Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) HULIO 2014

“Dakayo Dagiti Saksik”

“Dakayo Dagiti Saksik”

“‘Dakayo dagiti saksik,’ kuna ni Jehova.”—ISA. 43:10.

1, 2. (a) Ania ti kayat a sawen ti panagbalin a maysa a saksi, ken ania ti saan nga impadamag ti news media? (b) Apay a saan nga agpannuray ni Jehova iti news media?

ANIA ti kayat a sawen ti panagbalin a maysa a saksi? Kuna ti maysa a diksionario: “Daydiay nakakita iti maysa a pasamak ken mangipadamag iti dayta.” Kas pagarigan, iti siudad ti Pietermaritzburg, South Africa, maysa a periodiko a maawagan itan iti The Witness ti maipabpablaaken iti nasurok a 160 a tawen. Mayanatup dayta a nagan iti panggep ti pagiwarnak a mangipadamag iti umiso a paspasamak iti intero a lubong. Ti editor a nangirugi iti daytoy a periodiko inkarina nga ipadamag “ti kinapudno, ti bin-ig a kinapudno, ken ti laeng kinapudno.”

2 Ngem makapaladingit ta kaaduanna a di ikabkabilangan wenno balballikugen pay ketdi ti news media ti kapatgan a kinapudno iti pakasaritaan ti tao. Saanna nga ipadpadamag ti maipapan iti Dios a mannakabalin-amin ken kadagiti inaramidna. Ngem saan a kasapulan ti Soberano nga Agturay iti uniberso ti news media. Kinuna ti Dios babaen ken propeta Ezequiel: ‘Maammuanto dagiti nasion a siak ni Jehova.’ (Ezeq. 39:7) Addaan ni Jehova iti agarup walo a milion a Saksi a mangiwarwaragawag iti amin a nasion ti maipapan kenkuana ken kadagiti inaramidna ken iti aramidennanto pay. Daytoy a buyot dagiti Saksi ipakpakaammoda met dagiti kari ti Dios a tungpalennanto iti masanguanan ken pakabendisionan ti sangatauan. No ipangpangrunatayo daytoy a trabaho, pampaneknekantayo a maikaritayo iti intedna a  nagantayo iti Isaias 43:10: “‘Dakayo dagiti saksik,’ kuna ni Jehova, ‘ti mismo nga adipenko a pinilik.’”

3, 4. (a) Kaano nga inawat dagiti Estudiante ti Biblia ti baro a naganda, ken ania ti nariknada? (Kitaen ti ladawan iti rugi ti artikulo.) (b) Ania a salsaludsod ti usigentayo?

3 Anian a pribilehio ti panangawit iti nagan ni Jehova, ta isu ti “Ari ti kinaagnanayon,” a nagkuna: “Daytoy ti naganko agingga iti tiempo a di nakedngan, ket daytoy ti pakalaglagipan kaniak iti kinapkaputotan”! (1 Tim. 1:17; Ex. 3:15; idilig ti Eclesiastes 2:16.) Idi 1931, inawat dagiti Estudiante ti Biblia ti nagan a Saksi ni Jehova. Adu ti nangisurat iti apresasionda iti daytoy a pagbasaan. Kuna ti maysa a kongregasion iti Canada: “Maragsakankami a maawagan iti ‘saksi ni Jehova,’ ken bimmileg ti determinasionmi a mangikagumaan nga agbalin a maikari iti daytoy a baro a nagan.”

4 Kasanom a maipakita nga ap-apresiarem ti pribilehiom a mangawit iti nagan iti Dios? Ken mailawlawagmo kadi ti Nainkasuratan a nakaibatayan ti nagantayo a Saksi ni Jehova?

DAGITI NAGKAUNA A SAKSI TI DIOS

5, 6. (a) Kasano nga impakita dagiti nagannak nga Israelita a saksi ida ni Jehova? (b) Ania pay ti naibilin kadagiti nagannak nga Israelita, ken apay a masapul met nga aramiden dayta dagiti nagannak ita?

