Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan —Pagadalan nga Edision

  |  Marso 2015

Daytoy ti “Wagas nga Inanamongam”

Daytoy ti “Wagas nga Inanamongam”

“Dagitoy a banag siaannad nga inlimedmo kadagiti mamasirib ken nasasaririt, ket impalgakmo ida kadagiti maladaga.”—LUC. 10:21.

1. Apay a ni Jesus ‘aglaplapusanan ti rag-ona iti nasantuan nga espiritu’? (Kitaen ti ladawan iti rugi ti artikulo.)

MAILADAWAM kadi ni Jesu-Kristo nga ‘aglaplapusanan ti rag-ona iti nasantuan nga espiritu’? Nalabit kasla makitkitam a nagmayat ti isemna ken nakaragragsak. Apay? Kaibabaonna laeng idi ti 70 kadagiti adalanna a mangikasaba iti naimbag a damag maipapan iti Pagarian ti Dios, ket magagaran unay a makaammo no kasanoda nga intungpal ti annongenda. Adu a nalatak a tattao ti bumusbusor iti naimbag a damag, kas kadagiti nasikap ken nangato ti adalna nga eskriba ken Fariseo. Inimpluensiaanda ti adu a tattao a mangtagibassit ken Jesus kas maysa laeng a karpintero ken kadagiti adalanna kas “awan adalna ken gagangay.” (Ara. 4:13; Mar. 6:3) Nupay kasta, nakaragragsak dagiti adalan idi nagsublida. Nangasabada nupay busbusoren ida dagiti tattao, ken uray dagiti demonio! Apay a naragsak ken naturedda latta?—Basaen ti Lucas 10:1, 17-21.

2. (a) Kasano a mayarig kadagiti ubbing dagiti adalan ni Jesus? (b) Ania ti nakatulong kadagiti pasurot ni Kristo a mangtarus kadagiti napapateg a naespirituan a kinapudno?

2 Paliiwem ti kinuna ni Jesus ken Jehova: “Idaydayawka iti publiko, Ama, Apo ti langit ken daga, agsipud ta inlemmengmo dagitoy a banag kadagiti mamasirib ken nasaririt ket  impalgakmo ida kadagiti ubbing. Wen, O Ama, agsipud ta ti panangaramid iti kasta isu ti wagas nga inanamongam.” (Mat. 11:25, 26) Siempre, saan nga ibagbaga ni Jesus a literal nga ubbing dagiti adalanna. Imbes ketdi, ammona a kayariganda dagiti ubbing no maidilig kadagiti mamasirib ken nangato ti adalna nga eskriba ken Fariseo, a mangibilang iti bagbagida kas masirib. Ngem insuro ni Jesus dagiti pasurotna nga agbalinda koma a kas ubbing, nga agtalinaedda a napakumbaba ken nalaka a maisuro. (Mat. 18:1-4) Ania ti resulta ti kinapakumbabada? Tinulongan ida ni Jehova babaen ti nasantuan nga espirituna tapno matarusanda dagiti napapateg a kinapudno. Ngem dagiti masirib ken nasaririt, a manglalais kadakuada, nagtalinaedda a bulsek iti naespirituan gapu ken Satanas ken iti kinapasindayagda.

3. Ania ti usigentayo iti daytoy nga artikulo?

3 Di pakasdaawan a maragragsakan ni Jesus! Maragsakan a makakita iti panangipalgak ni Jehova kadagiti nauneg a naespirituan a kinapudno kadagiti napakumbaba a tattao, aniaman ti adalda. Maragragsakan ta inanamongan ni Amana daytoy a pamay-an ti panangisuro. Nagbalbaliw kadi ti panangmatmat ni Jehova, ken kasano nga ipakpakitana nga anamonganna pay laeng daytoy a kita ti panangisuro? Bayat nga usigentayo ti sungbat, sigurado a maragsakantayo met a kas ken Jesus.

