Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) DISIEMBRE 2014

Kasapulam Kadi a Baliwan ti Panunotmo?

Kasapulam Kadi a Baliwan ti Panunotmo?

INKEDDENG ti maysa a grupo dagiti agtutubo a Kristiano a mapan buyaen ti maysa a pelikula. Nangngegda ngamin a nagustuan unay dayta ti adu a kaeskuelaanda. Idi nakadanondan iti pagsinean, nakitada kadagiti poster dagiti napipigsa nga armas ken dagiti babbai a makagargari ti panagbadbadoda. Ania ngata ti aramidenda? Ituloyda kadi latta ti planoda nga agbuya?

Ipakita daytoy a situasion nga adu kadagiti desision nga ar-aramidentayo ti mabalin a makaapekto iti espiritualidadtayo ken relasiontayo ken Jehova. No dadduma, mabalin a naikeddengmon ti aramidem, ngem nagbaliw ti desisionmo idi pinanunotmo a naimbag dayta. Kayatna kadi a sawen a nakapuyka nga agdesision, wenno umiso laeng ti inaramidmo?

No Kaano a Di Umiso a Baliwam ti Panunotmo

Ti ayattayo ken Jehova ti nangtignay kadatayo a mangidedikar iti biagtayo kenkuana ken agpabautisar. Siempre, tarigagayantayo ti agtalinaed a matalek iti Dios. Ngem determinado ti kabusortayo a ni Satanas a Diablo a mangdadael iti kinamatalektayo. (Apoc. 12:17) Inkeddengtayo ti agserbi ken Jehova ken agtulnog kadagiti bilinna. Anian a makapaladingit no baliwantayo ti desisiontayo ket ditayo tungpalen ti dedikasiontayo ken Jehova! Mabalin a mapukawtayo ti biagtayo no kasta ti aramidentayo.

Nasurok a 2,600 a tawenen ti napalabas, nangaramid ni Ari Nabucodonosor ti Babilonia iti dakkel a ladawan a balitok ken imbilinna nga amin ket agruknoy ken agdayaw iti dayta. Siasinoman nga agsukir ket maipuruak iti gumilgil-ayab nga urno. Saan a nagtulnog dagiti tallo nga agtutubo nga adipen ni Jehova a da Sidrac, Mesac, ken Abednego. Gapu ta saanda a nagruknoy iti ladawan, naipuruakda iti gumilgil-ayab nga urno. Nupay simimilagro nga insalakan ida ni Jehova, determinadoda idi a mangirisgo iti biagda imbes nga  ikompromisoda ti desisionda nga agserbi iti Dios.—Dan. 3:1-27.

Idi agangay, nagtultuloy a nagkararag ni propeta Daniel iti laksid ti pangta a pannakaitapuakna iti abut dagiti leon. Wen, intultuloyna ti regular a panagkararagna ken Jehova, a mamitlo iti kada aldaw. Saan a nagbaliw ti determinasion ni Daniel nga agdayaw iti pudno a Dios. Kas resultana, naisalakan daytoy a propeta iti “gammat dagiti leon.”—Dan. 6:1-27.

Agbibiag met dagiti adipen ti Dios ita maitunos iti dedikasionda kenkuana. Iti maysa nga eskuelaan iti Africa, nagkedked ti maysa a grupo dagiti estudiante a Saksi ni Jehova a makiraman iti panagsaludo iti bandera. Napangtaanda a maikkat iti eskuelaan no saanda a makipartisipar a kadua ti dadduma nga estudiante. Di nagbayag, bimmisita iti ili ti minister of education ken nakisarita iti dadduma kadagiti estudiante a Saksi. Sidadayaw ngem situtured nga inlawlawag dagiti agtutubo a Saksi ti takderda. Nanipud idin, saanen a nagbalin nga isyu dayta. Makapagtultuloyen nga ageskuela dagitoy nga agtutubo nga awan ti mangpilpilit kadakuada a mangikompromiso iti relasionda ken Jehova.

