Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) OKTUBRE 2014

Maaddaan iti Natibker a Pammati iti Pagarian

Maaddaan iti Natibker a Pammati iti Pagarian

“Ti pammati isu ti sigurado a panangsegsegga iti bambanag nga in-inanamaen.”—HEB. 11:1.

1, 2. Ania ti mangpatibker iti pammatitayo a tungpalen ti Pagarian ti panggep ti Dios iti sangatauan? Sigun iti Efeso 2:12, kasano a pabilgendatayo dagiti tulag? (Kitaen ti ladawan iti rugi ti artikulo.)

KAS Saksi ni Jehova, sireregta nga ikaskasabatayo ti Pagarian ti Dios kas ti kakaisuna a solusion ti amin a problematayo. Magagarantayo a mangibaga iti sabsabali maipapan iti daytoy a napateg a kinapudno iti Kasuratan. Maliwliwatayo met iti namnama nga ipaay kadatayo ti Pagarian. Ngem talaga kadi a kombinsidotayo a pudpudno ti Pagarian ken itungpalna ti panggep ti Dios? Kasanotayo a maaddaan iti natibker a pammati iti Pagarian?—Heb. 11:1.

2 Ti Mesianiko a Pagarian ti usaren ni Jehova a mangibanag iti panggepna para iti sangatauan. Natibker ti pundasion ti Pagarian. Naibatay dayta iti naan-anay a kalintegan ni Jehova a mangituray. Dagiti napateg nga aspeto ti Pagarian—ti ari, dagiti kakaduana nga agturay, dagiti iturayanda—ket nayurnos iti legal a pamay-an babaen kadagiti tulag, kayatna a sawen, babaen kadagiti legal a kontrata wenno urnos, a ti maysa kadagiti nakitulag ket ti Dios wenno ti Anakna, ni Jesu-Kristo. Ti panangusig kadagitoy tulongannatayo a maaddaan iti nalawlawag a pannakatarus no kasano nga agballigi ti panggep  ti Dios ken no kasano katibker dayta a Pagarian.—Basaen ti Efeso 2:12.

3. Ania ti usigentayo ita ken iti sumaganad nga artikulo?

3 Dakamaten ti Biblia ti innem a kangrunaan a tulag a nainaig iti Mesianiko a Pagarian nga iturayan ni Kristo Jesus. Dagitoy ti (1) tulag ken Abraham, (2) Linteg ti tulag, (3) tulag ken David, (4) tulag para iti maysa a padi a kaasping ni Melquisedec, (5) baro a tulag, ken (6) tulag ti Pagarian. Usigentayo no kasano a ti tunggal tulag ket nainaig iti Pagarian ken no kasano nga ibanagna ti panggep ti Dios ditoy daga ken iti sangatauan.—Kitaen ti tsart a “ No Kasano nga Itungpal ti Dios ti Panggepna.”

KARI A MANGIPALGAK NO KASANO A MATUNGPAL TI PANGGEP TI DIOS

4. Sigun iti Genesis, ania dagiti banag nga inkeddeng ni Jehova mainaig kadagiti tao?

4 Idi naisaganan ni Jehova ti napintas a planetatayo, adda tallo a banag nga inkeddengna mainaig kadagiti tao: (1) parsuaenna ida sigun iti ladawanna; (2) isaknapda ti Paraiso iti intero a daga ken punnuenda dayta iti nalinteg a kaputotanda; ken (3) saanda a kanen ti bunga ti kayo ti pannakaammo iti naimbag ken dakes. (Gen. 1:26, 28; 2:16, 17) Awanen ti sabali pay a kasapulan malaksid kadagitoy. Kalpasan ti pannakaparsua ti tao, ti laengen dua a nabati ti masapul a matungpal tapno maibanag ti panggep ti Dios para iti tao ken iti daga. Ngem apay a masapul nga agaramid ti Dios kadagiti tulag?

5, 6. (a) Kasano a pinadas ni Satanas a lapdan ti panggep ti Dios? (b) Kasano a tinaming ni Jehova ti karit ni Satanas idiay Eden?

5 Gapu iti dakes a panggepna a manglapped iti panggep ti Dios, nangpataud ni Satanas a Diablo iti panagrebelde. Inaramidna dayta babaen ti panangpuntiriana iti maikatlo a banag nga inkeddeng ti Dios—ti banag nga agkalikagum iti panagtulnog ti tao. Sinulisogna ti umuna a babai, ni Eva, nga agsukir iti imbilin ti Dios a saanda a mangan iti bunga ti kayo ti pannakaammo iti naimbag ken dakes. (Gen. 3:1-5; Apoc. 12:9) Iti dayta nga inaramid ni Satanas, kinaritna ti kalintegan ti Dios a mangituray kadagiti parsuana. Idi agangay, inakusaran met ni Satanas dagiti nasungdo a tattao ket kinunana nga agserserbida laeng iti Dios gapu iti agimbubukodan a motibo.—Job 1:9-11; 2:4, 5.

