Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan —Pagadalan nga Edision  |  Marso 2015

 PAKASARITAAN TI BIAG

Nasarakanmi ti Naragragsak a Karera

Nasarakanmi ti Naragragsak a Karera

LIMA ti tawenmi ken Gwen idi mangrugikami nga agsursuro nga agsala. Dikam pay idi agam-ammo. Ngem bayat a dumakdakkelkami, agpadakami a determinado a mangtun-oy iti arapaapmi nga agbalin a nalatak a sumasala iti ballet. Ngem no kaano a dandanimin madanon ti alimpatok ti balligi, pinanawanmi ti propesionmi. Apay?

David: Nayanakak idi 1945 iti ili ti Shropshire, England. Adda farm ni tatangko iti naulimek nga away. Kalpasan ti klase, pagay-ayatko ti agpakan kadagiti manok ken agkolekta kadagiti itlog kasta met ti agaywan kadagiti baka ken karnero. No bakasionen iti eskuelaan, tumulongak nga agani, a no dadduma siak ti agmaneho kadagiti traktorami.

Ngem adda pay sabali a naginteresak a nagbalin a paset ti biagko. Idi ubingak pay, napaliiw ni tatangko nga agsalaak no kasta a makangngegak iti musika. Isu nga idi lima ti tawenko, insingasingna ken Nanang nga ipannak iti maysa nga eskuelaan ti panagsala iti lugarmi tapno agsursuroak iti tap dancing. Nakita ti mannursurok nga adda potensialko nga agbalin a ballet dancer isu a sinuruannak met nga ag-ballet. Idi agtawenak iti 15, nangabakak iti scholarship iti nalatak a Royal Ballet School idiay London. Dita a naam-ammok ni Gwen, ket dakami ti nagbalin nga agpartner.

Gwen: Nayanakak iti okupado a siudad ti London idi 1944. Uray idi ubingak pay, addan nauneg a pammatik iti Dios. Basbasaek ti Bibliak ngem diak maaw-awatan. Idi lima ti tawenko, nageskuelaak iti panagsala. Kalpasan ti innem a tawen, nangabakak iti maysa a kompetision a silulukat iti amin a taga-Britain, a ti mangabak ket agbalin a junior student iti The Royal Ballet School. Masarakan dayta iti White Lodge, maysa a napintas a Georgian mansion iti Richmond Park iti London. Sadiay a nageskuelaak ken sinanaydak dagiti nalalaing a mannursuro iti ballet. Idi agtawenakon iti 16, nagbalinak a senior student iti The Royal Ballet School iti sentro ti London, ket dita a naam-ammok ni David. Kalpasan ti sumagmamano laeng a bulan, agpabpabuyakamin iti ballet iti Royal Opera House iti Covent Garden, London.

Gapu iti karerami kas ballet dancer, nakapagsalakami iti nadumaduma a paset ti lubong

David: Kas kinuna ni Gwen, nakapagsalakami iti nalatak a Royal Opera House ken nagbalinkami a miembro ti London Festival Ballet (maawagan itan iti English National Ballet). Maysa a choreographer iti Royal Ballet ti nangbukel iti maysa nga internasional a kompania idiay Wuppertal, Germany, ket pinilinakami a dua kas soloist dancer. Bayat nga aktibokami iti karerami, nagpabpabuyakami kadagiti teatro iti intero a lubong a kaduami dagiti nalatak a ballet dancer a kas kada Margot Fonteyn ken Rudolf Nureyev. Gapu iti kastoy a kita ti karera,  nagbalinkami a managimbubukodan, ket ti laengen propesionmi ti nakaipokusanmi.

Gwen: Naipamaysa ti intero a bagi ken panunotko iti panagsala. Ambisionmi ken David ti agbalin a nalatak. Magusgustuak ti agpirma iti autograph, umawat kadagiti sabsabong, ken ti panagpalakpak dagiti agbuybuya. Kas agpabpabuya iti teatro, napalikmutanak iti tattao nga immoral, managsigarilio, ken managinum iti arak; ken kas iti dadduma a padak ti karerana, nagtalekak kadagiti an-anib.

