Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) MARSO 2015

Ti Maadal iti Ilustrasion Maipapan Kadagiti Talento

Ti Maadal iti Ilustrasion Maipapan Kadagiti Talento

“Iti daydiay maysa isu nangted iti lima a talento, iti sabali dua, iti sabali pay maysa.”—MAT. 25:15.

1, 2. Apay nga insalaysay ni Jesus ti ilustrasion maipapan kadagiti talento?

ITI pangngarig ni Jesus maipapan kadagiti talento, silalawag nga impalgakna ti dakkel a responsabilidad nga impabaklayna kadagiti napulotan a pasurotna. Masapul a maawatantayo ti kaipapanan daytoy a pangngarig ta apektaranna ti amin a pudno a Kristiano, nailangitan man wenno naindagaan ti namnamatayo.

2 Ti pangngarig ni Jesus maipapan kadagiti talento ket karaman iti sungbatna iti saludsod dagiti adalanna maipapan iti ‘pagilasinan ti kaaddana ken ti panungpalan ti sistema ti bambanag.’ (Mat. 24:3) Matungtungpal iti kaaldawantayo daytoy a pangngarig ken paset ti pagilasinan ti kaadda ni Jesus ken ti panagturayna kas Ari.

3. Ania dagiti maadaltayo kadagiti ilustrasion a nairekord iti Mateo kapitulo 24 ken 25?

3 Ti pangngarig maipapan kadagiti talento ket maysa kadagiti uppat nga agkakanaig nga ilustrasion a nairekord iti Mateo 24:45 agingga iti 25:46. Ti tallo a dadduma pay—maipapan iti matalek ken masirib nga adipen, sangapulo a birhen, ken dagiti karnero ken kalding—ket karaman met iti sungbat ni Jesus iti saludsod maipapan iti pagilasinan ti kaaddana. Kadagita nga uppat nga  ilustrasion, intampok ni Jesus dagiti kualidad a masapul a patanoren dagiti pudno a pasurotna bayat daytoy maudi nga al-aldaw. Dagiti ilustrasion maipapan iti adipen, dagiti birhen, ken dagiti talento ket naiturong kadagiti napulotan a pasurotna. Iti ilustrasion maipapan iti matalek nga adipen, impaganetget ni Jesus a masapul nga agbalin a matalek ken masirib ti bassit a grupo dagiti napulotan a nakaitalkan iti annongen a panangtaraon kadagiti katulong bayat ti maudi nga al-aldaw. Impaganetget met ni Jesus iti pangngarig maipapan kadagiti birhen a masapul a nakasagana ken naridam ti amin a napulotan a pasurotna, yantangay ammoda nga um-umayen ni Jesus nupay dida ammo ti aldaw wenno oras. Iti pangngarig maipapan kadagiti talento, impakita ni Jesus a masapul a naanep dagiti napulotan iti panangitungpalda kadagiti annongenda kas Kristiano. Inturong met ni Jesus ti maudi nga ilustrasion maipapan kadagiti karnero ken kalding kadagidiay addaan iti naindagaan a namnama. Impaganetgetna a masapul nga agbalinda a nasungdo ken naan-anay a suportaranda dagiti napulotan a kakabsatna ditoy daga. * Usigentayo ita ti ilustrasion maipapan kadagiti talento.

INTALEK TI APO TI DAKKEL A KANTIDAD KADAGITI ADIPENNA

4, 5. Siasino ti iladladawan ti tao wenno ti apo iti ilustrasion, ken ania ti gatad ti maysa a talento?

4 Basaen ti Mateo 25:14-30. Nabayagen nga inlawlawag dagiti publikasiontayo a ti tao wenno ti apo iti ilustrasion ket isu ni Jesus, ket ti panagdaliasatna iti sabali a lugar iladladawanna ti iyuulina idiay langit idi 33 C.E. Iti immun-una a pangngarig ni Jesus, impalgakna nga agdaliasat iti sabali a lugar “tapno gumun-od iti naarian a pannakabalin.” (Luc. 19:12) Saan a dagus a naan-anay a nagturay ni Jesus iti Pagarian idi nagsubli idiay langit. * Imbes ketdi, “nagtugaw iti makannawan ti Dios, nanipud idin agur-uray agingga a dagiti kabusorna maikabilda a pagbatayan dagiti sakana.”—Heb. 10:12, 13.

