Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) HUNIO 2015

‘Kasapulam ti Panagibtur’

‘Kasapulam ti Panagibtur’

KALPASAN a nabautisaran ni Anita * kas maysa a Saksi ni Jehova, siuulpit a binusor ni lakayna. “Pinawilannak a makigimong ken imparitna pay uray ti panangdakamatko iti nagan ti Dios,” kinuna ni Anita. “Makapungtot ni lakayko uray no ibagak laeng ti nagan a Jehova.”

Sabali manen a pannubok ken Anita ti panangisurona kadagiti annakna maipapan ken Jehova. “Naiparit iti mismo a pagtaengak ti panagdayaw ken Jehova. Saanak a nawaya a mangyadal kadagiti annakko, ken diak maitugot ida iti gimong.”

Kas iti kapadasan ni Anita, maysa a pannubok iti kinamatalek ti maysa a Kristiano ti ibubusor ti pamilia. Kasta met ti nakaro a sakit, ipapatay ti anak wenno asawa, wenno ti panagtallikud ti maysa a miembro ti pamilia ken Jehova. Ngarud, ania ti makatulong iti maysa a Kristiano nga agtalinaed a matalek ken Jehova?

No maipasangoka kadagiti kasta a kasasaad, ania ti aramidem? Kinuna ni apostol Pablo: ‘Kasapulam ti panagibtur.’ (Heb. 10:36) Ngem ania ti makatulong kenka nga agibtur?

AGPATULONGKA KEN JEHOVA

Maysa kadagiti kangrunaan a pamay-an tapno maaddaantayo iti bileg a mangibtur kadagiti pannubok ket ti panagpatulong ken Jehova. Kasta ti inaramid ni Ana. Iti maysa nga aldaw ti Lunes, natay ti lakayna a nakadennana iti 30 a tawen. Kinunana: “Agtawen laeng idi iti 52 ket saanen a nakaawid pay manipud iti trabahona.”

Kasano a nadaeran ni Ana dayta? Nakatulong kenkuana ti panagtrabahona manen gapu ta agkalikagum ti trabahona iti panangipamaysa. Nupay kasta, saan a naan-anay a naikkat ti saem a marikriknana. Kinunana: “Nagpakpakaasiak ken Jehova a tulongannak koma a mangiliwliwag iti pukawko.” Sinungbatan kadi ni Jehova dagiti kararagna? Mamati ni Ana a nasungbatan dayta. Kinunana: “Ti talna a ti Dios laeng ti makaited, binang-aranna ti kararuak ken ti panunotko. Masiguradok a pagungarento ni Jehova ni lakayko.”—Fil. 4:6, 7.

Inkari ti “Managdengngeg iti kararag” nga ipaayna ti amin a kasapulan dagiti adipenna tapno makapagtalinaedda a matalek kenkuana. (Sal. 65:2) Umanamongka kadi a makapabileg iti pammati daytoy a pammatalged? Matulongannaka kadi dayta a mangkita a kabaelam met ti agibtur?

MAKATULONG DAGITI NAKRISTIANUAN A GIMONG

Tultulongan ni Jehova dagiti adipenna babaen iti kongregasion Kristiano. Kas pagarigan, idi naipasango ti kongregasion idiay Tesalonica iti nakaro a pannakaidadanes, indagadag ni Pablo kadakuada: “Itultuloyyo a liwliwaen ti maysa ken maysa ken pabilgen ti maysa ken maysa, a kas iti pudno nga ar-aramidenyo.” (1 Tes. 2:14; 5:11) Babaen ti ayat ken panagtitinnulong, napagballigian dagiti Kristiano idiay Tesalonica dayta a pannubok iti pammatida. Ti panagibturda ket nagsayaat nga ulidan kadatayo ita ken makaisuro tapno makapagibturtayo.

Ti nasinged a pannakigayyemtayo kadagiti kakongregasiontayo tulongannatayo a makapagririnnanud iti “bambanag a makapabileg iti maysa ken maysa.” (Roma 14:19) Nakapatpateg daytoy nangruna kadagiti narigat a kasasaad. Adda dagiti gundaway a naipasango iti rigat ni Pablo, ngem pinabileg ni Jehova nga agibtur babaen kadagiti padana a Kristiano. Kas pagarigan, idi impaw-it ni Pablo ti kablaawna kadagiti kakabsat a taga-Colosas, kinunana maipapan kadakuada: “Nagbalinda a makapabileg a tulong kaniak.” (Col. 4:10, 11) Wen, ti ayatda ken Pablo ti nangtignay kadakuada a mangliwliwa ken mangpabileg kenkuana idi kasapulanna. Mabalin a pinaregta ken pinabilegdaka metten dagiti kakongregasionmo.

