Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) HULIO 2015

Daytoy ti Lugar a Pagdaydayawantayo

Daytoy ti Lugar a Pagdaydayawantayo

“Ti regta maipaay iti balaymo ibusennakto.”—JUAN 2:17.

KANTA: 127, 118

1, 2. (a) Ania dagiti lugar a pagdayawan nga inusar dagiti nagkauna nga adipen ni Jehova? (b) Kasano a minatmatan ni Jesus ti templo iti Jerusalem? (c) Ania ti usigentayo iti daytoy nga artikulo?

IDI un-unana, addan dagiti lugar nga inusar dagiti adipen ti Dios para iti pudno a panagdayaw. Idi nagdaton ni Abel iti Dios, mabalin a nagaramid iti altar. (Gen. 4:3, 4) Nagbangon met da Noe, Abraham, Isaac, Jacob, ken Moises kadagiti altar. (Gen. 8:20; 12:7; 26:25; 35:1; Ex. 17:15) Imbilin ni Jehova a mangbangon dagiti Israelita iti tabernakulo. (Ex. 25:8) Idi agangay, binangonda ti templo a pagdayawanda ken Jehova. (1 Ar. 8:27, 29) Kalpasan ti panagsublida manipud iti Babilonia, kanayon a naguummong dagiti Judio kadagiti sinagoga. (Mar. 6:2; Juan 18:20; Ara. 15:21) Naggigimong dagiti nagkauna a Kristiano kadagiti pagtaengan dagiti padada a Kristiano. (Ara. 12:12; 1 Cor. 16:19) Iti kaaldawantayo, agtataripnong ti ili ni Jehova kadagiti rinibribu a Kingdom Hall iti intero a lubong tapno agadal ken agdayawda.

2 Impatpateg ken inap-apresiar unay ni Jesus ti templo ni Jehova iti Jerusalem isu a maysa a mannurat ti Ebanghelio ti nangiyebkas kenkuana iti daytoy a padto: “Ti bin-ig a regta maipaay iti balaymo inibusnak.” (Sal. 69:9; Juan 2:17) Saan a naan-anay a maawagan a “balay ni Jehova” dagiti Kingdom Hall a kas iti  kaipapanan dagita a sasao idi nayawag iti templo iti Jerusalem. (2 Cron. 5:13; 33:4) Nupay kasta, adda dagiti prinsipio iti Biblia a mangipakita no kasano nga usaren ken raementayo dagiti lugar a pagdaydayawantayo ita. Usigentayo iti daytoy nga artikulo ti dadduma kadagita a prinsipio ken no kasano nga agaplikar dagita iti panangmatmat, panangsuporta, ken panangmantenertayo kadagiti Kingdom Hall. *

PANANGIPAKITA ITI PANAGRAEM ITI PUDNO A PANAGDAYAW

3-5. Ania ti pakausaran ti Kingdom Hall, ket ania koma ti panangmatmattayo kadagiti gimong?

3 Ti Kingdom Hall ti sentro ti pudno a panagdayaw iti maysa a lugar. Ti maysa kadagiti parabur ni Jehova ket dagiti makapasalun-at a naespirituan a taraon a magun-odantayo kadagiti linawas a gimong iti Kingdom Hall. Ditoy a mapabileg ti espiritualidadtayo ken maawattayo dagiti instruksion manipud iti organisasionna. Arigna nga ipatpateg ti amin a makigimong ti awis ni Jehova ken ti Anakna. Gapu ta maysa a pribilehio ti maawis a makipangan iti “lamisaan ni Jehova,” saantayo koma a pulos tagtagilag-anen dayta nga awis.—1 Cor. 10:21.

4 Nakapatpateg ken Jehova dagita nga okasion para iti panagdayaw ken iti panagpipinnaregta isu a pinaltiinganna ni apostol Pablo a paregtaennatayo a saantayo a baybay-an ti panagtataripnongtayo. (Basaen ti Hebreo 10:24, 25.) Maipakitatayo ngata a raraementayo ni Jehova no saantayo a makigimong gapu iti saan a nainkalintegan a rason? Kinapudnona, maipakitatayo nga ipatpategtayo ni Jehova ken dagiti probisionna no agsagana ken makipasettayo kadagita.—Sal. 22:22.

