Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) HUNIO 2014

Tulongan ti Sabsabali a Mangragpat iti Naan-anay a Potensialda

Tulongan ti Sabsabali a Mangragpat iti Naan-anay a Potensialda

“Mangipaayakto iti balakad a ti matak situturong kenka.”—SAL. 32:8.

1, 2. Ania ti panangmatmat ni Jehova kadagiti adipenna ditoy daga?

NO PALPALIIWEN dagiti nagannak ti panagay-ayam dagiti annakda, mabalin a masdaawda kadagiti abilidad dagiti ubbing. Nalabit kasta met ti napaliiwmo. Mabalin a naalibtak wenno nalaing iti isports ti maysa nga ubing, idinto ta ti kabsatna ket nalaing iti board games wenno iti panagdrowing. Ngem aniaman ti paglaingan dagiti annakda, maragragsakan dagiti nagannak a makakita iti potensialda.

2 Maseknan met unay ni Jehova kadagiti annakna ditoy daga. Ibilbilangna dagiti adipenna ita kas “matarigagayan a banag dagiti amin a nasion.” (Hag. 2:7) Napategda kenkuana nangnangruna gapu iti pammati ken debosionda. Mabalin a mapaliiwyo nga adda nagduduma a paglaingan dagiti kapammatiantayo. Adda dagiti kakabsat a lallaki a nalaing a pumapalawag, idinto ta nalaing met nga agorganisar ti dadduma. Adu a kakabsat a babbai ti nalaka a makasursuro iti sabali a lengguahe ket us-usarenda dayta iti ministerio, ken adda met dagidiay nagsayaat nga ulidan iti panangparegta iti sabsabali wenno panangaywan kadagiti masakit. (Roma 16:1, 12) Ditay kadi agyaman ta adda dagiti kasta a kakabsat iti uneg ti kongregasion?

3. Aniada a saludsod ti usigentayo iti daytoy nga artikulo?

 3 Nupay kasta, saan pay nga ammo ti dadduma a kapammatiantayo—pakairamanan dagiti agtutubo wenno nabiit pay a nabautisaran a lallaki—no kasano a naan-anay a makatulongda iti kongregasion. Kasanotayo a matulongan ida a mangragpat iti naan-anay a potensialda? Apay nga ikagumaantayo a tuladen ti panangmatmat ni Jehova ken kitaentayo dagiti naimbag a kualidad dagiti kakabsattayo?

KITKITAEN NI JEHOVA TI NAIMBAG A KUALIDAD DAGITI ADIPENNA

4, 5. Kasano nga ipakita ti salaysay iti Uk-ukom 6:11-16 a kitkitaen ni Jehova ti potensial dagiti adipenna?

4 Ipakita ti sumagmamano a salaysay iti Biblia a saan laeng a ti naimbag a kababalin ti kitkitaen ni Jehova kadagiti adipenna no di pay ket dagiti potensialda. Kas pagarigan, idi napili ni Gideon a mangwayawaya iti ili ti Dios manipud panangirurumen dagiti Midianita, naklaat la ketdi idi inkablaaw ti anghel: “Ni Jehova adda kenka, sika a maingel, mannakabalin.” Nalawag a saan a nabigbig ni Gideon iti daydi a tiempo a maysa isuna a “maingel.” Imbagana a saanna a kabaelan nga isalakan ti ili ti Dios. Ngem kas ipakita ti panagsaritada, positibo ti panangmatmat ni Jehova ken Gideon.—Basaen ti Uk-ukom 6:11-16.

5 Agtalek ni Jehova a kabaelan ni Gideon nga isalakan ti Israel gapu kadagiti nakitana nga abilidadna. Kas pagarigan, nakita ti anghel ni Jehova nga agir-irik ni Gideon iti trigo iti amin a pigsana. Adda pay nadlaw ti anghel. Idi tiempo ti Biblia, gagangay nga agirik dagiti mannalon iti naangin a lugar tapno maitayab dagiti taep. Ngem naiduma ni Gideon ta sililimed a nagirik iti maysa a pagpespesan iti ubas tapno mailemmengna kadagiti Midianita ti bassit a naanina. Talaga a nalaing a mangipamuspusan! Di pakasdaawan a nakita ni Jehova a saan laeng a naannad a mannalon ni Gideon no di ket masirib pay. Wen, nakita ni Jehova ti potensial ni Gideon ket sinanayna.

