Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan —Pagadalan nga Edision  |  Hulio 2015

Situtulok nga Agsaksakripisioda—Iti Russia

Situtulok nga Agsaksakripisioda—Iti Russia

IDI 1991, napalalo ti ragsak dagiti Saksi ni Jehova idiay Russia idi opisial a naipalubos ti nabayagen a maiparparit nga aktibidadda. Iti dayta a tiempo, manmano ti nangipagarup nga umadu iti maminsangapulo ti bilang dagiti Saksi sadiay nga agdagup itan iti agarup 170,000! Karaman kadagitoy a nagaget a manangaskasaba iti Pagarian dagiti Saksi manipud iti sabali a pagilian nga immakar iti Russia tapno tumulong iti naespirituan a panagani. (Mat. 9:37, 38) Am-ammuentayo ti dadduma kadakuada.

TIMMULONG DAGITI KAKABSAT A LALLAKI KADAGITI KONGREGASION

Iti tawen a naipalubos ti panangasaba iti Russia, 28 ti tawen ni Matthew a taga-Great Britain. Iti kombension iti dayta a tawen, naitampok iti maysa a palawag nga agkasapulan iti tulong dagiti kongregasion idiay Eastern Europe. Kas pagarigan, dinakamat ti ispiker nga adda kongregasion iti St. Petersburg, Russia, nga awanan iti panglakayen ken maymaysa laeng ti ministerial nga adipen. Ngem ginasut ti iyad-adalan dagiti agibumbunannag! Kinuna ni Matthew: “Kalpasan dayta a palawag, sangkapanunotkon ti Russia, isu nga inkararagko ken Jehova a kayatko ti umakar sadiay.” Nagurnong ni Matthew ken inlakona ti adu a sanikuana ket immakar idiay Russia idi 1992. Ania ti nagbanagan ti inaramidna?

Matthew

Kinuna ni Matthew: “Narigat nga adalen ti lengguahe dagiti Russian, isu a narigatanak a makisarita kadagiti naespirituan a bambanag.” Narigatan pay nga agsapul iti pagdagusan. “Diak mabilang no namin-ano nga immakarak iti apartment.” Iti laksid dagita a lapped, kinuna ni Matthew: “Ti iyaakarko iti Russia ti kasayaatan pay laeng a desision nga inaramidko.” Inlawlawagna: “Gapu iti panagserbik ditoy, nasursurok ti ad-adda nga agpannuray ken Jehova ken nariknak ti panangiwanwanna iti adu a pamay-an.” Idi agangay, nadutokan ni Matthew a panglakayen ken special pioneer ket agserserbi itan iti sanga nga opisina iti asideg ti St. Petersburg.

Idi 1999, agtawen ni Hiroo iti 25 idi nagturpos iti Ministerial Training School idiay Japan, ket pinaregta ti maysa kadagiti instruktorna nga agserbi iti sabali a pagilian. Nangngeg ni Hiroo a dakkel ti  panagkasapulan idiay Russia isu a nagsursuro iti Russian. Adda pay inaramidna a panagsagana. “Napanak idiay Russia iti innem a bulan,” kinunana. “Gapu ta nakalamlam-ek sadiay, napanak iti Nobiembre tapno maammuak no maibturak ti lam-ek.” Idi naibturanna ti kalam-ekna, nagsubli idiay Japan ket pinasimplena ti biagna tapno makaurnong ken adda usarenna nga agsubli idiay Russia tapno agnaeden sadiay.