5 Ti panangmatmattayo iti Kingdom Hall—ti mismo a pasdek ken dagiti naespirituan nga aktibidad a maar-aramid sadiay—ipakitana no kasano kadakkel ti panagraemtayo ken Jehova. Saan kadi nga ipakita ti kababalintayo no ania ti panangmatmattayo iti nagan ti Dios, a makita iti karatula ti Kingdom Hall?—Idilig ti 1 Ar-ari 8:17.

6. Ania ti komento ti dadduma kadagiti us-usarentayo a Kingdom Hall ken kadagiti tumabtabuno iti gimong? (Kitaen ti ladawan iti rugi ti artikulo.)

6 Masansan a madlaw dagiti saan a Saksi ti panagraemtayo kadagiti lugar a pagdaydayawantayo. Kas pagarigan, kinuna ti maysa a lalaki a taga-Turkey: “Bilibak iti kinadalus ken kinaurnos a makitkitak kadagiti Kingdom Hall. Natakneng ti panagbadbado dagiti tattao sadiay, naisem, ken sibabara a kinablaawandak. Nagustuak unay dayta.” Idi kuan, nakigimongen ti lalaki ket nabautisaran idi agangay. Iti maysa a siudad iti Indonesia, inawis dagiti kakabsat dagiti lokal nga opisial ti gobierno ken dagiti kaarrubada para iti pannakaidedikar ti baro a Kingdom Hall. Immay ti mayor. Nagustuanna ti natibker a pannakaibangon, disenio, ken ti nagpintas a hardin ti Kingdom Hall. Kinunana: “Ipakita ti kinadalus daytoy a pasdek a pudno ti pammatiyo.”

Mabalin a makita iti kababalintayo a saantayo a raraemen ti Dios (Kitaen ti parapo 7, 8)

7, 8. Ania dagiti napateg a laglagipen dagiti tumabuno kadagiti Nakristianuan a gimong?

7 Ti panagraemtayo iti Dios a nangawis kadatayo kadagiti Nakristianuan a gimong ket makita iti panagtigtignay, panagkawkawes, ken panaglanglangatayo. Maipakitatayo pay ti panagraem no agbalintayo a balanse. Napaliiw a ti dadduma ket estrikto unay no maipapan iti umiso a kababalin bayat dagiti gimong, ngem dadduma met ti saan unay a maseknan iti dayta. Siempre, kayat ni Jehova a komportable dagiti adipenna ken ti dadduma a tumabuno iti Kingdom Hall. Kasta met, kayattayo a saan a masinga ti atension  dagiti kakabsat kabayatan dagiti gimong babaen ti saan a disente a panagkawes, panagteks, panagsasarita, pannangan ken panaginum, ken dadduma pay. Masapul nga isuro dagiti nagannak kadagiti annakda a ti Kingdom Hall ket saan a lugar a pagay-ayaman wenno pagtaraytarayan.—Ecl. 3:1.

8 Nakapungtot ken pinapanaw idi ni Jesus dagiti agnegnegosio iti templo ti Dios. (Juan 2:13-17) Dagiti Kingdom Hall ket lugar met a pagdaydayawan ken pakasursuruantayo iti naespirituan. Gapuna, aniaman a panagnegosio wenno aktibidad a saan a mainaig iti naespirituan a bambanag ket masapul a maaramid iti sabali a lugar.—Idilig ti Nehemias 13:7, 8.

PANANGSUPORTA KEN PANAGIBANGON KADAGITI KINGDOM HALL

9, 10. (a) Kasano a masupsuportaran ken maibangbangon dagiti baro a Kingdom Hall, ken ania ti resulta dayta? (b) Ania a naayat a probision ti nakatulong kadagiti kongregasion a saan a makabael a mangipatakder iti bukodda a Kingdom Hall?

9 Ikagkagumaan ti organisasion ni Jehova ti mangipaay ken mangsuporta kadagiti Kingdom Hall. Ti panagdisenio, panagibangon, ken panangpapintas wenno panangpalawa kadagiti Kingdom Hall ket ar-aramiden dagiti boluntario. Ania ti resulta dayta? Manipud idi Nobiembre 1, 1999, nasurok a 28,000 a baro ken nagpipintas a Kingdom Hall ti naibangon para kadagiti kongregasion iti intero a lubong. Gapuna, bayat ti napalabas a 15 a tawen, mapan a lima a baro a Kingdom Hall ti naibangon iti inaldaw.

