Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan —Pagadalan nga Edision  |  Agosto 2015

Agtultuloyka a Manginanama!

Agtultuloyka a Manginanama!

“Uray no agtaktak, agtultuloyka a manginanama iti dayta.”—HAB. 2:3.

KANTA: 128, 45

1, 2. Ania a kababalin ti nabayagen nga ipakpakita dagiti adipen ni Jehova?

NABAYAGEN a namnamaen dagiti adipen ni Jehova a matungpal dagiti naipaltiing a padto. Kas pagarigan, impadto ni Jeremias a dadaelen dagiti taga-Babilonia ti Juda, ket kasta ti napasamak idi 607 B.C.E. (Jer. 25:8-11) Napaltiingan ni Isaias a mangipadto nga iyeg ni Jehova ti pannakaisubli dagiti Judio: “Naragsak amin dagidiay mangin-inanama kenkuana.” (Isa. 30:18) Kinuna met ni Mikias a nagipadto mainaig iti nagkauna nga ili ti Dios: “Ken Jehova nga agtultuloyakto nga agsiput.” (Mik. 7:7) Iti ginasut a tawen, nangin-inanama met dagiti adipen ti Dios iti kaitungpalan dagiti padto maipapan iti Mesias, wenno Kristo.—Luc. 3:15; 1 Ped. 1:10-12. *

2 Agtultuloy met a mangin-inanama dagiti adipen ti Dios ita ta matungtungpal pay laeng ti dadduma a padto maipapan iti Mesias. Babaen iti Mesianiko a Pagarian, asidegen a pagpatinggaen ni Jehova ti panagsagaba dagiti tattao babaen ti panangdadaelna kadagiti dakes ken panangispalna kadagiti adipenna iti daytoy agbaliwbaliw a lubong nga iturturayan ni Satanas. (1 Juan 5:19)  Agtalinaedtayo ngarud nga alerto ken sipapanunot a dandanin agpatingga daytoy a sistema.

3. Ania ti maisaludsodtayo no adun a tawen nga ur-urayentayo ti panungpalan?

3 Kas ad-adipen ni Jehova, segseggaantayo a makita a ti pagayatan ti Dios ket ‘maaramid koma, kas sadi langit, kasta met iti daga.’ (Mat. 6:10) Ngem no adun a tawen nga ur-urayentayo ti panungpalan daytoy a sistema, mabalin a maisaludsodtayo, ‘Adda pay kadi dagiti nabileg a rason tapno agtultuloy a mangnamnamatayo?’ Kitaentayo.

APAY NGA AGTULTULOYKA A MANGINANAMA?

4. Ania ti kangrunaan a rason nga agtultuloytayo nga agbantay?

4 Ibaga ti Biblia no ania ti masapul nga aramidentayo bayat nga ur-urayentayo ti panungpalan daytoy dakes a sistema ti bambanag. Kinuna ni Jesus kadagiti pasurotna nga ‘agtultuloyda nga agbantay’ ken ‘agtalinaedda a siririing.’ (Mat. 24:42; Luc. 21:34-36) Maysa dayta a naimbag a rason tapno agtultuloytayo a mangnamnama—imbaga a mismo ni Jesus nga aramidentayo dayta! Ipakpakita ti organisasion ni Jehova ti nagsayaat nga ulidan iti daytoy a banag. Agtultuloy nga iparparegta dagiti publikasiontayo nga ‘urayentayo ken agtalinaedtayo a silalagip iti kaadda ti aldaw ni Jehova’ ken kanayon a panunotentayo ti kari ti Dios a baro a lubong.—Basaen ti 2 Pedro 3:11-13.

5. Apay a nakapatpateg nga agtultuloytayo nga agbantay iti panawentayo?

5 Napateg idi nga agtultuloy a mangnamnama dagiti Kristiano a nagbiag ginasut a tawen ti napalabasen, ngem ad-adda a napateg dayta kadatayo ita. Apay? Gapu ta agbibiagtayon iti tiempo ti kaadda ni Kristo. Makitan dagiti pagilasinan ti kaaddana manipud pay idi 1914, a pakairamanan ti dumakdakes a kasasaad ti lubong ken ti pannakaikasaba ti Pagarian iti intero a lubong. Ipakita dagita nga agbibiagtayon iti “panungpalan ti sistema ti bambanag.” (Mat. 24:3, 7-14) Nupay saan nga imbaga ni Jesus no kasano kabayag dayta a tiempo sakbay ti panungpalan, nakapatpateg nga agridam ken agbantaytayo.

