Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) MARSO 2015

Sisusungdo a Suportaram Dagiti Kakabsat ni Kristo

Sisusungdo a Suportaram Dagiti Kakabsat ni Kristo

“No kasano nga inaramidyo dayta iti maysa kadagiti kanunumuan kadagitoy kakabsatko, inaramidyo dayta kaniak.”—MAT. 25:40.

1, 2. (a) Ania dagiti ilustrasion nga insalaysay ni Jesus kadagiti nasinged a gagayyemna? (Kitaen ti ladawan iti rugi ti artikulo.) (b) Ania dagiti masapul nga ammuentayo iti ilustrasion maipapan kadagiti karnero ken kalding?

KADUA idi ni Jesus dagiti nasinged a gagayyemna a da Pedro, Andres, Santiago, ken Juan. Insalaysayna kadakuada dagiti ilustrasion maipapan iti matalek ken masirib nga adipen, sangapulo a birhen, ken kadagiti talento. Ingngudona ti salaysayna babaen ti maysa pay a pangngarig. Dinakamatna ti tiempo inton “ti Anak ti tao” ukomenna ti ‘amin a nasion.’ Naginteres la ketdi dagiti adalanna iti dayta nga ilustrasion! Dinakamatna ti dua a grupo, dagiti arig-karnero ken arig-kalding, kasta met ti nagpateg a maikatlo a grupo a tinukoyna kas ‘kakabsat’ ti “ari.”—Basaen ti Mateo 25:31-46.

2 Paginteresan unay dagiti adipen ni Jehova dayta nga ilustrasion tangay tuktukoyen ni Jesus iti dayta ti mapasamakto kadagiti tattao. Imbagana no apay nga agbiagto nga agnanayon ti dadduma ken no apay nga adda dagiti madadael. Nakadepende ti biagtayo iti pannakatarustayo kadagiti kinapudno nga impalgak ni Jesus ken iti panagtignaytayo maitunos kadagita. Masapul ngarud nga isaludsodtayo: Kasano a linawlawagan ni Jehova ti pannakatarustayo iti dayta nga ilustrasion? Apay a maibagatayo nga ipagpaganetget ti  ilustrasion ti kinapateg ti trabaho a panangasaba? Siasino dagiti naipaayan iti annongen a mangasaba? Ken apay nga itan ti tiempo a sisusungdo a suportarantayo ti “ari” ken dagiti aw-awaganna kas “kakabsatko”?

KASANO A NALAWLAWAGAN TI PANNAKATARUSTAYO?

3, 4. (a) Ania dagiti masapul nga ammuentayo tapno matarusantayo ti ilustrasion maipapan kadagiti karnero ken kalding? (b) Idi 1881, kasano nga inlawlawag ti Zion’s Watch Tower daytoy nga ilustrasion?

3 Tapno umiso ti pannakatarustayo iti ilustrasion maipapan kadagiti karnero ken kalding, masapul nga ammuentayo (1) no siasino dagidiay nadakamat, (2) no kaano a mapasamak ti panangukom, ken (3) no ania ti pakaibatayan ti pannakaukom ti maysa kas karnero wenno kalding.

4 Idi 1881, imbaga ti Zion’s Watch Tower a “ti Anak ti tao,” a naawagan met kas “ari,” ket isu ni Jesus. Impagarup dagiti immuna nga Estudiante ti Biblia a ti ‘kakabsat’ ti ari ket dagidiay agturayto a kadua ni Kristo ken dagiti perpekto a tattao nga agbiagto ditoy daga. Imbagada a mapaglalasinto dagiti karnero ken dagiti kalding bayat ti Sangaribu a Tawen a Turay ni Kristo. Ken namatida a maibilangto dagiti tattao kas karnero gapu ta nagbiagda maitunos iti linteg ti Dios maipapan iti ayat.