6 Kasano a tinaming ni Jehova ti karit ni Satanas idiay Eden? No dinadaelna a dagus dagiti rebelde, nagpatingga koman ti panagrebeldeda. Ngem kaipapananna met koma a saanen a matungpal ti panggep ti Dios a ti daga ket mapno kadagiti natulnog a kaputotan da Adan ken Eva. Imbes a dagus a papatayenna dagiti rebelde, nagtignay ti masirib a Namarsua babaen ti panangyebkasna iti maysa a nagpateg a padto—ti kari idiay Eden—tapno masigurado a matungpal ti amin a detalye ti panggepna.—Basaen ti Genesis 3:15.

7. Ania ti ipasigurado kadatayo ti kari idiay Eden maipapan iti serpiente ken iti kaputotanna?

7 Babaen ti kari idiay Eden, inyetnag ni Jehova ti pannusana iti serpiente, ni Satanas a Diablo, ken iti kaputotanna, ti amin a dumasig kenkuana maibusor iti kalintegan ti Dios a mangituray. Ti pudno a Dios intedna iti kaputotan ti nailangitan a babai ti autoridad a mangdadael ken Satanas. Gapuna, saan laeng nga ipasigurado ti kari idiay Eden a mapukawto daydiay nangpataud iti panagrebelde ken ti amin a dakes nga epekto ti inaramidna no di ket ipakitana pay no kasano a maaramid dayta.

8. Ania ti maibagatayo maipapan iti pakabigbigan ti babai ken ti kaputotanna?

8 Siasino ti kaputotan ti babai? Maysa la ketdi nga espiritu a parsua. Apay? Gapu ta daytoy a kaputotan rumekennanto wenno  “pukawenna” ti espiritu a parsua a ni Satanas a Diablo. (Heb. 2:14) Gapuna, naespirituan met ngarud ti panangipasngay ti babai iti dayta a kaputotan. Bayat nga umad-adu ti kaputotan ti serpiente, nagtalinaed a misterio ti kinasiasino ti babai ken ti kaputotanna iti agarup 4,000 a tawen kalpasan nga inyebkas ni Jehova ti kari idiay Eden. Kabayatan dagita a tawtawen, nangaramid ni Jehova iti sumagmamano a tulag a mangipalgak iti kinasiasino ti kaputotan ti babai. Impatalgedna pay kadagiti adipenna a daytanto a kaputotan ti usarenna a mangpukaw kadagiti dakes a kasasaad nga inyeg ni Satanas iti sangatauan.

TULAG A MANGIPAKAAMMO ITI KAPUTOTAN

9. Ania a tulag ti inaramid ni Jehova ken Abraham? Kaano a nangrugi dayta?

9 Agarup dua ribu a tawen ti napalabas kalpasan a nasentensiaan ni Satanas, binilin ni Jehova ni patriarka Abraham a panawanna ti Ur idiay Mesopotamia ket mapan iti daga ti Canaan. (Ara. 7:2, 3) Kinuna kenkuana ni Jehova: “Pumanawka iti pagiliam ken kadagiti kabagiam ken iti balay ni amam nga agturong iti pagilian nga ipakitakto kenka; ket mangaramidakto iti dakkel a nasion manipud kenka ket bendisionankanto ket pagbalinekto a naindaklan ti naganmo; ket agbalinka a maysa a bendision. Ket bendisionakto dagidiay mangbendision kenka, ket ti mangidawdawat ti pakadaksam ilunodkonto, ket amin a pampamilia iti daga pudno unay a bendisionandanto ti bagbagida babaen kenka.” (Gen. 12:1-3) Daytoy ti kaunaan a nairekord a salaysay maipapan iti tulag ken Abraham. Saantayo nga ammo no kaano ti umuna a panangyebkas ni Jehova iti dayta a tulag. Nupay kasta, nangrugi dayta idi 1943 B.C.E., idi pinanawan ni Abraham ti Haran iti edad a 75 ken binallasiwna ti Karayan Eufrates.

10. (a) Kasano nga impakita ni Abraham a natibker ti pammatina kadagiti kari ti Dios? (b) Ania dagiti detalye nga in-inut nga impalgak ni Jehova maipapan iti kaputotan ti babai?