Hiroo ken Svetlana

Ita, 12 a tawenen nga agnanaed ni Hiroo idiay Russia ken nakapagserbin iti adu a kongregasion. Adda dagiti gundaway nga isu laeng ti panglakayen iti kongregasion nga addaan iti nasurok a 100 nga agibumbunannag. Iti maysa a kongregasion, linawas nga isu ti mangiparang iti kaaduan a paset ti Gimong ti Serbisio, idaulona ti Teokratiko nga Eskuelaan ti Panagministro, ti Panagadal iti Pagwanawanan, ken lima a Panagadal ti Libro iti Kongregasion. Sinarungkaran ken pinaregtana met dagiti kakabsat. No malagipna dagidi a tawen, kinuna ni Hiroo: “Nakaragragsak ti tumulong tapno mapabileg ti espiritualidad dagiti kakabsat.” Ania ti naitulong kenkuana ti panagserbina iti lugar nga addaan iti dakdakkel a panagkasapulan? Kinunana: “Sakbay a napanak iti Russia, agserserbiak kas panglakayen ken payunir, ngem nariknak a napabaro ti relasionko ken Jehova idi immayak ditoy. Nasursurok ti ad-adda nga agtalek ken Jehova iti amin nga aspeto ti biagko.” Idi 2005, inkasar ni Hiroo ni Svetlana, ket agtultuloyda nga agserserbi kas payunir.

Kadua da Michael ken Olga da Marina ken Matthew

Taga-Canada ni Matthew nga agtawen iti 34 ken ti kabsatna a ni Michael nga agtawen iti 28. Bimmisitada idiay Russia ket nasdaawda ta nagadu ti interesado a timmabuno iti gimong ngem manmano ti kakabsat a lallaki a mangidaulo kadakuada. Kinuna ni Matthew: “Adda 200 a timmabuno iti kongregasion a sinarungkarak, ngem maysa laeng a lakay a panglakayen ken maysa nga agtutubo a ministerial nga adipen ti nangidaulo iti gimong. Idi nakitak ti kasasaadda, natignayak nga umakar sadiay tapno tumulong kadagidiay a kakabsat.” Immakar ni Matthew idiay Russia idi 2002.

Uppat a tawen kalpasanna, immakar met ni Michael idiay Russia ket dagus a nakitana a dakkel latta ti panagkasapulan kadagiti kakabsat a lallaki. Kas maysa a ministerial nga adipen, nadutokan a mangasikaso iti kuenta, literatura, ken teritoria. Nakiddaw met nga aramidenna ti gagangay a trabaho ti sekretario, mangipaay iti palawag publiko, ken tumulong a mangorganisar kadagiti asamblea ken panagibangon kadagiti Kingdom Hall. Kinapudnona, agingga ita, agkasapulan pay laeng iti tulong dagiti kongregasion sadiay. Nupay adu ti as-asikasuen ni Michael a maysa itan a panglakayen, kinunana: “Makapnek ti tumulong kadagiti kakabsat. Dayta ti kasayaatan a pangusarak iti biagko!”

Idi agangay, inkasar ni Matthew ni Marina, ken inkallaysa met ni Michael ni Olga. Dagitoy a dua a pagassawaan ken ti dadduma a situtulok a kakabsat, agtultuloy a tultulonganda dagiti rumangrang-ay a kongregasion.

TIMMULONG DAGITI KAKABSAT A BABBAI ITI PANAGANI

Tatyana

Idi 1994, idi agtawen ni Tatyana iti 16, nangrugi nga agserbi iti kongregasionda idiay Ukraine ti innem nga special pioneer manipud Czech Republic, Poland, ken Slovakia. Maragragsakan a nanglagip kadakuada. Kinunana: “Nalaka a maas-asitgan ken nasingpet dagidiay a naregta a payunir ken kabesadoda ti Biblia.” Nakitana a binendisionan ni Jehova ti kinamanagsakripisioda, isu a naikunana, ‘Kayatko a tuladen ida.’

Gapu ta naparegta iti ulidan dagidiay a payunir, inusar ni Tatyana ti bakasionna iti eskuelaan tapno sumurot kadagiti kakabsat a mapan kadagiti adayo a teritoria idiay Ukraine ken Belarus nga awan pay idi ti nangasaba a Saksi. Nagustuanna dagidiay a panangasaba iti adayo isu nga implanona ti umakar idiay Russia tapno mapalawana ti ministeriona. Idi damo, napan sadiay tapno bisitaenna ti kabsat a babai nga immakar manipud iti sabali a pagilian ken agbirok iti trabaho tapno  addanto pangsuportana iti panagpayunirna. Idi 2000, immakar ni Tatyana idiay Russia. Narigat kadi dayta a panagbalbaliw?