5. Kasano a nalawlawagan ti pannakatarustayo idi dekada 1920?

5 Idi rugrugi ti dekada 1920, linawlawagan ni Jehova ti pannakatarus dagiti adipenna iti daytoy nga ilustrasion. Pinatalgedan ti The Watch Tower nga Oktubre 15, 1923 a “ti Anak ti tao” ket isu ni Jesus. Nupay kasta, babaen kadagiti teksto iti Biblia nailawlawag iti dayta no siasino dagiti kakabsat ni Kristo ken dagiti maibilangto kas karnero—dagiti kakabsat ni Kristo isuda dagiti kakaduana nga agturayto idiay langit, ket dagiti maibilangto a karnero isuda met dagiti addaan iti namnama nga agbiag ditoy daga iti sidong ti turay ti Pagarian ni Kristo. Kaano a mapaglalasin dagiti karnero ken dagiti kalding? Kinuna ti artikulo a kaduanto ni Kristo dagiti kakabsatna nga agturay idiay langit bayat ti Sangaribu a Tawen a Turayna, isu a saan ida a matulongan wenno mabaybay-an dagidiay agbiag ditoy daga. Gapuna, ti panamaglalasin kadagiti karnero ken kalding ket mapasamakto sakbay a mangrugi ti Sangaribu a Tawen a Turay. Maipapan met iti no ania ti pakaibatayan ti pannakaukom ti maysa kas karnero, kuna ti artikulo a maukomto dagiti tattao kas karnero no bigbigenda ni Jesus kas Apoda ken patienda a pasayaatento ti Pagarian ti kasasaad ti daga.

6. Kasano nga ad-adda a nalawlawagan ti pannakatarustayo idi dekada 1990?

6 Gapu iti dayta a pannakailawlawag, impagarup dagiti adipen ni Jehova a dagiti tattao ket maikeddeng kas karnero wenno kalding kabayatan ti panungpalan ti sistema ti bambanag, depende no ania ti reaksionda iti mensahe ti Pagarian. Nupay kasta, nalawlawagan dayta a pannakatarustayo idi katengngaan ti dekada 1990. Inlawlawag ti dua nga artikulo ti Pagwanawanan nga Oktubre 15, 1995 dagiti pagpadaan dagiti sasao ni Jesus a nairekord iti Mateo 24:29-31 (basaen) ken iti Mateo 25:31, 32. (Basaen.) * Ti konklusion? Kinuna ti umuna nga artikulo: “Maaramidto iti masanguanan ti pannakaukom dagiti karnero ken kalding.” Kaano? “Mapasamakto dayta kalpasan ti panangrugi ‘ti dakkel a rigat’ a nadakamat iti Mateo 24:29, 30 ken inton ‘dumteng [ti Anak ti tao] iti dayagna.’ . . . Kalpasanna, inton manungpalen ti intero a dakes a sistema, agtugawto ni Jesus iti pangukoman ket ipátay ken ibanagna ti pangngeddeng.”

7. Ania itan ti nalawag a pannakatarustayo iti ilustrasion?

 7 Ita, nalawagen ti pannakatarustayo iti ilustrasion maipapan kadagiti karnero ken kalding. Siasino dagiti matuktukoy iti pangngarig? “Ti Anak ti tao,” wenno ti ari, ket isu ni Jesus. Dagidiay naawagan kas “kakabsatko” ket isu dagiti napulotan iti espiritu a lallaki ken babbai a kaduanto ni Kristo nga agturay idiay langit. (Roma 8:16, 17) “Dagiti karnero” ken “dagiti kalding” iladladawanda dagiti tattao manipud iti amin a nasion, ngem saanda a napulotan iti nasantuan nga espiritu. Kaano a mapasamak ti panangukom? Mapasamak dayta sakbay ti ngudo ti dakkel a rigat a nakaas-asidegen. Ken ania ti pakaibatayan ti pannakaukom ti maysa kas karnero wenno kalding? Agdepende dayta iti panangtratoda kadagiti napulotan iti espiritu a kakabsat ni Kristo nga adda pay laeng ditoy daga. Bayat nga umas-asideg ti panungpalan daytoy a sistema ti bambanag, anian a yamantayo ta in-inut a lawlawagan ni Jehova ti pannakatarustayo iti daytoy nga ilustrasion ken iti dadduma pay a nainaig nga ilustrasion a nairekord iti Mateo kapitulo 24 ken 25!

