Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan —Pagadalan nga Edision  |  Hunio 2015

Agbiagkayo Maitunos iti Modelo a Kararag—Paset II

Agbiagkayo Maitunos iti Modelo a Kararag—Paset II

“Ti . . . Amayo ammona no ania ti bambanag a kasapulanyo.”—MAT. 6:8.

1-3. Apay a masigurado ti maysa a kabsat a babai nga ammo ni Jehova ti kasapulantayo?

SAAN a pulos malipatan ni Lana ti kapadasanna idiay Germany iti kalgaw ti 2012. Nariknana a nasungbatan ti dua kadagiti espesipiko a kararagna. Ti umuna ket inkararagna bayat a nakalugan iti tren a mapan iti airport. Kiniddawna ken Jehova a makapangasaba koma. Idi simmangpet iti airport, naammuanna a naipabigat ti biahena. Iti dayta a gundaway, espesipiko manen a nagkararag ken Jehova ta dandani nagastonan ti amin a kuartana ken awan ti pagdagusanna.

2 Kalpasan la unay ti maikadua a panagkararag ni Lana, adda nangngegna a nangibaga, “Komusta, Lana! Ania ti ar-aramidem ditoy?” Ti lalaki a nangawag kenkuana ket dati a kaklasena. Intulod da nanang ken lolana iti airport ta mapan idiay South Africa. Idi naammuan ni Elke a nanang ti kaklasena ti problema ni Lana, siraragsak nga inawisna nga umian pay laeng idiay balayda. Nakaad-adu ti saludsodda ken Lana maipapan iti patpatienna ken iti trabahona kas amin-tiempo a manangaskasaba.

3 Kabigatanna, kalpasan ti pammigatda, sinungbatan ni Lana ti  adu pay a saludsodda maipapan iti Biblia. Kiniddaw ni Lana ti adres ken numero ti teleponoda tapno maawaganna ida ken adda mangsarungkar kadakuada. Natalged a nakaawid ni Lana ket intultuloyna ti nagserbi kas regular pioneer. Maikunana a ti “Managdengngeg iti kararag” ti nangimaniobra kadagiti bambanag.—Sal. 65:2.

4. Aniada a kasapulan ti usigentayo?

4 No bigla nga adda tumaud a problematayo, mabalintayo ti agkararag a dagus ken Jehova, ket maragsakan a dumngeg iti kararagtayo. (Sal. 34:15; Prov. 15:8) Ngem no utobentayo ti modelo a kararag, mabalin nga adda dagiti napatpateg a kasapulantayo a saantayo a madakdakamat iti kararagtayo. Kas pagarigan, usigentayo no kasano nga agminar dagiti naespirituan a kasapulantayo iti tallo a maudi a kiddaw iti modelo a kararag. Adda kadi pay maaramidantayo tapno maitunostayo ti biagtayo iti maikapat a kiddaw maipapan iti inaldaw a taraontayo?—Basaen ti Mateo 6:11-13.

ITEDMO KADAKAMI TI TARAONMI ITA NGA ALDAW

5, 6. Apay a napateg a kiddawentayo latta ti inaldaw a taraontayo uray no aduantayo iti material a bambanag?

5 Paliiwem ta iti daytoy a personal a kiddaw, nadakamat ti sasao a “taraonmi” ita nga aldaw saan ket a “taraonko” ita nga aldaw. Ni Victor, a maysa a manangaywan iti sirkito iti Africa, kinunana: “Kanayon nga agyamyamanak ken Jehova ta saanmi unay a pakaringgoran ken baketko ti kanenmi, ken uray ti pagabangmi. Siaayat nga ipapaay dagiti kakabsat ti kasapulanmi iti inaldaw. Ngem ikarkararagak met ida a makalung-awda koma iti rigat ti biag a pakaipaspasanguanda.”

6 No adda umdas nga abastotayo a taraon, mabalin a malagiptayo dagiti kakabsattayo a napanglaw wenno naapektaran iti kalamidad. Saantayo laeng koma nga ikararagan ida no di ket agtignaytayo maitunos iti kararagtayo. Kas pagarigan, mabalin nga iranudtayo ti aniaman nga adda kadatayo kadagiti kakabsat nga agkasapulan. Mabalin met a regular nga agdonartayo para iti sangalubongan a trabahotayo, ta ammotayo a mausar dayta iti nasayaat a wagas.—1 Juan 3:17.