5 Ti tunggal Israelita idi kaaldawan ni Isaias ket ‘saksi’ ni Jehova, ken ti intero a nasion ket ‘adipen’ ti Dios. (Isa. 43:10) Nagbalin a saksi dagiti nagannak nga Israelita babaen ti panangisuroda kadagiti annakda maipapan iti inaramid ti Dios kadagiti inapoda. Kas pagarigan, kinuna ni Jehova idi imbilinna kadagiti Israelita a rambakanda ti Paskua iti tunggal tawen: “Inton kunaen kadakayo ti annakyo, ‘Ania ti kaipapanan kadakayo daytoy a panagserbi [wenno, okasion]?’ iti kasta masapul a kunaenyo, ‘Dayta ti sakripisio ti paskua ken Jehova, a nanglabas kadagiti balay ti annak ti Israel idiay Egipto idi sinaplitna dagiti Egipcio, ngem inispalna dagiti balaymi.’” (Ex. 12: 26, 27) Mabalin met nga inlawlawag dagidiay a nagannak kadagiti annakda nga idi napan ni Moises iti agturay ti Egipto tapno kiddawenna a mapan agdaydayaw dagiti Israelita idiay let-ang, insungbat ni Faraon: “Siasino ni Jehova, tapno pagtulnogak ti timekna a palubosak ti Israel?” (Ex. 5:2) Mabalin pay nga inyestoriada a kalpasan ti sangapulo a saplit a nangdidigra iti Egipto ken kalpasan a naispal dagiti Israelita manipud iti buyot ni Faraon idiay Nalabaga a Baybay, nakita ti amin ti sungbat iti saludsod ni Faraon. Ni laeng Jehova ti Mannakabalin-amin. Nasaksian met dagiti Israelita a ni Jehova ti pudno a Dios ken Manangtungpal kadagiti karina.

6 Dagiti Israelita a nangapresiar iti pribilehioda a mangawit iti nagan ni Jehova insarsaritada la ketdi dagitoy a nakaskasdaaw a pasamak, saan laeng a kadagiti annakda no di pay ket kadagiti ganggannaet a nagbalin nga adipenda. Naibilin met kadagiti Israelita a sanayenda dagiti annakda nga agbalin a nasantuan wenno agbiag maitunos kadagiti pagalagadan ti Dios. Kinuna ni Jehova: “Rebbeng nga agbalinkayo a nasantuan, agsipud ta siak ni Jehova a Diosyo nasantuanak.” (Lev. 19:2; Deut. 6:6, 7) Nagsayaat a tuladen dayta dagiti Kristiano a nagannak ita. Masapul a sanayenda dagiti annakda nga agbiag a nasantuan tapno maidaydayawda ti nadayag a nagan ti Dios!—Basaen ti Proverbio 1:8; Efeso 6:4.

Maidaydayaw ti nagan ni Jehova no isurotayo kadagiti annaktayo ti maipapan kenkuana (Kitaen ti parapo 5, 6)

7. (a) No matalek dagiti Israelita ken Jehova, ania idi ti epekto dayta iti kabangibangda a nasnasion? (b) Ania ti responsabilidad ti amin a mangaw-awit iti nagan ti Dios?

7 No ngarud matalek dagiti Israelita, mangipapaayda iti nasayaat a panangsaksi iti nagan ti Dios. Naibaga kadakuada: “Makitanto ti amin nga il-ili ti daga a ti nagan ni Jehova nayawag kenka, ket pudno nga agbutengdanto kenka.” (Deut. 28:10) Ngem nakalkaldaang ta iti kaaduan a paset ti pakasaritaan dagiti Israelita, nagbalinda a nasukir ken Jehova. Namin-adu a nagsublida iti panagdaydayaw kadagiti idolo. Kas kadagiti Canaanita a didiosen a dinaydayawda, nagbalinda a naranggas, ket insakripisioda dagiti annakda ken inrurumenda dagiti napanglaw. Nagpateg a leksion daytoy kadatayo! Masapul nga ikagumaantayo ti agbalin a nasantuan, agsipud ta datayo ket pannakabagi ni Jehova, Daydiay Kasasantuan.

“ADTOY! MANGAR-ARAMIDAK ITI BANAG A BARO”

8. Ania ti imbaga ni Jehova nga aramiden ni Isaias, ken ania ti reaksionna?

8 Impadto ni Jehova a mangaramid iti nakaskasdaaw a panangisalakan a masaksianto ti nakautibo a nasion ti Israel. (Isa. 43:19) Ti umuna nga innem a kapitulo ti libro ti Isaias ket kaaduanna a naglaon kadagiti pakdaar maipapan iti pannakadadael a dumteng iti Jerusalem ken kadagiti siudad iti aglawlawna. Ni Jehova, a makabasa iti puso, ammona a saan idin nga agbabawi dagiti Israelita. Ngem imbilinna ken Isaias nga itultuloyna latta ida a pakdaaran uray no dida mangipangag. Nasdaaw ni Isaias iti dayta ket dinamagna no kasano pay kabayag ti di panagbabawi dagiti kailianna. Insungbat ti Dios: “Agingga a dagiti siudad pudno a marpuogda a marebrebba, a maawanan iti agnanaed, ket dagiti balay maawanan iti . . . tao, ket ti met laeng daga madadael nga agturong iti panaglangalang.”—Basaen ti Isaias 6:8-11.

