Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) AGOSTO 2015

Agsaganaka Itan nga Agbiag iti Baro a Lubong

Agsaganaka Itan nga Agbiag iti Baro a Lubong

Ibagam kadakuada nga “agaramidda iti naimbag, . . . tapno mapetpetanda a sititibker ti pudpudno a biag.”—1 TIM. 6:18, 19.

KANTA: 125, 40

1, 2. (a) Ania ti segseggaam a bendision iti Paraiso a daga? (Kitaen ti ladawan iti rugi ti artikulo.) (b) Ania dagiti naespirituan a bendision a masagraptayto iti baro a lubong?

“TI PUDPUDNO A BIAG.” No mangngegtayo dagita a sasao, mabalin a malagip ti adu kadatayo ti namnama a biag nga agnanayon iti Paraiso a daga. Kinapudnona, innaig ni apostol Pablo ti “agnanayon a biag” iti “pudpudno a biag.” (Basaen ti 1 Timoteo 6:12, 19.) Mangnamnamatayo iti biag nga awan inggana a mangyeg kadatayo iti rag-o ken pannakapnek. Kasla saan a nakappapati a binigat a mariingtayto a nakasalsalun-at iti pisikal, mental, ken emosional. (Isa. 35:5, 6) Panunotem no kasanonto karagsak ti makilangen kadagiti ipatpateg ken gagayyemtayo a pakairamanan dagiti napagungar! (Juan 5:28, 29; Ara. 24:15) Addanto met gundawaytayo a mangpasayaat iti paglaingantayo iti siensia, musika, arkitektura, ken dadduma pay.

2 Segseggaantayo dagita a nagsasayaat a bambanag, ngem dagiti naespirituan a bambanag ti kangrunaan a bendision iti baro a lubong. Talaga a makaparagsakto a maammuan a naidaydayawen ti nagan ni Jehova ken naalangonen ti kinasoberanona! (Mat. 6:9, 10) Magagarantayto a makakita iti pannakatungpal ti orihinal a  panggep ni Jehova iti sangatauan ken iti daga. Nalaklakanton ti makisinninged ken Jehova bayat nga in-inut nga agbalintayo a perpekto!—Sal. 73:28; Sant. 4:8.

3. Ania koma a panagsagana ti aramidentayo itan?

3 Magun-odtayo dagita a bendision agsipud ta impasigurado ni Jesus nga “iti Dios amin a bambanag mabalin.” (Mat. 19:25,26) Ngem no kayattayo ti agbiag iti baro a lubong ken agtultuloy nga agbiag kalpasan ti Sangaribu a Tawen a Panagturay ni Kristo, masapul nga agtignaytayo itan a ‘mangpetpet’ iti agnanayon a biag. Masapul nga agbiagtayo a mangnamnama iti pannakadadael daytoy dakes a lubong, ken masapul nga agsaganatayo itan nga agbiag iti baro a lubong. Kasano a maaramidtayo dayta nupay addatayo pay laeng iti dakes a sistema ti bambanag?

NO KASANO TI AGSAGANA

4. Mangted iti pagarigan no kasano a makapagsaganatayo itan nga agbiag iti baro a lubong.

4 Kasanotayo a makapagsagana ita iti biag iti baro a lubong ti Dios? Ipapantayo nga agplamplanotayo nga umakar iti sabali a pagilian. Kasanotayo nga agsagana iti dayta a panagakar? Mabalin a rugiantayo a sursuruen ti lengguahe dagiti tattao iti dayta a pagilian. Nasayaat met no masursurotayo ti kaugalianda. Mabalin met a ramanantayo dagiti sumagmamano a taraonda. No mabalin, rugiantayon ti agbiag a kas kadagiti umili dayta a pagilian, ngamin namnamaentayo a kastanto ti panagbiagtayo inton addatayon iti dayta a pagilian. Kasta met, makapagsaganatayo nga agbiag iti baro a lubong no agbiagtayo itan a kas iti namnamaentayo a panagbiagtayo sadiay. Gapuna, usigentayo ti sumagmamano a pagarigan.

5, 6. Apay a ti panagtulnog kadagiti teokratiko nga urnos ket makatulong kadatayo nga agsursuro nga agbiag iti baro a lubong?

