Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) HULIO 2015

Panagserbi ken Jehova Kadagiti “Makadidigra nga Aldaw”

Panagserbi ken Jehova Kadagiti “Makadidigra nga Aldaw”

“KUMAPKAPUY ti salun-atko,” insennaay ni Ernst nga agtawen iti nasuroken a 70. * Mariknam met kadin dayta? No tumataenganka ken mariknam a kumapkapsutkan, mabalin a matarusam dagiti nadeskribir iti Eclesiastes kapitulo 12. Iti bersikulo 1, ti al-aldaw dagiti natataengan ket naawagan kas ‘makadidigra nga al-aldaw.’ Nupay kasta, saanka a nailugnak iti nakaay-ay-ay a biag. Agbalin latta a makapnek ti biagmo ken siraragsak a makapagserbika ken Jehova.

TAGINAYONEM A NABILEG TI PAMMATIM

Dungdungnguenmi a natataengan a kakabsat, saan laeng a dakayo ti makapaspasar iti kasta. Napasaran met dagita dagiti adipen ti Dios idi panawen ti Biblia. Kas pagarigan, nagbalin a bulsek da Isaac, Jacob, ken Ahias. (Gen. 27:1; 48:10; 1 Ar. 14:4) ‘Kimmapsut’ met ni Sara. (Gen. 18:11, 12) “Saan a makarikna [ni Ari David] iti bara.” (1 Ar. 1:1) Ti nabaknang a ni Barzillai saanna met a maramanan ti kanenna ken mangngeg ti uni ti musika. (2 Sam. 19:32-35) Dinaeran met da Abraham ken Noemi ti ipupusay ti assawada.—Gen. 23:1, 2; Ruth 1:3, 12.

Ania ti nakatulong kadakuada nga agtalinaed a naragsak ken agmatalek ken Jehova? Gapu ta mamati ni Abraham iti kari ti Dios uray idi lakayen, “bimmileg babaen ti pammatina.” (Roma 4:19, 20) Kasapulantayo met ti nabileg a pammati. Dayta a pammati ket saan nga agdepende iti edad, abilidad, wenno kasasaad. Kas pagarigan, impakita latta ni Jacob ti nabileg a pammatina kadagiti kari ti Dios uray nakapsut, bulsek, ken naidaliten iti pagiddaan. (Gen. 48:1-4, 10; Heb. 11:21) Ita, agtawenen iti 93 ni Ines ken nakapuyen, ngem kinunana: “Mariknak nga inaldaw a bembendisionannak ni Jehova. Ti inaldaw a panangpampanunotko iti Paraiso ti mangmangted kaniak iti namnama.” Nagsayaat dayta a positibo nga espiritu!

Bumileg ti pammatitayo no agkararag, adalentayo ti Sao ti Dios, ken tumabunotayo kadagiti gimong. Mamitlo idi nga agkararag iti inaldaw ken kanayon a nagadal iti Sao ti Dios ti lakayen a propeta a ni Daniel. (Dan. 6:10; 9:2) “Saan a pulos limmanglangan idiay templo” ti baketen a balo a ni Ana. (Luc. 2:36, 37) No ikagumaam ti tumabuno ken makiraman kadagiti gimong, mapabilegmo ti bagim ken ti amin a tumabuno. Maragragsakan met ni Jehova kadagiti kararagmo uray no limitadon ti maaramidam.—Prov. 15:8.

Paregtaem ti sabsabali

Kayat ti adu kadakayo a matalek a kakabsatmi ti nalawag koma a makakita tapno makabasa ken napigsa pay a tumabuno kadagiti gimong, ngem mabalin a marigatankayo wenno saanyo pay ketdin a kabaelan. Ania ngarud ti mabalin nga aramidenyo? Usarenyo ti aniaman nga adda kadakayo. Adu kadagiti saan a makatabuno iti gimong ti dumngeg lattan iti telepono. Iti laksid ti nakapuy a panagkitana, agsagana ni Inge nga agtawen iti 79 para iti gimong babaen kadagiti dadakkel ti pannakayimprentana a pagbasaan nga ipapaay ti kakongregasionna.

Mabalin nga adda kenka ti kayat ti dadduma a maadda kadakuada—ti panawen. Apay a saanmo nga usaren dayta a dumngeg iti nairekord a libro ti Biblia ken naibatay-Biblia a literatura, palawag, ken audio drama? Mabalin met a tawagam dagiti kapammatiam tapno mangiranudka kadagiti naespirituan a sagut ken matagiragsakyo ti ‘agsisinnukat iti pammaregta.’—Roma 1:11, 12.

AGTALINAEDKA A NAREGTA NGA AGSERBI ITI DIOS

Ikasabam ti sao

“Makapaladingit ta saankon a maaramid dagiti dati nga ar-aramidek,” insennaay ni Christa nga agtawen iti nasuroken a 80. Kasano ngarud a makapagtalinaed a naragsak dagiti nataengan? Kuna ni Peter nga agtawen iti 75: “Babaen ti panagbalin a positibo a saanmo a kanayon a pampanunoten ti saanmon a maaramid  no di ket maragsakanka a mangaramid iti kabaelam nga aramiden.”

Adda kadi mapanunotmo a mabalinmo pay a pakiramanan a wagas ti panangasaba? Saanen a makapagbalaybalay ni Heidi kas iti sigud nga ar-aramidenna. Ngem uray no agtawenen iti nasurok a 80, sinursurona ti agusar iti kompiuter tapno agaramid kadagiti surat. Dadduma a natataengan ti mangirugi iti saritaan mainaig iti Biblia bayat ti panagtugawda kadagiti parke wenno pagurayan iti lugan. No agnanaedkan iti pagtaengan dagiti natataengan, mabalin kadi nga agbalin a “teritoriam” dayta babaen ti panangasabam kadagiti doktor ken nurse a mangas-asikaso kenka ken ti dadduma pay nga agtataeng iti dayta?

Agbalinka a naparabur

Idi lakayen ni Ari David, sipipinget a sinuportaranna ti nadalus a panagdayaw. Nangted kadagiti pondo ken inorganisarna ti pannakaibangon ti templo. (1 Cron. 28:11–29:5) Mabalinmo met ti aktibo a makiraman iti sangalubongan a trabaho maipaay iti Pagarian. Mabalin kadi a suportaram dagiti payunir wenno dadduma pay a nareregta a kakabsat iti kongregasionyo babaen iti makapabileg a sasao, bassit a sagut, wenno uray simple laeng a merienda? Mabalinmo met nga iraman iti kararagmo dagiti ubbing, agtutubo, pamilia, dagiti agserserbi iti amin-tiempo, dagiti masakit, ken dagiti addaan iti nadagsen nga annongen.

Dungdungnguenmi a natataengan, maipatpategkayo ken uray ti panagserbiyo. Saannakayto a pulos nga ibelleng ti nailangitan nga Amatayo. (Sal. 71:9) Ay-ayaten ken ipatpategnakayo ni Jehova. Iti saanen a mabayag, umadunto dagiti tawentayo ngem awanto ti pakarigatan wenno didigra a mapasarantayo. Imbes ketdi, napigsa ken nakasalsalun-attayto nga agserbi iti agnanayon iti naayat a Diostayo a ni Jehova!

^ par. 2 Nabaliwan ti dadduma a nagan.