9. (a) Kaano a natungpal ti padto ni Isaias maipapan iti Jerusalem? (b) Ania a pakdaar ti masapul nga ipangagtayo ita?

9 Naited ken Isaias daytoy nga annongen idi maudi a tawen ti panagturay ni Ari Ozias, wenno idi agarup 778 B.C.E. Intultuloyna ti nagipadto iti agarup 46 a tawen agingga iti kalpasan ti 732 B.C.E., idi tiempo a panagturay ni Ari Ezekias. Dayta ket 125 a tawen sakbay a nadadael ti Jerusalem idi 607 B.C.E. Isu a nasaksakbay ngarud a naipakaammo iti ili ti Dios no anianto ti mapasamak iti  nasionda. Ita, nabayag metten nga ar-aramaten ni Jehova ti ilina a mangipakaammo iti mapasamak iti masanguanan. Iti uneg ti 135 a tawenen, manipud iti umuna a ruar ti Pagwanawanan, maibagbagan kadagiti agbasbasa nga asidegen nga agpatingga ti dakes a turay ni Satanas ket masukatan dayta iti Sangaribu a Tawen a Turay ni Jesu-Kristo.—Apoc. 20:1-3, 6.

10, 11. Ania a kaitungpalan ti padto ni Isaias ti nasaksian dagiti Israelita idiay Babilonia?

10 Adu a natulnog a Judio a simmuko kadagiti Babilonio ti naispal idi nadadael ti Jerusalem ken naipanda kas kautibo idiay Babilonia. (Jer. 27:11, 12) Kalpasan ti 70 a tawen, nasaksian ti ili ti Dios ti kaitungpalan daytoy a nakaskasdaaw a padto: “Daytoy ti kinuna ni Jehova, ti Manangsakayo, Daydiay Santo ti Israel: ‘Maipagapu kadakayo agbaonakto idiay Babilonia ket ibabak ti balbalunet dagiti pagbaludan.’”—Isa. 43:14.

11 Kas kaitungpalan dayta a padto, adda makapakintayeg a napasamak iti maysa a rabii idi Oktubre 539 B.C.E. Bayat a ti ari ti Babilonia ken dagiti panguluenna umin-inumda iti arak kadagiti nasantuan a kopa nga innalada iti templo ti Jerusalem ken idaydayawda dagiti didiosenda, rinaut dagiti buyot ti Media ken Persia ti siudad ti Babilonia. Idi 538 wenno 537 B.C.E., ni Ciro, a nangparmek iti Babilonia, imbilinna kadagiti Judio nga agsublida ket bangonenda manen ti templo ti Dios idiay Jerusalem. Amin dagitoy ket impadto ni Isaias, pakairamanan ti kari ni Jehova a mangsalaknib ken mangipaay iti kasapulan ti agbabbabawi nga ilina inton makasublidan idiay Jerusalem. Inawagan ida ti Dios kas “ili a binukelko maipaay kaniak, tapno isaritada koma ti pakaidaydayawak.” (Isa. 43:21; 44:26-28) Idi nakasublin dagitoy a dati a kautibo ken naibangonda manen ti templo ni Jehova idiay Jerusalem, nasaksianda a ni Jehova ti pudno a Dios ken kanayon a tungpalenna dagiti karina.

12, 13. (a) Siasino ti nairaman kadagiti Israelita idi naisubli ti pudno a panagdayaw? (b) Ania ti manamnama kadagiti “sabsabali a karnero” bayat a supsuportaranda ti “Israel ti Dios,” ken ania ti namnamada?

12 Rinibu a saan nga Israelita ti nagbalin a paset dayta a baro a nasion, ken idi agangay, adu pay a Gentil ti nagbalin a Judio a proselita. (Esd. 2:58, 64, 65; Ester 8:17) Iti kaaldawantayo, “maysa a dakkel a bunggoy” ti “sabsabali a karnero” ni Jesus ti sisusungdo a mangsupsuporta kadagiti napulotan a Kristiano, a mangbukel iti “Israel ti Dios.” (Apoc. 7:9, 10; Juan 10:16; Gal. 6:16) Ti dakkel a bunggoy ket naawagan met kas Saksi ni Jehova.

13 Inton Sangaribu a Tawen a Turay ni Kristo, dinto mailadawan ti rag-o ti dakkel a bunggoy bayat nga ilawlawagda kadagiti mapagungar ti rikna ti panagbalin a Saksi ni  Jehova iti maudi nga al-aldaw daytoy a sistema ti bambanag. Ngem maaramidantayo laeng dayta no agbiagtayo a maitunos iti nagantayo ken ikagumaantayo ti agtalinaed a nasantuan. Kasta met, kasanoman ti kapasnektayo, masapul nga inaldaw a dumawattayo iti pammakawan iti aniaman a nagbiddutantayo, a bigbigentayo a managbasoltayo ken naisangsangayan unay ti pribilehiotayo a mangawit iti nasantuan a nagan ti Dios.—Basaen ti 1 Juan 1:8, 9.