Kinuna ni Tatyana: “Gapu ta saanko a kabaelan ti agabang iti apartment, nagkaseraak. Saan a nalaka dayta. Adda dagiti gundaway a kayatkon ti agawid. Ngem kanayon a tinulongannak ni Jehova a mangkita a makagunggona ti panangituloyko iti panagserbik.” Agserserbi itan ni Tatyana kas misionera idiay Russia. Kinunana: “Nangted iti nakapatpateg a kapadasan ken gagayyem dagiti tawen a binusbosko nga adayo iti pagilian a nakayanakak. Kangrunaanna, napabileg ti pammatik.”

Masako

Ni Masako a taga-Japan nga agtawenen iti nasurok a 50, nabayagen a tartarigagayanna ti agserbi kas misionera. Ngem gapu iti problemana iti salun-at, kasla saanna a maaramid dayta. Nupay kasta, idi simmayaat ti salun-atna, inkeddengna ti umakar idiay Russia tapno tumulong iti trabaho a panagani. Nupay narigat ti agbirok iti nasayaat a pagyanan ken panggedan, nabaelanna a suportaran ti panagpayunirna babaen iti panangisurona iti Japanese ken panagdalusna. Ania ti nakatulong kenkuana a mangitultuloy iti ministeriona?

No lagipen ni Masako ti nasurok a 14 a tawen a panagserbina idiay Russia, kunana: “Awan aniamanna dagiti rigat a napasarak gapu iti ragsakko iti ministerio. Makapapigsa ken makaparagsak ti panangasaba kadagiti lugar nga addaan iti dakkel a panagkasapulan kadagiti agibumbunannag iti Pagarian.” Kinunana pay: “Para kaniak, kasla milagro ti makapadas no kasano nga impaay ni Jehova iti adu a tawen ti taraon, kawes, ken pagtaengak.” Malaksid iti panagserbina iti lugar nga addaan iti dakdakkel a panagkasapulan idiay Russia, nakiraman met ni Masako iti trabaho a panagani idiay Kyrgyzstan. Kanayonanna, timmulong pay kadagiti grupo nga agsasao iti Ingles, Chinese, ken Uighur. Agserserbi itan ni Masako kas payunir idiay St. Petersburg.

SIMMUPORTA DAGITI PAMILIA KET NABENDISIONANDA

Inga ken Mikhail

Gapu iti rigat ti panagbiag, masansan nga agabrod ti dadduma a pamilia tapno sumayaat ti panagbiagda. Ngem kas idi kada Abraham ken Sara, dadduma a  pamilia ti immakar iti sabali a pagilian gapu ta kayatda ti tumulong iti naespirituan. (Gen. 12:1-9) Kas pagarigan, idi 2003, immakar idiay Russia manipud Ukraine ti agassawa a da Mikhail ken Inga. Dagus a nakasarakda kadagiti tattao nga agsapsapul iti kinapudno iti Biblia.

Kinuna ni Mikhail: “Naminsan, nangasabakami iti lugar nga awan pay idi ti nangasaba a Saksi. Maysa a lakay ti nangilukat iti ridaw sa nagsaludsod, ‘Manangaskasabakayo kadi?’ Idi imbagami a wen, kinunana: ‘Ammok nga umaykayo. Saan a mabalin a saan a matungpal ti sasao ni Jesus.’ Idi kuan, kinotar ti lakay ti Mateo 24:14.” Innayon ni Mikhail: “Iti dayta met laeng a lugar, nakasarakkami met iti sangapulo a babbai a Baptist a pudno a mabisbisin iti kinapudno. Addaanda iti libro nga Agbiag nga Agnanayon, ket us-usarenda dayta no agadalda iti Biblia kada ngudo ti lawas. Iti adu nga oras, sinungbatanmi dagiti saludsodda ken nagkakaduakami a nagkanta kadagiti kanta ti Pagarian. Kalpasanna, nagkakaduakami a nangrabii. Dayta a panagbisita ti maysa kadagiti kasayaatan a kapadasak.” Umanamong da Mikhail ken Inga a ti panagserbi kadagiti lugar nga addaan iti dakkel a panagkasapulan kadagiti agibumbunannag iti Pagarian ti nangpasinged kadakuada ken Jehova, nangpauneg iti panagayatda kadagiti tattao, ken nangipaay kadakuada iti makapnek a biag. Agserserbida itan iti sirkito.