6, 7. (a) Kasano a ti panangmatmat ni Jehova ken ni propeta Amos ket naiduma iti panangmatmat dagiti Israelita? (b) Ania ti mangipakita a saan nga ignorante ni Amos?

6 Umasping iti dayta, nakita ni Jehova ti potensial ni propeta Amos, nupay agparang a saan a maun-uni wenno gagangay laeng a tao. Dineskribir ni Amos ti bagina kas agtartaraken iti karnero ken agkedkeddel iti higos a sikomoro—maysa a kita ti higos a maibilang a taraon dagiti napanglaw. Idi dinutokan ni Jehova ni Amos a kondenarenna ti sangapulo-tribu a pagarian ti Israel nga agdaydayaw kadagiti idolo, impagarup ti dadduma nga Israelita a saan a maikari ni Amos iti dayta nga annongen.—Basaen ti Amos 7:14, 15.

7 Nasulinek a purok ti pagnanaedan ni Amos, ngem ti pannakaammona kadagiti kostumbre ken kadagiti agtuturay idi panawenna ipakitana a saan nga ignorante. Pagaammona dagiti mapaspasamak iti Israel, ken adu met ti ammona kadagiti kabangibang a nasion nalabit gapu kadagiti agdaldaliasat a komersiante. (Amos 1:6, 9, 11, 13; 2:8; 6:4-6) Ibaga ti dadduma nga eskolar a nalaing a mannurat ni Amos, a nagaramat iti simple ken napuersa a sasao. Ti natured a sungbatna iti korap a padi a ni Amazias paneknekanna nga umiso ti pili ni Jehova. Nakita ni Jehova nga addaan ni Amos iti abilidad a nalabit saan a nakita ti sabsabali idi damo.—Amos 7:12, 13, 16, 17.

8. (a) Ania ti impatalged ni Jehova ken David? (b) Apay a makapabileg ti Salmo 32:8 kadagidiay nakurang ti kompiansada iti bagida?

8 Wen, makita ni Jehova ti potensial dagiti adipenna. Impatalgedna ken Ari David a kanayon nga iwanwanna, nga arigna ‘situturong kenkuana ti matana.’ (Basaen ti Salmo 32:8.) Apay a makaparegta daytoy kadatayo? Uray no nakurang ti kompiansatayo iti bagitayo, matulongannatayo ni Jehova a  mangaramid iti banag a ditay ipagarup a kabaelantayo. No kasano nga isuro ken igiya ti maysa a nalaing a mannursuro ti awanan pay kapadasan nga estudiantena, isuro ken igiyanatayo met ni Jehova tapno maragpattay ti naan-anay a potensialtayo. Mabalin met nga usaren ni Jehova dagiti kapammatiantayo a tumulong kadatayo a mangragpat iti naan-anay a potensialtayo. Kasano?

KITAEN TI NAIMBAG A KUALIDAD TI SABSABALI

9. Kasanotayo a mayaplikar ti pammaregta ni Pablo a ‘kitaen’ ti paginteresan ti sabsabali?

9 Imparegta ni Pablo kadagiti amin a Kristiano a ‘kitaenda’ ti paginteresan dagiti kapammatianda. (Basaen ti Filipos 2:3, 4.) Kayatna a sawen, masapul a paliiwentayo ti paglaingan wenno abilidad ti sabsabali ken komendarantayo ida. Ania ti mariknatayo no adda mangkomendar iti naaramidantayo nga irarang-ay? Masansan a matignaytayo a rumang-ay pay ken mangaramid iti amin a kabaelantayo. Kasta met, no apresiarentayo ti panagregget dagiti kapammatiantayo, tultulongantayo ida a rumang-ay iti naespirituan.

10. Asino ti nangnangruna nga agkasapulan iti atensiontayo?

10 Asino ti nangnangruna nga agkasapulan iti atensiontayo? Siempre kasapulantayo amin ti atension no dadduma. Ngem ad-adda a kasapulan dayta dagiti agtutubo ken nabiit pay a nabautisaran a lallaki tapno mariknada a karamanda kadagiti aktibidad ti kongregasion. Daytoy ti tumulong kadakuada a makabigbig a napategda iti organisasion ti Dios. Ngem no saantayo a maipaayan ida iti atension, mabalin a maawan ti gagarda a gumun-od iti ad-adu pay a responsabilidad, a dayta ti iparparegta kadakuada ti Sao ti Dios.—1 Tim. 3:1.