6. Apay a namnamaentayo a dumakes pay ti kasasaad ti lubong bayat nga umas-asideg ti panungpalan?

6 Ngem mabalin a maisaludsodtayo: Saan ngata a ti “panungpalan ti sistema ti bambanag” tukoyenna ti tiempo inton dumakes pay dagiti kasasaad ti lubong? Ibaga ti Biblia a kumaro pay ti kinadakes iti ‘maudi nga al-aldaw.’ (2 Tim. 3:1, 13; Mat. 24:21; Apoc. 12:12) Gapuna, namnamaentayo a dumakes pay ti kasasaad ti lubong.

7. Ania ti ipakita ti Mateo 24:37-39 maipapan iti kasasaad ti lubong bayat ti maudi nga al-aldaw?

7 Ngem kasano kakaro ti namnamaem a kasasaad ti lubong sakbay ti “dakkel a rigat”? (Apoc. 7:14) Pampanunotem kadi nga adda gubat iti tunggal pagilian, awan ti taraon, ken adda agsakit iti tunggal pamilia? No kasta ti mapasamak, uray dagiti managduadua mapilitanda a mamati a matungtungpalen ti padto ti Biblia. Ngem kinuna ni Jesus a kaaduan a tattao ti saanto a ‘mangikankano’ iti kaaddana, nga itultuloyda nga aramiden ti gagangay nga ar-aramidda agingga a dumteng ti aldaw ni Jehova. (Basaen ti Mateo 24:37-39.) Gapuna, ipakita ti Biblia a saan a masapul a nakaro ti kinadakes ti lubong bayat ti maudi nga al-aldaw tapno mapilitan dagiti tattao a mamati nga asidegen ti panungpalan.—Luc. 17:20; 2 Ped. 3:3, 4.

8. Ania ti masigurado dagidiay mangipangpangag iti bilin ni Jesus nga ‘agtultuloy nga agbantay’?

8 Kasta met, tapno mapasamak ti panggep ti pagilasinan, masapul a madlaw ti  kaitungpalan dagita tapno matignay dagiti agtultulnog iti balakad ni Jesus nga ‘agtultuloyda nga agbantay.’ (Mat. 24:27, 42) Manipud pay idi 1914, kastan ti mapaspasamak. Matungtungpalen dagiti paset ti pagilasinan. Nalawag nga agbibiagtayo itan iti “panungpalan ti sistema ti bambanag”—ti ababa a tiempo nga agturong iti pannakadadael ti dakes a lubong.

9. Apay a masapul nga agtultuloy a mangnamnamatayo iti panungpalan daytoy a lubong?

9 Apay ngarud a masapul nga agtultuloytayo a mangnamnama? Gapu ta agtultulnogtayo ken ni Jesu-Kristo. Mailasintayo met dagiti pagilasinan ti kaaddana. Mangnamnamatayo saan a gapu ta patientayo ti amin a mangngegtayo no di ket gapu ta nabileg ti pammaneknek ti Biblia a mangtignay kadatayo nga agtalinaed a naridam, siririing, ken mangnamnama iti panungpalan daytoy dakes a lubong.

KASANO KABAYAG?

10, 11. (a) Apay nga imbaga ni Jesus kadagiti adalanna nga agtultuloyda nga agbantay? (b) Ania ti imbaga ni Jesus nga aramiden dagiti pasurotna no nabayagen nga ur-urayenda ti panungpalan? (Kitaen ti ladawan iti rugi ti artikulo.)

10 Adu kadatayo ti nabayagen a siririing iti naespirituan. Ngem saantayo koma nga ipalubos a ti panaglabas ti tiempo ti mangupay kadatayo nga agtultuloy a mangnamnama. Masapul a sisasaganatayo iti idadateng ni Jesus a mamagpatingga iti daytoy a lubong. Laglagipentayo nga indagadag ni Jesus kadagiti pasurotna: “Agtultuloykayo a kumita, agtultuloykayo a siririing, ta saanyo nga ammo no kaano ti naituding a tiempo. Dayta ket kas iti tao nga agdaldaliasat iti sabali a daga a pinanawanna ti balayna ket intedna ti autoridad kadagiti adipenna, iti tunggal maysa ti trabahona, ket binilinna ti agay-aywan iti ruangan nga agtultuloy nga agbantay. Gapuna, agtultuloykayo nga agbantay, ta saanyo nga ammo no kaano nga umay ti apo ti balay, no iti mumalemen wenno iti tengnga ti rabii wenno . . . iti nasapa iti bigat; tapno no dumteng a kellaat, saannakayo a masarakan a matmaturog. Ngem ti kunaek kadakayo kunaek iti isuamin, Agtultuloykayo nga agbantay.”—Mar. 13:33-37.

