Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) DISIEMBRE 2014

‘Matarusam Kadi ti Kaipapananna’?

‘Matarusam Kadi ti Kaipapananna’?

“Linuktanna a naan-anay ti pampanunotda tapno matarusanda ti kaipapanan dagiti Kasuratan.”—LUC. 24:45.

1, 2. Kasano a pinabileg ni Jesus dagiti adalanna idi aldaw a napagungar?

ALDAW idi ti panagungar ni Jesus. Dua kadagiti adalanna ti magmagna a mapan iti maysa a purok nga agarup 11 kilometro (7 milia) manipud Jerusalem. Malmaldaanganda gapu iti ipapatay ni Jesus ngem dida ammo a napagungaren. Pagammuan ta nagparang kadakuada ni Jesus ken nakigiddan kadakuada a nagna ket liniwliwana ida. Kasano? “Nangrugi ken Moises ken kadagiti amin a Mammadto imbuksilanna kadakuada ti bambanag maipapan iti bagina kadagiti amin a Kasuratan.” (Luc. 24:13-15, 27) Gapu iti dayta, rimmayray ti pusoda gapu ta “lukluktanna idi a naan-anay” wenno inlawlawagna a naimbag kadakuada ti Kasuratan.—Luc. 24:32.

2 Iti dayta met laeng a rabii, nagsubli idiay Jerusalem dagitoy dua nga adalan. Idi nasarakanda dagiti apostol, insalaysayda ti kapadasanda. Bayat nga agsasaoda, nagparang ni Jesus kadakuada. Ngem nagbutengda unay ket nangrugida nga agduadua no ni Jesus met laeng dayta. Kasano a pinabileg ida ni Jesus? Kuna ti Biblia: “Linuktanna a naan-anay ti pampanunotda tapno matarusanda ti kaipapanan dagiti Kasuratan.”—Luc. 24:45.

3. Ania dagiti karit a mabalin a pakaipasanguantayo, ken ania ti makatulong tapno maaddaantayo iti balanse a panangmatmat iti ministeriotayo?

3 Kas kadagidiay nga adalan, adda met tiempo a makariknatayo iti liday. Nupay okupadotayo iti trabaho ti Apo, mabalin a  maupaytayo no awan ti makitatayo a resulta ti panangasabatayo. (1 Cor. 15:58) Wenno kasla nagbayag a rumang-ay dagiti iyad-adalantayo iti Biblia. Nalabit simmardeng pay ketdin a makipagadal ti dadduma kadakuada. Ania ti mabalintayo nga aramiden tapno maaddaantayo iti balanse a panangmatmat iti ministeriotayo? Ti maysa a makatulong ket ti naan-anay a panangtarustayo iti kaipapanan dagiti ilustrasion ni Jesus a nairekord iti Nasantuan a Kasuratan. Usigentayo ti tallo kadagita nga ilustrasion ket kitaentayo no ania dagiti maadaltayo.

TI NAGMULA A NAPAN NATUROG

4. Ania ti kaipapanan ti ilustrasion ni Jesus maipapan iti nagmula a napan naturog?

4 Basaen ti Marcos 4:26-29. Ania ti kaipapanan ti ilustrasion ni Jesus maipapan iti nagmula a napan naturog? Ti lalaki iti ilustrasion irepresentarna ti tunggal manangiwaragawag iti Pagarian. Ti bin-i ket isu ti mensahe ti Pagarian a naikasaba kadagiti nasayaat ti panagpuspusona a tattao. Kas paset ti normal a rutina ti biag, ti nagmula ket “maturog iti rabii ken bumangon iti aldaw.” Agkasapulan iti sumagmamano a tiempo ti idadakkel ti bin-i, manipud pannakaimulana agingga a maani. Iti dayta a tiempo, ti bin-i ket “agtubo ken dumakkel.” In-inut nga agtubo a “bukbukodna.” Iti umasping a pamay-an, in-inut met ti naespirituan nga idadakkel. No rimmang-ayen ti maysa ken inkeddengnan ti agserbi iti Dios, mangpatpatauden iti bunga ta idedikarnan ti biagna ken Jehova ken kayatnan ti agpabautisar.

