Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) MAYO 2015

 PAKASARITAAN TI BIAG

Ti Damo nga Ayatko Tinulongannak nga Agibtur

Ti Damo nga Ayatko Tinulongannak nga Agibtur

RUGRUGI idi ti kalgaw ti 1970. Nakaiddaak iti katrek iti Valley Forge General Hospital iti Phoenixville, Pennsylvania, United States. Al-alaen ti maysa a nurse a lalaki ti presion ti darak kada 30 a minuto. Maysaak a soldado nga agtawen iti 20 nga agsagsagaba iti nakaro a sakit. Gapu iti kasasaadko, madanagan ti nurse nga in-inauna bassit ngem siak. Idi agtultuloy a bumaba ti presion ti darak, kinunak kenkuana, “Awan pay siguro ti nakitam a natay, ania?” Uray la bimsag sa kinunana, “Wen, awan pay.”

Kasla awan idin ti namnamak. Ngem apay ngamin a nayospitalak? Palubosandak a mangestoria iti kapadasak.

TI KAPADASAK ITI GUBAT

Naaddaanak iti sakit idi agtrabtrabahoak kas katulongan iti operating room bayat ti gubat iti Vietnam. Maragsakanak a tumulong kadagiti masakit ken nasugatan, ken kayatko ti agbalin a siruhano. Simmangpetak iti Vietnam idi Hulio 1969. Kas kadagiti padak a kassangpet, inikkandak iti makalawas a mangiruam iti bagik iti naiduma a time zone ken nabara a temperatura.

Apaman a nagtrabahoak iti maysa nga ospital iti Mekong Delta, iti Dong Tam, nagsangpet ti nagadu a helikopter a napno kadagiti nasugatan ken natay. Ipatpategko ti pagiliak ken magustuak ti trabahok, isu a kayatko ti tumulong a dagus. Naasikaso dagiti nasugatan sa naipan a dagus iti bassit a de-aircon a siled a metal container a nagserbi kas pagoperaan. Iti dayta a nakail-ilet a siled, ikagkagumaan ti siruhano, anestesiologo, ken dua a nurse ti mangsalbar iti biag. Nadlawko a saan a naibaba dagiti dadakkel a nangisit a bag a karga dagiti helikopter. Naammuak a naglaon dagidiay kadagiti nasinasina a paset ti bagi dagiti natay a soldado gapu iti gubat. Dayta ti kapadasak.

TI PANANGBIROKKO ITI DIOS

Idi agtutuboak, addan ammok maipapan iti kinapudno

Idi agtutuboak, addan ammok maipapan iti kinapudno nga isursuro dagiti Saksi ni Jehova. Nakipagadal iti Biblia ti ipatpategko nga ina kadagiti Saksi ngem saan a nakapagpabautisar. Magustuak idi ti makipagadal a kadua ni Nanang. Naminsan, kaduak ti agsiuman kaniak idi nalabsanmi ti maysa a Kingdom Hall. Dinamagko  kenkuana, “Ania dayta?” Kinunana: “Saanmo nga as-asitgan dagita a tattao!” Ay-ayatek ken agtalekak iti agsiuman kaniak isu a nagtulnogak. Manipud idin, diak nakasaritan dagiti Saksi ni Jehova.

Idi nakaawidakon manipud Vietnam, nariknak a kasapulak ti Dios. Nabibineg ti emosionko gapu kadagiti nasaem a kapadasak iti gubat. Kasla awan ti naan-anay a makaawat iti kasasaad iti Vietnam. Malaglagipko dagiti agprotprotesta nga aw-awaganda dagiti soldado ti Amerika kas “baby killers” gapu kadagiti damag a mapappapatay dagiti inosente nga ubbing iti gubat.

Tapno mapennek ti naespirituan a kasapulak, tinabunuak dagiti serbisio ti nadumaduma a relihion. Ay-ayatek ti Dios ngem diak magustuan ti ar-aramiden dagidiay a relihion. Kamaudiananna, nakigimongak iti Kingdom Hall dagiti Saksi ni Jehova iti Delray Beach, Florida. Aldaw idi ti Domingo iti Pebrero 1971.