NAAN-ANAY A NABALBALIWAN TI BIAGMI

Ti aldaw ti kasarmi

David: Kalpasan ti adu a tawen iti karera a panagsala, nabannogakon nga agakar-akar. Dimmakkelak iti maysa a farm, ket mailiwak iti simple a biag iti away. Isu nga idi 1967, pinanawak ti karerak ket inrugik ti nagtrabaho iti dakkel a farm iti asideg ti pagtaengan dagiti nagannakko. Pinalubosannak ti makinkukua iti farm nga agabang iti bassit a balay. Kalpasanna, tinawagak ni Gwen iti teatro ket kiniddawko nga agkasarkami. Maysa idin a solo dancer ket nasayaaten ti karerana, isu a saan a nalaka dayta para kenkuana. Ngem kaskasdi nga inawatna ti kiddawko ket nagnaedkami iti farm, nupay saanna a nakairuaman dayta.

Gwen: Wen, narigat ti biag iti farm. Agpagatasak iti baka ken agpakanak iti baboy ken manok uray ania ti paniempo, ket naiduma dayta iti biag a nakairuamak. Nageskuela ni David iti farming iti siam a bulan tapno masursurona dagiti kabaruan a metodo ti panagtaraken, ket nalidayak agingga a di makaawid iti rabii. Nayanak idin ti inauna a balasangmi a ni Gilly. Kas insingasing ni David, sinursurok ti agmaneho iti lugan. Maysa nga aldaw, bimmisitaak iti maysa a kabangibang nga ili ket nakitak ni Gael, a naam-ammok idi iti maysa a shop a pagtrabtrabahuanna.

Ti biagmi iti farm idi kakaskasarmi

Inawisnak ni Gael iti balayda tapno uminomkami iti tsa. Nagpinnakitakami kadagiti retrato ti kasarmi, ket adda nakitak a retratoda a naala iti ruar ti patakder a maaw-awagan iti Kingdom Hall. Dinamagko no ania a simbaan dayta. Naragsakanak idi imbagana nga isuda nga agassawa ket Saksi ni Jehova. Malagipko a Saksi ti maysa nga antik. Malagipko met a kasuron unay idi ni tatangko ni antik, nga uray la ibellengna dagiti pagbasaan dagiti Saksi. Isu a masmasdaawak no apay a kapungtot unay ti nasingpet a tatangko ti nasayaat nga antik.

Naaddaanak met laengen iti gundaway a mangammo no ania ti nakaidumaan ti patpatien ni antik kadagiti sursuro ti simbaan. Impakita ni Gael kaniak no ania a talaga ti isursuro ti Biblia. Nasdaawak ta adu gayam a doktrina, kas iti Trinidad ken immortal a kararua, ti saan a maitunos iti Kasuratan.  (Ecl. 9:5, 10; Juan 14:28; 17:3) Damok met a makita iti Biblia ti nagan ti Dios a Jehova.—Ex. 6:3.

David: Imbaga ni Gwen kaniak ti nasursurona. Nalagipko ti kinuna ni Tatang idi ubingak a masapul a basaek ti Nasayaat a Libro. Immanamongkami ngarud ken Gwen a makipagadal iti Biblia iti agassawa a da Gael ken Derrick. Kalpasan ti innem a bulan, naaddaankami iti oportunidad a mangabang iti bassit a farm iti Oswestry, iti met laeng ili ti Shropshire, isu nga immakarkami sadiay. Ni Deirdre, a maysa a Saksi iti dayta a lugar, ti siaanus a nangitultuloy iti panagadalmi iti Biblia. Idi damo, naginad ti panagrang-aymi. Okupadokami ngamin unay kadagiti tarakenmi. Ngem in-inut a rimmamut ti kinapudno iti pusomi.