5 Iti baro a lubong, naan-anayton a maalangon ti kalintegan ti Dios a mangituray. Makapabang-ar la ketdi ti nakaidumaan ti panangituray ti Dios iti panangituray daytoy lubong nga iturturayan ni Satanas! Mabalin a kaykayat ti dadduma ti agbalin a nawaya ken mangipilit kadagiti kaykayatda, ngem ania ti nagbanagan dayta? Ti saan a panagtulnog kadagiti bilin ti Dios ket nangyeg iti panagsagaba, rigat, ken uray didigra. (Jer. 10:23) Segseggaantayo ti tiempo inton ti amin a tattao ket agpasakupen iti naayat a panangituray ni Jehova!

6 Nakaragragsakto ti agpasakup iti urnos ni Jehova iti baro a lubong bayat a pappapintasentayo ti daga, sursuruantayo dagiti napagungar, ken ar-aramidentayo ti pagayatan ti Dios. Ngem kasanon no mabilintayo a mangaramid iti trabaho a saantayo a magustuan? Agtulnogtayo kadi ken aramidentayo ti amin a kabaelantayo a mangaramid iti naibilin kadatayo ket tagiragsakentayo dayta? Kaaduan kadatayo ti sumungbat iti wen! No kasta, kanayon kadi nga agtultulnogtayo ita kadagiti teokratiko a bilin? No kanayon nga agtulnogtayo, agsagsaganatayo nga agbiag nga agnanayon iti sidong ti panangituray ni Jehova.

7, 8. (a) Apay a masapul a makitinnulongtayo? (b) Ania a panagbalbaliw ti napasaran ti dadduma a Kristiano? (c) Ania ti masiguradotayo maipapan iti biag iti baro a lubong?

7 Makapagsaganatayo nga agbiag iti baro lubong no agtulnogtayo kadagiti urnos nga ipapaay ni Jehova ita ken no ikagumaantayo ti agbalin a kontento ken mannakitinnulong. No agtulnog ken makitunostayo kadagiti mangidadaulo ita, nalabit ikagkagumaantayo ti agbalin a kontento ken naragsak iti naited a trabahotayo, kastanto met laeng ti ugalitayo iti baro a lubong. (Basaen ti Hebreo 13:17.) Iti Naikari a Daga, nabingbingay ti tawid dagiti Israelita babaen iti panagbibinnunot. (Num. 26:52-56; Jos. 14:1, 2) Siempre, saantayo nga ammo ita no sadinonto ti pakaibaonantayo  a pagnaedan iti baro a lubong. Nupay kasta, no makitunostayo, makontento ken naragsaktayto a mangaramid iti pagayatan ni Jehova sadinoman ti pagnaedantayto ditoy daga.

8 Nagdakkel a pribilehio ti agbiag iti sidong ti turay ti Pagarian. Gapuna, ikagumaantayo koma ti makitinnulong iti organisasion ni Jehova ita ken aramidentayo dagiti teokratiko a trabaho a naited kadatayo. Siempre, mabalin nga agbaliw ti kasasaadtayo bayat nga aglabas ti tiempo. Kas pagarigan, dadduma a miembro ti pamilia ti Bethel iti United States ti naibaon nga agpayunir iti nagduduma a teritoria ket maragragsakanda itan iti adu a bendision a sagsagrapenda iti amin-tiempo a ministerio. Gapu iti panaglakay ken panagbaket ken iti dadduma pay a rason, dadduma nga adda idi iti trabaho a panagdaliasat ti naidestino kas special pioneer. No agbalintayo a kontento, ikararagtayo ti tulong ti Dios, ken aramidentayo ti amin a kabaelantayo nga agserbi iti Dios, maragsakantayo ken mabendisionantayo uray iti daytoy napeggad a maudi nga al-aldaw. (Basaen ti Proverbio 10:22.) Ngem kasanon no adda pampanunotentayo a kayattayo a pagnaedan iti baro a lubong, ket makiddaw kadatayo nga umakartayo iti sabali a lugar? Sadinoman ti pagserbian ken aniaman ti aramidentayto, sigurado nga agyaman, kontento, ken napalalonto ti ragsaktayo.—Neh. 8:10.

9, 10. (a) Apay a masapul nga ipakitatayo ti kinaanus iti baro a lubong? (b) Kasano a maipakitatayo ti kinaanus?

9 Iti baro a lubong, mabalin nga addanto tiempo a masapul nga ipakitatayo ti panaganus. Kas pagarigan, mabalin a makadamagtayto kadagiti napagungar. Mabalin a maragsakan dagiti kabagian ken gagayyemda ta nagungardan. Nupay kasta, mabalin nga urayentayo pay ti panagungar dagiti ipatpategtayo. No kasta ti mapasamak, makipagragsaktayto kadi kadagiti dadduma ken makapaganustayto? (Roma 12:15) Ti panagan-anustayo a manguray iti kaitungpalan dagiti kari ni Jehova ita ket makatulong kadatayo nga agan-anusto iti baro a lubong.Ecl. 7:8.

