a nasaysayaat dagiti daldalan ken pagalagadan ni Jehova. * Sireregta nga ikaskasabana ti naimbag a damag ken tumultulong iti panagkaykaysa ti kongregasion.

7 Uray no nabayagen nga agserserbitayo ken Jehova, mabalin nga isaludsod ti tunggal maysa kadatayo, ‘Adda kadi pay dagiti aspeto iti biagko a masapul nga itunosko iti biag ni Jesus tapno agtultuloy a rumang-ayak iti naespirituan?’

“TI NAKIRED A TARAON AGPAAY KADAGITI NATAENGAN A TATTAO”

8. Ania ti makunatayo iti pannakaammo ken pannakaawat ni Jesus iti Kasuratan?

8 Naan-anay a matarusan ni Jesus ti Sao ti Dios. Uray agtawen laeng idi iti 12, nailawlawagna dagiti sursuro a naibatay iti Biblia kadagiti mannursuro iti templo. “Amin dagidiay umim-imdeng kenkuana nagtultuloyda a masmasdaaw iti pannakaawatna  ken kadagiti sungbatna.” (Luc. 2:46, 47) Bayat ti ministeriona, pinagulimek ni Jesus dagiti bumusbusor babaen ti umiso a panagkotarna iti Sao ti Dios.—Mat. 22:41-46.

9. (a) Kasano nga agadal iti Biblia dagiti mayat a rumang-ay iti naespirituan? (b) Ania ti panggep ti panagadal iti Biblia?

9 Maitunos iti ulidan ni Jesus, ti Kristiano a mayat a rumang-ay iti naespirituan saan laeng a mapnek iti narabaw a pannakaammo iti Biblia. Regular nga adalenna dagiti nauneg a pannakaammo a linaonna a bigbigenna a “ti nakired a taraon agpaay kadagiti nataengan a tattao.” (Heb. 5:14) Nalawag, kayat ti nataengan iti naespirituan a Kristiano ti maaddaan iti “umiso a pannakaammo iti Anak ti Dios.” (Efe. 4:13) Adda kadi eskediulmo nga agbasa iti Biblia iti inaldaw? Adda kadi eskediulmo nga agadal? Ikagkagumaam kadi ti mangipaay iti tiempo para iti linawas a panagdaydayaw ti pamiliam? No agadalka iti Sao ti Dios, siputam dagiti prinsipio ti Biblia a makatulong kenka a mangtarus iti panagpampanunot ken rikrikna ni Jehova. Kalpasanna, ikagumaam nga iyaplikar dagiti prinsipio ti Biblia ken usarem dagita no agdesisionka, iti kasta, ad-adda a sumingedka ken Jehova.

10. Kasano a maipakita ti maysa a nataengan iti naespirituan a Kristiano iti inaldaw a panagbiagna ti pannakaammo a nasursurona iti Biblia?

10 Ammo ti Kristiano a nataengan iti naespirituan nga adda pay napatpateg ngem iti pannakaammo. Malaksid nga ammonan dagiti daldalan ken prinsipio ti Dios, masapul nga ipategna pay dagita. Makita dayta no dagiti ipangpangrunana iti biag ket maitunos iti pagayatan ni  Jehova imbes a ti pagayatan ti tao. Maysa pay, agregget ti maysa a Kristiano a ‘mangikkat’ iti dati a kababalinna. Bayat nga agbalbaliw ti maysa a Kristiano, ikawesna ti baro a personalidad a “naparsua maitunos iti pagayatan ti Dios iti pudno a kinalinteg ken kinasungdo.” (Basaen ti Efeso 4:22-24.) Naisurat ti Biblia babaen ti panangidalan ti nasantuan nga espiritu ti Dios. Bayat nga umun-uneg ti pannakaammo ken panagayat ti maysa a Kristiano kadagiti pagalagadan ti Biblia, ipalpalubosna a ti nasantuan nga espiritu ti mangiwanwan iti panunot ken pusona. Makatulong dayta tapno rumang-ay iti naespirituan.

