Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) HULIO 2015

Napateg Kadi nga Adda Makakita iti Ar-aramidem?

Napateg Kadi nga Adda Makakita iti Ar-aramidem?

SAAN nga agdadamo da Bezalel ken Oholiab iti panagbangon. Kas tagabo idiay Egipto, nakaad-adu dagiti inaramidda a ladrilio a mabalin a saandan a kayat a lagipen. Ngem napalabasen dagidi a tawtawen. Agbalindan a nalaing ken nangato ti saadna a trabahador a mangidaulo iti pannakaibangon ti tabernakulo. (Ex. 31:1-11) Nupay kasta, sumagmamano laeng ti nakakita iti makapaamanga a gapuananda. Maupayda kadi ta saanda a nabigbig? Napateg kadi nga adda nakakita iti trabahoda? Napateg kadi nga adda makakita iti ar-aramidem?

NAKAPIMPINTAS NGA OBRA A SUMAGMAMANO LAENG TI NAKAKITA

Dadduma kadagiti dekorasion iti tabernakulo ket nagpipintas nga obra. Alaentayo a pagarigan dagiti balitok a kerubin a naiparabaw iti lakasa ti tulag. Inladawan dagita ni apostol Pablo kas “nadayag.” (Heb. 9:5) Panunotem ti makapaamanga a kinapintas dagiti kitikit a naaramid iti napitpit a balitok!—Ex. 37:7-9.

No masarakan koma ita dagiti kitikit nga inaramid da Bezalel ken Oholiab, rumbeng laeng a maikabil iti kasayaatan a museo, a pangapresiaran ti adu a tattao. Ngem idi tiempo a naaramid dagita, mano ngata ti nakakita iti kinapintasda? Naikabil dagiti kerubin iti Kasasantuan, ngarud ti laeng nangato a padi ti makakita kadagita no sumrek iti maminsan ti makatawen iti Aldaw ti Panangabbong. (Heb. 9:6, 7) Gapuna, manmano laeng ti nakakita kadagita.

MAPNEK URAY SAAN A MAPADAYAWAN

No sika koma ni Bezalel wenno ni Oholiab ken nagbambannogam nga inaramid ti kasta a nakapimpintas nga obra, ania ti mariknam no manmano laeng ti nakakita iti inaramidmo? Ita, dadduma ti makarikna nga adda nagapuananda no mapadayawan ken no apresiaren ida ti sabsabali. Pangrukodanda dayta iti pateg ti nagbannoganda. Ngem naiduma dagiti adipen ni Jehova. Kas kada Bezalel ken Oholiab, mapnektayon iti panangaramid iti pagayatan ni Jehova ken pananggun-od iti anamongna.

Idi kaaldawan ni Jesus, gagangay nga agkararag dagiti lider ti relihion tapno iparammag dayta iti sabsabali. Nupay kasta, insuro ni Jesus ti sabali a pamay-an: Agkararag a sipapasnek a saan a tapno  padayawan ti sabsabali. Ania ti resulta dayta? ‘Ni Amam a kumitkita iti nalimed supapakannakanto.’ (Mat. 6:5, 6) Nalawag a saan a napateg ti maibaga ti dadduma iti kararagtayo no di ket no ania ti maikuna ni Jehova. Ti opinionna ti mamagbalin a napateg iti kararagtayo. Kasta met laeng iti aniaman a magapuanantayo iti panagserbitayo iti Dios. Saan a ti pammadayaw ti sabsabali ti nakaibatayan ti kinapateg ti magapgapuanantayo; no di ket no makaay-ayo dayta ken Jehova a ‘kumitkita iti nalimed.’

Idi nairingpas ti tabernakulo, “rinugian ti ulep nga abbongan ti tolda ti gimong, ket ti dayag ni Jehova pinunnona ti tabernakulo.” (Ex. 40:34) Nalawag a pakakitaan dayta iti anamong ni Jehova! Ania ngata ti narikna da Bezalel ken Oholiab iti dayta a tiempo? Nupay saan a naikitikit dagiti naganda iti inaramidda, mabalin a napnekda a makaammo a binendisionan ti Dios ti amin a panagbannogda. (Prov. 10:22) Kadagiti simmaruno a tawen, sigurado a naragsakanda a nakakita a nagtultuloy a nausar ti inaramidda iti panagserbi ken Jehova. Inton agungar da Bezalel ken Oholiab iti baro a lubong, maragsakandanto a makaammo a nausar ti tabernakulo iti pudno a panagdayaw iti agarup 500 a tawen!

Uray no awan makakitkita iti napakumbaba ken natulok a panagserbim, makitkita dayta ni Jehova!

Iti organisasion ni Jehova ita, saan a maipakpakaammo no siasino dagiti animator (eksperto iti panagaramid kadagiti cartoons), artist, musikero, retratista, agipatpatarus, ken mannurat. Arigna awan “makakitkita” iti ar-aramidenda. Kasta met laeng kadagiti nakaad-adu a trabaho a maar-aramid iti nasurok a 110,000 a kongregasion iti intero a lubong. Siasino ti makakitkita iti mangas-asikaso iti kuenta no aramidenna ti report ti kuenta iti ngudo ti bulan? Siasino ti kumitkita no isagana ti sekretario ti report a nagapuanan ti kongregasion iti ministerio? Siasino ti makakitkita iti maysa a kabsat a lalaki wenno babai a mangtartarimaan iti Kingdom Hall?

Iti unos ti panagbiagda, awan naawat da Bezalel ken Oholiab a tropeo, medalia, wenno plake a pammadayaw iti nakapimpintas a disenio nga inaramidda ken iti nalagda nga imbangonda. Ngem adda nagun-odda a napatpateg ngem dagita—ti anamong ni Jehova. Masiguradotayo a nakita ni Jehova ti trabahoda. Tuladentayo ngarud ti kinapakumbaba ken ti kinatulokda nga agserbi.