10 Makapagsaganatayo pay nga agbiag iti baro a lubong babaen ti panagbalin a naanus uray adda panagbalbaliw iti pannakatarustayo iti kinapudno. Agsuksukimat ken naanustayo kadi bayat nga in-inut a malawlawagan ita ti pannakatarustayo kadagiti kinapudno ti Biblia? No wen, saantayto a marigatan nga agbalin a naanus iti baro a lubong bayat nga ipakpakaammo ni Jehova dagiti kalikagumanna kadagiti tattao.—Prov. 4:18; Juan 16:12.

11. Ania ti isursuro ita ni Jehova kadatayo mainaig iti pannakilangentayo, ket ania ti pagimbagan daytoy kadatayo iti baro a lubong?

11 Ti maysa pay a makatulong kadatayo nga agbiag iti baro a lubong ket ti kinamanangpakawan. Bayat ti Sangaribu a Tawen a Panagturay ni Kristo, mabalin a saanto a dagus a maikkat dagiti nakalasat a nalinteg ken dagiti nakillo dagiti di umiso nga ugalida. (Ara. 24:15) Maipakitatayto kadi ti ayat iti pannakilangentayo kadakuada iti dayta a tiempo? No sursuruentayo ti agbalin a manangpakawan ken no ikagumaantayo ti agbalin a mannakigayyem ita, nalaklakatayto a maaramid dayta.—Basaen ti Colosas 3:12-14.

12. Ania ti pakainaigan ti panagbiag iti masanguanan iti panagbiagtayo ita?

12 Ti biag iti baro a lubong saanna a kayat a sawen a maalatayo a dagus ti amin a kayattayo. Imbes ketdi, karaman iti dayta a biag ti panagbalin a manangapresiar ken kontento iti aniaman a kasasaad bayat a mabembendisionantayo gapu ta agpapaituraytayo ken Jehova. Masapul ngarud nga ipakitatayo dagiti galad nga isursuro ni Jehova ita a masapul a patanorentayo. No sursuruentayo itan  ti agbiag a kasla agbibiagtayon iti baro a lubong, mapatanortayo dagiti kababalin a masapul nga ipakitatayo iti agnanayon. Agbalin a napaypayso kadatayo ti um-umay a “mapagnaedan a daga.” (Heb. 2:5; 11:1) Kasta met, maipakitatayo a segseggaantayo ti nalintegto a kasasaad ditoy daga. No kasta, agsagsaganatayo nga agbiag nga agnanayon iti baro a lubong ti Dios.

IPAMAYSAM DAGITI NAESPIRITUAN A KALAT

Naan-anay a makiramanka iti ministerio

13. Ania nga aktibidad ti ipangpangrunatayo iti baro a lubong?

13 Usigentayo ti maysa pay a pamay-an tapno makapagsaganatayo nga agbiag iti masanguanan. Nupay naikari nga addaantayto iti aglaplapusanan a taraon ken dadduma pay a kasapulan iti baro a lubong, naragragsaktayo no mapennek ti naespirituan a kasapulantayo. (Mat. 5:3) Ipangpangrunatayo dagiti naespirituan nga aktibidad, ken ipakitatayo a napalalo ti ragsaktayo ken Jehova. (Sal. 37:4) No ipangpangrunatayo dagiti naespirituan a bambanag ita, agsagsaganatayo para iti pudpudno a biag iti masanguanan.—Basaen ti Mateo 6:19-21.

14. Ania dagiti naespirituan a kalat a makatulong kadagiti agtutubo nga agbalin a sipapanunot iti biag nga agnanayon?

14 Kasano nga ad-adda a matagiragsaktayo dagiti teokratiko nga aktibidad? Makatulong no mangikeddengtayo kadagiti naespirituan a kalat. No agtutuboka pay ken kayatmo nga usaren ti pigsam nga agserbi ken Jehova, apay a saanmo a sukimaten dagiti naipablaaken a material maipapan iti nagduduma a pamay-an ti amin-tiempo a panagserbi ket aramidem a kalat ti maysa kadagita? * Mabalin a makisaritaka kadagiti nabayagen nga agserserbi iti amin-tiempo. No pagbalinem a karera ti ministerio, agsagsaganaka a mangitultuloy iti panagserbim iti baro a lubong ti Dios, a sadiay mausarmonto ti kapadasam ken ti teokratiko a pannakasanaymo.

