Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) SEPTIEMBRE 2014

‘Rumagragpatka’ Kadi?

‘Rumagragpatka’ Kadi?

MADANDANAGAN ni Fernando. * Imbaga ti dua a panglakayen a kayatda isuna a kasarita iti pribado. Kinasaritada idin kalpasan ti sumagmamano nga ibibisita ti manangaywan iti sirkito. Inlawlawagda met idin kenkuana no ania ti masapul a parang-ayenna tapno makualipikar para iti kanayonan a pribilehio. Iti panaglabas ti tiempo, pinampanunot ni Fernando no madutokanto pay ngata kas panglakayen. Ita, nalpas manen ti ibibisita ti manangaywan iti sirkito. Ania ngata ti ibaga kenkuana dagiti panglakayen?

Dimngeg ni Fernando bayat nga agsasao ti maysa kadagiti panglakayen. Dinakamat ti panglakayen ti 1 Timoteo 3:1 ken imbagana a naawatdan ti surat ti pannakadutokna kas maysa a panglakayen. Nasorpresa ni Fernando ket sinaludsodna, “Ania ti kinunayo?” Inulit ti kabsat ti imbagana, ket immisem ni Fernando. Kalpasanna, idi naipakaammo iti kongregasion ti pannakadutokna, naragsakan amin a kakabsat.

Dakes kadi ti agtarigagay iti pribilehio iti kongregasion? Saan. Sigun iti 1 Timoteo 3:1, “no ti asinoman a lalaki ragragpatenna ti akem a manangaywan, tartarigagayanna ti nasayaat nga aramid.” Adu a Kristiano a lallaki ti nangyaplikar iti dayta ket rimmang-ayda iti naespirituan agingga a nakualipikarda kadagiti pribilehio iti kongregasion. Kas resultana, nabendisionan ti ili ti Dios iti pinullo a ribu a kualipikado a panglakayen ken ministerial nga adipen. Ngem gapu iti irarang-ay dagiti kongregasion, kasapulan ti ad-adu a kakabsat a lallaki a rumagpat iti kanayonan a pribilehio. Ania ti umiso a pamay-an a maaramidanda dayta? Ken rumbeng kadi a dayta ti sangkapanunot dagidiay agtartarigagay nga agbalin a manangaywan, kas ken Fernando?

ANIA TI KAIPAPANAN TI ‘RUMAGPAT’?

Ti Griego a sao iti Biblia a naipatarus a ‘rumagpat’ kaipapananna ti napasnek a panagtarigagay wenno gumaw-at. Mayarig dayta iti maysa a tao a mangikagkagumaan a manggaw-at iti makaatrakar a bunga ti maysa a kayo. Ngem ti iraragpat dina kayat a sawen ti siaagum a pananggaw-at iti pribilehio nga agbalin a “manangaywan.” Apay a saan? Gapu ta ti kalat  dagidiay talaga nga interesado nga agserbi kas panglakayen ket tapno mangipaay iti “nasayaat nga aramid” imbes a gumun-od iti posision.

Adu kadagiti kualipikasion a nainaig iti daytoy a nasayaat nga aramid ti nailista iti 1 Timoteo 3:2-7 ken Tito 1:5-9. Maipapan kadagita a nangato a pagalagadan, inlawlawag ti nabayagen a panglakayen nga agnagan iti Raymond: “Ti kapatgan kaniak ket ti kinataotayo. Napateg ti kinalaing nga agpalawag ken mangisuro, ngem napatpateg ti nasayaat a reputasion, natimbeng a panagug-ugali, nasimbeng a panunot, kinaurnos, kinamanagpadagus, ken kinanainkalintegan.”

‘Rumagpatka’ babaen ti panangaramidmo iti amin a kabaelam a tumulong iti kongregasion

Ti kabsat a pudpudno a rumagragpat ipakitana a nasayaat ti reputasionna babaen ti panangliklikna iti aniaman a kita ti panagkusit ken kinarugit. Natimbeng ti panagug-ugalina, nasimbeng ti panagpampanunotna, naurnos, managpadagus, ken nainkalintegan. Iti kasta, agtalek dagiti kakabsat iti panangidaulona ken ammoda a tulonganna ida no adda parikutda. Gapu ta managpadagus, maparparegtana dagiti agtutubo ken dagiti kabbaro iti kinapudno. Ipaayanna met iti liwliwa ken tulong dagiti masakit ken nataenganen a kakabsat gapu ta isu ket managayat iti kinaimbag. Patanorenna dagitoy a kualidad, saan a tapno laeng madutokan a panglakayen, no di ket tapno magunggonaan ti sabsabali. *