KASANO NGA IPAGANETGET TI ILUSTRASION TI TRABAHO A PANANGASABA?

8, 9. Apay a naawagan dagiti karnero kas “nalinteg”?

8 Saan a direkta a dinakamat ni Jesus ti maipapan iti trabaho a panangasaba iti ilustrasion maipapan kadagiti karnero ken kalding. Apay ngarud a maibagatayo nga ipagpaganetgetna ti kinapateg ti panangasaba?

9 Umuna, laglagipentayo a mangisursuro idi ni Jesus babaen ti ilustrasion. Nalawag a dina tuktukoyen ti panamaglalasin kadagiti literal a karnero ken kalding. Saanna met nga ibagbaga a tapno maukom ti maysa kas karnero, masapul a literal a pakanen, kawesan, aywanan, wenno bisitaenna iti pagbaludan ti maysa kadagiti kakabsat ni Jesus. Imbes ketdi, iladladawanna ti panangtrato dagiti piguratibo a karnero kadagiti kakabsatna. Inawaganna dagiti karnero kas “nalinteg” gapu ta bigbigbigenda nga adda maysa a grupo dagiti napulotan a kakabsat ni Kristo ditoy daga, ken sisusungdo a supsuportaranda dagiti napulotan bayat dagitoy napeggad a maudi nga al-aldaw.—Mat. 10:40-42; 25:40, 46; 2 Tim. 3:1-5.

10. Kasano a maipakita dagiti karnero ti kinaimbagda kadagiti kakabsat ni Kristo?

10 Maikadua, panunotentayo ti konteksto ti kinuna ni Jesus. Isalsalaysay ni Jesus ti pagilasinan ti kaaddana ken ti panungpalan ti sistema ti bambanag. (Mat. 24:3) Iti rugi ti salaysayna, adda dinakamatna a nagpateg a paset ti pagilasinan—ti pannakaikasaba ti naimbag a damag ti Pagarian iti “intero a mapagnaedan a daga.” (Mat. 24:14) Ken sakbay unay a dinakamatna ti maipapan kadagiti karnero ken kalding, insalaysayna nga umuna ti ilustrasion maipapan kadagiti talento. Kas nadakamat iti immun-una nga artikulo, ipagpaganetget ni Jesus iti dayta nga ilustrasion a masapul a sireregta a makiraman iti trabaho a panangasaba dagiti adalanna a napulotan iti espiritu, wenno dagiti ‘kakabsatna.’ Nupay kasta, nagdakkel ti trabaho nga aramiden ti bassit a bilang dagiti napulotan nga adda ditoy daga bayat ti kaadda ni Jesus—panangasaba iti “amin a nasion” sakbay ti panungpalan. Ipakita ti ilustrasion maipapan kadagiti karnero ken kalding nga agkasapulan iti tulong dagiti napulotan. Gapuna, maysa kadagiti kangrunaan a pamay-an a maipakita dagiti potensial a karnero ti kinaimbagda kadagiti kakabsat ni Kristo ket ti panangsuportada iti trabaho a panangasaba. Ngem ania ti ramanen dayta? Ti laeng kadi panangted iti pinansial a kontribusion ken panangpabileg kadakuada, wenno adda pay sabali?

SIASINO TI MANGASABA?