Usigentay met ti kapadasan ni Joseph idi nagsakit ni baketna iti kanser ken bigla a natay. Maawatan ken raemen dagiti kabagian ni Joseph ti kayatna a mapasamak iti panagminatayda. Ngem saan a Saksi dagiti kabagian ni baketna, ket kayatda a masurot dagiti kustombre iti panagminatay, a pakairamanan dagiti ritual a di makaay-ayo iti Dios. Kinuna ni Joseph: “Gapu ta diak kayat nga ikompromiso ti pammatik, pinadasda a kombinsiren dagiti annakko, ngem saanda a nagballigi. Pinadasda pay ti mangaramid kadagiti nakayugalianda a ritual iti panagminatay iti balayko, ngem imbagak a no ipilitda ti kayatda, saan nga iti pagtaengak. Ammoda a dagiti ritual iti panagminatay ket di maitunos iti pammatimi ken baketko, isu a kalpasan ti adu a diskusion inangayda dagiti ritualda iti sabali a lokasion.

“Bayat daytoy a makapaladingit a tiempo, kiniddawko ken Jehova a tulongannakami nga agmatalek kas pamilia. Dinengngeg ni Jehova dagiti kararagko ket tinulongannakami nga agbalin a natibker iti laksid ti panangpilit dagiti kabagianmi.” Para ken Joseph ken dagiti annakna, di umiso a baliwanda ti desisionda nga agtulnog ken Jehova.

No Kaano a Mabalin a Baliwam ti Panunotmo

Saan unay a nabayag kalpasan ti Paskua idi 32 C.E., maysa a babai a taga-Fenicia ti immasideg ken Jesus iti paset ti Sidon. Nagpakpakaasi ken Jesus a paruarenna koma ti demonio a nanglugan iti balasangna. Idi damo, saan a simmungbat ni Jesus. Kinunana kadagiti adalanna: “Saanak a naibaon iti aniaman no di kadagiti napukaw a karnero iti balay ti Israel.” Idi saan a mamingga ti babai, kinuna ni Jesus: “Saan nga umiso nga alaen ti tinapay ti annak ket ipuruak dayta kadagiti uken.” Buyogen ti dakkel a pammati, kinuna ti babai: “Wen, Apo; ngem pudno a dagiti uken manganda kadagiti murkat nga agtintinnag manipud iti lamisaan dagiti appoda.” Pinatgan ni Jesus ti kiddaw ti babai ket pinaimbagna ti balasangna.—Mat. 15:21-28.

Babaen ti panangaramid ni Jesus iti dayta, tultuladenna ni Jehova a sisasagana a mangbaliw iti pangngeddengna no isu ti kasapulan. Kas pagarigan, inkeddeng ti Dios a talipuposenna dagiti Israelita idi nangaramidda iti balitok nga urbon a baka, ngem pinalubosanna ni Moises nga agpakaasi Kenkuana tapno baliwanna ti desisionna.—Ex. 32:7-14.

Tinulad ni apostol Pablo ni Jehova ken ni Jesus. Adda idi tiempo a narikna ni Pablo a kasla saan a maitutop nga itugotna ni Juan Marcos iti panagmisioneroda ken Bernabe gapu ta pinanawanna ida bayat ti immuna a panagdaliasatda ken Bernabe kas misionero. Ngem idi agangay, nakita ni Pablo ti panagrang-ay ni Marcos ken ti dakkel a maitulongna kenkuana. Kinuna ngarud ni Pablo ken Timoteo: “Alaem ni Marcos ket ikuyogmo, ta adu ti usarna kaniak maipaay iti panagserbi.”—2 Tim. 4:11.

Ania ti maadaltayo? Kas panangtulad iti naasi, naanus, ken naayat a nailangitan nga  Amatayo, baka mabalintayo met a baliwan ti panunottayo. Kas pagarigan, mabalin a baliwantayo ti panangmatmattayo iti sabsabali. Saantayo a perpekto a kas ken Jehova ken ni Jesus. No sidadaanda a mangbalbaliw iti panangmatmatda, mabalin kadi met a baliwantayo ti panangmatmattayo iti sabsabali no adda nainkalintegan a rason?