PANANGIPAKAAMMO KADAGITI NAUNEG A KINAPUDNO ITI ISUAMIN A TAO

4. Apay a maysa a naayat a sagut ti napasimple nga edision ti The Watchtower?

4 Iti nabiit pay a tawtawen, ad-addan nga ipagpaganetget ti organisasion ni Jehova ti nasimsimple ken nalawlawag a pamay-an ti panangisuro. Usigentayo ti tallo a pagarigan. Umuna, nairuar ti napasimple nga edision ti The Watchtower. * Daytoy nga edision ket naayat a sagut para kadagidiay marigatan a mangtarus iti regular nga edision. Madlaw dagiti ulo ti pamilia a mas aktibo itan dagiti annakda nga agkomento bayat ti Panagadal iti Pagwanawanan, ti kangrunaan a pamay-an a pakatartaraonantayo iti naespirituan. Adu ti nagsurat tapno iyebkasda ti naimpusuan a panagyamanda. Maysa a sister ti nagkuna nga agkedked idi nga agkomento iti Panagadal iti Pagwanawanan. “Managbabainak idi,” kinunana. Ngem ita ta us-usarennan ti napasimple nga edision, kinunana: “Saan laengen a mammaminsan nga agkomentoak, ken saanakon nga agnerbios! Agyamanak ken Jehova ken kadakayo.”

5. Ania ti sumagmamano a pagsayaatan ti rebisado nga edision ti New World Translation of the Holy Scriptures?

5 Maikadua, naaramid ti rebisado nga edision ti New World Translation of the Holy Scriptures a nairuar iti Ingles iti tinawen a miting idi Oktubre 5, 2013. * Basbassiten ti sasao a nausar iti adu a teksto, ngem isu met laeng ti kaipapananna ken nalaklaka pay ketdin a maawatan. Kas pagarigan, ti dati a 27 a sasao iti Job 10:1 ket nagbalin laengen a 19; ti 20 a sasao iti Proverbio 8:6 ket nagbalinen a 13. Nalaklaka itan a maawatan dagitoy a bersikulo iti baro nga edision. Kinapudnona, kinuna ti maysa a matalek a napulotan a brother nga adun a dekada nga agserserbi: “Kabasbasak laeng ti libro a Job iti baro nga edision, ket kasla itak pay laeng a maawatan ti linaonna!” Kasta met laeng ti komento ti adu a kakabsat.

6. Ania ti panagriknam maipapan iti nabalbaliwan a pannakaawattayo iti Mateo 24:45-47?

 6 Maikatlo, usigentayo ti dadduma a nabiit pay a panagbalbaliw iti pannakaawattayo. Kas pagarigan, naragsakantayo idi limmawag ti pannakaawattayo maipapan iti “matalek ken masirib nga adipen,” a nairuar iti Pagwanawanan a Hulio 15, 2013. (Mat. 24:45-47) Nailawlawag a ti matalek nga adipen ket isu ti Bagi a Manarawidwid, idinto ta ‘dagiti katulong’ ket dagiti amin a matartaraonan iti naespirituan, napulotan man wenno kameng ti “sabsabali a karnero.” (Juan 10:16) Anian a ragsaktayo a makaammo kadagitoy a kinapudno ken mangisuro kadagita iti dadduma! Ania ti dadduma pay a pamay-an a mangipakpakita nga anamongan ni Jehova ti simple ken nalawag a panangisuro?

NALAWLAWAG KEN NASIMSIMPLE A PANNAKAILAWLAWAG DAGITI SALAYSAY ITI BIBLIA

7, 8. Ania ti dadduma a salaysay iti Biblia nga adda dakdakkel a kaitungpalanna iti masanguanan?