11. Ania ti tumaud a saludsod, ken apay?

11 Iti agdama, saan a napulotan iti espiritu  ti kaaduan kadagiti walo a milion nga adalan ni Jesus. Saanda nga immawat kadagiti talento nga inted ni Jesus kadagiti napulotan nga adipenna. (Mat. 25:14-18) Gapuna, mabalin a maisaludsodtayo, ‘Ti kadi panangasaba ket annongen met dagiti saan a napulotan iti nasantuan nga espiritu?’ Wen. Usigentayo ti dadduma a rason no apay.

12. Ania ti maadaltayo iti sasao ni Jesus a nairekord iti Mateo 28:19, 20?

12 Imbilin ni Jesus a mangasaba ti amin nga adalanna. Kalpasan ti panagungar ni Jesus, imbagana kadagiti pasurotna a mangaramidda iti ad-adalan, a suruanda ida a mangtungpal iti “amin a bambanag” nga imbilinna. Karaman kadagita a bilin ti annongen a mangasaba. (Basaen ti Mateo 28:19, 20.) Masapul ngarud a mangasaba ti amin nga adalan ni Kristo, ti man namnamada ket agturay idiay langit wenno agbiag ditoy daga.—Ara. 10:42.

13. Ania ti ipasimudaag ti sirmata a nakita ni Juan, ken apay?

13 Ipasimudaag ti libro nga Apocalipsis a ti trabaho a panangasaba ket itungpal dagiti napulotan ken ti dadduma pay. Nangipaay ni Jesus ken apostol Juan iti sirmata maipapan iti “nobia,” ti 144,000 a napulotan a tattao a kaduanto ni Kristo nga agturay idiay langit, nga iyaw-awisda kadagiti tattao nga uminumda iti “danum ti biag nga awan bayadna.” (Apoc. 14:1, 3; 22:17) Dayta a simboliko a danum irepresentarna dagiti probision ni Jehova a mangispal kadagiti tattao iti basol ken ipapatay maibatay iti daton a subbot ni Kristo. (Mat. 20:28; Juan 3:16; 1 Juan 4:9, 10) Ti subbot ket nagpateg a paset ti mensahe nga ikaskasabatayo, ket dagiti napulotan ti mangidadaulo iti panangtulong kadagiti tattao a mangammo ken magunggonaan iti dayta. (1 Cor. 1:23) Ngem adda dadduma pay a nakita ni Juan iti sirmata a saan a karaman iti klase nobia. Naibilin met a kunaenda, “Umayka!” Agtultulnogda iti  dayta ken iyaw-awisda iti sabsabali nga uminumda iti danum ti biag. Daytoy a maikadua a grupo ket dagidiay addaan iti namnama nga agbiag ditoy daga. Gapuna, nalawag nga ipasimudaag daytoy a sirmata a ti amin a mangipangag iti awis nga “umayka” ket addaan iti responsabilidad a mangasaba.

14. Ania ti ramanen ti panagtulnog iti “linteg ti Kristo”?

14 Masapul a mangasaba ti amin nga adda iti sidong ti “linteg ti Kristo.” (Gal. 6:2) Maymaysa ti pagalagadan ni Jehova agpaay iti amin. Kas pagarigan, kinunana kadagiti Israelita: “Maymaysa a linteg ti adda maipaay iti katutubo ken maipaay iti ganggannaet nga agnanaed . . . iti nagtetengngaanyo.” (Ex. 12:49; Lev. 24:22) Awanen iti sidong ti Mosaiko a Linteg dagiti Kristiano. Ngem amintayo, napulotan man wenno saan, ket adda iti sidong ti “linteg ti Kristo.” Dayta a linteg ramanenna ti amin nga insuro ni Jesus. Ti kangrunaan nga insurona kadagiti pasurotna ket ti panangipakita iti ayat. (Juan 13:35; Sant. 2:8) Ket ti maysa a kangrunaan a pamay-an a maipakitatayo ti ayattayo iti Dios, ken ni Kristo, ken kadagiti tattao ket babaen ti panangikasabatayo iti naimbag a damag ti Pagarian.—Juan 15:10; Ara. 1:8.