Makiramanka kadagiti teokratiko nga aktibidad

15. Ania dagiti naespirituan a kalat a mabalin a ragpaten ti amin a manangaskasaba iti Pagarian?

15 Kas manangaskasaba iti Pagarian, ania dagiti naespirituan a kalat a mabalin nga ikeddengtayo? Mabalin a pagbalinentayo a kalat a pasayaaten ti abilidadtayo iti ministerio. Mabalin met a paunegentayo ti pannakaawattayo kadagiti prinsipio ti Biblia ken iti aplikasionda. Mabalin kadi a pasayaatentayo ti panagbasa, panagpalawag, wenno panagkomentotayo iti gimong? Sigurado nga adu pay dagiti mapanunotyo. Ti napateg ket: No adda naespirituan a kalattayo, maparegtatayo a makipaset kadagiti teokratiko nga aktibidad, ket makatulong dayta kadatayo nga agsagana nga agbiag iti baro a lubong.

 MABEMBENDISIONANTAYON!

Ipakitam nga ipatpategmo dagiti naespirituan a taraon

16. Apay a ti panagserbi ken Jehova ti kasayaatan a wagas ti panagbiag?

16 Ti kadi panagsaganatayo nga agbiag iti baro a lubong ti Dios kayatna a sawen a paidamantayo ti bagitayo iti nasayaat ken makapnek a biag ita? Saan a pulos! Makapnek unay a biag ti panagserbi ken Jehova. Saantayo a mapilpilit nga agserbi tapno laeng maisalakantayo iti dakkel a rigat. Dayta ti panggep a naparsuatayo. Mangipaay dayta iti napalalo a ragsak. Ti panangiwanwan ni Jehova ken ti napudno a panagayatna ket nasaysayaat nga amang ngem iti panagbiag a saan a nasinged kenkuana. (Basaen ti Salmo 63:1-3.) Siempre, saanen a masapul nga urayentayo a dumteng ti baro a lubong sakbay a matagiragsaktayo dagiti naespirituan a bendision nga ipaay ni Jehova gapu iti naimpusuan a panagserbitayo. Matagiragsaktayo dagita itan! Kinapudnona, adu kadatayo ti nabayagen a mangtagtagiragsak kadagita a bendision, ken napaneknekantayo nga awanen ti sabali pay a wagas ti panagbiag a makaiyeg iti dakdakkel a pannakapnek.—Sal. 1:1-3; Isa. 58:13, 14.

Agpaiwanwanka iti Sao ti Dios

17. Iti Paraiso, kasanotayo a matmatan ti panagaliwaksay ken ti panaglinglingay?

17 Iti baro a lubong, mapennek met dagiti pagayatan ken pagragsakantayo. Kinapudnona, pinarsuanatayo ni Jehova nga agtarigagay a mangaramid kadagiti nasayaat a magapuanan ken mangtagiragsak iti biag ken kayatna a naan-anay a mapennek dagita. (Ecl. 2:24) Iti aniaman a pamay-an, kanayonto a ‘penneken [ni Jehova] ti tarigagay ti tunggal sibibiag a banag.’ (Sal. 145:16) Adda lugar ti panagaliwaksay ken panaglinglingay, ngem ad-adda a matagiragsaktayo dayta no ipangpangrunatayo ti relasiontayo ken Jehova. Kastanto met iti Paraiso. Nainsiriban ngarud a sursuruentayo nga ikabil dagiti personal a pagayatantayo iti umiso a lugarda bayat a sapsapulentayo nga umuna ti Pagarian ken ipamaysatayo ti atensiontayo kadagiti naespirituan a bendision nga ipapaay ni Jehova ita.—Mat. 6:33.

18. Kasano a maipakitatayo nga agsagsaganatayo nga agbiag nga agnanayon iti Paraiso?

18 Iti Paraiso, mariknatayto ti napalalo a kinaragsak a ditay pay napaspasaran. Ipakitatayo koma ngarud a magagarantayo a manggun-od iti pudpudno a biag babaen iti panagsagana itan. No kasta, patanorentayo dagiti nadiosan a galad ken sireregtatayo a makiraman iti annongentayo a trabaho a mangikasaba iti Pagarian. Maragragsakantayo koma a mangaramid kadagiti naespirituan a bambanag. Babaen iti naan-anay a pammati kadagiti kari ni Jehova, agbiagtayo itan a mangnamnama iti baro a lubong!

^ par. 14 Kitaen ti Dagiti Saludsod nga Iyimtuod ti Agtutubo—Dagiti Sungbat nga Epektibo, Tomo 2, pp. 311-318.