7 No adun a tawen nga agserserbika ken Jehova, mabalin a nadlawmo ti in-inut a panagbaliw iti pamay-an a panangilawlawag dagiti literaturatayo iti adu a salaysay iti Biblia. Kasano? Iti napalpalabas, masansan a mabasatayo kadagiti literaturatayo nga adda tipiko ken antitipiko a kaipapanan dagitoy a salaysay. Ti salaysay iti Biblia isu ti tipiko, ket ti naimpadtuan a kaitungpalanna isu ti antitipiko. Adda kadi nakaibatayan ti kasta a panangilawlawag? Adda. Kas pagarigan, dinakamat ni Jesus ti “pagilasinan ni Jonas a mammadto.” (Basaen ti Mateo 12:39, 40.) Inlawlawag ni Jesus a ti temporario a kaadda ni Jonas iti tian ti ikan—a dayta koman ti tanemna no saan nga inispal ni Jehova—iladladawanna ti tiempo a kaadda ni Jesus iti tanem.

8 Adda pay dadduma a salaysay iti Biblia nga addaan iti dakdakkel a kaitungpalan iti masanguanan. Inlawlawag ni apostol Pablo ti sumagmamano kadagita. Kas pagarigan, ti relasion ni Abraham kada Agar ken Sara iladladawanna ti relasion ni Jehova iti nasion ti Israel ken iti nailangitan a paset ti organisasion ti Dios. (Gal. 4:22-26) Kasta met, ti tabernakulo ken ti templo, ti Aldaw ti Panangabbong, ti nangato a padi, ken ti dadduma pay nga aspeto ti Mosaiko a Linteg ket “anniniwan ti naimbag a bambanag nga umay.” (Heb. 9:23-25; 10:1) Makapainteres ken makapabileg iti pammati ti panangadal kadagita a salaysay ken dagiti iladladawanda. Ngem kaipapananna kadi a tunggal karakter, pasamak, ken banag a nadakamat iti Biblia ket adda iladladawanna nga indibidual wenno banag?

9. Ania ti dati a pannakailawlawag ti salaysay iti Biblia maipapan ken Nabot?

9 Iti napalabas, masansan a kasta ti pannakailawlawag dagiti salaysay iti Biblia. Kas pagarigan, iti salaysay maipapan ken Nabot, implano ti dakes a reyna a ni Jezebel ti di nainkalintegan a pannakabista ken pannakapapatay ni Nabot tapno maagaw ni lakayna nga Acab ti kaubasan dayta a lalaki. (1 Ar. 21:1-16) Idi 1932, inlawlawag ti The Watchtower a da Acab ken Jezebel iladladawanda ni Satanas ken ti organisasionna; ni Nabot iladladawanna ni Jesus; sa ti ipapatay ni Nabot iladladawanna ti pannakapapatay ni Jesus. Ngem iti libro a “Let Your Name Be Sanctified” a naipablaak idi 1961, naikuna a ni Nabot iladladawanna dagiti napulotan, ket ni Jezebel iladladawanna ti Kakristianuan. Ti ngarud pannakaidadanes ni Nabot iti ima ni Jezebel iladladawanna ti pannakaidadanes dagiti napulotan bayat ti maudi nga al-aldaw. Iti adu a tawtawen, napabileg ti pammati ti ili ti Dios kadagiti kastoy a panangilawlawag. Apay ngarud a sabali itan ti pamay-an ti panangilawlawagtayo?

10. (a) Kasano a nagbalin nga ad-adda a naannad ti matalek nga adipen no maipapan iti panangilawlawag iti dadduma a salaysay iti Biblia? (b) Ania itan ti ad-adda a nakaipamaysaan dagiti literaturatayo?

 10 Iti panaglabas ti tawtawen, tinulongan ni Jehova ti “matalek ken masirib nga adipen” nga agbalin nga ad-adda a masirib, wenno naannad. Gapu iti dayta, sada laengen ibaga nga adda iladladawan ti maysa a salaysay iti Biblia no adda nalawag a Nainkasuratan a nakaibatayanna. Kasta met, ti dadduma a dati a pannakailawlawag dagiti salaysay iti Biblia ken dagiti iladladawanda ket narigat a maawatan, tandaanan, ken iyaplikar. Kangrunaanna, no nakapokustayo unay kadagiti posible a dakdakkel a kaipapanan dagiti salaysay iti Biblia, mabalin a lumibeg wenno mapukaw pay ketdin dagiti moral wenno praktikal a leksion a maadal kadagita. Isu nga ita, ad-addan a naipamaysa dagiti literaturatayo kadagiti simple ken praktikal a leksion maipapan iti pammati, panagibtur, nadiosan a debosion, ken dadduma pay a napapateg a kualidad a masursurotayo kadagiti salaysay iti Biblia. *