5. Apay nga inusar ni Jesus ti ilustrasion maipapan iti nagmula a napan naturog?

5 Apay nga inusar ni Jesus daytoy nga ilustrasion? Kayat ni Jesus a maawatantayo a ni Jehova ti mangpadpadakkel iti kinapudno iti puso dagidiay “siuumiso nga agannayas.” (Ara. 13:48; 1 Cor. 3:7) Agmula ken agsibugtayo, ngem saantayo a mapilit wenno mapapartak ti idadakkel ti kinapudno. Kas iti lalaki iti ilustrasion, ditay ammo no kasano a mapasamak ti idadakkel. Masansan a ditay madmadlaw dayta bayat nga ar-aramidentayo dagiti inaldaw nga aktibidadtayo. Ngem inton agangay, mabalin nga agbunga ti naimula a bin-i ti Pagarian. Kumuyogen kadatayo ti baro nga adalan ket tumulongen iti trabaho a panagani.—Juan 4:36-38.

6. Ania koma ti bigbigentayo maipapan iti naespirituan nga idadakkel?

6 Ania ti maadaltayo iti daytoy nga ilustrasion? Umuna, masapul a bigbigentayo a saantayo a kontrolado ti naespirituan nga idadakkel ti maysa nga iyad-adalantayo iti Biblia. Aramidentayo ti amin a kabaelantayo a tumulong ken mangsuporta kenkuana, ngem saantayo a piliten wenno puersaen nga agpabautisar. Imbes ketdi, sipapakumbaba a bigbigentayo nga isu a mismo ti agdesision no kayatna nga idedikar ti biagna iti Dios. Awaten laeng ni Jehova ti dedikasiontayo no situtuloktayo a mangaramid iti dayta gapu iti panagayattayo kenkuana.—Sal. 51:12; 54:6; 110:3.

7, 8. (a) Ania dagiti maadaltayo iti ilustrasion ni Jesus maipapan iti nagmula a napan naturog? Mangted iti pagarigan. (b) Ania ti isuro daytoy kadatayo maipapan ken Jehova ken ni Jesus?

7 Maikadua, no matarusantayo daytoy nga ilustrasion, saantay a nalaka a maupay no ditay makita a dagus ti resulta ti trabahotayo. Agan-anustayo koma. (Sant. 5:7, 8) No inaramidtayo ti amin a kabaelantayo a tumulong iti iyad-adalantayo ngem saan a nagbunga ti bin-i nga immulatayo kenkuana, dina kayat a sawen a saantayo nga epektibo a mannursuro. Padakkelen laeng ni Jehova ti bin-i ti kinapudno iti maysa a napakumbaba a puso a situtulok nga agbalbaliw. (Mat. 13:23) Isu a saantayo koma a rukrukoden ti kinaepektibo ti ministeriotayo babaen laeng iti kaadu dagiti nagpabautisar nga iyad-adalantayo. Para ken Jehova, ti balligi ti ministeriotayo ket saan nga agdepende  iti reaksion dagiti iyad-adalantayo. Imbes ketdi, napateg ken Jehova ti naanep a panagreggettayo, aniaman ti resultana.—Basaen ti Lucas 10:17-20; 1 Corinto 3:8.

8 Maikatlo, saantay a kanayon a madlaw dagiti panagbalbaliw a mapaspasamak iti puso ti maysa a tao. Kas pagarigan, maysa a pagassawaan ti nangibaga iti misionero a mangyad-adal kadakuada a kayatdan ti agbalin a di bautisado nga agibumbunannag. Impalagip ti misionero a tapno makualipikarda, masapul nga isardengda ti agsigarilio. Nasdaaw idi imbagada a sumagmamanon a bulan nga insardengda dayta. Nabigbigda ngamin a makitkita ni Jehova ti panagsigarilioda ken kagurana ti panaginsisingpet. Isu nga inkeddengda no agsigarilioda iti sango ti misionero wenno mamimpinsanen nga isardengda dayta. Nupay saan a nadnadlaw ti misionero ti dakkel a panagbalbaliw nga inaramidda, ti dumakdakkel nga ayatda ken Jehova ti nakatulong kadakuada nga agaramid iti umiso a desision.

TI IKET

9. Ania ti kaipapanan ti ilustrasion maipapan iti iket?

9 Basaen ti Mateo 13:47-50. Ania ti kaipapanan ti ilustrasion ni Jesus maipapan iti iket? Ti pannakaikasaba ti mensahe ti Pagarian iti amin a tattao ket inyarig ni Jesus iti pannakaiwayat ti maysa a dakkel nga iket iti baybay. No kasano a makakalap dayta iti “tunggal kita ti ikan,” maatrakar met ti minilion a nagduduma a kita ti tattao iti trabahotayo a panangasaba. (Isa. 60:5) Paneknekan dayta ti dakkel a bilang ti tumabtabuno kadagiti kombensiontayo ken iti panangselebrartayo iti tinawen a Memorial. Dadduma kadagitoy a simboliko nga ikan ket “nasayaat” ken naummong iti kongregasion Kristiano. Ngem dadduma met a masarakantayo ket “di nasayaat,” ket saan nga awaten ida ni Jehova.