5 Ti tao iti ilustrasion ket agik-ikut iti walo a talento, a dakkel a kantidad iti daydi a tiempo. * Sakbay a nagdaliasat, inyawatna dagiti talento kadagiti adipenna ken namnamaenna nga inegosioda dagita bayat ti kaawanna. Kas iti dayta a tao, agik-ikut met ni Jesus iti banag a dakkel ti gatadna sakbay a nagpalangit. Ania dayta? Isu ti trabahona idi ditoy daga.

6, 7. Ania ti isimsimbolo dagiti talento?

6 Nakapatpateg ken Jesus ti trabaho a panangasaba ken panangisuro. (Basaen ti Lucas 4:43.) Babaen iti dayta, arigna sinukayna ti maysa a talon a pagtaudanto ti adu nga apit. Kinapudnona, kinunana kadagiti adalanna: “Itannawagyo dagiti matayo ket matmatanyo dagiti talon, ta purawdan a maipaay iti pannakaani.” (Juan 4:35-38) Pampanunoten idi ni Jesus ti pannakaummong ti adu pay a napasnek a tattao nga agbalin nga adalanna. Kas iti maysa a nalaing a mannalon, saan a baybay-an ni Jesus ti talon a mabalinen nga anien. Gapuna, kalpasan la unay ti panagungarna ken sakbay ti panagpalangitna, inikkanna dagiti adalanna iti dakkel nga annongen: “Inkayo ngarud ket mangaramidkayo iti ad-adalan.” (Mat. 28:18-20) Intalek ngarud ni Jesus kadakuada ti maysa a nagpateg a gameng, ti Nakristianuan a ministerio.—2 Cor. 4:7.

 7 Ania ngarud ti konklusiontayo? Idi inikkan ni Jesus dagiti pasurotna iti annongen nga agaramid iti ad-adalan, arigna intalekna kadakuada dagiti “sanikuana”—dagiti talentona. (Mat. 25:14) Iti sabali a pannao, dagiti talento isimboloda ti annongen a mangasaba ken agaramid iti ad-adalan.

8. Nupay nagduduma ti bilang ti talento nga inted ti apo kadagiti adipen, ania ti ninamnamana kadakuada?

8 Iti pangngarig, inikkan ti apo dagiti adipenna kadagiti talento. Adda inikkanna iti lima, dua, ken maysa. (Mat. 25:15) Nupay nagduduma ti bilang ti talento nga inted ti apo kadagiti adipen, ninamnamana a siaanep nga usarenda dagita, kayatna a sawen, aramidenda ti amin a kabaelanda iti ministerio. (Mat. 22:37; Col. 3:23) Idi umuna a siglo, nanipud idi Pentecostes 33 C.E., inrugi dagiti pasurot ni Kristo nga inegosio dagita a talento. Ti kinaanepda iti trabaho a panangasaba ken panagaramid iti ad-adalan ket nailanad iti libro nga Aramid. *Ara. 6:7; 12:24; 19:20.

PANANGINEGOSIO KADAGITI TALENTO ITI TIEMPO TI PANUNGPALAN

9. (a) Ania ti inaramid ti dua a matalek nga adipen kadagiti talento, ken ania ti maadaltayo iti dayta? (b) Ania ti akem ti “sabsabali a karnero”?

9 Iti tiempo ti panungpalan, nangnangruna manipud 1919, inegnegosion dagiti  matalek a napulotan nga adipen ni Kristo ditoy daga dagiti talento ti Apo. Kas iti umuna a dua nga adipen, inaramid dagiti napulotan ti amin a kabaelanda para iti trabaho a panangasaba. Saantay koma a pakaseknan no siasino ti isimsimbolo ti dua nga adipen a naikkan iti lima ken dua a talento. Iti pangngarig, agpada a nadoble ti dua nga adipen dagiti talento nga intalek kadakuada ti apo, isu nga agpadada a naanep. Ania met ti akem dagidiay addaan iti naindagaan a namnama? Nagpateg ti akemda! Ipakita ti ilustrasion ni Jesus maipapan kadagiti kalding ken karnero nga addaanda iti pribilehio a sisusungdo a mangsuporta kadagiti napulotan a kakabsat ni Jesus iti trabaho a panangasaba ken panangisuro. Bayat daytoy napeggad a maudi nga al-aldaw, agdangdanggay dagitoy a grupo kas “maymaysa nga arban,” a sireregta nga itungtungpalda ti annongenda a mangaramid iti ad-adalan.—Juan 10:16.