Nagpateg ti maadaltayo iti ulidan ni Nabot (Kitaen ti parapo 11)

11. (a) Ania itan ti panangilawlawagtayo iti salaysay maipapan ken Nabot, ken kasano a makatulong ti ulidanna kadatayo? (b) Apay a manmanon a dakamaten dagiti nabiit pay a publikasiontayo dagiti tipiko ken antitipiko? (Kitaen ti “Salsaludsod Dagiti Agbasbasa” iti daytoy a ruar.)

11 Ania ngarud itan ti panangilawlawagtayo iti salaysay maipapan ken Nabot? Nalawlawag ken nasimsimplen. Natay daytoy a nalinteg a lalaki, saan a gapu ta iladladawanna ni Jesus wenno dagiti napulotan, no di ket gapu iti kinamatalekna iti Dios. Nagtulnog iti Linteg ni Jehova uray no indadanes dagiti naulpit nga agtuturay. (Num. 36:7; 1 Ar. 21:3) Anian a nagsayaat nga ulidan para iti amin nga adipen ti Dios ita a mabalin nga agib-ibtur iti kasta a pannakaidadanes! (Basaen ti 2 Timoteo 3:12.) Ti kasta a makapabileg iti pammati a leksion ket nalaka a maawatan, malagip, ken iyaplikar ti amin a Kristiano.

12. (a) Ania koma ti saantay a panunoten maipapan kadagiti salaysay iti Biblia? (b) Apay a kabaelantayo nga ilawlawag uray dagiti nauneg a bambanag? (Kitaen ti footnote.)

12 Ngem kayatna kadi a sawen a praktikal a leksion laeng ti maadaltayo kadagiti salaysay iti Biblia ken awanen ti sabali a kaipapananda? Saan. Ad-adda itan nga isursuro  dagiti publikasiontayo no kasano nga umasping ti maysa a salaysay iti Biblia iti sabali pay a salaysay. Saan unayen a naipamaysa dagiti literaturatayo kadagiti simboliko a kaipapanan dagiti salaysay iti Biblia. Kas pagarigan, umiso nga ibagatayo a ti kinatarnaw ni Nabot iti laksid ti pannakaidadanes ken ipapatay ipalagipna kadatayo ti kinatarnaw ni Kristo ken dagiti napulotan. Ngem mabalin met nga ipalagip dayta ti kinamatalek ti adu a kameng ti “sabsabali a karnero” ti Apo. Ti kasta a nalawag ken simple a panangyasping ti pakabigbigan ti nadiosan a sursuro. *

NASIMSIMPLE A PANNAKAILAWLAWAG DAGITI ILUSTRASION NI JESUS

13. Ania dagiti pagarigan a mangipakita a nasimsimple ken nalaklaka itan a maawatan ti panangilawlawagtayo iti dadduma nga ilustrasion ni Jesus?

13 Ni Jesu-Kristo ti katan-okan a Mannursuro a nagbiag ditoy daga. Maysa kadagiti magusgustuanna a pamay-an ti panangisuro ket ti panagaramat iti ilustrasion. (Mat. 13:34) Dagiti ilustrasion ket nabiag a panangiladawan iti maysa a banag a manggutugot iti isip ken puso. Iti panaglabas ti tawtawen, nasimsimple kadin ken nalaklakan a maawatan ti panangilawlawag dagiti literaturatayo kadagiti ilustrasion ni Jesus? Wen. Saan kadi a naragsakantayo iti limmawag a pannakatarustayo kadagiti ilustrasion ni Jesus maipapan iti lebadura, bukel ti mustasa, ken iket iti Pagwanawanan a Hulio 15, 2008? Silalawag itan a maawatantayo a dagitoy nga ilustrasion ket agaplikar iti Pagarian ti Dios ken iti naballigi a pannakaummong dagiti pudno a pasurot ni Kristo manipud iti daytoy dakes a lubong.