Maragsakan ti bagi dagiti panglakayen a mangipaay iti balakad ken pammaregta iti kabsat a rumagragpat iti pribilehio. Ngem isu ti masapul nga agtignay tapno maragpatna dagiti kualipikasion. Kinuna ni Henry a maysa nga eksperiensiado a manangaywan: “No rumagragpatka, ikagumaam a paneknekan a kualipikadoka.” Dinakamatna ti linaon ti Eclesiastes 9:10: “Isuamin a masarakan ta imam nga aramiden, aramidem buyogen ti mismo a bilegmo.” Sana kinuna: “Aniaman ti annongen nga ipaay kenka dagiti panglakayen, aramidem ti amin a kabaelam. Tagipatgem ti amin a trabaho a maited kenka iti kongregasion, uray panagwalis laeng. Inton agangay, madlawdanto ti panagreggetmo.” No kayatmo ti agbalin a panglakayen iti masanguanan, aggaggagetka ken mapagtalkanka koma iti amin nga aspeto ti sagrado a panagserbim. Agbalinka koma a napakumbaba saan ket a napannakkel.—Mat. 23:8-12.

 IWAKSIM TI DI UMISO A PANAGPAMPANUNOT KEN TIGTIGNAY

Gapu ta kayat ti dadduma ti maaddaan iti pribilehio iti kongregasion, mabalin nga ipadlawda dayta kadagiti panglakayen wenno padasenda pay ketdi nga impluensiaan ti bagi dagiti panglakayen. Adda met dagidiay agsakit ti nakemna no balakadan ida dagiti panglakayen. No adda kasta a riknam, isaludsodmo iti bagim, ‘Ti kadi laeng pagimbagak ti pampanunotek, wenno kayatko a pagserbian ken aywanan dagiti karnero ni Jehova?’

Laglagipen koma dagiti rumagragpat iti pribilehio ti maysa pay a makalikaguman kadagiti panglakayen—ti ‘panagbalin nga ulidan iti arban.’ (1 Ped. 5:1-3) Tapno maaramidan dayta ti maysa nga indibidual, masapul a liklikanna ti agpanunot ken agtignay a sisisikap. Sursuruenna ti aganus ken agibtur, adda man pribilehiona wenno awan pay. Ngem saanna a kayat a sawen a no agbalin a panglakayen ti maysa ket awanen ti pagkapuyanna. (Num. 12:3; Sal. 106:32, 33) Nupay ‘awan [makitana] nga aniaman a banag maibusor iti bagina,’ mabalin nga adda negatibo a makuna ti sabsabali maipapan kenkuana. (1 Cor. 4:4) Isu a no balakadandaka dagiti panglakayen manipud iti Biblia, dika koma masuron. Imbes ketdi, dumngegka ken ikagumaam nga iyaplikar ti balakadda.

KASANON NO NABAYAGEN NGA AGUR-URAYKA?

Iti panagrikna ti dadduma a kakabsat, kasla nakabaybayagdan nga agur-uray. No adun a tawen a ‘ragragpatem ti akem a manangaywan,’ matuokanka kadi nga aguray no dadduma? No kasta, usigem dagitoy a naipaltiing a sasao: “Ti inanama a maitantan pagsakitenna ti puso, ngem ti banag a tinarigagayan maysa a kayo ti biag.”—Prov. 13:12.

Mabalin a maupay ti maysa no kasla saanna a maragragpat ti tartarigagayanna a kalat. Kasta idi ti narikna ni Abraham. Inkari ni Jehova a maaddaan iti anak a lalaki, ngem adun a tawen ti limmabas ket awan met laengen ti anakda ken Sara. (Gen. 12:1-3, 7) Lakayen idi inkararagna: “Soberano nga Apo Jehova, ania ti itdemto kaniak, yantangay agtultuloy nga awananak iti putot . . . Saannak nga inikkan iti [anak].” Impasigurado manen ni Jehova a matungpalto ti karina a maaddaan ni Abraham iti anak. Ngem agarup 14 a tawen pay ti limmabas sa tinungpal ti Dios ti karina.—Gen. 15:2-4; 16:16; 21:5.

Napukaw kadi ni Abraham ti rag-ona nga agserserbi ken Jehova bayat ti panagur-urayna? Saan. Dina pulos pinagduaduaan ti kari ti Dios. Intultuloyna ti mangnamnama. Insurat ni apostol Pablo: “Kalpasan a nangipakita ni Abraham iti kinaanus, nagun-odanna daytoy a kari.” (Heb. 6:15) Idi agangay, binendisionan ti Mannakabalin-amin a Dios daytoy a matalek a lalaki iti labes ti ninamnamana. Ania ti maadalmo ken Abraham?