Gwen: Ti dakkel a lapped a masapul a parmekek ket ti panamatik iti gasat. Nakatulong kaniak ti Isaias 65:11 a mangammo no ania ti panangmatmat ni Jehova ‘kadagidiay agidasdasar iti lamisaan maipaay iti dios ti Naimbag a Gasat.’ Kinasapulak ti adu a tiempo ken kararag tapno maibellengko ti amin nga an-anib ken anting-antingko. Idi naadalko a “siasinoman a mangitan-ok iti bagina maipababanto, ket siasinoman a mangipababa iti bagina maitan-okto,” ammokon no ania a kita ti tao ti sapsapulen ni Jehova. (Mat. 23:12) Kayatko ti agserbi iti Dios a maseknan unay kadatayo nga uray la impaayna ti bugbugtong nga Anakna kas subbot. Nayanak idin ti maikadua a balasangmi, ket makaparagsak a maammuan a mabalinmi ti agbiag nga agnanayon iti paraiso a daga kas maysa a pamilia.

David: Idi natarusak ti nakaskasdaaw a pannakatungpal dagiti padto ti Biblia, kas iti masarakan iti Mateo kapitulo 24 ken iti libro ti Daniel, nakombinsirak a daytoyen ti kinapudno. Nabigbigko nga iti daytoy a sistema ti bambanag, awanen ti napatpateg pay ngem iti maaddaan iti relasion ken Jehova. Isu nga iti panaglabas ti tiempo, in-inut a nakissayan ti kinaambisiosok. Naawatak a napateg met a kas kaniak ti asawak ken dagiti annakko. Nakombinsirak iti kuna ti Filipos 2:4 a masapul a saan laeng a ti bagik ti pampanunotek ken ti tarigagayko a maaddaan iti dakkel a farm. Imbes ketdi, kasapulan nga iyun-unak ti agserbi ken Jehova. Insardengko ngarud ti agsigarilio. Inorganisarko ti aktibidad ti pamiliami tapno makatabunokami iti gimong iti rabii ti Sabado iti Kingdom Hall a 10 kilometro (6 milia) ti kaadayona. Saan a nalaka dayta gapu ta kasapulan a magatasan dagiti baka iti dayta nga oras. Ngem gapu iti tulong ni Gwen, saanmi a naliwayan ti makigimong. Kanayon met nga ikuyogmi dagiti annakmi a rummuar iti ministerio iti tunggal agsapa ti Domingo—kalpasan a mapagatasmi dagiti baka.

Saan a naragsakan dagiti kabagianmi iti dayta a panagbalbaliw. Innem a tawen a saan a nakisarsarita ken Gwen ni tatangna. Kayat met dagiti nagannakko nga isardengmi ti makikadua kadagiti Saksi.

 Gwen: Tinulongannakami ni Jehova nga agibtur kadagitoy a suot. Idi agangay, dagiti kakabsat iti Oswestry Congregation ti nagbalin a baro a pamiliami, a siaayat a tinulongandakami iti amin a problemami. (Luc. 18:29, 30) Indedikarmi ti biagmi ken Jehova ket nabautisarankami idi 1972. Kayatko a tulongan ti adu a tattao a mangammo iti kinapudno, isu a nagpayunirak.

TI NARAGSAK A BARO A KARERAMI

David: Makabannog ti tawtawen a panagtrabahomi iti farm. Ngem inkagumaanmi ti agbalin nga ulidan iti naespirituan kadagiti babbalasangmi. Idi kinissayan ti gobierno ti badyetna para iti nadumaduma a sektor, insublimi ti farm iti makinkukua. Gapu ta awanen ti pagtaengan ken trabahomi ken makatawen pay laeng ti maikatlo nga anakmi, inkararagmi ken Jehova a tulongan ken iwanwannakami. Nagdesisionkami nga usaren ti abilidadmi ket nanglukatkami iti maysa a dance studio kas pangsuporta iti pamiliami. Nasayaat ti imbunga ti determinasionmi a mangyun-una iti naespirituan a bambanag. Maragsakankami idi nagpayunir dagiti tallo nga annakmi kalpasan ti panageskuelada. Payunir met idin ni Gwen isu nga inaldaw a masanayna dagiti annakmi.