SUPORTA DAGITI PANGLAKAYEN

Nangipaay ti Dios iti sabali pay a paggapuan iti tulong iti kongregasion Kristiano—dagiti panglakayen.  Dagitoy a nataengan iti naespirituan a lallaki ket agbalinda a kas “paglemmengan a lugar manipud iti angin ken lugar a pakaitalimengan manipud iti natutudo a bagyo, kas barbaresbes ti danum iti awanan danum a pagilian, kas salinong ti maysa a nadagsen a napasdok a bato iti napaksuyan a daga.” (Isa. 32:2) Makapabang-ar a talaga dayta! Ap-aprobetsarem kadi dayta a naayat a probision? Ti pammaregta ken suporta dagiti panglakayen ket makatulong kenka nga agibtur.

Siempre, saan a marisut dagiti panglakayen ti amin a problemam. Imperpektoda a tattao nga “addaan kadagiti isu met laeng a pagkapuyan a kas kadatayo.” (Ara. 14:15) Nupay kasta, adda pagimbaganna no ikararagandatayo. (Sant. 5:14, 15) Maysa a kabsat a lalaki a taga-Italy ti nabayagen nga agib-ibtur iti muscular dystrophy, maysa a sakit a kumarkaro bayat ti panaglabas ti panawen. Kinunana: “Nakatulong kaniak nga agibtur ti panangipateg ken ayat dagiti kakabsat, kasta met ti kanayon nga isasarungkarda.” Mabalin kadi a naan-anay nga aprobetsarem ti naayat a probision ni Jehova—dagiti panglakayen?

TAGINAYONEM TI REGULAR A NAESPIRITUAN A RUTINAM

Adda pay dadduma a masapul nga aramidentayo tapno makapagibturtayo. Ti maysa ket ti panangtaginayon iti regular a naespirituan a rutina. Usigentayo ti kasasaad ti 39 ti tawenna a ni John a nadayagnos nga addaan iti saan a gagangay a kanser. Kinunana: “Panagriknak ket kaslaak la naallilaw gapu ta ubingak pay laeng.” Iti dayta a tiempo, tallo pay laeng ti tawen ti anak ni John. Intuloy ni John: “Kayatna a sawen a saan laeng a ti anakmi ti asikasuen ni baketko no di ket masapul pay nga aywanannak ken kaduaennak iti doktor.” Gapu iti chemotherapy, mapakpaksuyan ken makasarsarwa ni John. Ngem saan la a dayta. Naidalit met ti amana isu a masapul a maaywanan.

Kasano a nadaeran ni John ken ti pamiliana dayta a narigat a kasasaad? “Iti laksid ti pannakapaksuyko, sigsiguraduek a regular latta ti naespirituan a rutinami,” kinunana. “Tinabunuanmi ti amin a gimong, linawas a mangasabakami, ken regular ti panagdaydayaw ti pamiliami uray no narigat dayta para kadakami.” Wen, nakita ni John a ti panangtaginayon iti espiritualidad ti tulbek tapno makapagibtur ti maysa. Ania ti maibalakad ni John kadagiti agpaspasar iti narigat a kasasaad? Kunana: “Bayat nga in-inut nga agmawmaw ti pannakakigtotmo iti sakitmo, ti bileg ken ayat ni Jehova ti mangikkat iti kanayon a panangpampanunotmo iti dayta. Mapapigsanakayo ni Jehova, a kas kaniak.”

Awan duadua a babaen iti tulong ni Jehova, kabaelantayo nga ibturan dagiti narigat a kasasaad a mabalin a maipasango kadatayo ita wenno iti masanguanan. Ngarud, agpatulongtayo ken Jehova, makisinningedtayo kadagiti kakongregasiontayo, agpatulongtayo kadagiti Kristiano a panglakayen, ken taginayonentayo ti regular a naespirituan a rutinatayo. No aramidentayo dagita, agtigtignaytayo maitunos iti sasao ni Pablo: “Kasapulanyo ti panagibtur.”

^ par. 2 Nabaliwan ti dadduma a nagan.