PAGKAYKAYSAENNATAYO

11. Ania ti napadasan ni Jesus idi nakilangen iti pamiliana ken kadagiti adalanna?

11 Idi nagbiag ni Jesus ditoy daga kas perpekto a tao, nakalangenna dagiti imperpekto a tattao. Pinadakkel dagiti imperpekto a nagannakna ken nakaduana iti adu a tawen dagiti imperpekto a kabagianna. Naimpluensiaan pay dagiti nasinged a pasurotna iti kinaambisioso ken naturay a kababalin nga agraraira idi. Kas pagarigan, iti rabii sakbay a mapapatay ni Jesus, adda “timmaud a nabara a supiat iti nagtetengngaanda no siasino kadakuada ti kasla kadakkelan.” (Luc. 22:24) Ngem nagtalek ni Jesus a rumang-ay iti naespirituan dagiti imperpekto a pasurotna ket mangbukeldanto iti nagkaykaysa a kongregasion. Iti dayta met la a rabii, inkararag ni Jesus iti nailangitan nga Amana ti panagkaykaysa dagiti apostolna. Kinunana: ‘Agmaymaysada koma amin, a kas kenka, Ama, naikaykaysaka kaniak ket naikaykaysaak kenka, tapno isuda met maikaykaysada koma kadata, . . . tapno maymaysada koma a kas kadata a maymaysa.’—Juan 17:21, 22.

12, 13. (a) Kasano nga impaganetget ti Efeso 4:15, 16 a masapul ti panagkaykaysa iti kongregasion? (b) Kasano a naparmek ti maysa a kabsat ti pagkapuyanna ket nakatulong iti panagkaykaysa ti kongregasion?

12 Makatulong ti nataengan iti naespirituan nga adipen ni Jehova iti panagkaykaysa ti kongregasion. (Basaen ti Efeso 4:1-6, 15, 16.) Kas ili ti Dios, kayattayo nga agkaykaysa ken agtutunos ti amin a miembro ti kongregasion. Sigun iti Sao ni Jehova, kasapulan nga agbalintayo a napakumbaba tapno agkaykaysatayo. Sipapakumbaba a tumulong dagiti nataengan iti naespirituan a kakabsat tapno agkaykaysa ti kongregasion, uray no maipasangoda iti kinaimperpekto ti dadduma. Ania ti reaksionmo no agkamali ti maysa a kabsat? Kasanon no adda nangpasakit kenka iti kongregasion? Dagus kadi a mangibangonka iti pader a mamagsina kadakayo, wenno mangaramidka iti rangtay tapno agkappiakayo? Wen, ikagumaan ti nataengan a Kristiano ti mangaramid iti rangtay, saan ket a pader.

13 Usigem ti kapadasan ni Uwe. Nalaka laeng idi a marurod no agkamali dagiti kapammatianna. Gapuna, inkeddengna nga adalen ti pakasaritaan ni David iti Biblia ken iti Pannakatarus iti Kasuratan. Apay a ni David ti napilina? Inlawlawag ni Uwe: “Nakita ni David ti dakes a kababalin ti dadduma nga adipen ni Jehova a di maitunos iti pagalagadan ti Dios. Kas pagarigan, pinadas ni Ari Saul a papatayen ni David, dadduma ti mayat a mangubor kenkuana, ken inuy-uyaw pay ti mismo nga asawana. (1 Sam. 19:9-11; 30:1-6; 2 Sam. 6:14-22) Ngem saan nga impalubos ni David a bumaaw ti ayatna ken Jehova gapu iti kababalin ti sabsabali. Naasi met ni David, maysa a kualidad a masapul a patanorek. Gapu kadagiti naadalko, nagbalbaliw ti panangmatmatko iti pagkapuyan dagiti kakabsat. Saanakon  nga agbilbilang iti kamali. Imbes ketdi, ikagkagumaak ti tumulong iti panagkaykaysa ti kongregasion.” Ar-aramidem met kadi ti amin a kabaelam a tumulong iti panagkaykaysa ti kongregasion?

