Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) AGOSTO 2014

Maaw-awatmo Kadi ti ‘Taraon iti Umiso a Tiempo’?

Maaw-awatmo Kadi ti ‘Taraon iti Umiso a Tiempo’?

AGBIBIAGTAYO iti karirigatan a tiempo iti pakasaritaan ti tao. (2 Tim. 3:1-5) Inaldaw a masubok ti ayattayo ken Jehova ken ti determinasiontayo a mangannurot kadagiti nalinteg a pagalagadanna. Nasaksakbay a nakita ni Jesus daytoy a nariribuk a tiempo, ket impasiguradona kadagiti pasurotna nga umawatdanto iti kasapulanda a pammaregta tapno makapagibturda agingga iti panungpalan. (Mat. 24:3, 13; 28:20) Tapno mapabilegna ida, nangdutok iti matalek nga adipen a mangipaay iti naespirituan a ‘taraon iti umiso a tiempo.’—Mat. 24:45, 46.

Nadutokan idi 1919 dayta a matalek nga adipen. Sipud idin, mangipapaayen dayta iti naespirituan a taraon para iti ili ti Dios iti adu a lengguahe. (Mat. 24:14; Apoc. 22:17) Nupay kasta, saan nga amin a publikasiontayo ket magun-odan iti amin a lengguahe, ken saan nga amin nga indibidual ket makagun-od iti elektroniko a porma dagiti publikasiontayo. Kas pagarigan, adu ti saan a makabuya kadagiti video ken makabasa kadagiti artikulo a naikabil laeng iti jw.org. Kayatna kadi a sawen a saanda a maaw-awat ti amin a naespirituan a taraon a kasapulanda? Tapno maammuantayo ti sungbat, usigentayo dagiti sungbat ti uppat a napapateg a saludsod.

 1. Ania ti kangrunaan a ramen ti taraon nga ipapaay ni Jehova?

Idi sulsulisogen ni Satanas ni Jesus a pagbalinenna a tinapay dagiti bato, insungbat ni Jesus: “Ti tao agbiag, saan nga iti tinapay laeng, no di ket iti tunggal sao a rumrummuar iti ngiwat ni Jehova.” (Mat. 4:3, 4) Ti sasao ni Jehova ket nairekord iti Biblia. (2 Ped. 1:20, 21) Isu a ti Biblia ti kangrunaan a ramen ti naespirituan a taraontayo.—2 Tim. 3:16, 17.

Impatarus ti organisasion ni Jehova ti Baro a Lubong a Patarus ti Nasantuan a Kasuratan iti intero wenno iti sumagmamano a pasetna iti nasurok a 120 a lengguahe, ket adu pay a lengguahe ti mainaynayon iti kada tawen. Malaksid iti dayta a patarus, binilion a kopia ti dadduma pay a bersion ti Biblia ti maar-aramid iti rinibu a lengguahe, iti intero wenno iti sumagmamano a pasetna. Dayta a nakaskasdaaw a gapuanan ket maitunos iti pagayatan ni Jehova a “maisalakan koma dagiti amin a kita ti tattao ken dumtengda iti umiso a pannakaammo iti kinapudno.” (1 Tim. 2:3, 4) Ket gapu ta “awan ti parsua a saan a sibabatad iti imatang [ni Jehova],” masiguradotayo nga iyasidegna iti organisasionna “dagidiay sipapanunot iti naespirituan a kasapulanda” ken ipaayanna ida iti naespirituan a taraon.—Heb. 4:13; Mat. 5:3, 6; Juan 6:44; 10:14.

2. Ania ti akem dagiti publikasiontayo iti pannakaipaay ti naespirituan a taraon?

Tapno maaddaan ti maysa iti nabileg a pammati, saanna laeng a basaen ti Biblia. Masapul a tarusanna ti basbasaenna ken iyaplikarna ti masursurona. (Sant. 1:22-25) Kasta ti inaramid ti maysa nga Etiope a eunuko idi umuna a siglo. Basbasaenna idi ti Sao ti Dios idi dinamag kenkuana ti ebanghelisador a ni Felipe: “Ammom kadi nga agpayso no ania ti basbasaem?” Insungbat ti eunuko: “Kasano koma a maawatak, malaksid no adda nangidalan kaniak?” (Ara. 8:26-31) Iti kasta, tinulongan ni Felipe ti eunuko a mangtarus iti basbasaenna. Natignay ti eunuko iti nasursurona ket nagpabautisar. (Ara. 8:32-38) Umasping iti dayta, natulongannatayo dagiti publikasiontayo a mangtarus iti kinapudno a masarakan iti Sao ti Dios. Dimmanon dagita iti kaunggantayo ket natignaytayo a mangyaplikar iti maad-adaltayo.—Col. 1:9, 10.

Babaen kadagita a publikasion, maipapaayan dagiti adipen ni Jehova iti naruay a naespirituan a taraon. (Isa. 65:13) Kas pagarigan, ti Pagwanawanan, a magun-odanen iti nasurok a 210 a lengguahe, ilawlawagna dagiti padto ti Biblia, nayonanna ti pannakatarustayo kadagiti nauneg a naespirituan a kinapudno, ken gutugotennatayo a mangannurot kadagiti prinsipio ti Biblia. Ti magasin nga Agriingkayo!, a maipabpablaak iti agarup 100 a lengguahe, palawaenna ti pannakaammotayo maipapan iti parparsua ni Jehova ken ipakitana no kasanotay a mayaplikar ti praktikal a balakad ti Biblia. (Prov. 3:21-23; Roma 1:20) Mangipapaay ti matalek nga adipen iti naibatay-Biblia a material iti nasurok nga 680 a lengguahe! Iwaywayaam kadi a basaen ti Biblia iti inaldaw? Basbasaem kadi ti tunggal baro a magasin ken amin a baro a publikasion a maipatpatarus iti lengguahem iti tunggal tawen?