10. Ania ti nagpateg a paset ti pagilasinan ti kaadda ni Jesus?

10 Nainkalintegan laeng a mangnamnama ti Apo iti nasayaat a resulta. Kas nadakamaten, talaga a pinaadu dagiti matalek nga adalanna idi umuna a siglo ti sanikuana. Komusta met ngay iti daytoy a tiempo ti panungpalan a matungtungpalen ti pangngarig maipapan kadagiti talento? Itungtungpal dagiti matalek ken naanep nga ad-adipen ni Jesus ti kasaknapan pay laeng a trabaho a panangasaba ken panagaramid iti adalan. Gapu iti panagregget ti tunggal maysa kadakuada, ginasut a ribu ti agbalbalin nga adalan a mainaynayon kadagiti agibumbunannag iti Pagarian iti kada tawen. Ipakita dayta a ti trabaho a panangasaba ken panangisuro ket nagpateg a paset ti pagilasinan ti kaadda ni Jesus kas agturay iti Pagarian. Sigurado a maragragsakan ti Apoda!

Intalek ni Kristo kadagiti adipenna ti nagpateg nga annongen a mangasaba (Kitaen ti parapo 10)

KAANO NGA UMAY TI APO TAPNO MAKIKUENTA?

11. Apay a maikunatayo nga inton dakkel a rigat ti pannakikuenta ni Jesus?

11 Umay ni Jesus tapno makikuenta kadagiti adipenna sakbay ti ngudo ti dakkel a rigat a nakaas-asidegen. Apay a maikunatayo a kasta? Iti padto ni Jesus iti Mateo kapitulo 24 ken 25, maulit-ulit a dinakamatna ti iyaayna. Idi imbagana a dagiti tattao “makitadanto ti Anak ti tao nga um-umay kadagiti ulep ti langit,” tuktukoyenna ti panangukom bayat ti dakkel a rigat. Indagadagna kadagiti pasurotna nga agbibiag iti maudi  nga al-aldaw nga agbalinda a naridam idi kinunana: “Saanyo nga ammo no ania nga aldaw nga umay ti Apoyo” ken “iti oras a saanyo nga ipagarup nga isu dayta, ti Anak ti tao umay.” (Mat. 24:30, 42, 44) Gapuna, idi imbaga ni Jesus nga “immay ti apo dagidiay nga adipen ket nakikuenta kadakuada,” nalawag a tuktukoyenna ti tiempo inton ipakatna ti panangukomna iti panungpalan daytoy a sistema. *Mat. 25:19.

12, 13. (a) Ania ti kinuna ti apo iti umuna a dua nga adipen, ken apay? (b) Kaano nga awaten dagiti napulotan ti maudi a pannakaselioda? (Kitaen ti kahon a “ Makikuentada Inton Matayda.”) (c) Anianto a gunggona ti awaten dagiti maukom kas karnero?

12 Sigun iti pangngarig, idi immay ti apo, nakitana a ti umuna a dua nga adipen nga inikkanna iti lima ken dua a talento ket matalek, ta napagbalinda a doble ti gatad a naited kadakuada. Agpada ti kinuna ti apo kadakuada: “Nasayaat unay, naimbag ken matalek nga adipen! Matalekka iti sumagmamano a banag. Dutokankanto iti adu a banag.” (Mat. 25:21, 23) Ania ngarud ti namnamaentayo inton ti Apo, ni naipadayag a Jesus, ket umay tapno mangukom iti masanguanan?

13 Ti umuna a dua nga adipen, nga iladladawan dagiti naanep a napulotan nga adalan, naawatdanton ti maudi a pannakaselioda sakbay a mangrugi ti dakkel a rigat. (Apoc. 7:1-3) Sakbay ti Armagedon, ited ni Jesus ti naikari a nailangitan a namnamada. Dagidiay met addaan iti naindagaan a namnama a nangsuporta kadagiti kakabsat ni Kristo iti trabaho a panangasaba ket naukomton kas karnero. Maikkandanto iti pribilehio nga agbiag ditoy daga iti sidong ti panangituray ti Pagarian.—Mat. 25:34.

TI NADANGKES KEN SADUT NGA ADIPEN

14, 15. Ibagbaga kadi ni Jesus nga adu kadagiti napulotan a pasurotna ti agbalinto a nadangkes ken sadut? Ilawlawagmo.

