Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) PEBRERO 2015

 MANIPUD ITI ARCHIVES

“Nakapatpateg a Tiempo”

“Nakapatpateg a Tiempo”

IDI 1870, adda maysa a bassit a grupo iti Pittsburgh (Allegheny), Pennsylvania, U.S.A., a nangrugi a mangsukimat iti Kasuratan. Iti panangidaulo ni Charles Taze Russell, inadalda ti maipapan iti subbot ni Kristo ket di nagbayag nabigbigda a nakapatpateg dayta iti panggep ni Jehova. Anian a ragsakda idi maammuanda a ti subbot ti pamay-an ti Dios a mangisalakan, uray kadagidiay saan pay a nakangngeg iti maipapan ken Jesus! Natignayda nga agyaman babaen ti pananglaglagipda iti ipapatay ni Jesus iti tunggal tawen.—1 Cor. 11:23-26.

Inrugi nga ipablaak ni Brother Russell ti Zion’s Watch Tower, a mangitamtampok iti subbot kas kangrunaan nga ebkas ti ayat ti Dios. Kinuna ti Watch Tower a ti tiempo ti Memorial ket “nakapatpateg a tiempo” ken imparegtana kadagiti agbasbasa a selebraranda dayta kas grupo idiay Pittsburgh wenno iti sabali pay a lugar. “Dua man wenno tallo laeng ti presente”—wenno uray agmaymaysa laeng—mabalinda ti “naimpusuan a makipangan iti Apo.”

Iti tinawen, umadu nga umadu ti tumabtabuno iti Memorial idiay Pittsburgh. “Sibabara nga abrasaendakayo,” kuna ti imbitasion. Pinadagus ken pinakan dagiti lokal nga Estudiante ti Biblia dagiti naespirituan a kakabsatda. Idi 1886, adda naangay a “General Meeting” iti sumagmamano nga aldaw bayat ti tiempo ti Memorial. Imparegta ti Watch Tower: “Umaykayo koma nga agliplippias ti pusoyo iti ayat iti Apo ken iti kakabsatna ken iti kinapudno.”

Plano iti pannakaipasa dagiti emblema ti Memorial iti London Tabernacle

Iti adu a tawen, adda dagiti kombension nga inangay dagiti Estudiante ti Biblia iti Pittsburgh para kadagiti mamati iti subbot a timmabuno iti Memorial. Bayat nga immadu dagiti Estudiante ti Biblia, immadu met ti bilang dagiti grupo a mangselselebrar iti Memorial iti intero a lubong. Ni Ray Bopp a miembro ti ecclesia (kongregasion) ti Chicago malagipna nga idi dekada ti 1910, immabot iti sumagmamano nga oras ti pannakaipasa dagiti emblema iti ginasgasut a timmabuno gapu ta gistay amin ket nakiraman.

Ania dagiti emblema a nausar? Nupay kuna ti Biblia a nagusar ni Jesus iti arak iti Pangrabii ti Apo, inrekomenda idi ti Watch Tower a tubbog ti kappuros nga ubas wenno naluto a pasas ti mausar tapno saan a masulisog dagidiay “nakapuy iti lasag.” Nupay kasta, adda arak a maited kadagidiay mamati a “masapul nga arak ti mausar.” Idi agangay, naawatan dagiti Estudiante ti Biblia a puro a nalabaga nga arak ti maitutop a simbolo ti dara ni Jesus.

Naipasa daytoy a papel ken lapis iti tunggal selda tapno mailista ti bilang ti timmabuno iti Memorial iti maysa a pagbaludan idiay Nicaragua

Ti pananglaglagip iti ipapatay ni Jesus ket nagsayaat a gundaway para iti panagmennamenna. Nupay kasta, adda dagiti kongregasion a nangipakita iti napalalo a ladingit, ket kalpasan ti programa, agawidda a dida man la nagsasarita. Ngem kuna ti libro a Jehovah idi 1934 a saan koma a “naladingit” ti  pannakaselebrar ti Memorial gapu iti ipapatay ni Jesus, no di ket “naragsak” gapu ta agturturayen kas Ari sipud 1914.

Nagtataripnong dagiti kakabsat iti kampo a pagtrabahuan idiay Mordvinia, Russia, tapno selebraranda ti Memorial idi 1957

Adda dakkel a panagbalbaliw idi 1935 a nangapektar iti pannakaselebrar ti Memorial, gapu ta nalawlawagan ti kaipapanan ti “dakkel nga umariwekwek” (KJ), wenno “dakkel a bunggoy,” iti Apocalipsis 7:9. Sakbay ti 1935, impapan dagiti adipen ni Jehova a daytoy a grupo ket buklen dagiti dedikado a Kristiano a saan unay a naregta. Ita, nabigbig daytoy a dakkel a bunggoy kas dagiti matalek nga agdaydayaw iti Dios a mangnamnama nga agbiagto iti paraiso a daga. Kalpasan dagitoy a pannakalawlawag ken ti naannad a panangusigna iti bagina, nabigbig ni Russell Poggensee: “Mariknak a ti nailangitan a namnama ket saan nga inted kaniak ni Jehova babaen ti nasantuan nga espirituna.” Ni Kabsat Poggensee—ken ti adu a matalek a kas kenkuana—insardengna ti makiraman kadagiti emblema ngem intultuloyna latta ti tumabuno iti Memorial.

Adda dagiti nayurnos nga espesial a panangasaba bayat daytoy “nakapatpateg a tiempo,” isu a nagsayaat a gundaway dayta para iti amin a mangipakita iti panagyamanda iti subbot. Indagadag ti maysa a Bulletin idi 1932 a dagiti Kristiano saanda koma nga agbalin a “santo ti Memorial,” a makiraman laeng iti Memorial ngem saanda met a “trabahador,” wenno mangaskasaba. Idi 1934, inyawis ti Bulletin ti panagserbi kas auxiliary pioneer, ket insaludsodna: “Addanto ngata 1,000 nga agaplay iti tiempo ti Memorial?” Kastoy ti kuna ti Informant maipapan kadagiti napulotan: “Sa la agbalin a naan-anay ti rag-oda no ikasabada ti mensahe ti Pagarian.” Kasta met ti masapul nga aramiden dagiti naindagaan ti namnamada tapno agbalinda a naragsak. *

Bayat nga agmaymaysa a naibalud ni Harold King, nangputar kadagiti daniw ken kanta maipapan iti Memorial

Iti amin nga adipen ni Jehova, ti Memorial ti kasagraduan a rabii iti tawen. Selselebraranda dayta uray kadagiti narigat a kasasaad. Idi 1930, agarup 80 kilometro (50 milia) ti pinagna ni Pearl English ken ni manangna nga Ora tapno matabunuanda ti Memorial. Bayat ti agmaymaysa a pannakaibalud ni Harold King a misionero idi idiay China, nangputar kadagiti daniw ken kanta maipapan iti Memorial ken nangaramid kadagiti emblema nga inusarna ti black currant ken innapuy. Dagiti nabileg ti pakinakemna a Kristiano iti Makindaya a Europa, iti Makintengnga nga America, ken iti Africa situtured a sinelebraranda ti Memorial uray iti tiempo ti gubat wenno pannakaiparit ti trabahotayo. Sadinoman ti ayantayo wenno aniaman ti kasasaadtayo, agtataripnongtayo tapno idaydayawtayo ni Jehova a Dios ken ni Jesu-Kristo bayat ti nakapatpateg a tiempo ti Memorial.

^ par. 10 Ti Bulletin ket naawagan idi agangay iti Informant, nga itan ket Ti Ministeriotayo iti Pagarian.