MAKIGAYYEM KADAGITI MANGAR-ARAMID ITI PAGAYATAN TI DIOS

14. Siasino dagiti pinili ni Jesus a gagayyemna?

14 Mannakigayyem ni Jesu-Kristo kadagiti tattao. Komportable a makikadua kenkuana dagiti lallaki, babbai, agtutubo, nataengan, ken uray dagiti ubbing. Ngem pinili ni Jesus dagiti kasingedna. Kinunana kadagiti matalek nga apostolna: “Dakayo ti gagayyemko no aramidenyo ti ibilbilinko kadakayo.” (Juan 15:14) Pinili ni Jesus dagita a gagayyem manipud kadagiti matalek a pasurotna ken naimpusuan nga agserserbi ken Jehova. Pilpiliem met kadi dagiti nasinged a gagayyemmo manipud kadagiti matalek ken naimpusuan nga agserserbi ken Jehova? Apay a napateg dayta?

15. Kasano a magunggonaan dagiti agtutubo no makikaduada kadagiti Kristiano a nataengan iti naespirituan?

15 Mas agluom ti adu a kita ti prutas no mainitan. Iti umasping a pamay-an, makatulong ti nabara nga ayattayo iti maysa ken maysa tapno agmataengantayo iti naespirituan. Maysaka kadi nga agtutubo a mangpampanunot iti pangusaram iti biagmo? Masiribka no makikaduaka kadagiti kapammatiam a nabayagen nga agserserbi ken Jehova ken tumultulong iti panagkaykaysa ti kongregasion! Iti adu a tawen, mabalin a naipasangoda iti rigat ken mabalin a nasubok pay ketdi ti panagserbida iti Dios. Matulongandaka a mangpili iti kasayaatan a wagas ti panagbiag. No makigayyemka kadakuada, matulongandaka nga agaramid kadagiti umiso a desision ken agbalinka a nataengan iti naespirituan.—Basaen ti Hebreo 5:14.

16. Kasano a tinulongan dagiti natataengan iti kongregasion ti maysa nga agtutubo a kabsat?

16 Malagip ni Helga a bayat ti maudi a tawenna iti hayskul, pagpapatangan dagiti kaklasena dagiti kurso nga alaenda. Adu kadakuada ti agplamplano nga agkolehio kas pangrugian kano iti aw-awaganda a naraniag a masakbayan. Inestoria dayta ni Helga kadagiti gagayyemna iti kongregasionda. Kinunana: “Adu kadakuada ti in-inauna ngem siak, ket dakkel ti naitulongda kaniak. Pinaregtadak nga agpayunir ket nakapagpayunirak iti lima a tawen. Ita, kalpasan ti adu a tawen, nakaragragsakak ta inusarko ti kinaagtutubok iti panagserbi ken Jehova. Diakto pulos pagbabawyan dayta!”

17, 18. Kasano a makatulong ti naespirituan a kinanataengan tapno makapagserbitayo a naan-anay ken Jehova?

17 Agmataengantayo iti naespirituan no tuladentayo ti ulidan ni Jesus. Sumingedtayo ken Jehova ken rumayray ti tarigagaytayo nga agserbi kenkuana iti amin a kabaelantayo. Maipaay ti maysa ti kasayaatan a panagserbi ken Jehova no naan-anayen a rimmang-ay iti naespirituan ken nagbalinen a nataengan a Kristiano. Pinaregta ni Jesus dagiti pasurotna: “Agsilnag koma ti silawyo iti sanguanan ti tattao, tapno makitada dagiti nasayaat nga aramidyo ket idayawda ti Amayo nga adda iti langlangit.”—Mat. 5:16.

18 Kas naadaltayon, dakkel ti maitulong ti maysa a Kristiano a nataengan iti naespirituan iti kongregasion. Ti kasta a kinanataengan iti naespirituan ket makita iti pamay-an ti panangusar ti maysa iti inted ti Dios a konsiensiana. Kasano a makatulong ti konsiensiatayo tapno makaaramidtayo kadagiti umiso a desision? Ken kasanotayo a raemen ti desision dagiti kakabsattayo? Usigentayo dagitoy iti sumaganad nga artikulo.

^ par. 6 Kas pagarigan, mabalin a makiddaw kadagiti lakayen ken aduanen iti kapadasan a panglakayen nga iparebbengda ti dadduma nga annongenda kadagiti ub-ubing a kakabsat a lallaki ket tulonganda ida a mangibaklay kadagita nga annongen.