 10 Inulit ni Jehova ti karina ken Abraham iti sumagmamano a daras tapno mangted iti kanayonan a detalye. (Gen. 13:15-17; 17:1-8, 16) Idi impakita ni Abraham ti natibker a pammatina kadagiti kari ti Dios babaen ti situtulok a panangidatonna iti bugbugtong nga anakna, natignay ni Jehova a mangpatalged iti tulagna babaen ti panangisapatana a tungpalenna ti karina. (Basaen ti Genesis 22:15-18; Hebreo 11:17, 18.) Idi nangrugin ti tulag ken Abraham, in-inut nga impalgak ni Jehova dagiti napateg a detalye maipapan iti kaputotan ti babai. Dayta a kaputotan ket agtaudto ken Abraham, umadunto ti bilangda, agserbidanto kas ar-ari, dadaelendanto ti amin a kabusor, ken agbalindanto a bendision agpaay iti adu.

Impakita ni Abraham a natibker ti pammatina kadagiti kari ti Dios (Kitaen ti parapo 10)

11, 12. Kasano nga ipakita ti Kasuratan nga adda dakdakkel a kaitungpalan ti tulag ken Abraham? Ania ti kaipapanan dayta kadatayo?

11 Nupay ti tulag ken Abraham ket literal a natungpal kadagiti kaputotanna idi tinawidda ti Naikari a Daga, ipakita ti Kasuratan nga adda met naespirituan a kaitungpalan dayta a tulag. (Gal. 4:22-25) Iti daytoy a dakdakkel a kaitungpalan, napaltiingan ni apostol Pablo a mangilawlawag a ti kangrunaan a paset ti kaputotan ni Abraham ket isu ni Kristo. Ti maikadua a paset ti kaputotan ket dagiti 144,000 a Kristiano a napulotan iti espiritu. (Gal. 3:16, 29; Apoc. 5:9, 10; 14:1, 4) Ti babai a pagtaudan ti kaputotan ket ti “Jerusalem sadi ngato”—ti nailangitan a paset ti organisasion ti Dios, a buklen dagiti nasungdo nga espiritu a parsua. (Gal. 4:26, 31) Kas naikari iti tulag ken Abraham, ti kaputotan ti babai ket mangipaayto kadagiti bendision iti sangatauan.

12 Ti tulag ken Abraham ket agserbi kas legal a pammatalged a pudpudno ti Pagarian ken agturayto idiay langit ti Ari ken dagiti kakaduana. (Heb. 6:13-18) Kaano nga agpatingga daytoy a tulag? “Agingga iti tiempo a di nakedngan,” kuna ti Genesis 17:7. Agtultuloy dayta a tulag agingga a ti Mesianiko a Pagarian madadaelna dagiti kabusor ti Dios ken mabendisionan ti amin a pamilia nga agnanaed ditoy daga. (1 Cor. 15:23-26) Ngem dagiti gunggona nga ipaay daytoy a tulag ket tagiragsakento dagiti agnanaed ditoy daga iti agnanayon. Ipakita ti tulag ti Dios ken Abraham a determinado ni Jehova a mangibanag iti panggepna a ‘mapunno ti daga’ iti nalinteg a tattao.—Gen. 1:28.

TULAG A MANGIPASIGURADO NGA AGNANAYONTO TI PAGARIAN

13, 14. Ania ti patalgedan ti tulag ken David maipapan iti Mesianiko a turay?

13 Ipakita ti kari idiay Eden ken ti tulag ken Abraham a ti kalintegan ni Jehova a mangituray ket kanayon a naibatay kadagiti nalinteg a pagalagadanna. No kasta, naibatay met ngarud kadagita a nalinteg a pagalagadan ti Mesianiko a Pagarian. (Sal. 89:14) Posible kadi nga agbalinto a dakes dagiti agturay iti Pagarian, iti kasta kasapulan a madadael? Patalgedan ti sabali pay a tulag a saanto a pulos mapasamak dayta.

14 Usigentayo ti inkari ni Jehova ken Ari David iti nagkauna nga Israel. Maawagan dayta iti tulag ken David. (Basaen ti 2 Samuel 7:12, 16.) Inaramid ni Jehova daytoy a tulag bayat nga agturturay ni David kas ari iti Jerusalem. Inkarina ken David nga agtaudto kenkuana ti Mesias. (Luc. 1:30-33) Gapuna, impalgak ni Jehova ti espesipiko a pagtaudan dayta a kaputotan ken pinatalgedanna a ti addaan iti “legal a kalintegan” nga agtawid iti trono ti Mesianiko a Pagarian ket maysa a kaputotan ni David. (Ezeq. 21:25-27) Babaen ken Jesus, ti  kinaari ni David ket “maipasdekto . . . a sititibker iti tiempo a di nakedngan.” Gapuna, ti kaputotan ni David ket “agingga iti tiempo a di nakedngan, ken [agtalinaed iti agnanayon] ti tronona kas iti init.” (Sal. 89:34-37) Wen, saanto pulos nga agbalin a dakes ti Mesias, ket agnanayonto dagiti banag a maaramidanna!

