Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) OKTUBRE 2014

 PAKASARITAAN TI BIAG

Dagiti Diak Malipatan iti Panagserbik iti Pagarian

Dagiti Diak Malipatan iti Panagserbik iti Pagarian

Idi 1947, riniribuk dagiti Katoliko a papadi dagiti Saksi iti Santa Ana, El Salvador. Madama idi ti linawas a panagadal iti Pagwanawanan idi adda ubbing a lallaki a nangubor iti dadakkel a batbato iti nakalukat a ruangan ti balay a pagtataengan dagiti misionero. Kalpasanna, adda maysa a libut nga indauluan dagiti padi. Dadduma kadakuada ti nakaiggem iti aluten ken adda met dagiti nakaawit iti imahen. Dua nga oras nga inub-uborda ti pasdek ken impukpukkawda: “Agbiag ti Birhen!” ken “Matay koma ni Jehova!” Pangbutbutengda dayta tapno pumanaw dagiti misionero. Ammok dayta a pasamak ta maysaak kadagidiay a misionero ken addaak iti daydi a gimong 67 a tawenen ti napalabas. *

DUA a tawen sakbay daytoy a pasamak, naggraduarkami iti partnerko a misionero a ni Evelyn Trabert iti maikapat a klase ti Watchtower Bible School of Gilead a masarakan idi iti asideg ti Ithaca, New York. Naibaonkami nga agserbi iti Santa Ana. Ngem sakbay nga ituloyko nga isalaysay ti dandani 29 a tawen a panagserbik kas misionero, palubosandak a mangestoria no apay a pinilik daytoy a trabaho.

TI NAESPIRITUAN A TAWIDKO

Nayanakak idi 1923. Agnanaed idi dagiti nagannakko a da John ken Eva Olson idiay Spokane, Washington, U.S.A. Nupay Luterano dagiti nagannakko, saanda a mamati iti umap-apuy nga impierno nga isursuro ti simbaan gapu ta maikontra dayta iti panamatida a ti Dios ket ayat. (1 Juan 4:8) Maysa a rabii iti panaderia a pagtrabtrabahuan ni Tatang, imbaga ti maysa a katrabahuanna a saan nga isursuro ti Biblia a ti impierno ket maysa a lugar a pagtutuokan. Idi agangay, nakipagadal dagiti dadakkelko kadagiti Saksi ni Jehova ket naammuanda no ania a talaga ti isursuro ti Biblia maipapan iti kasasaad dagiti natay.

Siam laeng ti tawenko idi, ngem malagipko a dumdumngegak iti naganaygay a panangyebkas dagiti nagannakko iti kinapudno a nasarakanda iti Biblia. Ad-adda pay a narubroban ti gagarda idi naammuanda a Jehova ti nagan ti pudno a Dios ken  naluk-atanda iti makariro a doktrina ti Trinidad. Kaslaak iti espongha a nangagsep kadagita a Nainkasuratan a sursuro—‘ti kinapudno a mangwayawaya iti maysa.’ (Juan 8:32) Saanko man la a napanunot a makauma ti panagadal iti Sao ti Dios, no di ket kanayon a maragragsakanak a mangsukimat iti dayta. Nupay managbabainak, sumursurotak latta kadagiti nagannakko a mapan mangasaba. Nabautisaranda kas Saksi ni Jehova idi 1934 ket nabautisaranak met idi 1939 iti edad a 16.

Kaduak da Nanang ken Tatang iti asamblea idi 1941 idiay St. Louis, Missouri

Idi Hulio 1940, inlako dagiti nagannakko ti balaymi, ket inrugimi a tallo ti agserbi iti amin a tiempo kas payunir idiay Coeur d’Alene, Idaho. Nangabangkami iti apartment nga adda iti ngato ti maysa a talyer. Maus-usar met ti apartmentmi kas pagtataripnongan. Iti dayta a tiempo, sumagmamano laeng a kongregasion ti adda bukodna a Kingdom Hall isu nga agtataripnong dagiti kakabsat iti pribado a pagtaengan wenno iti maab-abangan a kuarto.