No adun a tawtawen a tartarigagayam ti agserbi kas panglakayen ngem saanka pay a nadutokan, itultuloymo ti agtalek ken Jehova. Dimo ipalubos a mapukaw ti rag-om nga agserserbi kenkuana. Kastoy ti kuna ni Warren nga adun a kakabsat a lallaki ti natulonganna a rumang-ay iti naespirituan: “Kasapulan ti panawen tapno makita no kualipikado nga agbalin a panglakayen ti maysa a kabsat. Iti panaglabas ti tiempo, in-inut a makita dagiti abilidad ken kababalin ti maysa babaen ti tigtignayna ken ti panangitungpalna kadagiti  maited kenkuana nga annongen. Patien ti dadduma a naballigida no maikkanda iti pribilehio wenno annongen. Ngem saan nga umiso ti kasta a panangmatmat ken mabalin nga agresulta dayta iti nalabes a pannakaseknan iti pribilehio. Maibilangka a naballigi no matalekka nga agserserbi ken Jehova, sadinoman ti ayanmo ken aniaman ti ar-aramidem.”

Nasurok a sangapulo a tawen ti inuray ti maysa a kabsat sakbay a nadutokan a panglakayen. Kastoy ti imbagana a naadalna iti Ezequiel kapitulo 1: “Iturturong ni Jehova ti karuahena, ti organisasionna, iti kapartak a kayatna. Ti napateg ket saan a ti tiempo a pampanunotentayo no di ket ti tiempo a pampanunoten ni Jehova. No maipapan iti panagserbi kas panglakayen, saan a siak ti napateg—no ania ti kayatko wenno ti arapaapko a pagbalinan. Amangan no ti kayatko ket saan gayam nga isu ti kayat ni Jehova a para kaniak.”

No tartarigagayam ti agbalin a Kristiano a manangaywan, ikagumaam a ragpaten dayta babaen ti pannakitinnulongmo a mangparayray iti naragsak nga espiritu ti kongregasion. No matektekanka nga agur-uray, dika koma maupay ket agan-anuska. Kinuna ni Raymond a nadakamat itay: “Awan ti pannakakontento ti tao nga ambisioso. Dagidiay matektekan nga aguray dida marikna ti rag-o iti panagserbi ken Jehova.” Naan-anay a patanorem ti bunga ti espiritu ti Dios, nangnangruna ti kinaanus. Ikagumaam a pasayaaten ti espiritualidadmo babaen ti panangadalmo iti Kasuratan. Nayonam ti panawenmo a mangikasaba iti naimbag a damag ken mangyadal iti Biblia kadagiti interesado. Idauluam ti pamiliam kadagiti naespirituan nga aktibidad ken iti panagdaydayawyo kas pamilia. Tagiragsakem ti makilangen kadagiti kakabsat iti kongregasion. Naragsakkanto bayat a ragragpatem ti kalatmo.

Ti panagregget a rumagpat kadagiti pribilehio iti kongregasion ket maysa a bendision manipud ken Jehova. Saan a kayat ni Jehova ken ti organisasionna a maupay dagidiay rumagragpat iti pribilehio. Suportaran ken bendisionan ti Dios dagiti amin a nadalus ti motibona nga agserbi Kenkuana. Wen, “awan rigat nga inayonna” kadagiti amin a bendision nga ipapaayna.—Prov. 10:22.

Uray no medio nabayagen a rumagragpatka iti pribilehio, adda latta maaramidam nga irarang-ay iti naespirituan. Bayat a patpatanorem dagiti kasapulan a kualidad ken supsuportaram ti kongregasion ken saanmo met a baybay-an ti pamiliam, saanto a lipaten ni Jehova ti amin a panagreggetmo nga agserbi kenkuana. Sapay koma ta kanayon a pagragsakam ti agserbi ken Jehova, aniaman ti annongen a maited kenka.

^ par. 2 Nabaliwan dagiti nagan iti daytoy nga artikulo.

^ par. 8 Dagiti prinsipio a nadakamat iti daytoy nga artikulo ket agaplikar met kadagidiay agtarigagay nga agserbi kas ministerial nga adipen. Dagiti kualipikasion a masapul a ragpatenda ket masarakan iti 1 Timoteo 3:8-10, 12, 13.