Idi simrekak, malmalpasen ti palawag publiko isu a nagtalinaedak para iti Panagadal ti Pagwanawanan. Diak malagipen ti topiko a naadal ngem malagipko pay dagiti ubbing a mangbirbirok kadagiti teksto iti Bibliada. Natukay ti pusok iti dayta! Dimngeg ken nagpaliiwak a naimbag. Idi pumanawakon iti Kingdom Hall, inasitgannak ti maysa a naayat a kabsat nga agarup 80 ti tawennan. Jim Gardner ti naganna. Inyawatna ti libro a Ti Kinapudno a Mangiturong iti Biag nga Awan Inggana, sana kinuna, “Pangngaasim ta alaem daytoy.” Nagtulagkami nga irugimi ti agadal iti Biblia iti agsapa ti Huebes.

Masapul nga agtrabahoak iti dayta a rabii ti Domingo. Agob-obraak iti emergency room ti maysa a pribado nga ospital iti Boca Raton, Florida, manipud 11:00 ti rabii agingga iti 7:00 ti bigat. Naulimek ti rabii isu a binasak ti libro a Kinapudno. Inasitgannak ti maysa a senior nurse, inagawna ti libro ken kinitana ti akkub sa imbugkawna, “Apay, kayatmo met ti agbalin a kas kadakuada?” Inagawko ti librok sa kinunak, “Kagudua pay laeng ti nabasak, ngem kasla kayatkon.” Pinanawannak, ket inleppasko a binasa ti libro iti dayta a rabii.

Ti nangyadal kaniak a ni Jim Gardner, maysa a napulotan a kabsat a makaam-ammo ken Charles Taze Russell

Idi agadalkamin iti Biblia ken Kabsat Gardner, dinamagko, “Ania ngarud ti adalenta?” Insungbatna, “Ti libro nga intedko kenka.” Kinunak, “Nabasakon.” Siaalumamay a simmungbat, “Mayat ngarud, ngem adalenta laeng ti umuna a kapitulo.” Nasdaawak ta nagadu pay gayam ti masapul a maammuak. Impabasana ti adu a teksto iti Bibliak a King James a red-letter edition (naisurat iti nalabaga dagiti sasao ni Jesus). Masursurok met laengen ti maipapan iti pudno a Dios a ni Jehova. Iti dayta a bigat, tallo a kapitulo iti libro a Kinapudno ti inadalmi ken Kabsat Gardner nga inawagak iti Jim. Nanipud idin, tallo a kapitulo ti adalenmi iti kada bigat ti Huebes. Magusgustuak dagidi a panagadalmi. Agyamyamanak ta inyadalannak ti maysa  a napulotan a kabsat a makaam-ammo ken Charles T. Russell!

Kalpasan ti sumagmamano a lawas, naaprobaranak kas agibumbunannag. Tinulongannak ni Jim iti adu a pakaseknak, agraman ti panangasaba iti binalaybalay. (Ara. 20:20) Bayat ti pannakikaduak kenkuana iti ministerio, in-inut a nagustuak ti mangasaba. Ibilbilangko pay laeng ti ministerio kas kapatgan a pribilehiok. Talaga a makaparagsak ti agbalin a katrabahuan ti Dios!—1 Cor. 3:9.

TI DAMO NGA AYATKO KEN JEHOVA

Estoriaek met ita ti damo nga ayatko ken Jehova. (Apoc. 2:4) Tinulongannak dayta a mangdaer iti nasaem a kapadasak iti gubat ken iti dadduma pay a pakasuotan.—Isa. 65:17.

Ti ayatko ken Jehova tinulongannak a mangdaer iti nasaem a kapadasak iti gubat ken iti dadduma pay a pakasuotan

Nabautisaranak idi Hulio 1971 iti “Divine Name” District Assembly iti Yankee Stadium

Malaglagipko ti maysa nga aldaw idi 1971. Nabiit pay a napapanawak iti kondominium nga impalubos dagiti dadakkelko a pagnaedak. Saan ngamin a kayat ti agsiuman kaniak nga adda Saksi ni Jehova iti pagnaedanna! Awan idi ti makukuartak. Agsueldoak laeng kada dua a lawas iti pagtrabtrabahuak nga ospital, ken dandani naigatangko amin a kuartak iti bado nga usarek a mangasaba tapno maitutop a mairepresentarko ni Jehova. Adda met ketdi ti urnongko, ngem adda iti banko iti Michigan, ti lugar a dimmakkelak. Gapuna, masapul nga agnaedak iti kotsek iti sumagmamano nga aldaw. Nagibarbas ken nagdigusak iti restroom dagiti paggasolinaan.

