Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) DISIEMBRE 2014

Malagipyo Kadi?

Malagipyo Kadi?

Binasayo kadi a naimbag dagiti nabiit pay a ruar Ti Pagwanawanan? Bueno, kitaenyo no masungbatanyo dagiti sumaganad a saludsod:

Mabalin kadi ti cremation kadagiti Kristiano?

Ti panagpa-cremate ket personal a desision. Nupay awan ti ibagbaga ti Kasuratan a maiparit ti cremation, makapainteres ta napuoran dagiti bangkay da Ari Saul ken ti anakna a ni Jonatan sa naikali dagita. (1 Sam. 31:2, 8-13)—6/15, panid 7.

Kasanotay a masigurado a saan a gapuanan ti Dios dagiti dakes a mapaspasamak?

Nalinteg ti amin a daldalan ti Dios. Isu ket di mangidumduma, matalek, ken naimbag. Nadungngo ken naasi pay ni Jehova. (Deut. 32:4; Sal. 145:17; Sant. 5:11)—7/1, panid 4.

Aniada a karit ti mabalin a pakaipasanguan ti maysa nga umakar ken agserbi iti sabali a pagilian nga addaan iti dakdakkel a panagkasapulan?

Dagiti tallo a karit ket (1) kasasaad ti biag, (2) pannakailiw, ken (3) pannakibagay. Napagballigian ti adu dagitoy a karit ket nagsagrapda iti adu a bendision.—7/15, panid 4-5.

Apay a ni Jose ket ginura dagiti kakabsatna?

Ti maysa a rason ket gapu ta ni Jose ti paborito nga anak ni Jacob ken inikkanna iti napintas a kawes. Nagimon dagiti kakabsatna isu nga inlakoda ni Jose kas maysa nga adipen.—8/1, panid 11-13.

Apay nga epektibo ken nalaka nga usaren dagiti baro a tract?

Maymaysa ti pormat ti amin a baro a tract. Gutugotennatayo ti tunggal tract a mangibasa iti maysa a teksto ken saludsod iti bumalay. Aniaman ti isungbatna, ukradentayo a dagus ti makin-uneg a panid sa ipakitatay kenkuana ti kuna ti Biblia. Makaibatitayo pay iti saludsod a pakisaritaantayo inton agsarungkartayo.—8/15, panid 13-14.

Ania ti Syriac Peshitta?

Ti Syriac ket maysa nga Aramaiko a lengguahe a nasaknap a maus-usar idi maikadua wenno maikatlo a siglo C.E. Agparang a Syriac ti kaunaan a lengguahe a nakaipatarusan ti dadduma a paset ti Kristiano a Griego a Kasuratan. Ti Biblia a naipatarus iti Syriac ket pagaammo kas Peshitta.9/1, panid 13-14.

Ania ti aramiden dagiti nagannak a Kristiano tapno maipastoranda dagiti annakda?

Masapul a dumngegda kadagiti annakda tapno maam-ammoda ida. Ikagumaanda met a taraonan ida iti naespirituan. Siaayat nga iwanwanda ida no kas pagarigan ta mangrugidan a pagduaduaan ti kinapudno.—9/15, panid 18-21.

Ania dagiti awanton iti sidong ti Pagarian ti Dios?

Sakit, ipapatay, kinaawan pagtrabahuan, gubat, bisin, ken kinapanglaw.—10/1, panid 6-7.

Ania a tulag ti dinakamat ti Biblia a nangipaay iti gundaway kadagiti dadduma a makipagturay ken Kristo?

Kalpasan ti maudi a Pangrabii ti Paskua a kaduana dagiti adalanna, nangaramid ni Jesus iti maysa a tulag kadagiti matalek nga adalanna, a maaw-awagan iti tulag ti Pagarian. (Luc. 22:28-30) Impasigurado dayta kadakuada a makipagturaydanto ken Jesus idiay langit.—10/15, panid 16-17.

Mangted iti dua a pagarigan iti Biblia a mangpaneknek a pudpudno a persona ni Satanas.

Kuna ti Kasuratan a nakisarita ni Satanas ken Jesus idi pinadasna a sulisogen. Kasta met nga idi kaaldawan ni Job, nakisarita ni Satanas iti Dios. Paneknekan dagitoy a salaysay a pudpudno a persona ni Satanas.—11/1, panid 4-5.

Ania ti “ili a maipaay iti naganna” a dinakamat ni Santiago iti Aramid 15:14?

Isu dagiti Judio ken saan a Judio a manamati a dinutokan ti Dios kas napili a puli a ‘mangideklara a sisasaknap kadagiti kinatan-ok’ Daydiay nangayab kadakuada. (1 Ped. 2:9, 10)—11/15, panid 24-25.

Sadino ti ayan ti Timgad, ken ania ti kababalin ti dadduma a tattao sadiay?

Maysa idi ti Timgad a dakkel a Romano a siudad iti North Africa (masarakan itan iti Algeria). Ti prinsipio ti dadduma kadakuada ket naipakita iti maysa nga inskripsion a nakabakab sadiay: “Panaganup, Panagdigus, Panagay-ayam, Panagkatawa—Dayta ti Biag!” Umarngi dayta iti nadakamat iti 1 Corinto 15:32.—12/1, panid 8-10.