Idi 1941, tinabunuanmi a sangapamiliaan ti maysa nga asamblea idiay St. Louis, Missouri. Ti aldaw ti Domingo ket “Aldaw Dagiti Ubbing,” ket dagidiay agtawen iti 5 agingga iti 18 nagtugawda iti makannawan a sango ti entablado. Idi dandanin agngudo ti palawag ni Brother Joseph F. Rutherford, kinunana kadakami nga ubbing: “Dakayo amin . . . nga ubbing . . . nga immanamongen nga agtulnog iti Dios ken iti Arina, pangngaasiyo ta tumakderkayo!” Idi nakatakderkamin, kinuna ni Brother Rutherford: “Kitaenyo, nasurok a 15,000 a kabbaro a saksi para iti Pagarian!” Dayta a pasamak ti nangpabileg kaniak nga agpayunir.

DAGITI ANNONGEN TI PAMILIAMI

Sumagmamano a bulan kalpasan ti asamblea idiay St. Louis, immakarkami a sangapamiliaan iti makin-abagatan a California. Annongenmi ti mangbuangay iti kongregasion iti siudad ti Oxnard. Bassit a trailer ti pagnanaedanmi nga addaan laeng iti maysa a kama. Ti lamisaan a pangananmi ti agbalin a “kamak” iti rabii. Maikawaak unay ta sigud nga adda bukodko a kuarto.

Sakbay unay nga immakarkami iti California, binomba ti Japan ti Pearl Harbor iti Hawaii idi Disiembre 7, 1941. Kabigatanna, indeklara ti Estados Unidos ti pannakiramanna iti Gubat Sangalubongan II. Imbilin dagiti autoridad nga iddepenmi amin a silaw iti rabii tapno dagiti submarine ti Japan nga agpatpatrolia iti igid ti California saanda a makita dagiti puntiriada.

Sumagmamano a bulan kalpasanna, idi Septiembre 1942, inatendaranmi ti New World Theocratic Assembly idiay Cleveland, Ohio. Dimngegkami iti palawag ni Brother Nathan H. Knorr a napauluan iti “Talna—Agpautto Aya?” Inlawlawagna ti Apocalipsis kapitulo 17, a mangiladladawan iti “atap nga animal” nga “adda idi, ngem awanen, ket kaskasdi a dandanin rummuar manipud iti mangliwengliweng.” (Apoc. 17:8, 11) Inlawlawag ni Brother Knorr a ti “atap nga animal” ket isu ti League of Nations a nagsardeng idi 1939. Impadto ti Biblia a masukatanto dayta ket maadda ti tiempo ti talna. Kasta ti napasamak idi 1945, idi nagpatingga ti Gubat Sangalubongan II. Idi kuan, nagparang manen ti “animal” kas ti United Nations. Kalpasan dayta, pinalawa dagiti Saksi ni Jehova ti sangalubongan a trabahoda a panangasaba, ket sipapartak nga immaduda sipud idin!

Ti diplomak iti Gilead

Dayta a padto ti nakatulong kaniak a mangammo no ania ti mapasamak iti masanguanan. Idi naipakaammo a mangrugi ti Gilead School iti sumaganad a tawen, naparegtaak nga agbalin a misionero. Idi 1943, naibaonak nga agpayunir idiay Portland,  Oregon. Kadagidi nga aldaw, us-usarenmi ti ponograpo a mangipangngeg kadagiti nairekord a sermon sa mangitukonkami kadagiti bumalay iti naibatay-Biblia a literatura maipapan iti Pagarian ti Dios. Iti dayta a tawen, kanayonen a pinampanunotko ti agserbi kas misionero.

Idi 1944, anian a ragsakko ta naawiskami ken ni Evelyn Trabert a gayyemko nga ageskuela iti Gilead. Iti uneg ti lima a bulan, insurodakami dagiti instruktormi no kasano a matagiragsakmi ti personal a panagadal iti Biblia. Apresiarenmi ti kinapakumbabada. No dadduma, isuda ti agbalin a waiter bayat a mangmangankami. Naggraduarkami idi Enero 22, 1945.