Malaksid kadagiti publikasion, mangipapaay met ti organisasion ni Jehova kadagiti naibatay-Biblia a balabala ti palawag a maiparparang kadagiti gimong, asamblea, ken kombensiontayo. Ap-apresiarem kadi dagiti palawag, drama, demostrasion, ken interbiu kadagita a panagtataripnong? Talaga nga ipapaayannatayo ni Jehova iti aglaplapusanan a naespirituan a taraon!—Isa. 25:6.

 3. No awan iti lengguahem ti amin a maar-aramid a publikasion, agkurkurang kadi ti naespirituan a taraonmo?

Saan. Ken ditay koma agdanag no ad-adu a naespirituan a taraon ti magun-odan ti dadduma nga adipen ni Jehova. Apay? Panunotem dagiti apostol. Ad-adu ti inawatda nga instruksion ngem iti dadduma pay nga adalan idi umuna a siglo. (Mar. 4:10; 9:35-37) Nupay kasta, saan a nagkurang ti naespirituan a taraon ti dadduma pay nga adalan.—Efe. 4:20-24; 1 Ped. 1:8.

Laglagipem met nga adu kadagiti sinao ken inaramid ni Jesus ditoy daga ti saan a nairekord kadagiti Ebanghelio. Insurat ni apostol Juan: “Iti kinapudnona, adu pay a sabsabali a banag ti inaramid ni Jesus, a, no naisuratda koma iti naan-anay a detalye, pagarupek, ti lubong a mismo saanna a kabaelan a laonen dagiti naisurat a lukot.” (Juan 21:25) Uray no ad-adu ti ammo dagiti immuna nga adalan maipapan ken Jesus ngem kadatayo, sinigurado ni Jehova a maipaayantayo iti umdas a pannakaammo maipapan ken Jesus tapno masurottayo dagiti addangna.—1 Ped. 2:21.

Panunotem met dagiti surat nga impatulod dagiti apostol kadagiti kongregasion idi umuna a siglo. Agparang nga adda maysa a surat ni Pablo a saan a nairaman iti Biblia. (Col. 4:16) Agkurkurang kadi ti naespirituan a taraontayo gapu ta awan kadatayo dayta a surat? Saan. Ammo ni Jehova ti kasapulantayo ken umdas ti ipapaayna tapno agtalinaedtayo a nabileg iti naespirituan.—Mat. 6:8.

Ammo ni Jehova ti kasapulantayo ken ipaayannatayo iti umdas a naespirituan a taraon tapno agtalinaedtayo a nabileg iti naespirituan

Ita, ad-adu a naespirituan a taraon ti magun-odan ti dadduma nga adipen ni Jehova ngem iti sabsabali. Manmano laeng kadi a publikasion ti magun-odan iti lengguahem? No kasta, laglagipem a maseknan kenka ni Jehova. Adalem ti material nga adda kenka, ket no posible, tabunuam dagiti gimong iti lengguahe a maawatam. Ket manamnamam a tulongannaka ni Jehova nga agtalinaed a nabileg iti naespirituan.—Sal. 1:2; Heb. 10:24, 25.

4. No saanmo a makitkita dagiti material a maikabkabil iti jw.org, kumapuyka kadin iti naespirituan?

Magun-odan iti Web site-tayo dagiti magasin ken ti dadduma pay a publikasion a katulongan iti panagadal iti Biblia. Adda met iti dayta a Web site dagiti material a makatulong kadagiti agassawa, tin-edyer, ken kadagidiay addaan iti ubbing pay nga annak. Magunggonaan dagiti pamilia no usigenda daytoy a material iti Panagdaydayaw ti Pamiliada. Masarakan met iti Web site-tayo dagiti report maipapan kadagiti espesial a programa, a kas ti panaggraduar iti Gilead ken ti tinawen a miting, ken maipadamag met sadiay ti kasasaad dagiti kakabsattayo a nadidigra ken naikaso iti korte. (1 Ped. 5:8, 9) Nakadakdakkel met ti maaramidan ti Web site-tayo iti pannakaikasaba ti naimbag a damag uray iti dagdaga a pakaiparparitan ti trabahotayo.

Nupay kasta, makapagtalinaedka latta a nabileg iti naespirituan, adda man wenno awan koneksionmo iti Web site-tayo. Ikagkagumaan ti matalek nga adipen nga ipaay ti umdas a nayimprenta a material tapno agtultuloy nga adda naespirituan a taraon ti amin a Kristiano. Dimo koma panunoten nga obligadoka a gumatang iti alikamen wenno gadyet tapno laeng makitam dagiti material iti jw.org. Mabalin nga adda kakabsat nga agboluntario a mangyimprenta iti sumagmamano a material nga agparang iti Web site-tayo sa itedda kadagidiay saan a maka-Internet, ngem saan nga obligado dagiti kongregasion a mangaramid iti dayta.

Agyamantayo ken Jesus ta tungtungpalenna ti karina nga ipaayna ti naespirituan a kasapulantayo. Bayat nga umas-asideg ti panagpatingga daytoy narigat a maudi nga al-aldaw, makapagtalektayo nga itultuloy ni Jehova ti mangipaay iti naespirituan a ‘taraon iti umiso a tiempo.’