Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan —Pagadalan nga Edision  |  Pebrero 2015

Salsaludsod Dagiti Agbasbasa

Salsaludsod Dagiti Agbasbasa

Ania ti mabalin nga aramiden tapno matulongan dagiti kakabsat a sensitibo iti angot ti bangbanglo?

Narigat ti kasasaad dagiti sensitibo iti angot ti bangbanglo. Iti inaldaw a pannakipulapolda iti sabsabali, saanda a naan-anay a maliklikan ti makaangot iti bangbanglo. Nupay kasta, adda dagidiay agdamdamag no mabalin a kiddawen a liklikan dagiti kakabsat ti agusar iti bangbanglo ken cologne kadagiti Nakristianuan a gimong, asamblea, ken kombension.

Awan met siguro ti Kristiano a mangigagara a mangaramid iti maysa a banag a mangparigat kadagiti kakabsat a tumabuno kadagiti Nakristianuan a taripnong. Kasapulantayo amin ti pammaregta a maipapaay kadagiti gimongtayo. (Heb. 10:24, 25) Gapuna, asinoman a sensitibo unay iti bangbanglo, a dayta ti makagapu a saanen a makagimong, mabalinna ti makisarita kadagiti panglakayen maipapan iti daytoy a banag. Nupay saan a Nainkasuratan wenno maitutop ti mangaramid iti paglintegan maipapan iti panagusar iti bangbanglo kadagiti gimong, mabalin a mangipaay dagiti panglakayen iti makatulong nga impormasion tapno matarusan dagiti kakabsat ti parikut a pakaipaspasanguan ti dadduma. Depende iti kasasaad, mabalin nga iraman dagiti panglakayen iti lokal a kasapulan iti Gimong ti Serbisio dagiti nabiit pay a nairuar a napapateg nga impormasion mainaig iti dayta. Wenno mabalin met a mangaramidda iti naannad a pakaammo. * Ngem saan koma nga ulit-uliten dayta dagiti panglakayen. Kanayonto latta nga adda dagiti kabbaro a makigimong a saan a makaammo iti dayta a problema, ket kayattayo a mariknada a maragsakantay iti kaaddada. Ditay kayat nga adda asinoman a saan a relaks gapu iti panagusarna iti kalkalainganna ti angotna a bangbanglo.

No adda kasta a problema iti kongregasionyo ken no ipalubos ti kasasaad, mabalin nga iyurnos dagiti panglakayen nga agtugaw dagiti kakabsat a sensitibo iti bangbanglo iti maysa a paset ti Kingdom Hall. Kas pagarigan, nalabit adda conference room a mabalinda a pagyanan tapno magunggonaanda iti gimong. No saan a mairemedio ti kasasaad ken adda latta dagiti maapektaran iti bangbanglo, mabalin nga irekord dagiti gimong wenno i-hook-up dagita babaen ti telepono, kas iti maar-aramid para kadagiti kakabsat a saanen a makaruar iti pagtaenganda.

Mainaig iti daytoy a banag, masapul met koma a nakonsiderartayo iti sabsabali no tumabunotayo kadagiti rehional a kombension. Gapu ta kaaduan a kombension ket maang-angay kadagiti nakubong a lugar, ken awan met ti naisina a paset ti pagkombensionan a pagyanan dagiti sensitibo iti bangbanglo, panangipakita iti ayat no limitarantayo ti panagusartayo iti bangbanglo. Ngem daytoy nga instruksion ket saan koma nga agbalin a paglintegan kadagiti gimong ti kongregasion, ken saantay koma a matmatan a kasta.

Bayat nga addatayo pay laeng iti daytoy a sistema ti bambanag, agsagabatayo amin kadagiti epekto ti natawid a basol. Apresiarentay unay ti pannakikooperar ti sabsabali tapno saan a madegdegan ti panagsagabatayo. Mabalin a kaipapanan dayta nga agsakripisio ti dadduma a saan pay la nga agusar iti bangbanglo wenno cologne no umayda makigimong tapno saan a marigatan dagiti kakabsat a sensitibo iti bangbanglo. Ngem ti koma ayattayo kadagiti kakabsat ti mangtignay kadatayo a mangaramid iti dayta.