TI NAKAIBAONAK KAS MISIONERO

Idi Hunio 1946, maysaak kadagiti misionero a naibaon iti El Salvador. Kaduak da Evelyn Trabert, Leo ken Esther Mahan. Nasangpetanmi ti El Salvador a ‘purawen maipaay iti pannakaani.’ (Juan 4:35) Ipakita ti pasamak a nadakamat iti rugi daytoy a salaysay ti nakaro a pungtot dagiti papadi. Makalawas sakbay dayta, inangaymi ti umuna nga asamblea sirkito iti Santa Ana. Inyawismi ti palawag publiko ket naragsakankami ta dandani 500 ti timmabuno. Imbes a pumanawkami gapu iti buteng, ad-adda ketdi a determinadokami nga agtalinaed tapno tulonganmi dagiti naemma a tattao. Uray no imbilin dagiti papadi a saan a basaen dagiti umili ti Biblia ken manmano kadakuada ti makabael a gumatang iti dayta, talaga nga adu ti mabisin iti kinapudno. Inapresiarda ti panangikagumaanmi nga agsursuro iti Espaniol tapno maisuromi ida maipapan iti pudno a Dios, ni Jehova, ken maipapan iti karina a pannakaisubli ti Paraiso ditoy daga.

Limakami nga agkakaklase iti Gilead a naibaon iti El Salvador. Manipud kannigid: Evelyn Trabert, Millie Brashier, Esther Mahan, siak, ken ni Leo Mahan

Maysa ni Rosa Ascencio kadagiti immuna nga inyadalak iti Biblia. Idi inrugina ti makipagadal, nakisina iti kabkabbalayna a lalaki. Idi agangay, nagadal met iti Biblia ti lalaki. Kalpasanna, nagkasarda ken nagpabautisarda, ket nagbalinda a nareregta a Saksi ni Jehova. Ni Rosa ti kaunaan a payunir iti Santa Ana. *

Adda bassit a groseria ni Rosa. No mapan mangasaba, iserrana dayta ket agtalek nga ipaay ni Jehova dagiti kasapulanna. Inton ilukatna ti groseriana kalpasan ti sumagmamano nga oras, aggigiddanen dagiti mapan gumatang. Napaneknekanna a mismo a pudno ti Mateo 6:33. Nagtalinaed ni Rosa a matalek agingga iti ipapatayna.

Naminsan, binisita ti maysa a padi ti lalaki a pagab-abanganmi nga innem a misionero ket pinakdaaranna a maikkatda ken baketna iti simbaan no itultuloyna nga ipaabang ti balayna kadakami. Daytoy a lalaki, a maysa a nalatak a negosiante, ket datin a dismayado iti kababalin ti padi isu a saan a mabuteng kenkuana. Imbagana pay ketdi iti padi nga awan bibiangna uray maikkatda iti simbaan. Impanamnamana kadakami a mabalinmi latta ti agyan iti balayna agingga a kayatmi.

NAGBALIN A SAKSI TI MARARAEM NGA UMILI

Sanga nga opisina a naibangon idi 1955

Iti kabesera a siudad ti San Salvador, maysa a misionero  ti mangyad-adal iti Biblia iti asawa ti nasingpet nga inheniero nga agnagan iti Baltasar Perla. Saanen a mamati iti Dios daytoy a lalaki gapu iti makitkitana a kinamanaginsisingpet dagiti lider ti relihion. Idi maibangon ti sanga nga opisina, nagboluntario ni Baltasar, nupay saan pay idi a Saksi, nga isu ti mangaramid iti plano ken mangibangon iti pasilidad nga awan bayadna.

Kalpasan ti pannakikaduana kadagiti Saksi bayat ti panagibangon, nakombinsir ni Baltasar a nasarakannan ti pudno a relihion. Nabautisaran idi Hulio 22, 1955 ket nagpabautisar met ni baketna a ni Paulina di nagbayag kalpasanna. Agpada a matalek nga agserserbi ken Jehova ti dua nga annakda. Ti anakda a ni Baltasar, Jr. ket 49 a tawenen nga agserserbi iti Brooklyn Bethel, a mangsupsuporta iti rumangrang-ay a sangalubongan a trabaho a panangasaba ken agserserbi kas agdama a miembro ti Komite ti Sangay ti Estados Unidos. *

Idi nangrugi a maangay dagiti kombension iti San Salvador, tinulongannakami ni Brother Perla tapno mausarmi ti maysa a nalawa a gymnasium. Idi damo, sumagmamano la a tugaw ti maus-usarmi. Ngem gapu iti pamendision ni Jehova, immadu nga immadu ti bilangmi kada tawen agingga a napnon ti gymnasium ken saankami payen nga umanay! Dagita a naragsak a pasamak ti nakakitaak kadagiti dati nga iyad-adalak iti Biblia. Anian a ragsakko idi a dagiti bautisadon nga inyadalak inyam-ammoda kaniak dagiti “appokok”—dagiti kabbaro a bautisado nga inyadalanda!

