Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan —Pagadalan nga Edision  |  Agosto 2014

 MANIPUD ITI ARCHIVES

“Eureka Drama”—Nakatulong iti Adu a Makasarak iti Kinapudno

“Eureka Drama”—Nakatulong iti Adu a Makasarak iti Kinapudno

“EUREKA!” Daytoy a sao, a kaipapananna “Nasarakakon!,” ti ipukkaw idi dagiti minero no makasarakda iti balitok. Adu a minero ti napan idiay California, U.S.A. idi maika-19 a siglo tapno agbirokda iti balitok. Ngem adda napatpateg a banag a nasarakan da Charles Taze Russell ken dagiti padana nga Estudiante ti Biblia—ti kinapudno iti Biblia. Magagaranda a mangiranud iti dayta iti sabsabali.

Idi agarup katengngaan ti 1914, minilion a tattao ti nagtataripnong kadagiti dadakkel a siudad tapno buyaenda ti “Photo-Drama of Creation,” ti walo nga oras a pabuya nga inaramid ti International Bible Students Association (I.B.S.A.). Naglaon dayta iti motion pictures, dekolor nga slides, nairekord a salaysay, ken nagsayaat a klasikal a musika. Iti daytoy a naibatay-Biblia a presentasion, naipabuya ti maipapan iti panamarsua kasta met ti rugi ti pakasaritaan ti tao agingga iti ngudo ti Sangaribu a Tawen a Turay ni Jesu-Kristo.—Apoc. 20:4. *

Ngem kasano met a magunggonaan dagiti agnanaed iti babassit nga ili ken away? Tapno mataraonan dagiti mabisbisin iti kinapudno, inruar ti I.B.S.A. idi Agosto 1914 ti “Eureka Drama”—ti napaababa a bersion ti “Photo-Drama” a naikkat ti motion pictures-na. Adda tallo a klase a mabalin a pagpilian, a tunggal maysa ket naipatarus iti sumagmamano a lengguahe. Ti umuna isu ti “Eureka X,” a naglaon iti amin a nairekord a salaysay ken musika. Ti maikadua ket ti “Eureka Y,” a naglaon iti amin a nairekord a salaysay ken musika ngem napakuyogan iti napipintas a dekolor nga slides. Ti maudi isu ti “Eureka Family Drama,” a nairanta a pangpamilia ken naglaon iti napili laeng a salaysay ken musika. Mabalin met a maiparang dagita babaen iti saan a nangina a ponograpo ken projector.

Maus-usar ti projector iti pannakaipabuya dagiti dekolor nga slides

Uray awan ti film projector wenno dakkel nga iskrin, naidanon latta dagiti Estudiante ti Biblia ti mensahe ti Pagarian kadagiti di pay naas-asak a teritoria iti away babaen iti daytoy a libre a presentasion. Mabalinda nga ipatokar ti “Eureka X” iti aldaw wenno rabii. Maipabuyada met ti “Eureka Y” uray awan ti koriente babaen ti dekarburo a lampara. Kastoy ti report ti Finnish a Watch Tower: “Maipabuyami dagitoy nga slides iti gistay amin a lugar.”

Imbes nga agabangda iti dadakkel a teatro, masansan a makabirok dagiti manangipamuspusan nga Estudiante ti Biblia kadagiti libre a pasilidad, a kas ti siled ti eskuelaan, korte, estasion ti tren, ken uray dagiti  salas ti dadakkel a balbalay. Nagpabuyada met iti ruar nga agusarda iti dakkel nga ules kas pannaka-iskrin a maibitin iti diding ti kamarin. Insurat ni Anthony Hambuch: “Nangaramid dagiti mannalon iti kasla bassit nga istadium iti paraanganda. Nangalada kadagiti troso a mabalin a pagtugawan dagiti agbuya iti programa.” Ti grupo ni Anthony Hambuch ket nagusar iti kareson a guyguyoden ti kabalio a nangilugananda kadagiti alikamen, bagahe, pagturogan, ken paglutuanda.

Ti sumagmamano laeng idi a mapan agbuybuya iti “Eureka” ket nagbalin a ginasgasut. Idiay Estados Unidos, 400 ti timmabuno idi naipabuya dayta iti maysa nga eskuelaan iti maysa nga ili a 150 ti populasionna. Adda dagiti nagnagna iti walo a kilometro (5 milia) tapno laeng mabuyada ti “Eureka Drama.” Idiay Sweden, natukay ti rikna dagiti kaarruba ni Charlotte Ahlberg a nagtataripnong iti bassit a balayna idi nangngegda ti rekording. Idiay Australia, agarup 1,500 ti napan iti maysa a pannakaipabuya ti “Drama” iti maysa a siudad a pagminasan. Inreport ti Watch Tower a kadagiti hayskul ken kolehio, “nagustuan dagiti propesor ken estudiante dagiti nabuyada a napipintas a ladawan ken dagiti nangngegda a rekording.” Nagdinamag met ti “Eureka Drama” uray kadagiti pagsinean.

PANANGSIBUG ITI BIN-I TI KINAPUDNO

Dagiti klase wenno kongregasion dagiti Estudiante ti Biblia nangibaonda kadagiti ispiker iti nadumaduma a lugar tapno mabuangay dagiti baro a klase babaen ti panangipaayda kadagiti palawag ken panangipabuyada iti “Eureka Drama.” Awan ti makaammo no mano ti nakabuya iti dayta. Kanayon idi a mausar ti adu a set ti “Drama.” Ngem idi 1915, 14 laeng kadagiti 86 a grupo a nangipabuya iti “Drama” ti regular a nagreport. Ngem iti report iti ngudo dayta a tawen, naibaga nga agdagup iti nasurok a maysa a milion ti nakabuya iti “Drama.” Agarup 30,000 nga indibidual ti nagkiddaw kadagiti literatura a naibatay iti Biblia.

Uray bassit laeng a pakalaglagipan ti naibati ti “Eureka Drama” iti pakasaritaan, minilion ti nakakita iti dayta a naisangsangayan a pabuya manipud Australia agingga iti Argentina, manipud South Africa agingga iti British Isles, India, ken iti Caribbean. Adu kadakuada ti nakasarak iti kinapudno iti Biblia, a napatpateg nga amang ngem iti balitok. Ket mabalin a naipukkawda met ti “Eureka!”

^ par. 4 Kitaen ti “Manipud iti Archives—Maika-100 a Tawen ti Makapabileg-Pammati a Pabuya” iti Pagwanawanan a Pebrero 15, 2014, panid 30-32.