14. (a) Ania ti dati a panangilawlawagtayo iti pangngarig ni Jesus maipapan iti naasi a Samaritano? (b) Ania itan ti pannakaawattayo iti dayta a pangngarig ni Jesus?

14 Dagiti ngay mas detalyado nga estoria wenno pangngarig nga insalaysay ni Jesus? Siempre, sumagmamano kadagitoy ket simboliko ken adda iladladawanna; ken adda met dagiti mangipaganetget iti praktikal a leksion. Ngem kasanotayo nga ammo no ania a salaysay ti simboliko wenno saan? Limmawag ti sungbat iti dayta bayat ti panaglabas ti tawtawen. Kas pagarigan, usigentayo ti dati a panangilawlawagtayo iti pangngarig ni Jesus maipapan iti naasi a Samaritano. (Luc. 10:30-37) Idi 1924, kinuna ti The Watch Tower a ti Samaritano iladladawanna ni Jesus; ti dalan manipud Jerusalem agingga iti Jerico, nga agpasalog, iladawanna ti dumakdakes a kasasaad ti tao nanipud napasamak ti rebelion idiay Eden; dagiti mannanakaw iti dalan iladawanda dagiti dadakkel a korporasion ken dagiti naagum a komersiante; ket ti padi ken ti Levita iladawanda ti Kakristianuan. Ita, us-usaren dagiti literaturatayo dayta nga ilustrasion a mangipalagip kadagiti amin a Kristiano a ditay koma mangidumduma no tumulongtayo, nangnangruna iti naespirituan. Saan kadi a makaparagsak ta pagbalbalinen ni Jehova a nalawag kadatayo ti kinapudno?

15. Ania ti usigentayo iti sumaruno nga artikulo?

15 Iti sumaruno nga artikulo, usigentayo ti sabali pay a pangngarig ni Jesus—ti sangapulo a birhen. (Mat. 25:1-13) Kasano ti kayat ni Jesus a pannakaawat dagiti pasurotna iti maudi nga al-aldaw iti dayta a nabileg nga ilustrasion? Kayatna kadi a tarusantayo dayta kas maysa a detalyado a salaysay a tunggal tao, banag, ken pasamak ket addaan iti simboliko a kaipapanan? Wenno, kayatna a masursurotayo dagiti praktikal a leksion a makatulong kadatayo iti maudi nga al-aldaw? Kitaentayo.

^ par. 4 Ti napasimple nga edision ket damo a nairuar iti Ingles idi Hulio 2011. Nanipud idin, nairuar met ti napasimple nga edision iti sumagmamano a lengguahe.

^ par. 5 Maisagsaganan ti rebisado nga edision iti dadduma pay a lengguahe.

^ par. 10 Kas pagarigan, ti libro a Tuladenyo ti Pammatida ilawlawagna ti biag ti 14 a nagduduma a karakter ti Biblia. Naipamaysa dayta kadagiti praktikal a leksion, imbes a kadagiti simboliko wenno naimpadtuan a kaipapanan.

^ par. 12 Naglaon met ti Sao ti Dios iti bambanag a kasla “narigat a maawatan,” a pakairamanan ti dadduma a paset ti sursurat ni Pablo. Ngem amin a mannurat ti Biblia ket pinaltiingan ti nasantuan nga espiritu. Dayta met la a puersa ti tumultulong kadagiti pudno a Kristiano ita tapno maawatanda dagiti kinapudno iti Biblia. Iti kasta, “uray pay ti nauneg a bambanag ti Dios” ket nalaklaka a maawatan ti limitado a panunottayo.—2 Ped. 3:16, 17; 1 Cor. 2:10.