Brother F. W. Franz kasarsaritana dagiti misionero iti maysa a kombension

Iti maysa nga asamblea, adda maysa a kabsat nga immasideg kaniak. Kinunana nga adda banag nga ipudnona. Saanko a mabigbig ngem kayatko a maammuan ti ibagana. Kinunana, “Maysaak idi kadagiti ubbing a nangubor kadakayo idiay Santa Ana.” Anian a ragsakko ta daytoy a lalaki ket maysa itan nga adipen ni Jehova a kas kaniak! Napaneknekak iti dayta a panagtungtongmi a ti amin-tiempo a ministerio ti kasayaatan a karera a mabalin a pilien ti asinoman.

Ti umuna nga asamblea sirkito a tinabunuanmi iti El Salvador

DAGITI MAKAPNEK A DESISIONKO

Nagtultuloyak nga agserbi kas misionero iti El Salvador iti dandani 29 a tawen—umuna iti siudad ti Santa Ana, kalpasanna iti Sonsonate, sa iti Santa  Tecla, ken kamaudiananna iti San Salvador. Idi 1975, kalpasan ti adu a panagkarkararag, inkeddengko ti sumardeng kas misionero tapno aywanak dagiti matalek a nataenganen a nagannakko idiay Spokane.

Natay ni Tatang idi 1979, ket inaywanak ni Nanang bayat nga in-inut a kimmapuy ti salun-atna. Nagbiag pay iti walo a tawen, ket natay iti edad a 94. Gapu iti napalalo a bannogko iti pisikal ken emosional, naaddaanak iti nakaut-ut-ot a sakit a shingles. Ngem gapu iti kararag ken naayat a pannarabay ni Jehova a nangpabpabileg kaniak, nabaelak nga ibturan dayta a narigat a kasasaad. Kas iti imbaga ni Jehova, ‘uray iti kinaubanan, awiten ken [ispalenka].’—Isa. 46:4.

Idi 1990, immakarak iti Omak, Washington. Naragsakak ta matultulongak manen dagiti tattao nga Espaniol ti pagsasaona, ket dadduma kadagiti iyad-adalak iti Biblia ti nabautisaran. Idi Nobiembre 2007, immakarak iti maysa nga apartment nga asideg iti ili ti Chelan, Washington ta saankon a kabaelan nga aywanan ti balayko iti Omak. Ti nakaikamengak nga Espaniol a kongregasion ti mangay-aywan kaniak agingga ita, ket pagyamyamanak unay dayta. Gapu ta siak laeng ti nataengan a Saksi ditoy, siaayat nga “inampondak” dagiti kakabsat kas “lolada.”

Uray no pinilik ti di makiasawa ken di agpamilia tapno “awan ti makasinga” iti panagserbik, naaddaanak met iti adu a naespirituan nga annak. (1 Cor. 7:34, 35) Ammok a saanko a maaramidan ti amin a banag ita. Isu nga inyun-unak ti kapatgan a banag—ti panagserbik ken Jehova iti amin a pusok. Inton baro a lubong, adunto ti tiempotayo a mangaramid iti makagunggona a bambanag. Ti paboritok a teksto ket Salmo 145:16, a mangipatalged kadatayo a ‘penkento ni Jehova ti tarigagay ti tunggal sibibiag a banag.’

Gapu iti panagpayunirko, mariknak a kasla agkabannuagak pay laeng

Agtawenak itan iti 91, ngem napigsaak pay isu nga agpaypayunirak latta. Gapu iti dayta, mariknak a kasla agkabannuagak pay laeng ken adda panggep ti biagko. Idi simmangpetak iti El Salvador, karugrugi pay laeng ti trabaho a panangasaba sadiay. Nupay di mamingga ti ibubusor ni Satanas, adda itan nasurok a 39,000 nga agibumbunannag iti El Salvador. Mapabpabileg ti pammatik gapu iti dayta. Nalawag a supsuportaran ti nasantuan nga espiritu ni Jehova ti panagregget dagiti adipenna!

^ par. 4 Kitaen ti 1981 Yearbook of Jehovah’s Witnesses, panid 45-46.

^ par. 19 1981 Yearbook, panid 41-42.

^ par. 24 1981 Yearbook, panid 66-67, 74-75.