7. Kasano nga inyilustrar ni Jesus ti balakadna a ‘ditay pulos maringgoran maipapan iti sumaganad nga aldaw’?

7 Idi dinakamat ni Jesus ti maipapan iti inaldaw a taraon, tuktukoyenna dagiti talaga a kasapulantayo. Gapuna, dinakamatna no kasano nga ay-aywanan ti Dios dagiti sabong iti away, ket kinunana: “Saan kadi nga ad-adda pay a kawesannakayto, dakayo a bassitan pammati? Gapuna dikay pulos maringgoran ket kunaenyo, . . . ‘Ania ti pagkawesmi?’” Kalpasanna, inulitna manen daytoy a napateg a balakad: “Dikay pulos maringgoran maipapan iti sumaganad nga aldaw.” (Mat. 6:30-34) Ipakita daytoy nga imbes nga agbalintayo a materialistiko, masapul a mapnektayo no adda la ketdin dagiti inaldaw a kasapulantayo. Ramanen dagita ti disente a pagtaengan, trabaho a pangsuporta iti pamilia, ken sirib tapno makaaramidtayo iti umiso a desision maipapan iti salun-at. Ngem no dagiti laeng material a kasapulantayo ti ikararagtayo, saantayo a balanse. Adda dagiti naespirituan a kasapulantayo nga isu ti napatpateg.

8. Ania ti ipalagip kadatayo ti panangdakamat ni Jesus iti inaldaw a taraon? (Kitaen ti ladawan iti rugi ti artikulo.)

8 Ti panangdakamat ni Jesus iti inaldaw a taraontayo ipalagipna ti panagkasapulantayo iti naespirituan a taraon. Kinuna ni Jesus nga Apotayo: “Ti tao agbiag, saan nga iti tinapay laeng, no di ket iti tunggal sao a rumrummuar iti ngiwat ni Jehova.” (Mat. 4:4) Masapul ngarud nga itultuloytayo nga ikararag ken Jehova nga itultuloyna ti mangipaay iti naespirituan a taraon iti umiso a tiempo.

 “PAKAWANENNAKAMI KADAGITI UTANGMI”

9. Apay a mayarig iti ‘utang’ dagiti basoltayo?

9 Apay nga inusar ni Jesus ti sao nga “utangmi,” ket iti sabali a gundaway, inusarna ti sao a “basbasolmi”? (Mat. 6:12; Luc. 11:4) Iti napalabas a nasurok nga 60 a tawen, kastoy ti kinuna daytoy a magasin: “Ti panaglabsingtayo iti linteg ti Dios, arigna nakautangtayo kenkuana. . . . No agbasoltayo, mabalin a singiren ken babawyen ti Dios ti biagtayo. . . . Mabalinna a gupden ti nasayaat a relasionna kadatayo. . . . Kalikagumanna ti ayat ken panagtulnogtayo isu a no agbasoltayo, saantayo a subsubadan ti ayat nga utangtayo kenkuana, ta ti panagbasol ket saan a panangipakita iti ayat iti Dios.”—1 Juan 5:3.

10. Ania ti pangibatayan ni Jehova iti panangpakawanna iti basbasoltayo, ket ania koma ti panagriknatayo iti dayta?

10 Masapul nga inaldaw a dumawattayo iti pammakawan. Ipakita dayta a ti daton a subbot ni Jesus ti kakaisuna a pangibatayan ti Dios a mangikkat kadagiti basoltayo. Nupay naibayad dayta a subbot dandani 2,000 a tawen ti napalabasen, masapul nga ipategtayo a kasla iti sagut a kaaw-awattayo laeng. Ti ‘gatad a naisubbot’ iti biagtayo ket “napateg unay” nga awan a pulos ti imperpekto a tao a makabalin a mangtupag iti dayta. (Basaen ti Salmo 49:7-9; 1 Pedro 1:18, 19.) Gapuna, ditay koma mamingga nga agyaman ken Jehova gapu iti dayta a nakapatpateg a sagut. Ipalagip pay ti sasao a “basbasolmi,” saan ket a “basbasolko,” a kasapulan ti amin nga adipen ti Dios dayta a naayat a probision. Nalawag ngarud a kayat ni Jehova a saantayo laeng a maseknan iti naespirituan a pagimbagantayo no di ket uray iti pagimbagan dagiti kakabsattayo, a pakairamanan dagiti nakabasol kadatayo. Masansan a nalag-an laeng a basol dagita, ngem maipakitatayo a pudno nga ay-ayatentayo dagiti kakabsattayo no pakawanentayo ida, a kas iti Dios a siaasi a mangpakawan kadatayo.—Col. 3:13.