Kalpasan a mabasam ti Mateo 13:47-50 . . .

10. Apay nga inusar ni Jesus ti ilustrasion maipapan iti iket?

10 Apay nga inusar ni Jesus daytoy nga ilustrasion? Ti simboliko a pannakapaglalasin dagiti ikan ket saan a tumukoy iti panangukom bayat ti dakkel a rigat. Imbes ketdi, ipakitana ti mapasamak bayat ti maudi nga al-aldaw daytoy a dakes a sistema ti bambanag. Impakita ni Jesus a saan nga amin a maatrakar iti kinapudno ket agtarigagay nga agbalin nga adipen ni Jehova. Adu a tumabtabuno kadagiti gimongtayo wenno iyad-adalantayo iti Biblia ket agkedked a mangidedikar iti biagda ken Jehova. (1 Ar. 18:21) Adda met dagidiay simmardengen a tumabuno kadagiti gimongtayo. Dadduma nga agtutubo a dimmakkel iti Kristiano a pagtaengan ti saan a nangipateg kadagiti pagalagadan ni Jehova. Aniaman ti kasasaad, impaganetget ni Jesus a masapul a personal nga agdesision ti tunggal maysa. No mangaramidtayo iti umiso a desision, ibilangnatayo ni Jehova kas “matarigagayan” a bambanag ti “amin a nasion.”—Hag. 2:7.

. . . usigem no kasano nga agaplikar dayta iti kaaldawantayo

11, 12. (a) Kasanotayo a magunggonaan iti ilustrasion maipapan iti iket? (b) Ania ti isuro daytoy kadatayo maipapan ken Jehova ken ni Jesus?

11 Kasanotayo a magunggonaan iti ilustrasion maipapan iti iket? Dagiti maadaltayo iti daytoy nga ilustrasion tulongannatayo a saan a maladingitan wenno maupay no saan a kayat ti iyad-adalantayo wenno ti maysa kadagiti annaktayo ti agserbi ken Jehova. Mabalin a mapasamak dayta iti laksid ti panangaramidtayo iti amin a kabaelantayo. Saan nga automatiko a maaddaan ti maysa iti natibker a personal a relasion ken Jehova gapu laeng ta makipagad-adal iti Biblia wenno gapu ta napadakkel iti kinapudno. Dagidiay saan nga agpasakup iti panangituray ni Jehova ket saanto nga agbalin nga adipenna.

Dadduma nga aginteres iti kinapudno ket agbalin nga adipen ni Jehova (Kitaen ti parapo 9-12)

12 Kaipapanan kadi daytoy a dagidiay  nangpanaw iti kinapudno ket saandanton a mapalubosan nga agsubli iti kongregasion? Wenno agnanayonto kadi a maibilang a “di nasayaat” ti maysa a saan a nangidedikar iti biagna ken Jehova? Saan. Adda pay laeng gundaway dagiti kasta nga indibidual sakbay a bumtak ti dakkel a rigat. Arigna ibagbaga ni Jehova kadakuada: “Agsublikayo kaniak, ket agsubliakto kadakayo.” (Mal. 3:7) Naipaganetget daytoy a punto iti sabali pay nga ilustrasion ni Jesus—ti ilustrasion maipapan iti bayanggudaw nga anak.—Basaen ti Lucas 15:11-32.

TI BAYANGGUDAW NGA ANAK

13. Ania ti kaipapanan ti ilustrasion maipapan iti bayanggudaw nga anak?

13 Ania ti kaipapanan ti ilustrasion ni Jesus maipapan iti bayanggudaw nga anak? Ti naasi nga ama iti daytoy nga ilustrasion iladawanna ti naayat a nailangitan nga Amatayo, ni Jehova. Ti anak a nangkiddaw iti tawidna sana binusbos amin dayta irepresentarna dagidiay nangpanaw iti kongregasion. Arigna nagdaliasatda iti “adayo a pagilian”—ti lubong ni Satanas—a naisina ken Jehova. (Efe. 4:18; Col. 1:21) Ngem idi agangay, adda dagidiay nakapagpampanunot ket inrugida ti arigna narigat a panagdaliasat nga agsubli iti organisasion ni Jehova. Sidadaan nga awaten manen ti manangpakawan nga Amatayo dagitoy a napakumbaba ken agbabbabawi nga indibidual.—Isa. 44:22; 1 Ped. 2:25.

