Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan —Pagadalan nga Edision  |  Mayo 2015

Salsaludsod Dagiti Agbasbasa

Salsaludsod Dagiti Agbasbasa

Siasino ti Gog iti Magog a nadakamat iti libro ti Ezequiel?

Iti adun a tawen, inlawlawag dagiti publikasiontayo a ti nagan a Gog iti Magog ket nayawag ken Satanas a Diablo kalpasan a naitapuak manipud langit. Naibatay daytoy iti libro nga Apocalipsis a mangibagbaga a ni Satanas a Diablo ti mangidaulo iti sangalubongan a pannakaraut ti ili ti Dios. (Apoc. 12:1-17) Gapuna, naipagarup a ti Gog ket sabali pay a nagan ni Satanas.

Ngem dayta a panangilawlawag ket mangpataud kadagiti napapateg a saludsod. Apay? Usigentayo daytoy: Inton maabak ni Gog, kunaen kenkuana ni Jehova: “Kadagiti tumatayab nga agsippayot, kadagiti tumatayab nga addaan iti tunggal kita ti payak, ken kadagiti atap nga animal iti tay-ak itedkanto a kas taraon.” (Ezeq. 39:4) Kalpasanna, kunaen ni Jehova: “Iti dayta nga aldaw nga itdekto ken Gog ti maysa a disso sadiay, maysa a lugar a pagitabonan iti Israel . . . Sadiay itabondanto ni Gog ken ti intero a bunggoyna.” (Ezeq. 39:11) Ngem kasano koma a ti maysa nga espiritu ket kanen ‘dagiti tumatayab nga agsippayot ken dagiti atap nga animal iti tay-ak’? Kasano koma a ‘maitabon’ ni Satanas ditoy daga? Nalawag nga ipakita ti Biblia a ni Satanas ket maitapuak iti mangliwengliweng nga abut iti 1,000 a tawen, saan ket a makan wenno maitabon.—Apoc. 20:1, 2.

Naikuna nga iti ngudo ti 1,000 a tawen, maluk-atanto ni Satanas iti mangliwengliweng nga abut, ket “rummuarto tapno iyaw-awanna dagidiay nasion nga adda iti uppat a suli ti daga, da Gog ken Magog, tapno urnongenna ida a sangsangkamaysa maipaay iti gubat.” (Apoc. 20:8) Ngem kasano a mayaw-awan ni Satanas ni Gog no isu a mismo ni Gog? Ngarud, ni “Gog” ket saan nga isu ni Satanas, iti padto ni Ezequiel wenno iti libro ti Apocalipsis.

Asino ngarud ti Gog iti Magog? Masapul a sukimatentayo ti Kasuratan tapno maammuantayo. Saan laeng a dakamaten ti Biblia ti iraraut ti ‘Gog iti Magog’ no di ket dakamatenna pay ti iraraut ti “ari ti amianan” ken ti iraraut ti “ar-ari ti daga.” (Ezeq. 38:2, 10-13; Dan. 11:40, 44, 45; Apoc. 17:14; 19:19) Agduduma kadi ti tuktukoyen dagitoy? Saan. Nalawag nga ibagbaga ti Biblia a maymaysa dayta nga iraraut a nagduduma laeng ti pannakaawagna. Apay a kasta ti konklusiontayo? Gapu ta ibaga kadatayo ti Kasuratan nga amin a nasion ditoy daga ket karamanto iti daytoy maudi nga iraraut a mangiturong iti gubat ti Armagedon.—Apoc. 16:14, 16.

 No pagdidiligentayo dagitoy a Nainkasuratan a pannakatukoy ti maudi a pannakaraut ti ili ti Dios, nalawag a ti nagan a Gog iti Magog ket saan a tumukoy ken Satanas no di ket iti aliansa dagiti nasion. Idauluanto kadi ti piguratibo nga “ari ti amianan” daytoy nga aliansa? Ditay masigurado. Ngem agparang a maitunos dayta iti kinuna ni Jehova maipapan ken Gog: “Umaykanto manipud iti dissom, manipud iti kaadaywan a paspaset ti amianan, sika ken ti adu nga ili a maikuyog kenka, isuda amin sisasakayda kadagiti kabalio, maysa a dakkel a kongregasion, maysa a puersa militar a nakaad-adu.”—Ezeq. 38:6, 15.

Kinuna met ni propeta Daniel a kapanawenan ni Ezequiel maipapan iti ari ti amianan: “Addanto damdamag a mangriribuk kenkuana, manipud iti leleggakan ti init ken manipud iti amianan, ket sigurado a rummuarto nga addaan iti dakkel a pungtot tapno mangtalipupos ken tapno ipaayna ti adu iti pannakadadael. Ket ipasdeknanto dagiti pimmalasio a toldana iti nagbaetan ti naindaklan a baybay ken ti nasantuan a bantay ti Arkos; ket kasapulanto nga umay agingga iti pagnguduanna, ket awanto ti katulongan maipaay kenkuana.” (Dan. 11:44, 45) Nalawag nga umasping daytoy iti kunaen ti libro ti Ezequiel maipapan kadagiti aramidento ni Gog.—Ezeq. 38:8-12, 16.

Ania ti sumaruno a mapasamak kas resulta daytoy a maudi nga iraraut? Kinuna ni Daniel: “Kabayatan dayta a tiempo tumakderto [inton Armagedon] ni Miguel [Jesu-Kristo], ti dakkel a prinsipe nga agtaktakder [manipud 1914] maigapu iti annak ti ilim. Ket sigurado nga addanto dumteng a tiempo ti rigat [ti dakkel a rigat] a saan pay a naipagteng manipud kaadda ti maysa a nasion agingga iti dayta a tiempo. Ket bayat dayta a tiempo makalisinto ti ilim, tunggal maysa a masarakan a naisurat iti libro.” (Dan. 12:1) Daytoy a tignay ni Jesus a pannakabagi ti Dios ket nailadawan met iti Apocalipsis 19:11-21.

Ngem asino ti matuktukoy a “Gog ken Magog” iti Apocalipsis 20:8? Bayat ti maudi a pannubok iti ngudo ti 1,000 a tawen, dagiti agrebelde ken Jehova ipakitadanto ti kababalin a kas iti kababalin ti ‘Gog iti Magog’—dagiti nasion a mangraut iti ili Dios sakbay la unay ti Armagedon. Agpada ti pagtungpalan dagita a grupo—agnanayon nga ipapatay! (Apoc. 19:20, 21; 20:9) Maitutop ngarud a maawagan iti “Gog ken Magog” ti amin a rebelde iti ngudo ti Sangaribu a Tawen.

Kas napasnek nga agad-adal iti Sao ti Dios, sigagagar nga ur-urayentayo no asino ti agakemto kas “ari ti amianan” iti asidegen a masanguanan. Ngem siasinoman ti mangidaulo iti aliansa dagiti nasion, masiguradotayo ti dua a banag: (1) maabak ken matalipuposto ti Gog iti Magog ken dagiti buyotna; ken (2) ti agturturayen nga Aritayo a ni Jesu-Kristo isalakannanto ti ili ti Dios ken iyegna ida iti natalna ken natalged a baro a lubong.—Apoc. 7:14-17.