TULAG PARA ITI KINAPADI

15-17. Maitunos iti tulag para iti maysa a padi a kaasping ni Melquisedec, ania ti kanayonan nga akem ti kaputotan, ken apay?

15 Nalawag nga ipakita ti tulag ken Abraham ken ti tulag ken David nga agturayto kas ari ti kaputotan ti babai. Ngem tapno naan-anay a magunggonaan ti intero a sangatauan, saan laeng nga agakem kas ari dayta a kaputotan no di ket agakem pay kas padi. Ti laeng padi ti makaidaton iti sakripisio a kasapulan tapno mawayawayaan dagiti tattao manipud iti basol ken tapno makapagbalinda a paset ti unibersal a pamilia ni Jehova. Isu a tapno makapagserbi kas padi ti kaputotan ti babai, nangaramid ni Jehova iti sabali pay a legal nga urnos, ti tulag para iti maysa a padi a kaasping ni Melquisedec.

16 Babaen ken Ari David, impalgak ni Jehova a mangaramid iti personal a tulag ken Jesus. Adda dua a panggep daytoy a tulag. Umuna, tapno ‘agtugaw [ni Jesus] iti makannawan’ ti Dios agingga a maparmekna dagiti kabusorna. Maikadua, tapno agbalin a ‘padi agingga iti tiempo a di nakedngan a [kas iti kinapadi] ni Melquisedec.’ (Basaen ti Salmo 110:1, 2, 4.) Apay a kas iti kinapadi ni Melquisedec? Mabayag pay ngamin sakbay a tawiden dagiti kaputotan ni Abraham ti Naikari a Daga, nagserbin ni Melquisedec nga ari ti Salem kas “padi ti Kangatuan a Dios.” (Heb. 7:1-3) Mismo a ni Jehova ti nangdutok kenkuana iti dayta nga akem. Isu laeng ti kakaisuna a dinakamat ti Hebreo a Kasuratan a nagserbi kas ari ken padi. Naawagan met kas “padi iti kinaagnanayon” ta awan ti nairekord a sinunuanna wenno simmuno kenkuana.

17 Direkta a nadutokan ni Jesus kas padi babaen iti daytoy a tulag nga inaramid kenkuana ni Jehova, ken agtalinaedto kas ‘padi agingga iti tiempo a di nakedngan a [kas iti kinapadi] ni Melquisedec.’ (Heb. 5:4-6) Nalawag nga ipakita daytoy a tulag nga ipaspasigurado ni Jehova nga aramatennanto ti Mesianiko a Pagarian a mangitungpal iti orihinal a panggepna agpaay iti sangatauan ken iti daga.

DAGITI TULAG NGA AGSERBI KAS LEGAL A PAKAIBATAYAN TI PAGARIAN

18, 19. (a) Ania ti ipakita dagiti inusigtayo a tulag mainaig iti Pagarian? (b) Ania pay a saludsod ti usigentayo?

18 Kadagiti tulag nga inusigtayo, naammuantayo no kasano a nainaig dagitoy iti Mesianiko a Pagarian ken no kasano a sititibker a naibatay ti Pagarian kadagiti legal a katulagan. Ipasigurado ti kari idiay Eden a tungpalen ni Jehova ti panggepna iti daga ken iti sangatauan babaen iti kaputotan ti babai. Sungbatan met ti tulag ken Abraham no siasino dayta a kaputotan ken no anianto ti agbalin nga akemna.

19 Ipakita ti tulag ken David ti espesipiko a pagtaudan ti kangrunaan a paset dayta a kaputotan. Ipaayna met iti dayta a kaputotan ti kalintegan a mangituray iti daga tapno agpaut iti agnanayon dagiti maaramidan ti Pagarian. Ti tulag para iti maysa a padi a kaasping ni Melquisedec patalgedanna nga agserbi kas padi dayta a kaputotan. Ngem saan nga agmaymaysa ni Jesus a mamagbalin a perpekto iti sangatauan. Adda dadduma pay a nadutokan kas ar-ari ken papadi. Sadino ti paggapuanda? Dayta ti mausig iti sumaganad nga artikulo.