No maipapan kadagiti nateokratikuan a kalat, baka nasayaat a baliwantayo ti panunottayo. Ti dadduma nga agad-adal iti Biblia a makigimgimongen iti kongregasiontayo saanda pay a kayat ti agpabautisar. Bumdeng met ti dadduma a kakabsat nga agpayunir uray no kabaelanda a palawaen ti ministerioda iti kasta a pamay-an. Adda met dagiti kakabsat a nalabit agkedked a rumagpat kadagiti responsabilidad iti kongregasion. (1 Tim. 3:1) Kasta kadi met ti riknam? Siaayat nga aw-awisennaka ni Jehova a mangibaklay kadagita a pribilehio. Isu nga apay a dimo baliwan ti panangmatmatmo tapno naragragsakka iti panagserbim iti Dios ken iti sabsabali?

Mabalin nga agresulta iti bendision ti panangbaliwmo iti panunotmo

Kastoy ti kuna ni Ella a Bethelite iti Africa: “Idi kasangsangpetko iti Bethel, diak ammo no makapagbayagak. Kayatko ti agserbi ken Jehova iti amin-kararua ngem saanak a naruam a mayadayo iti pamiliak. Idi damo, kasla kayatkon ti agawid ta mailiwak unay kadakuada! Ngem pinabpabilegnak ti kakuartok isu nga inkeddengko ti agtalinaed iti Bethel. Sangapulon a tawen nga addaak ditoy, ket tarigagayak ti agtultuloy nga agserbi kadagiti kakabsat agingga a posible babaen ti panagtalinaedko iti annongek.”

No Kaano a Rumbeng a Baliwam ti Panunotmo

Malagipmo kadi ti napasamak ken Cain idi nagimon ken nagpungtot iti kabsatna? Imbaga ti Dios iti daytoy agpupungtot a lalaki a  mapaboran manen no agaramid iti naimbag. Binalakadan ti Dios ni Cain a parmekenna ti basol a “kumkumleb iti pagserkan.” Mabalin koma a baliwan ni Cain ti kababalin ken panagpampanunotna ngem dina inkankano ti balakad ti Dios. Makapaladingit ta pinatay ni Cain ti kabsatna ket nagbalin isuna a kaunaan a mammapatay!—Gen. 4:2-8.

Ania ngata no binaliwan ni Cain ti panunotna?

Usigem met ti napasamak ken Ari Ozias. Idi damo, ar-aramidenna no ania ti umiso kadagiti mata ni Jehova ket intultuloyna a binirok ti Dios. Ngem dinadael ni Ozias ti nasayaat a rekordna gapu ta nagbalin a napannakkel. Simrek iti templo tapno mangidaton iti insienso uray no saan a padi. Idi pinakdaaran dagiti papadi a saanna koma nga aramiden dayta, binaliwanna kadi ti panunotna? Saan. “Nakapungtot” ni Ozias ket saanna nga inkankano ti pakdaarda. Kas resultana, dinusa ni Jehova babaen ti sakit a kukutel.—2 Cron. 26:3-5, 16-20.

Wen, adda dagiti gundaway a rumbeng a baliwantayo ti panunottayo. Alaentayo a pagarigan ti kapadasan ti maysa a kabsat a ni Joachim. Nabautisaran idi 1955 ngem nailaksid idi 1978. Kalpasan ti nasurok a 20 a tawen, impakitana ti panagbabawina ket naisubli kas maysa a Saksi ni Jehova. Iti nabiit pay, dinamag ti maysa a panglakayen no apay nga inurayna ti napaut a tiempo sakbay a nagsubli. Kinuna ni Joachim: “Nasakit ti nakemko idi ken napannakkelak. Masayanganak ta diak nagsubli a dagus. Uray nailaksidak, ammok a dagiti Saksi ni Jehova ti mangisursuro iti kinapudno.” Kasapulan a balbaliwan ni Joachim ti kababalinna ken agbabawi.

Nalabit adda met dagiti situasion a kasapulan a baliwantayo ti pampanunot ken ar-aramidtayo. Sidadaantayo koma a mangaramid iti dayta tapno agbalintayo a makaay-ayo ken Jehova.—Sal. 34:8.