14. Apay nga inusar ni Jesus ti ilustrasion maipapan iti bayanggudaw nga anak?

14 Apay nga inusar ni Jesus daytoy nga ilustrasion? Iti makagutugot a pamay-an, inyilustrar ni Jesus a tarigagayan ni Jehova nga agsubli dagidiay naiwawa. Ti ama iti ilustrasion ket saan a naawanan iti namnama nga agsublinto ti anakna. Idi nakitana a sumungsungad ti anakna, timmaray a simmabat uray no “adayo pay.” Daytoy koma nga ilustrasion ti mangtignay kadagiti nangpanaw iti kinapudno nga agsubli ken Jehova iti kabiitan a panawen. Mabalin a napaksuyandan iti naespirituan, ket kasla mabain ken marigatanda nga agsubli, ngem saan a sayang ti panagreggetda. Maragsakan la ketdi ni Jehova, ni Jesus, ken dagiti anghel idiay langit no agsublida.—Luc. 15:7.

15, 16. (a) Ania dagiti maadaltayo iti ilustrasion ni Jesus maipapan iti bayanggudaw nga anak? Mangted kadagiti pagarigan. (b) Ania ti isuro daytoy kadatayo maipapan ken Jehova ken ni Jesus?

15 Kasanotayo a magunggonaan iti ilustrasion maipapan iti bayanggudaw nga anak? Tuladentayo koma ti ulidan ni Jehova.  Saantay koma nga agbalin a “nalabes ti kinalintegna” a ditayo kayat nga awaten dagiti agbabbabawi a nakabasol. Agresulta laeng daytoy iti pannakadangran ti espiritualidadtayo. (Ecl. 7:16) Adda pay maadaltayo iti daytoy. Ti maysa a nangpanaw iti kongregasion ket ibilangtay koma kas ‘napukaw a karnero,’ a makasublinto met laeng. (Sal. 119:176) No adda masarakantayo a naiwawa ngem saan a nailaksid iti kongregasion, mangipaaytayo kadi iti naayat ken praktikal a tulong tapno makapagsubli? Dagus kadi nga ipakaammotayo dayta kadagiti panglakayen tapno makaipaayda iti tulong? Kasta ti aramidentayo no iyaplikartayo ti naadaltayo iti ilustrasion ni Jesus maipapan iti bayanggudaw nga anak.

16 Agyamyaman dagidiay nakasubli gapu iti asi ni Jehova ken iti ayat ken suporta ti kongregasion. Kuna ti maysa a brother a nailaksid iti 25 a tawen: “Nagtultuloy a rimmayray ti rag-ok nanipud naisubliak gapu ta ipapaayannak ni Jehova kadagiti ‘panawen ti pannakabang-ar.’ (Ara. 3:19) Nakaim-imbag ken nakadungdungngo dagiti kakabsat! Addaanak itan iti nagsayaat a naespirituan a pamilia.” Kinuna met ti maysa a naiwawa nga agtutubo a sister a nagbalin nga inaktibo iti lima a tawen: “Diak mailadawan ti riknak idi maipakita kaniak ti mismo nga ayat nga ibagbaga ni Jesus. Awanen ti napatpateg pay ngem iti panagbalin a paset ti organisasion ni Jehova!”

17, 18. (a) Ania dagiti praktikal a leksion a maadaltayo kadagiti tallo nga ilustrasion nga inusigtayo? (b) Ania koma ti determinasiontayo?

17 Ania dagiti praktikal a leksion a maadaltayo kadagitoy tallo nga ilustrasion? Umuna, bigbigentay koma a saantayo a kontrolado ti naespirituan nga idadakkel. Biang ni Jehova dayta. Maikadua, saantayo nga ekspektaren nga amin a makitimpuyog ken makipagadal kadatayo ket agtarigagay nga agserbi ken Jehova. Ken maikatlo, uray adda dagidiay nangpanaw ken Jehova, ditay koma maawanan iti namnama nga agsublidanto manen. Ket no agsublida, tuladentayo koma ti panangmatmat ni Jehova kadakuada ket awatentayo ida.

18 Sapay koma ta itultuloytayo a biroken ti pannakaammo, pannakaawat, ken sirib. Bayat a basbasaentayo dagiti ilustrasion ni Jesus, isaludsodtayo iti bagitayo: ‘Ania ti kaipapanan daytoy nga ilustrasion? Apay a nairekord daytoy iti Biblia? Kasano a mayaplikarko dagiti maadalko? Ania ti maadalko ditoy maipapan ken Jehova ken ni Jesus?’ No kasta ti aramidentayo, ipakpakitatayo a tartarusantayo ti kaipapanan ti sasao ni Jesus.