Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) MAYO 2015

 MANIPUD ITI ARCHIVES

Nakitana nga Ayat ti Nangimanehar iti Cafeteria

Nakitana nga Ayat ti Nangimanehar iti Cafeteria

DAGITI dadakkel a naespirituan a padaya ket naragsak a paset ti panagdaydayaw ti ili ni Jehova. Kadagita a panagtataripnong, masansan a mangnayon iti rag-oda ti panagririnnanud iti taraon.

Idi Septiembre 1919, nangangay dagiti Estudiante ti Biblia iti walo nga aldaw a kombension iti Cedar Point, Ohio, U.S.A. Dagiti hotel ti pagdagusan ken mangipaay metten iti taraon dagiti delegado, ngem rinibribu pay ti simmangpet ken ad-adu ngem iti ninamnama. Gapu iti kaadu ti tao, nabambannog dagiti waiter ken waitress isu a saanda pay laeng a nagtrabaho. Nagproblema ti manedyer ti cafeteria isu a dinamagna kadagiti agtutubo a delegado no mabalinda ti tumulong, ket adu ti nagboluntario. Maysa kadakuada ni Sadie Green. Kinunana: “Dayta ti damo a panag-waitress-ko, ngem nakaragragsakkami.”

Sierra Leone, 1982

Kadagiti simmaruno a tawen, nayurnos dagiti cafeteria kadagiti kombension ket dayta ti nangted kadagiti adu a nararagsak a boluntario iti gundaway a makapagserbi kadagiti kakabsatda. Nakatulong met daytoy kadagiti adu nga agtutubo tapno maaddaanda kadagiti naespirituan a kalat. Ni Gladys Bolton ti maysa kadagiti nagserbi iti cafeteria iti kombension idi 1937. Kinunana: “Adu ti naam-ammok a kakabsat a naggapu iti sabali a lugar, ket naammuak no kasano a nadaeranda dagiti problemada. Dayta ti nangtignay kaniak nga agpayunir.”

Kinuna ti maysa kadagiti timmabuno iti kombension a ni Beulah Covey: “Gapu iti kinapinget dagiti boluntario, naannayas ti taray dagiti bambanag.” Ngem narigat dagiti trabaho. Kas pagarigan, idi 1969, kasangsangpet ni Angelo Manera iti Dodger Stadium iti Los Angeles, California idi naammuanna a nadutokan gayam a mangidaulo iti cafeteria. Inaminna, “Talaga a naklaatak!” Karaman iti panagsagana iti dayta a kombension ti panangikali iti 400 a metro ti kaatiddogna a kanal a pakaikabilan ti tubo ti gas nga agturong iti paglutuan!

Frankfurt, Germany, 1951

Iti Sierra Leone idi 1982, masapul a dalusan dagiti nagagaget a boluntario ti karuotan sakbay a mangipatakderda iti cafeteria nga usarenda dagiti materiales nga adda kadakuada. Idi 1951, dagiti manangipamuspusan a kakabsat iti Frankfurt, Germany, nangabangda iti makina ti tren a mangpataud iti sengngaw a  pagluto iti taraon iti 40 a dadakkel a kaldero. Makaisagana dagiti serbidor iti taraon para iti 30,000 a tattao iti kada oras. Tapno lumag-an ti trabaho dagiti 576 a boluntario iti departamento ti paginnawan, nangitugot dagiti timmabuno iti bukodda a kutsilio ken tinidor. Iti Yangon, Myanmar, kinissayan dagiti maseknan a paraluto ti nagasang a sili a ramen ti taraon dagiti delegado a naggapu iti sabali a pagilian.

“NAKATAKDERDA A MANGAN”

Iti maysa a kombension iti United States idi 1950, maysa a bendision ken Annie Poggensee ti pannakipilana iti cafeteria uray no nabayag ken nakatakder iti kainaran. Kinunana: “Nagustuak ti naragsak a panagin-innestoria ti dua a sister a nagbarko manipud Europe.” Pagsarsaritaanda no kasano a tinulongan ida ni Jehova a makatabuno. Innayonna: “Awanen ti naragragsak pay ngem kadagidiay a kakabsat. Kasla dida madmadlaw ti pudot ken ti kapautda a nakipila.”

Seoul, Korea, 1963

Iti adu a dadakkel a kombension, naibangon dagiti dadakkel a tolda para iti cafeteria nga addaan kadagiti naintar a lamisaan. Nangangato dagita a lamisaan tapno agtakder dagiti mangan ken saanda nga agbayag tapno makasublat ti dadduma. Ania koma pay ti pamay-an tapno makapangaldaw ti rinibribu? Kinuna ti maysa a lalaki a saan a Saksi: “Naidumduma dayta a relihion. Nakatakderda a mangan.”

Nasdaaw dagiti opisial ti gobierno ken militar gapu iti nakitada a kinaannayas ken kinaurnos. Kalpasan nga ininspeksion ti maysa nga agserserbi iti United States Army ti cafeteria iti Yankee Stadium iti New York City, imbagana ken Major Faulkner iti British War Department a mapanna met inspeksionen ti cafeteria. Isu a napanda ken baketna iti “Triumphant Kingdom” nga asamblea iti Twickenham, England idi 1955. Kinunana nga ayat la ketdi ti mangimanmanehar iti dayta a cafeteria.

Iti pinullo a tawen, maragragsakan dagiti boluntario nga agisagana kadagiti nasustansia ken simple a taraon a pakagunggonaan dagiti makikombension. Ngem dakkel a trabaho dayta ta masansan a kasapulan ti adu a boluntario nga agtrabaho iti adu nga oras isu a maikapisda iti dadduma a paset wenno iti intero a programa. Iti maudi a paset ti dekada ‘70, napasimple ti pannakaipaay ti taraon kadagiti kombension iti adu a lugar, sa idi 1995, naipakaammo nga agbalonen dagiti mapan makikombension. Nabenepisiaran iti naespirituan a programa ken Nakristianuan a panaglalangen dagiti boluntario a nangisagana idi iti taraon. *

Ipatpateg la ketdi ni Jehova dagiti nagagaget a boluntario nga agserserbi para kadagiti kapammatianda! Mabalin nga il-iliwen ti dadduma dagidi a nararagsak nga aldaw a panagtrabahoda iti cafeteria. Ngem ti masiguradotayo ket: Ayat latta ti kangrunaan a ramen dagiti kombensiontayo.—Juan 13:34, 35.

^ par. 12 Siempre, adu latta ti gundaway dagiti boluntario a tumulong iti dadduma a departamento iti kombension.

Ammuem ti Ad-adu Pay

Um-ummongen ni Jehova ti Naragsak nga Ilina

Ania ti pagpadaan dagiti piesta iti Biblia ken dagiti kombension dagiti Saksi ni Jehova? Apay a napateg a tabunuantayo dagita?