14 Iti pangngarig, inkali ti maikatlo nga adipen ti talento imbes nga inegosio wenno idepositona koma iti banko. Impakita daytoy nga adipen a dakes ti kababalinna ta saanna a tinungpal ti bilin a paaduenna ti sanikua ti apona. Ti apo inawaganna daytoy nga adipen kas nadangkes ken sadut. Innala ti apo ti talento kenkuana ket intedna iti daydiay addaan iti sangapulo a talento. Kalpasanna, naipalladaw ti dakes nga adipen iti “sipnget iti ruar.” Ket “sadiay nga addanto ti panagsangitna ken ti panagngaretnget dagiti ngipenna.”—Mat. 25:24-30; Luc. 19:22, 23.

15 Maysa kadagiti tallo nga adipen ti apo ti nangikali iti talento. Ipaspasimudaag kadi ni Jesus a kakatlo kadagiti napulotan a pasurotna ti agbalinto a nadangkes ken sadut? Saan. Usigentayo ti konteksto. Iti pangngarig maipapan iti matalek ken masirib nga adipen, dinakamat ni Jesus ti maipapan iti  maysa a dakes nga adipen a nangkabil kadagiti padana nga adipen. Saan nga ibagbaga ni Jesus nga agbalinto a dakes ti dadduma kadagiti napulotan nga adipenna. Imbes ketdi, pakpakdaaranna dagiti matalek nga adipen a dida koma agbalin a kas iti dakes nga adipen. Umasping iti dayta, iti ilustrasion maipapan iti sangapulo a birhen, saan nga ibagbaga ni Jesus a kagudua kadagiti napulotan a pasurotna ti agbalinto a kas iti lima a maag a birhen. Imbes ketdi, pakpakdaaranna dagiti napulotan a kakabsatna iti mabalin a mapasamak no dida agtalinaed a naridam ken nakasagana. * Gapuna, rasonable ngarud a kunaentayo nga iti ilustrasion maipapan kadagiti talento, saan nga ibagbaga ni Jesus nga adunto kadagiti napulotan a kakabsatna bayat ti maudi nga al-aldaw ti agbalin a nadangkes ken sadut. Imbes ketdi, pakpakdaaran ni Jesus dagiti napulotan a pasurotna a masapul nga agtalinaedda a naanep—nga ‘inegosioda’ ti talento a naitalek kadakuada—ken liklikanda ti kababalin ken tigtignay ti dakes nga adipen.—Mat. 25:16.

16. (a) Ania dagiti maadaltayo iti pangngarig maipapan kadagiti talento? (b) Kasano a nakatulong kadatayo daytoy nga artikulo a mangtarus iti pangngarig maipapan kadagiti talento? (Kitaen ti kahon a “ Panangtarus iti Ilustrasion Maipapan Kadagiti Talento.”)

16 Ania ti dua a banag a maadaltayo iti pangngarig maipapan kadagiti talento? Umuna, ti Apo, ni Kristo, intalekna kadagiti napulotan nga adipenna ti maysa a nagpateg a banag—ti annongen a mangasaba ken agaramid iti ad-adalan. Maikadua, namnamaen ni Kristo nga agbalintay amin a naanep iti trabaho a panangasaba. No agbalintay a kasta, masiguradotayo a gunggonaan ti Apo ti kinamatalek, kinaridam, ken kinasungdotayo.—Mat. 25:21, 23, 34.

^ par. 3 Nailawlawag no siasino ti matalek ken masirib nga adipen iti Pagwanawanan a Hulio 15, 2013, panid 21-22, parapo 8-10. Nailawlawag met no siasino dagiti birhen iti immun-una nga artikulo iti daytoy a magasin. Ti ilustrasion maipapan kadagiti karnero ken kalding ket nailawlawag iti Pagwanawanan nga Oktubre 15, 1995, panid 23-28, ken iti sumaruno nga artikulo iti daytoy a magasin.

^ par. 5 Idi kaaldawan ni Jesus, ti maysa a talento ket aggatad iti agarup 6,000 a denario. Maysa a denario ti sueldo ti maysa a gagangay a trabahador iti kada aldaw, isu a masapul nga agtrabaho iti agarup 20 a tawen tapno makategged iti maysa a talento.

^ par. 8 Kalpasan ti ipapatay dagiti apostol, rinubroban ni Satanas ti apostasia, a nagraira iti adu a siglo. Kabayatan dayta a panawen, bassit laeng ti naaramid maipaay iti trabaho a panangasaba. Ngem agbalbaliw dayta bayat ti “panagani,” wenno iti maudi nga al-aldaw. (Mat. 13:24-30, 36-43) Kitaen ti Pagwanawanan a Hulio 15, 2013, panid 9-12.

^ par. 15 Kitaen ti parapo 13 iti immun-una nga artikulo a napauluan iti “Agtultuloyka Kadi nga Agbantay?”