NO ANIA TI KAIPAPANAN TI NAGAN TI DIOS

14. Ania ti kaipapanan ti nagan a Jehova?

14 Tapno ad-adda a maipategtayo ti pribilehiotayo a mangawit iti nagan ti Dios, nasayaat a mennamennaentayo ti kaipapanan ti naganna. Kaaduanna a naipatarus ti nagan ti Dios kas “Jehova,” a nagtaud iti Hebreo a berbo a mangiladawan iti panagtignay ken mabalin pay nga ipatarus kas “agbalin.” No kasta, agparang a ti kayat a sawen ti nagan a Jehova ket “Pagbalinenna.” Daytoy a depinasion ket maitutop unay ken Jehova ta isu ti Namarsua iti intero nga uniberso ken iti amin a nasaririt a parparsua, ken isu ti Manangtungpal iti panggepna. Awan asinoman a bumusbusor, uray ni Satanas, a makalapped iti panangitungpal ti Dios iti pagayatan ken panggepna.

15. Ania ti maadaltayo maipapan iti nagan ni Jehova sigun iti imbagana ken Moises? (Kitaen ti kahon a “ Nagan a Napnuan Kaipapanan.”)

15 Idi dinutokan ni Jehova ni Moises a mangidaulo iti ili ti Dios a rummuar iti Egipto, impalgakna ti maysa nga aspeto ti personalidadna. Nagusar iti berbo a sao a mangdeskribir iti naganna. Kuna ti Biblia: “Ti Dios kinunana ken Moises: ‘Agbalinakto No Anianto ti Pagbalinak.’ Ket innayonna: ‘Daytoy ti sawem iti annak ti Israel, “Ni Agbalinakto imbaonnak kadakayo.”’” (Ex. 3:14) No kasta, agbalin ni Jehova iti aniaman a kasapulan a pagbalinanna tapno matungpal ti panggepna. Para kadagiti Israelita a dati nga adipen, nagbalin ni Jehova kas Manangispal, Manangsalaknib, Manangiwanwan, ken Manangipaay iti amin a material ken naespirituan a kasapulanda.

IPAKITATAYO TI PANAGYAMANTAYO

16, 17. (a) Kasano a maipakitatayo nga agyamyamantayo iti pribilehio a mangawit iti nagan ti Dios? (b) Ania ti usigentayo iti sumaruno nga artikulo?

16 Itultuloy a pampaneknekan ita ni Jehova ti kaipapanan ti naganna babaen ti panangipaayna iti amin nga espiritual ken material a kasapulantayo. Nupay kasta, ti kaipapanan ti nagan ti Dios ket saan laeng a tumukoy iti aniaman a pilienna a pagbalinan. Ramanen dayta ti ar-aramidenna para iti trabaho dagiti Saksina tapno matungpal ti panggepna. Magutugottayo nga agbiag maitunos iti kaipapanan ti naganna no mennamennaentayo dayta. Kastoy ti kuna ti 84 ti tawenna a lakay nga agnagan Kåre a sireregta nga agserserbi kas Saksi ni Jehova iti Norway iti 70 a tawenen: “Dakkel a dayaw ti panagserbi ken Jehova, ti Ari ti kinaagnanayon, ken ti panagbalin a paset ti ilina a mangaw-awit iti nasantuan a naganna. Kanayon a dakkel a pribilehio nga ilawlawag ti kinapudno a linaon ti Biblia ken makita nga agbalin a naragsak dagiti tattao gapu ta natarusanda dayta. Kas pagarigan, maragragsakanak unay no isurok kadakuada ti maar-aramidan ti daton a sakripisio ni Kristo ken no kasano a babaen iti dayta, maaddaanda iti agnanayon a biag iti natalna ken nalinteg a baro a lubong.”

17 Agpayso nga iti dadduma a teritoria, manmanon a makasaraktayo kadagiti tattao a mayat a mangam-ammo iti Dios. Ngem kas ken Kåre, saan kadi a maragragsakanka met no makasarakka iti interesado ken maisurom kenkuana ti maipapan iti nagan ni Jehova? Ngem kasanotayo a makapagbalin a Saksi ni Jehova ken kasta met, saksi ni Jesus? Dayta a saludsod ti topiko ti sumaruno nga artikulotayo.