Maysa nga aldaw idi agnanaedak pay laeng iti kotsek, simmangpetak iti Kingdom Hall dua nga oras sakbay nga agtataripnong ti grupo a mapan mangasaba. Kagapgapuk idi iti ospital. Bayat a  nakatugawak iti likudan ti Kingdom Hall nga awan makakitkita kaniak, bigla a nalagipko dagiti pasamak iti Vietnam—ti angot ti napuoran a lasag ken dagiti dara-dara a biktima ti gubat—a nangriribuk unay kaniak. Kasla mangmangngeg ken makitkitak dagiti agkabannuag a lallaki nga agsalsaludsod kaniak, “Agbiagak pay ngata? Agbiagak pay ngata?” Ammok nga awan namnamadan, ngem pinatibkerko ti pakinakemda a diak impadlaw ti agpayso a pagtungpalanda. Bayat a nakatugawak, nariribukanak.

Ikagkagumaak a di mapukaw ti damo nga ayatko ken Jehova, nangnangruna no maipasangoak kadagiti pakarigatan

Nagkararagak nga agar-arubos dagiti luak. (Sal. 56:8) Inut-utobko ti namnama a panagungar ket naliwliwaak. Ikkatento ni Jehova a Dios ti amin nga epekto dagiti naimatangak a pammapatay ken ti saem a nariknami. Pagungarento ti Dios dagidiay nga agkabannuag a lallaki ken maaddaandanto iti gundaway nga agadal iti kinapudno maipapan kenkuana. (Ara. 24:15) Gapuna, nariknak ti napalaus a panagayat ken Jehova. Diak malipatan dayta nga aldaw. Nanipud idin, ikagkagumaak a di mapukaw ti damo nga ayatko ken Jehova, nangnangruna no maipasangoak kadagiti pakarigatan.

NAKAIM-IMBAG KANIAK NI JEHOVA

Bayat ti gubat, agaramid dagiti tattao iti kinadakes ket maysaak kadakuada. Ngem nakatulong ti panangutobko iti dua kadagiti paboritok a teksto. Ti umuna ket ti Apocalipsis 12:10, 11. Sigun iti dayta, saan laeng a maparmek ti Diablo babaen iti panangasabatayo no di ket babaen pay iti dara ti Kordero. Ti maikadua ket ti Galacia 2:20. Iti dayta a teksto, ammok a natay ni Jesu-Kristo “maipaay kaniak.” Maigapu iti dara ni Jesus, sinukimatnak ni Jehova, ket pinakawanna dagiti basolko. Gapu iti dayta, naaddaanak iti nadalus a konsiensia ken natignayak a mangaramid iti amin a kabaelak a tumulong iti sabsabali a mangammo iti kinapudno maipapan iti naasi a Diostayo a ni Jehova!—Heb. 9:14.

No lagipek ti napalabasko, apresiarek unay ti kanayon a panangaywan kaniak ni Jehova. Kas pagarigan, idi naammuan ni Jim nga agnanaedak iti kotsek, inyam-ammonak iti maysa a sister nga adda ipapaabangna a balay. Mamatiak nga inusar ni Jehova ni Jim ken ti sister a mangipaay iti komportable a pagnaedak. Nakaim-imbag ni Jehova! Ay-aywananna dagiti matalek nga adipenna.

NAREGTA NGEM MASAPUL A NATAKTIKA

Idi Mayo 1971, masapul a mapanak iti Michigan tapno asikasuek ti sumagmamano a banag. Sakbay a pumanawak iti Delray Beach Congregation iti Florida, pinunnok iti literatura ti pagkargaan iti likud ti kotsek, sa nagbiaheak a nagpaamianan iti kalsada nga Interstate 75. Sakbay pay a makapanawak iti Georgia, naibusen dagiti literatura. Sireregta nga inkasabak ti naimbag a damag ti Pagarian iti nagduduma a lugar. Dimmagasak iti pagbaludan ken nagipaimaak iti tract uray kadagiti lallaki iti restroom kadagiti pagsardengan ti lugan. Diak ammo no adda nagtubo kadagiti immulak idi a bukel ti kinapudno.—1 Cor. 3:6, 7.

Nupay kasta, aminek a saanak a nataktika idi nabiit pay a naammuak ti kinapudno, nangnangruna no isarsaritak dagita iti pamiliak. Gapu ta kasla sumsumged iti kaunggak ti damo nga ayatko ken Jehova, situtured ken prangka a kinasabaak ida. Ipatpategko dagiti manongko a da John ken Ron isu nga impilitko nga awatenda ti kinapudno. Ngem idi agangay, nagpadispensarak iti saan a naannad a pannakisaritak. Nupay kasta, intultuloyko nga inkararag nga awatenda koma ti kinapudno. Manipud idin, sinursuruannak ni Jehova, ket nagbalinak a nataktika a mangasaba ken mangisuro.—Col. 4:6.