Oksana, Aleksey, ken Yury

Idi 2007, bimmisita iti sanga nga opisina iti Russia ti agassawa a taga-Ukraine a da Yury ken Oksana nga agtawen itan iti nasurok a 30, ken ti anakda a ni Aleksey nga agtawen itan iti 13. Nakitada iti mapa ti Russia nga adu a lugar ti saan a maas-asak. Kinuna ni Oksana: “Idi nakitami ti mapa, nabigbigmi a dakkel ti panagkasapulan kadagiti manangaskasaba iti Pagarian, isu a natignaykami nga umakar iti Russia.” Ania pay ti nakatulong kadakuada? Kinuna ni Yury: “Nakatulong kadakami ti panagbasa kadagiti artikulo dagiti publikasiontayo a kas koma ti ‘Makapagserbikayo Kadi iti Ganggannaet a Tay-ak?’ * Binisitami ti lugar iti Russia nga inrekomenda ti sanga nga opisina a pagakaranmi ken nagbirokkami iti pagyanan ken pagtrabahuan.” Immakarda idiay Russia idi 2008.

Idi damo, narigatanda nga agbirok iti trabaho, ken namin-adu nga immakarda iti pagnaedan. Kinuna ni Yury: “Kanayon nga inkararagmi a saankami a maupay, ket intultuloymi ti nangasaba, a mangnamnama iti tulong ni Jehova. Nariknami a tinulongannakami ni Jehova gapu ta inyun-unami ti Pagarianna. Napabileg ti pamiliami ken simmingedkami iti maysa ken maysa.” (Mat. 6:22, 33) Ania met ti naitulong dayta a panagsakripisio iti barito a ni Aleksey? “Dakkel ti naitulongna,” kinuna ni Oksana. “Indedikarna ti biagna ken Jehova ket nagpabautisar idi agtawen iti siam. Gapu ta nakitana a dakkel ti panagkasapulan kadagiti manangaskasaba iti Pagarian, natignay nga ag-auxiliary pioneer kada bakasionda. Maragragsakankami a makakita iti ayat ken regtana iti ministerio.” Agserserbi itan kas special pioneer da Yury ken Oksana.

“TI LAENG PAGBABBABAWYAK”

Kas iti nalawag a komento dagitoy a paraani, ti iyaakar iti sabali a lugar kas panangpalawa iti ministerio ket agkalikagum iti naan-anay a panagtalek ken Jehova. Kinapudnona, iti baro a teritoriada, dagiti agserserbi iti lugar nga addaan iti dakkel a panagkasapulan makapasarda kadagiti pakarigatan, ngem mariknada ti rag-o gapu iti panangiranudda iti naimbag a damag kadagiti tattao a mayat a dumngeg iti mensahe ti Pagarian. Kabaelam kadi ti makipagani iti lugar nga addaan iti dakkel a panagkasapulan iti agibumbunannag iti Pagarian? No aramidem dayta, mabalin a maibagam met ti kinuna ni Yury maipapan iti desisionna nga agserbi iti lugar nga addaan iti dakdakkel a panagkasapulan: “Ti laeng pagbabbabawyak ket saanko nga inaramid dayta a nasapsapa.”

^ par. 20 Kitaen ti Pagwanawanan, Oktubre 15, 1999, panid 23-27.