11 Idi nailasinda a nangrugi ti kaadda ni Kristo idi 1914, dagiti pasurot ni Jesus nagsaganada a dagus iti nalabit nasapsapa nga idadateng ti panungpalan. Inaramidda dayta babaen ti sigaganetget a panangikasabada iti Pagarian. Dinakamat ni Jesus a mabalin a naladladaw ti iyaayna—iti parbangon wenno iti ‘nasapa a bigat.’ No mapasamak dayta, ania ti masapul nga aramiden dagiti pasurotna? Kinunana: “Agtultuloykayo nga agbantay.” Gapuna, uray no nabayagtayon nga agur-uray, saantayo koma a panunoten a mabayag pay wenno saanen a dumteng ti panungpalan.

12. Ania ti insaludsod ni Habakuk ken Jehova, ket ania ti kinuna ti Dios kenkuana?

12 Alaentayo a pagarigan ni Habakuk, a nabilin a mangipakaammo iti pannakadadael ti Jerusalem. Sakbay a nagipadto, adu a tawenen a maipakpakdaar ti pannakadadael dayta a siudad. Nakaro ti kinadakes iti daydi a tiempo ta ti nadangkes ‘palpalikmutanna ti nalinteg ken mabalballikug ti hustisia.’ Gapuna, saan a nakaskasdaaw nga insaludsod ni Habakuk: “Kasano kabayag, O Jehova, a masapul nga agpatulongak?” Imbes a direkta a sinungbatan ni Jehova ni Habakuk, impasiguradona kenkuana a ti impakaammona a pannakadadael ket “saanto a maladaw.” Kinuna ti Dios ken Habakuk: “Agtultuloyka a manginanama.”—Basaen ti Habakuk 1:1-4; 2:3.

13. Ania koma ti mabalin a napanunot ni Habakuk, ket apay a saan a nasayaat dayta?

13 Ania ngata no naupay ni Habakuk ket napanunotna: ‘Adu a tawenen a mangmangngegko  a madadael ti Jerusalem. Kasanon no mabayag pay? Kasla saanen a nasken nga itultuloyko pay nga ibaga nga asidegen a madadael ti siudad. Aramidento daytan ti dadduma.’ No kasta ti pinanunotna, mabalin a napukawna koma ti pabor ni Jehova—ken nalabit napukawna ti biagna idi dinadael dagiti taga-Babilonia ti Jerusalem.

14. Apay a masiguradotayo a saantayto a maupay no agtultuloy a mangnamnamatayo?

14 Iti baro a lubong, malaglagiptayto a dagiti naipadto a pasamak mainaig iti panungpalan ti lubong ket talaga a natungpal. No utobentayo dagita, ad-adda a tumibker ti panagtalektayo ken Jehova ken kadagiti karina a matungpalto pay iti masanguanan. (Basaen ti Josue 23:14.) Sigurado nga agyamantayto iti Dios, a nangikabil ‘kadagiti tiempo wenno pampanawen iti bukodna a sakup,’ ta binalakadannatayo nga agbiag a sipapanunot a ‘ti panungpalan ti amin a bambanag asidegen.’—Ara. 1:7; 1 Ped. 4:7.

MANGNAMNAMAKA NGEM AGTIGNAYKA!

Naregtaka kadi a mangikaskasaba iti naimbag a damag? (Kitaen ti parapo 15)

15, 16. Apay a ti panangaramid iti amin a kabaelantayo a mangasaba ti kasayaatan nga aramidentayo ita?

15 Namnamaentayo a kanayon a palagipannatayo ti organisasion ni Jehova a masapul nga agserbitayo iti Dios a sipapanunot iti kinaganat. Maipapaay dagita a palagip saan laeng a tapno agbalintayo nga okupado nga agserbi iti Dios no di ket tumulong dayta kadatayo tapno agtalinaedtayo a sipapanunot a matungtungpalen ti pagilasinan ti kaadda ni Kristo. Ania ti kasayaatan nga aramidentayo iti tiempo a pagbibiagantayo? Masapul nga itultuloytayo a biroken nga umuna ti Pagarian ken ti kinalinteg ti Dios babaen ti naregta a panangikasabatayo iti naimbag a damag.—Mat. 6:33; Mar. 13:10.

