Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan —Pagadalan nga Edision  |  Agosto 2014

‘Agsublika ket Pabilgem ti Kakabsatmo’

‘Agsublika ket Pabilgem ti Kakabsatmo’

NAGSANGIT a sipapait ni Pedro kalpasan nga inlibakna nga am-ammona ni Jesus. Nupay kasapulan nga agregget ni Pedro tapno maisubli ti natibker nga espiritualidadna, kayat latta ni Jesus nga aramaten a tumulong iti sabsabali. Sakbay dayta, imbaga kenkuana ni Jesus: “Apaman a nakasublikan, pabilgem ti kakabsatmo.” (Luc. 22:32, 54-62) Idi agangay, nagbalin ni Pedro a maysa kadagiti adigi ti kongregasion Kristiano idi umuna a siglo. (Gal. 2:9) Umasping iti dayta, ti maysa a dati nga agserserbi kas panglakayen mabalinna manen ti agserbi iti dayta nga annongen ken siraragsak a mangpabileg kadagiti kapammatianna.

Adda dagidiay agserserbi idi kas manangaywan a naikkat iti annongenda, ket mabalin a makariknada a napaayda. Kinuna ni Julio * a dati nga agserserbi kas panglakayen iti Bolivia iti nasurok a 20 a tawen: “Nagbalinen a paset ti biagko ti panagisagana iti palawag, panagsarungkar kadagiti kakabsat, ken panangipastor kadagiti miembro ti kongregasion! Ngem idi bigla a napukaw daytoy a pribilehiok, kasla nagbalin a kurang ti biagko. Anian a nagsaem!” Nupay kasta, agserserbi manen ita ni Julio kas panglakayen.

“IBILANGYO A RAG-O”

Insurat ni adalan a Santiago: “Ibilangyo a rag-o amin, kakabsatko, no maipasangokayo iti nadumaduma a pakasuotan.” (Sant. 1:2) Dagiti pakasuotan a tuktukoyen ditoy ni Santiago ket epekto ti pannakaidadanes ken ti kinaimperpektotayo. Dinakamatna pay ti managimbubukodan a tartarigagay, panangipakita iti paboritismo, ken dadduma pay. (Sant. 1:14; 2:1; 4:1, 2, 11) Mabalin a masaktan ti riknatayo no disiplinaennatayo ni Jehova. (Heb. 12:11) Ngem ditay koma ipalubos a maikkat ti rag-otayo gapu iti kakasta a pakasuotan.

Uray no naikkat ti pribilehiotayo iti kongregasion, adda pay laeng gundawaytayo a mangipakita a nabileg ti pammatitayo ken ti ayattayo ken Jehova. Mabalintay  met a lagipen no ania ti motibotayo idi nga agserserbi. Gapu kadi iti bukodtayo a pagimbagan, wenno gapu ta ay-ayatentayo ti Dios ken mamatitayo a kukuana ti kongregasion ken maikari dayta iti nadungngo a panangaywan? (Ara. 20:28-30) Dagiti dati a panglakayen a sirarag-o nga agtultuloy a mangipapaay iti sagrado a panagserbi pampaneknekanda iti amin, agraman ken Satanas, a pudpudno ti panagayatda ken Jehova.

Idi nadisiplina ni Ari David gapu kadagiti nadagsen a basolna, inawatna ti pannubngar ket napakawan. Inkanta ni David: “Naragsak daydiay a ti [salungasingna] mapakawan, a ti basolna maabbongan. Naragsak ti tao nga iti kuentaanna saan a mangikabil ni Jehova iti biddut, ket iti espirituna awan ti allilaw.” (Sal. 32:1, 2) Nagugoran ni David gapu iti disiplina ket dayta ti namagbalin kenkuana kas nasaysayaat a pastor ti ili ti Dios.

Masansan nga agbalin a nasaysayaat a papastor dagidiay nakapagsubli kas panglakayen. “Ad-adda itan a maawatak no kasano a tulongan dagidiay nakaaramid iti biddut,” kinuna ti maysa a nakasubli a panglakayen. Sabali pay a panglakayen ti nagkuna: “Ad-adda a tagipatgek itan ti pribilehiok nga agserbi kadagiti kakabsat.”

MAKAPAGSUBLIKA KADI?