Pakawanennaka ti Dios no pakawanem ti sabsabali (Kitaen ti parapo 11)

11. Apay a napateg a pakawanentayo ti sabsabali?

11 Gapu ta imperpektotayo, no dadduma agsakit ti nakemtayo iti sabsabali. (Lev. 19:18) No isarsaritatayo dayta, mabalin a datayo ti isakit wenno patien ti dadduma ket mabalin a mabingay ti dasigan dagiti kakabsat. No ipalubostayo nga agtultuloy ti kasta a kasasaad, ipakpakitatayo a saantayo nga ipatpateg ti asi ti Dios ken ti subbot. No  saantayo a mamakawan, saannatayo met a pakawanen ti Amatayo ken saantayo a magun-od ti bendision nga iyeg ti subbot nga indaton ti Anakna. (Mat. 18:35) Inlawlawag ni Jesus dayta kalpasan nga inyebkasna ti modelo a kararag. (Basaen ti Mateo 6:14, 15.) Kamaudiananna, tapno pakawanennatayo ti Dios, masapul a liklikantayo ti agaramid iti nadagsen a basol.—1 Juan 3:4, 6.

“SAANNAKAMI NGA IYEG ITI PANNAKASULISOG”

12, 13. (a) Ania ti napasamak kalpasan a nabautisaran ni Jesus? (b) Apay a saantayo a mapabasol ti sabali no matnagtayo iti sulisog? (c) Ania ti naibanag ti panagmatalek ni Jesus agingga iti ipapatayna?

12 Ti panangusigtayo iti napasamak kalpasan a nabautisaran ni Jesus ket makatulong tapno maawatantayo no apay a masapul a kiddawentayo daytoy: “Saannakami nga iyeg iti pannakasulisog.” Babaen ti espiritu ti Dios, naiturong idiay let-ang ni Jesus. Apay? “Tapno sulisogen ti Diablo.” (Mat. 4:1; 6:13) Masdaawtayo kadi iti dayta? Saan, no la ketdi ta maawatantayo ti kangrunaan a rason no apay nga imbaon ti Dios ti Anakna ditoy daga. Immay ni Jesus ditoy daga tapno risutenna ti isyu a napataud idi linaksid da Adan ken Eva ti kalintegan ti Dios a mangituray. Kasapulan ti umdas a tiempo tapno masungbatan dayta. Kas pagarigan, nagkamali kadi ti Dios iti panangparsuana iti tao? Mabalin kadi nga agtulnog iti Dios ti perpekto a tao uray pay nakaro ti panangsulisog “daydiay nadangkes”? Nasaysayaat kadi no saan nga iturayan ti Dios dagiti tattao a kas iti kinuna ni Satanas? (Gen. 3:4, 5) Ti sungbat dagita a saludsod ket agkalikagum iti napaut a tiempo. Nupay kasta, makitanto dagiti masirib a parsua a ti panangituray ni Jehova ket isu ti kasayaatan.

13 Nasantuan ni Jehova isu a saanna a pulos sulisogen ti asinoman nga agaramid iti dakes. Imbes ketdi, ti Diablo ti “Mannulisog.” (Mat. 4:3) Kabaelan ti Diablo ti agaramid iti pakasulisogantayo. Ngem agdepende iti maysa no agpasulisog. (Basaen ti Santiago 1:13-15.) Dagus a pinagkedkedan ni Jesus ti tunggal sulisog ni Satanas babaen iti panagkotarna iti maitutop a sasao manipud iti Kasuratan. Gapuna, sinuportaran ni Jesus ti kalintegan ni Jehova a mangituray. Ngem saan a simmardeng ni Satanas. Naguray “agingga iti sabali pay a mainugot a tiempo.” (Luc. 4:13) Intultuloy a kinontra ni Jesus ti amin a panangikagumaan ni Satanas a mangdadael iti kinamatalekna. Pinatalgedan ni Kristo a nalinteg ti panangituray ni Jehova ken pinaneknekanna a kabaelan ti perpekto a tao ti agtalinaed a matalek uray maipasango iti nakaro a pannubok. Kaskasdi, padpadasen latta a sulisogen ni Satanas dagiti pasurot ni Jesus, a pakairamanam.