 DADDUMA NGA IPATPATEGKO

Kanayon nga adda iti pusok ni Jehova, kasta met ti dadduma nga ipatpategko. Ni Susan a baketko ti maikadua nga ipatpategko. Kayatko ti maaddaan iti asawa a makatulong kaniak a mangitungpal iti trabaho mainaig iti Pagarian. Nataengan iti naespirituan ni Susan ken napigsa ti determinasionna. Malagipko ti naminsan a panangpasiarko kenkuana. Nakatugaw idi iti makinsango a beranda ti balayda iti Cranston, Rhode Island. Basbasaenna ti Pagwanawanan ken adda Bibliana. Nagustuak ti panangbasbasana iti maysa nga ababa nga artikulo sa basaenna pay dagiti naisitar a teksto. Naikunak, ‘Naespirituan daytoy a babai!’ Nagkasarkami idi Disiembre 1971. Agyamyamanak ta kanayon a tultulongan ken supsuportarannak nanipud idin. Apresiarek unay ti panagayatna ken Jehova a nangnangruna ngem siak.

Kaduak ni Susan ken ti annakmi a da Paul ken Jesse

Naaddaankami iti dua nga annak, da Jesse ken Paul. Tinarabay ida ni Jehova bayat a dumakdakkelda. (1 Sam. 3:19) Gapu ta agbibiagda maitunos iti kinapudno, maragragsakankami a nagannakda. Agtultuloy nga agserserbida ken Jehova gapu ta linaglagipda ti damo nga ayatda kenkuana. Nasuroken a 20 a tawen nga agserserbida iti amin-tiempo. Maipagpannakkelko met ti dua a nagsayaat a manugangko, da Stephanie ken Racquel, nga imbilangko kas bukodko nga annak. Nangasawa dagiti  annakko kadagiti naespirituan a babbai a mangay-ayat ken Jehova a Dios iti intero a puso ken kararuada.—Efe. 6:6.

Magusgustuanmi a sangapamiliaan ti mangasaba iti saan unay a maas-asak a teritoria

Kalpasan ti bautismok, nagserbiak iti 16 a tawen iti Rhode Island, ket naaddaanak kadagiti nagsasayaat a gagayyem. Malagipko ti adu a nakaduak a mapagulidanan a panglakayen. Pagyamyamanak met ti adu nga agdaldaliasat a manangaywan a nagsayaat ti impluensiada kaniak. Talaga a nagsayaat ti makipagtrabaho kadagiti lallaki a nangtaginayon iti damo nga ayatda ken Jehova! Idi 1987, immakarkami iti North Carolina tapno agserbi iti lugar nga addaan dakdakkel a panagkasapulan, ket naaddaankami manen kadagiti nagsasayaat a gagayyem. *

Mangidadauloak iti taripnong sakbay ti panangasaba bayat ti panagserbik iti sirkito

Idi Agosto 2002, inawatmi ken Susan ti awis nga agbalin a kameng ti pamilia ti Bethel iti Patterson iti United States. Nagtrabahoak iti Service Department ket nagtrabaho met ni Susan iti Laundry. Magusgustuanna ti agtrabaho sadiay! Ket idi Agosto 2005, naaddaanak iti pribilehio nga agbalin a miembro ti Bagi a Manarawidwid. Panagriknak, diak maikari iti dayta nga annongen. Madanagan met ni baketko iti responsabilidad, trabaho, ken panagbiahe a mainaig iti dayta. Maamak ni Susan nga ageroplano, ngem kanayon met nga ageroplanokami! Kuna ni Susan a ti naayat a balakad ti assawa dagiti miembro ti Bagi a Manarawidwid ti nakatulong kenkuana a determinado a mangsuporta kaniak agingga iti kabaelanna. Ket kasta ti inaramidna, isu nga ad-adda pay nga inayatko.

Iti opisinak, nalikmutak kadagiti retrato a nakapatpateg kaniak! Ipalagip dagita a nakaragragsak ti biagko. Adun ti naawatko a nagsasayaat a gunggona gapu iti pananglaglagipko iti damo nga ayatko ken Jehova!

Ti panaglalangenmi kas pamilia ti mangparparagsak unay kaniak

^ par. 31 Para iti dadduma pay a detalye ti amin-tiempo a panagserbi ni Brother Morris, kitaen ti Pagwanawanan a Marso 15, 2006, panid 26.