“[Ni Jehova] saanto a kanayon nga agsapsapul iti biddut,” insurat ti salmista. (Sal. 103:9) Isu a ditay koma pampanunoten a saanton nga agtalek ti Dios iti maysa a nakaaramid idi iti nadagsen a basol. “Dismayadoak unay gapu iti naaramidak a kamali,” kuna ni Ricardo, a naikkat kas panglakayen kalpasan ti adu a tawtawen a panagserbina. “Nabayag a nariknak a saanak a kualipikado, ket nagkedkedak nga agserbi manen kadagiti kakabsat kas manangaywan. Agduaduaak no kabaelak manen nga ipakita a mapagtalkanak. Ngem gapu ta maragsakanak a tumulong iti sabsabali, nabaelak ti mangyadal iti Biblia, mangparegta kadagiti kakabsat iti Kingdom Hall, ken makikadua kadakuada iti ministerio. Dayta ti nakatulong kaniak a mangpasubli iti panagtalekko iti bagik, ket agserserbiak manen ita kas panglakayen.”

Tultulongan ni Jehova dagiti lallaki tapno maisubli ti rag-o ken tarigagayda nga agserbi manen

No adda sakit ti nakem nga ing-ingpen ti maysa a kabsat, mabalin a dayta ti manglapped kenkuana nga agserbi manen kas panglakayen. Nasayaat no  tuladentayo ni David, nga immadayo ken Ari Saul nga agim-imon idi kenkuana. Nagkedked ni David a mangbales ken Saul, uray no adda idi gundawayna a mangaramid iti dayta. (1 Sam. 24:4-7; 26:8-12) Idi natay ni Saul iti gubat, nagdung-aw ni David ket tinukoyna ni Saul ken ti anakna a ni Jonatan kas ‘maay-ayat ken makaay-ayo.’ (2 Sam. 1:21-23) Awan ti sakit ti nakem nga ing-ingpen ni David.

No iti panagriknam ket biktimaka iti di umiso a pannakatrato, dimo koma ipalubos a ti sakit ti nakemmo ti mangringbaw iti pampanunotmo. Kas pagarigan, nagsakit ti nakem ni William a taga-Britain iti dadduma a panglakayen idi naikkat iti annongenna kalpasan ti agarup 30 a tawen a panagserbina. Ania ti nakatulong kenkuana a maaddaan iti umiso a panangmatmat? “Naparegtaak iti panangbasak iti libro a Job,” kinunana. “No tinulongan ni Jehova ni Job a makikappia kadagiti tallo a gagayyemna, sigurado a tulongannak met a makikappia kadagiti Kristiano a panglakayen!”—Job 42:7-9.

BENDISIONAN TI DIOS DAGIDIAY AGSERSERBI MANEN KAS PAPASTOR

No sika a mismo ti naglusulos iti annongem a mangipastor iti arban ti Dios, nasayaat a panunotem ti makagapu nga inaramidmo dayta. Maburburiboranka kadi idi iti adu a problemam? Nagbalin kadi a napatpateg kenka ti dadduma a bambanag? Naupayka kadi gapu iti pagkapkapuyan ti sabsabali? Aniaman ti makagapu, laglagipem a dakkel ti maitultulongmo iti sabsabali idi agserserbika pay kas panglakayen. Napabileg dagiti kakabsat kadagiti palawagmo, naparegtada iti ulidanmo, ken gapu iti panangipastormo, natulongam ida a mangibtur kadagiti nakaipasanguanda a pakasuotan. Naparagsakmo idi ti puso ni Jehova gapu iti kinamatalekmo kas panglakayen, ket naragsakanka met iti dayta.—Prov. 27:11.

Paneknekam ti ayatmo ken Jehova babaen ti siraragsak a pannakiramanmo iti sagrado a panagserbi

Tultulongan ni Jehova dagiti lallaki tapno maisubli ti rag-o ken tarigagayda a mangidaulo iti kongregasion. No naglusuloska wenno naikkatka a panglakayen, mabalinmo manen ti ‘rumagpat iti akem a manangaywan.’ (1 Tim. 3:1) ‘Saan a namingga ni Pablo a nangikarkararag’ kadagiti Kristiano idiay Colosas a mapnoda koma iti umiso a pannakaammo maipapan iti pagayatan ti Dios tapno ‘makapagnada a maikari ken Jehova ken naan-anay a makaay-ayoda kenkuana.’ (Col. 1:9, 10) No agserserbika manen kas panglakayen, namnamaem nga ipaayannaka iti bileg, kinaanus, ken rag-o. Iti daytoy maudi nga al-aldaw, kasapulan ti ili ti Dios ti naespirituan a suporta dagiti naayat a papastor. Kabaelam kadi a pabilgen dagiti kakabsat ken sidadaanka a mangaramid iti dayta?

^ par. 3 Nabaliwan ti dadduma a nagan.