14. Ania ti masapul nga aramidentayo tapno saantayo a matnag iti sulisog?

14 Agtultuloy pay laeng ti isyu maipapan iti kalintegan ti Dios a mangituray, isu a ni Jehova ipalpalubosna iti Mannulisog nga usarenna ti lubong tapno sulisogennatayo. Saannatayo a sulsulisogen ti Dios. Imbes ketdi, agtalek ken kayatnatayo a tulongan. Gapu ta inikkannatayo iti wayawaya nga agpili, saannatayo a dagus nga ilisi ni Jehova iti sulisog. Adda dua a banag a masapul nga aramidentayo—agtalinaedtayo a siririing iti naespirituan ken itultuloytayo ti agkararag. Kasano a sungbatan ni Jehova dagiti kararagtayo?

Taginayonem ti espiritualidad ken regtam a mangasaba (Kitaen ti parapo 15)

15, 16. (a) Ania ti dadduma a sulisog a masapul a labanantayo? (b) Asino ti mapabasol no matnagtayo iti sulisog?

15 Ipapaay ni Jehova ti nasantuan nga espirituna a mangpabileg ken tumulong kadatayo a mangkontra iti sulisog. Pakdaarannatayo met ti Dios babaen ti Saona ken ti kongregasion kadagiti situasion a masapul a liklikantayo, kas iti nalabes a panangibus iti  tiempo, kuarta, ken pigsatayo kadagiti saan a napateg a bambanag. Agnanaed da Espen ken Janne iti nabaknang a pagilian iti Europa. Iti adu a tawen, nagserbida kas regular pioneer iti paset ti pagilianda nga addaan iti dakkel a panagkasapulan. Idi nayanak ti inauna nga anakda, nagsardengda nga agpayunir. Dua itan ti annakda. Kinuna ni Espen: “Kanayon nga ikarkararagmi ken Jehova a saankami koma a masulisog ita ta saankamin a makabusbos iti adu a panawen kadagiti naespirituan nga aktibidad a kas idi. Ipakpakaasimi ken Jehova a tulongannakami a mangtaginayon iti espiritualidad ken regtami a mangasaba.”

16 Pornograpia ti sabali pay a sulisog a nalatak ita. No masulisogtayo iti dayta, saantayo a mapabasol ni Satanas. Apay? Saannatayo ngamin a mapilit ni Satanas ken ti lubongna a mangaramid iti saantayo a kayat. Dadduma ti natnag iti daytoy a sulisog gapu ta impalubosda nga agay-ayam iti panunotda dagiti dakes a bambanag. Ngem kabaelantayo a labanan dayta a kas ti ar-aramiden ti adu a kakabsattayo.—1 Cor. 10:12, 13.

“ISPALENNAKAMI ITI DAYDIAY NADANGKES”

17. (a) Kasano a makapagbiagtayo maitunos iti kiddaw nga ispalennakami iti daydiay nadangkes? (b) Ania a pannakabang-ar ti asidegen a sagrapentayo?

17 Tapno makapagbiagtayo a maitunos iti kiddaw nga “ispalennakami iti daydiay nadangkes,” masapul nga ikagumaantayo ti agbalin a ‘saan a paset ti lubong [ni Satanas].’ Masapul a saantayo nga “ayaten ti lubong [ni Satanas] wenno uray ti bambanag nga adda iti lubong.” (Juan 15:19; 1 Juan 2:15-17) Kasapulan ti panagregget tapno maaramidtayo dayta. Mabang-arantay la ketdi inton sungbatan ni Jehova ti kiddawtayo babaen iti panangpukawna ken Satanas ken ti lubongna! Ngem laglagipentayo nga idi naitappuak ni Satanas manipud langit, ammona nga ababan ti tiempona. Gapu iti pungtotna, aramidenna ti amin a kabaelanna a mangdadael iti kinamatalektayo. Masapul ngarud nga ikararagtayo a maispaltayo manipud kenkuana.—Apoc. 12:12, 17.

18. Ania ti itultuloytayo nga aramiden tapno maispaltayo iti panungpalan ti lubong ni Satanas?

18 Tartarigagayam kadi dayta a naragsak a pasamak? Itultuloymo ngarud nga ikararag nga umay ti Pagarian ti Dios a mangidaydayaw iti nagan ni Jehova ken mangitungpal iti pagayatanna ditoy daga. Itultuloymo ti agpannuray ken Jehova nga ipaayna dagiti naespirituan ken material a kasapulam. Wen, ikagumaam ti agbiag a maitunos iti modelo a kararag.