15. Apay a maibagatayo nga agaplikar iti amin a pasurot ni Jesus ti bilinna a mangasaba?

15 Ti imbaga ni Jesus iti sumagmamano ket mabalin nga agaplikar iti ad-adu. Kas pagarigan, 11 laeng nga adalan ti nakitulagan idi ni Jesus maipaay iti maysa a Pagarian, ngem agaplikar dayta a tulag iti amin a kameng ti 144,000. (Luc. 22:29, 30; Apoc. 5:10; 7:4-8) Kasta met, sumagmamano laeng kadagiti adalanna—dagidiay nagparanganna idi napagungar—ti binilinna a mangasaba. (Ara. 10:40-42; 1 Cor. 15:6) Ngem amin a matalek nga adalanna idi umuna a siglo nabigbigda nga agaplikar met kadakuada dayta a bilin. (Ara. 8:4; 1 Ped. 1:8) Ita, saan met a personal a nakisarita ni Jesus iti asinoman kadagiti walo a milion nga aktibo a manangaskasaba iti Pagarian. Ngem bigbigenda amin a masapul a maaddaanda iti pammati ken Kristo ken ipakitada dayta babaen ti panangitungpalda iti trabaho a panangasaba.—Sant. 2:18.

ITAN TI TIEMPO NGA AGBALINTAYO A NASUNGDO

16-18. Kasano a masuportarantayo dagiti kakabsat ni Kristo, ken apay nga itan ti tiempo nga aramidentayo dayta?

16 Gubgubaten ni Satanas dagiti napulotan iti espiritu a kakabsat ni Kristo nga adda pay laeng ditoy daga, ken degdegdeganna ti irarautna bayat a maib-ibusen ti ‘ababan a periodo ti tiempona.’ (Apoc. 12:9, 12, 17) Nupay agpaspasar dagiti napulotan iti nakaro a pannubok, itultuloyda nga idauluan ti kasaknapan pay laeng a trabaho a panangasaba iti pakasaritaan ti tao. Nabatad nga adda kadakuada ni Jesus ken iwanwanwanna ida.—Mat. 28:20.

17 Ti umad-adu a bilang dagiti potensial a karnero ibilangda a maysa a pribilehio ti panangsuporta kadagiti kakabsat ni Kristo saan laeng a babaen iti trabaho a panangasaba no di ket iti dadduma pay a praktikal a pamay-an. Kas pagarigan, mangipapaayda iti pinansial a kontribusion, tumultulongda iti panagibangon kadagiti Kingdom Hall, Assembly Hall, ken sanga nga opisina, ken sisusungdo nga agtultulnogda kadagiti mangidadaulo a dinutokan ti “matalek ken masirib nga adipen.”—Mat. 24:45-47; Heb. 13:17.

Dagiti arig-karnero supsuportaranda dagiti kakabsat ni Kristo iti nadumaduma a pamay-an (Kitaen ti parapo 17)

18 Asidegen a palusposan dagiti anghel dagiti makadadael nga angin ti dakkel a rigat. Mapasamakto dayta kalpasan ti maudi a pannakaselio ti amin a kakabsat ni Kristo nga addanto pay laeng ditoy daga. (Apoc. 7:1-3) Sakbay a mangrugi ti Armagedon, addanton idiay langit dagiti napulotan. (Mat. 13:41-43) Ngarud, itan ti tiempo a sisusungdo a suportarantayo dagiti kakabsat ni Kristo no kayattayo ti maibilangto kas karnero.

^ par. 6 Para iti detalyado a pannakailawlawag daytoy nga ilustrasion, kitaen dagiti artikulo nga “Anianto ti Takderyo iti Sanguanan ti Pangukoman?” ken “Aniat’ Masakbayan Dagiti Karnero ken Kalding?” iti Pagwanawanan nga Oktubre 15, 1995.