10 Iti intero a lubong, ikagkagumaan dagiti kakabsat a suportaran ti panagibangon kadagiti Kingdom Hall. Daytoy a naayat nga urnos ket naibatay iti prinsipio ti Biblia a punnuan ti ad-adu ti nanumo a donasion ti dadduma tapno adda ‘panagpapada.’ (Basaen ti 2 Corinto 8:13-15.) Kas resultana, naibangon dagiti nagpipintas a sentro ti pudno a panagdaydayaw para kadagiti kongregasion a saan a makabael a mangipatakder iti bukodda a Kingdom Hall.

11. Ania ti naibaga ti dadduma a kakabsat maipapan iti naibangon a baro a Kingdom Hall-da, ket ania ti panagriknam iti dayta?

11 Insurat ti maysa a kongregasion iti Costa Rica a naibangonan iti Kingdom Hall babaen iti daytoy a probision: “No agtakderkami iti sango ti napintas a Kingdom Hall, kasla agar-arapaapkami! Kasla saanmi a patien a naibangon dayta iti walo laeng nga aldaw! Naaramid dayta gapu iti pamendision ni Jehova, ti urnos ti organisasionna, ken ti suporta dagiti naayat a kakabsattayo. Talaga a nagpateg a sagut ni Jehova kadakami daytoy a lugar a pagdaydayawan. Napalalo ti ragsakmi!” Saan kadi a matukay ti pusom no mangngegmo ti kasta a panagyaman gapu kadagiti baro a Kingdom Hall ken maammuam a maragragsakan met dagiti  kakabsat iti nadumaduma a lugar iti intero a lubong? Daytoy a trabaho ket pagayatan ni Jehova, ta kalpasan a maibangon dagiti baro a Kingdom Hall, masansan a mapunno dagitoy kadagiti naemma a tattao nga agtarigagay a mangam-ammo iti naayat a Namarsua.—Sal. 127:1.

12. Ania ti mabalin nga aramidem tapno masuportaram ti panagibangon kadagiti Kingdom Hall?

12 Maragragsakan ti adu a kakabsat a lallaki ken babbai a timmulong iti panagibangon kadagiti Kingdom Hall. Kabaelantayo man ti tumulong a mismo iti trabaho a panagibangon wenno saan, amintayo ket mabalin a tumulong kadagiti kasta a proyekto babaen ti panangitedtayo iti donasion. Idi tiempo ti Biblia, sireregta a sinuportaran dagiti adipen ti Dios ti pudno a panagdayaw. Kasta met ti aramidentayo ita tapno maidaydayaw ni Jehova.—Ex. 25:2; 2 Cor. 9:7.

PANANGDALUS ITI KINGDOM HALL

13, 14. Ania dagiti prinsipio ti Biblia a mangipakita a masapul a kanayon a nadalus ken nadalimanek ti us-usarentayo a Kingdom Hall?

13 Kalpasan a maibangon ti baro a Kingdom Hall, masapul a mataginayon a nadalus ken nadalimanek tapno maiparangarang dagiti kualidad ken personalidad ti Dios a pagdaydayawantayo—ti Dios ti urnos. (Basaen ti 1 Corinto 14:33, 40.) Inaig ti Biblia ti kinasanto ken ti naespirituan a kinadalus iti pisikal a kinadalus. (Apoc. 19:8) Gapuna, no kayat dagiti tattao nga awaten ida ni Jehova, masapul met nga agbalinda a nadalus.

14 Maitunos kadagitoy a prinsipio, kanayon koma a maragsakantayo a mangawis kadagiti interesado a tattao nga umay makigimong gapu ta masiguradotayo a maitutop ti kasasaad ken kinapintas ti us-usarentayo a Kingdom Hall iti naimbag a damag nga ikaskasabatayo. Makitada a ti Dios a pagdaydayawantayo ket  nasantuan ken mabiiten a pagbalinenna ti daga a napintas ken nadalus a paraiso.—Isa. 6:1-3; Apoc. 11:18.

15, 16. (a) Apay a mabalin a narigat a taginayonen a nadalus ti Kingdom Hall, ngem apay a kasapulan a maaramid dayta? (b) Ania dagiti lokal nga urnos mainaig iti panagdalus, ket ania a pribilehio ti mabalin a pakiramanan ti amin?