Idi nagasawan ti dua nga in-inauna a babbalasangmi, da Gilly ken Denise, inserrami ti dance studio. Nagsuratkami iti sanga nga opisina no sadino ti mabalin a tumulonganmi. Naibaonkami kadagiti ili iti abagatan a daya nga England. Ni laengen Debbie nga anakmi ti adda idi iti podermi, isu a nangrugiak metten nga agpayunir. Kalpasan ti lima a tawen, naawiskami a tumulong kadagiti ad-adayo pay a kongregasion iti amianan. Kalpasan a nagkasar ni Debbie, nagserbikami iti sangapulo a tawen iti programa nga internasional a panagibangon idiay Zimbabwe, Moldova, Hungary, ken Côte d’Ivoire. Kalpasanna, nagsublikami iti England tapno tumulong iti konstruksion iti Bethel iti London. Gapu iti kapadasak iti farming, nakiddaw a tumulongak iti Bethel farm nga adda pay laeng idi. Iti agdama, agpaypayunirkami iti amianan a laud nga England.

Nasarakanmi ti dakkel a rag-o iti panagserbimi kadagiti proyekto iti internasional a panagibangon

Gwen: Naragsak ti umuna a karerami—ti ballet—ngem saan a nagpaut. Nangted kadakami iti dakkel a rag-o ti maikadua ken kapatgan a karerami—ti panagserbimi ken Jehova—ken manayon dayta. Agpartnerkami pay laeng, ngem iti daytoy a gundaway us-usarenmi ti sakami iti panagpayunir. Kasta unay a ragsak ti inyeg kadakami ti panangtulongmi iti adu a tattao a mangammo iti napateg ken makaispal-biag a kinapudno. Dagitoy a ‘sursurat ti rekomendasion’ ket nasaysayaat ngem iti aniaman a kinalatak iti daytoy a lubong. (2 Cor. 3:1, 2) No saanmi a nasarakan ti kinapudno, ti laeng koma adda kadakami ket ti pakalaglagipan ti dati a karerami, dagiti daan a retrato, ken rekord dagiti panagpabuyami kadagiti teatro.

David: Dakkel ti nagbalbaliwan ti biagmi gapu iti karerami a panagserbi ken Jehova. Ammok a dayta ti nakatulong kaniak nga agbalin a nasaysayaat nga asawa ken ama. Ibaga kadatayo ti Biblia nga inyebkas da Miriam, Ari David, ken ti dadduma pay ti ragsakda babaen ti panagsala. Ket dakami, kasta met ti adu a dadduma pay, magagarankami nga agsala gapu iti rag-o iti baro a lubong ni Jehova.—Ex. 15:20; 2 Sam. 6:14.

Ammuem ti Ad-adu Pay

TI PAGWANAWANAN

Pinagbalinko a Karera ti Panagserbi ken Jehova

Sumagmamano laengen a bulan ket aggraduaren kas architectural engineer, ngem inkeddeng ni Bill Walden a ragpaten ti naiduma a karera. Basaem no kasano a nagbaliw ti biagna gapu ta pinilina ti agserbi iti Dios iti amin-tiempo.

AGRIINGKAYO!

Ilawlawag ti Maysa a Klasikal a Pianista No Apay a Mamati iti Dios

Gapu iti musika, nakombinsir ti dati nga ateista a mamati iti Namarsua. Apay a nakombinsir a ti Biblia ket nagtaud iti Dios?