16 Kuna ti maysa a kabsat a babai: “Babaen ti panangikasabatayo iti naimbag a damag maipapan iti Pagarian, . . . matulongantayo dagiti tattao tapno maispalda iti um-umayen a pannakadadael ti lubong.” Ammona ti rikna ti maisalakan gapu ta naispalda ken lakayna iti kadadaksan a trahedia iti pakasaritaan ti panagbiahe iti taaw—idi limned ti dakkel a barko a Wilhelm Gustloff idi 1945. Uray pay iti kasta a peggad, mabalin a saan nga umiso ti panangmatmat ti maysa a tao no ania a talaga ti kapatgan. Malagip ti kabsat ti idungdung-aw ti maysa a babai: “Awanen dagiti maletak ken dagiti alahasko! Limnedda aminen a karaman ti barko! Awanen ti nabati kaniak!” Ngem naiduma ti dadduma a pasahero. Inrisgoda ti biagda a timmulong a nangalaw kadagiti tattao nga adda iti nakalamlamiis a danum ti baybay. Kas kadagiti pasahero a nangikagumaan a timmulong, aramidentayo met ti amin a kabaelantayo a tumulong kadagiti  tattao. Masapul a sipapanunottayo iti kinaganat ti panangasabatayo ket tulongantayo ti dadduma tapno makalasatda iti um-umayen a pannakadadael ti lubong sakbay a maladaw ti amin.

Ipakita kadi dagiti desisionmo a sipapanunotka iti kinaganat ti tiempo? (Kitaen ti parapo 17)

17. Apay a mamatitayo nga umay ti panungpalan iti aniaman a kanito?

17 Ipakita dagiti pasamak iti lubong a matungtungpalen dagiti padto ti Biblia ken dandanin agpatingga ti dakes a lubong. Gapuna, saantayo a panunoten a “ti sangapulo a sara” ken “ti atap nga animal” a nadakamat iti Apocalipsis 17:16 mabayag pay a dadaelenda ti Babilonia a Dakkel, ti imperio ti ulbod a relihion iti intero a lubong. Laglagipentayo a ti Dios ‘ikabilnanto dayta kadagiti puso’ ti sangapulo a sara ken ti atap nga animal tapno dadaelenda ti Babilonia a Dakkel—ket mabalin a kellaat a mapasamak dayta! (Apoc. 17:17) Asidegen nga agpatingga daytoy a lubong. Gapuna, ipangagtayo koma ti pakdaar ni Jesus: “Asikasuenyo ti bagbagiyo tapno dagiti pusoyo saanda a pulos madagsenan iti nalabes a pampannangan ken nakaro a panagin-inum ken kadagiti pakaringgoran iti biag, ket giddato a dayta nga aldaw kellaat nga umay kadakayo kas maysa a silo.” (Luc. 21:34, 35; Apoc. 16:15) Agtultuloytayo ngarud nga agserbi ken Jehova a sipapanunot iti kinaganat, nga agtalektayo nga “agtignay maipaay iti daydiay mangin-inanama kenkuana.”—Isa. 64:4.

18. Ania ti usigentayo iti sumaruno nga artikulo?

18 Bayat nga ur-urayentayo nga agpatingga daytoy dakes a lubong, ipangagtayo ti sasao nga insurat ni Judas: “Dungdungnguen, babaen ti panangpabilegyo iti bagbagiyo iti kasasantuan a pammatiyo, ken panagkararagyo buyogen ti nasantuan nga espiritu, pagtalinaedenyo ti bagbagiyo iti ayat ti Dios, bayat nga ur-urayenyo ti asi ni Apotayo a Jesu-Kristo a maipaay iti agnanayon a biag.” (Jud. 20, 21) Ngem kasano a maipakitatayo nga agbibiagtayo a mangnamnama iti inkari ti Dios a baro a lubong ken mangsegsegga iti dayta? Usigentayo dayta iti sumaruno nga artikulo.

^ par. 1 Para iti dadduma a padto ti Biblia maipapan iti Mesias ken ti kaitungpalanda, kitaen ti panid 200 iti libro nga Ania a Talaga ti Isursuro ti Biblia?