15 Para iti dadduma, nakapatpateg ti panagdalus. Ti kalidad ti panagdalusda ket mabalin a gapu iti pannakapadakkelda wenno kaadda dagiti bambanag a kas iti pitak, tapuk, kasasaad ti kalsada, kaadda ti danum ken dagiti mausar a pagdalus. Aniaman ti kababalin ti maysa wenno ti kasasaad iti lugaryo, rumbeng a mapagulidanan iti kinadalus ken kinadalimanek ti Kingdom Hall nga us-usarentayo, ta naikabil iti dayta ti nagan ni Jehova ken dayta ti lugar ti pudno a panagdayaw.—Deut. 23:14.

16 Saantayo koma a tagtagibassiten ti panagdalus iti Kingdom Hall. Siguraduen koma dagiti panglakayen nga adda eskediul ti panagdalus ken umdas a mausar a pagdalus tapno mataginayon a nadalus ken napintas ti lugar a pagdaydayawantayo. Gapu ta adda dagiti masapul a madalusan kalpasan ti gimong ken adda met dagiti saan a kasapulan a maaramid a kasta, masapul nga adda panagtutunos ken nasayaat a panangidaulo tapno masigurado nga awan ti maliwayan. Pribilehio ti amin a kakabsat iti kongregasion ti tumulong kadagitoy a trabaho.

PANANGMANTENER ITI LUGAR A PAGDAYDAYAWANTAYO

17, 18. (a) Mangted kadagiti pagarigan iti Biblia a mangipakita a nasken ti panangmantener iti lugar a pagdaydayawantayo. (b) Apay a masapul a mamantener a nasayaat ti kondision dagiti Kingdom Hall?

17 Ikagkagumaan met dagiti adipen ni Jehova a manteneren ti lugar a pagdaydayawanda. Ti Ari ti Juda a ni Jehoas imbilinna kadagiti papadi nga usarenda dagiti kontribusion a naited iti balay ni Jehova tapno tarimaanenda ti aniaman a rekka ti balay iti sadinoman a pakasarakanda. (2 Ar. 12:4, 5) Kalpasan ti 200 a tawen, inusar met ni Ari Josias dagiti kontribusion a naited iti templo tapno mausar kadagiti matarimaan.—Basaen ti 2 Cronicas 34:9-11.

18 Napaliiw dagiti sanga nga opisina iti dadduma a pagilian a saan nga ipangpangruna dagiti tattao a manteneren ken tarimaanen dagiti pasdek wenno dagiti alikamenda. Mabalin a saanda ngamin nga ammo a tarimaanen wenno awan pay ketdi dagiti material wenno pondo nga usarenda a pangmantener. Ngem nalawag a no mabaybay-an ti Kingdom Hall, mabalin nga agrakaya wenno nadaras a madadael dayta ket saan a makaipaay iti nasayaat a pangsaksi kadagiti tattao iti komunidad. Iti sabali a bangir, no ikagumaan ti amin a kakabsat ti tumulong tapno agtalinaed a nasayaat ti kondision ti Kingdom Hall, makaipaay dayta iti dayaw ken Jehova ken saan a masayang ti donasion dagiti kakabsat.

Masapul a saantayo a liwliwayan a dalusan ken manteneren ti Kingdom Hall (Kitaen ti parapo 16, 18)

19. Ania ti aramidem tapno maipakitam ti panagraem kadagiti us-usarentayo a lugar a pagdayawan?

19 Ti Kingdom Hall ket maysa a pasdek a naidedikar ken Jehova. Ngarud, saan nga umiso nga ibagatayo a kukua dayta ti maysa nga indibidual wenno ti kongregasion, aniaman ti nakakabil iti titulona. Ipakita dagiti prinsipio ti Biblia a masapul a naan-anay a makitunostayo tapno masigurado a mausar ti pasdek sigun iti panggep a naibangon dayta. Makatulong ti amin a kakabsat iti daytoy a banag babaen ti panangipakita iti panagraem iti lugar a pagdaydayawantayo, panangited iti donasion para iti pannakaibangon dagiti baro a Kingdom Hall, ken panangipaay iti pigsa ken panawentayo a mangdalus ken mangmantener kadagiti bukodtayo a Kingdom Hall. No suportarantayo dagitoy nga urnos, ipakpakitatayo ti regta nga impakita ni Jesus para iti lugar a pagdaydayawan ken Jehova.—Juan 2:17.

^ par. 2 Nupay dagiti Kingdom Hall ti kangrunaan a mausig iti daytoy nga artikulo, agaplikar met dagiti prinsipio kadagiti Assembly Hall ken dadduma pay a pasilidad a mausar iti pudno a panagdayaw.