 Suportaran kadi dagiti sekular a reperensia a nagbiag ni Poncio Pilato?

Tapi a bato a nakaikitikitan ti Latin a nagan ni Pilato

Nalatak ni Poncio Pilato kadagiti agbasbasa iti Biblia gapu iti akemna iti pannakabista ken pannakapapatay ni Jesus. (Mat. 27:1, 2, 24-26) Ngem nagparang met ti naganna iti dadduma pay a historikal a rekord. Kuna ti The Anchor Bible Dictionary a dagiti sekular a reperensia maipapan kenkuana ket “ad-adu ken mas detalyado ngem iti asinoman a Romano a gobernador ti Judea.”

Masansan a nagparang ti nagan ni Pilato kadagiti sinurat ti Judio a historiador a ni Josephus, a nangisurat iti tallo a pasamak a nagparikutan ni Pilato bayat ti kinagobernadorna iti Judea. Ti maikapat a pasamak ket innayon ti Judio a historiador a ni Philo. Ti Romano a mannurat a ni Tacitus, a nangirekord iti pakasaritaan dagiti emperador ti Roma, pinatalgedanna met nga imbilin ni Poncio Pilato ti pannakapapatay ni Jesus bayat ti panagturay ni Tiberio.

Idi 1961, adda tapi ti bato a nasarakan dagiti arkeologo iti nagkauna a Romano a teatro iti Cesarea, Israel, a nakaikitikitan ti Latin a nagan ni Pilato. Ti inskripsion (makita iti ladawan) ket saanen a kompleto ngem maipagarup a ti orihinal a pannakabasana ket: “Para kadagiti madaydayaw a didios (daytoy) a Tiberieum, indedikar ni Poncio Pilato, Prepekto ti Judea.” Ti patakder a tuktukoyenna ket nalabit maysa a templo a pangidaydayaw iti Romano nga emperador a ni Tiberio.

Masapul kadi nga agdalungdong ti babai nga agibumbunannag iti Pagarian no mangyadal iti Biblia iti imatang ti maysa a lalaki nga agibumbunannag?

Iti “Salsaludsod Dagiti Agbasbasa” iti Pagwanawanan a Hulio 15, 2002, nadakamat a masapul nga agdalungdong ti maysa a sister no mangikondukta iti panagadal iti Biblia iti imatang ti maysa a lalaki nga agibumbunannag, bautisado man wenno saan. Nausig manen daytoy a banag ket nakita a kasapulan ti panagbalbaliw iti daytoy nga urnos.

No bautisado ti lalaki a makikadua iti maysa a sister a mangyadal iti Biblia, masapul nga agdalungdong ti sister. Iti kasta, ipakpakitana a rara­emenna ti urnos ni Jehova mainaig iti kinaulo iti uneg ti kongregasion agsipud ta ar-aramidenna ti maysa nga annongen a gagangay a para iti lalaki. (1 Cor. 11:5, 6, 10) Ngem mabalin met a kiddawen ti sister a ti brother ti mangikondukta iti panagadal, no la ket kualipikado ken kabaelanna.

Ngem no ti kadua ti sister iti panangyadalna iti Biblia ket di bautisado a brother ken dina asawa, saan a kalikaguman ti Biblia nga agdalungdong. Nupay kasta, gapu ta makonsiensia ti dadduma a sister, agdalungdongda latta uray iti kasta a kasasaad.

^ par. 2 Maipapan iti daytoy a topiko, mabalinyo a kitaen ti “Panangtulong Kadagidiay Addaan iti MCS,” iti Agriingkayo! nga Agosto 8, 2000, panid 8-10.