11. (a) Kasano a tinulongan ti maysa a panglakayen ti maysa a managbabain nga agtutubo? (b) Ania ti maadalmo iti kapadasan ni Julien?

11 Kinuna ni Ludovic a maysa a panglakayen ken naipaayan iti kasta nga atension idi ubing pay: “Al-alisto a rumang-ay ti maysa a kabsat a lalaki no ipaayak iti naayat nga atension.” Kinuna ni Ludovic maipapan iti tinulonganna a managbabain nga agtutubo: “No dadduma, naregget a tumulong ni Julien ngem dina la ammo ti umiso a pamay-an. Ngem makitak a nakasingsingpet ken kayatna a talaga ti tumulong kadagiti kakabsat iti kongregasion. Isu nga imbes a kritikarek, kinitak ti nasayaat a kababalinna ken pinaregtak.” Idi agangay, nakualipikar ni Julien nga agbalin a ministerial nga adipen, ket maysa itan a regular pioneer.

TULONGAN IDA A MANGRAGPAT ITI NAAN-ANAY A POTENSIALDA

12. Ania ti masapul nga aramidentayo tapno matulongantayo ti maysa a mangragpat iti naan-anay a potensialna? Mangted iti pagarigan.

12 Nabatad a tapno matulongantay ti dadduma a mangragpat iti naan-anay a potensialda, nasken a kitaentayo dagiti abilidadda. Kas makitatayo iti kapadasan ni Julien, saantay koma nga ipokus ti atensiontayo iti pagkapkapuyan ti maysa a kabsat tapno makitatayo ti napipintas a kualidadna ken paglainganna a mabalinna a parang-ayen. Kasta ti panangmatmat ni Jesus ken ni apostol Pedro. Nupay nalaka nga agbaliwbaliw ni Pedro no dadduma, nakita ni Jesus nga agbalinto a nabileg ni Pedro a kas iti maysa a bato.—Juan 1:42.

13, 14. (a) Ania ti panangmatmat ni Bernabe ken agtutubo idi a Marcos? (b) Kasano a nagunggonaan ti maysa nga agtutubo a kabsat iti tulong nga impaay ti maysa a panglakayen? (Kitaen ti ladawan iti rugi ti artikulo.)

13 Kasta met laeng a pannakaseknan ti impakita ni Bernabe ken ni Juan, a napanaganan iti Marcos. (Ara. 12:25) Bayat ti umuna a panagmisionero ni Pablo a kaduana ni Bernabe, ni Marcos ti nadutokan a mangasikaso kadagiti kasapulanda. Ngem idi nakadanonda idiay Pamfilia, bigla a pinanawan ni Marcos dagiti kakaduana. Isu a da Pablo ken Bernabe laengen ti nagdaliasat iti napeggad  a lugar nga ayuyang dagiti tulisan. (Ara. 13:5, 13) Ngem ania ti inaramid ni Bernabe? Kinitana dagiti nasayaat a kualidad ni Marcos, saan a dagiti pagkapuyanna. Saanna nga imbilang ni Marcos kas di mapagtalkan isu a sinanayna. Idi agangay, nagbalin ni Marcos a nataengan a Kristiano. (Ara. 15:37-39) Sumagmamano a tawen kalpasanna, adda ni Marcos idiay Roma a tumultulong ken Pablo a madama idi a nakabalud. Ket idi nagsurat ni Pablo kadagiti Kristiano idiay Colosas, pinadayawanna ni Marcos. (Col. 4:10) Panunotem laengen ti ragsak ni Bernabe idi kiniddaw ni Pablo a tumulong kenkuana ni Marcos.—2 Tim. 4:11.

14 Kastoy ti kuna ti maysa a nabiit pay a panglakayen nga agnagan Alexandre maipapan iti tulong nga impaay kenkuana ti maysa a kabsat: “Idi agtutuboak pay, napalalo ti nerbiosko no mangidauloak iti kararag. Insuronak ti maysa a panglakayen a mangisagana iti bagik ken agbalin a kalmado. Imbes a dinakon awagan a mangikararag, masansan ketdi nga awagannak a mangidaulo iti kararag iti taripnong sakbay ti panangasaba. Idi agangay, addan kompiansak iti bagik.”

15. Kasano nga impakita ni Pablo nga ap-apresiarenna dagiti kapammatianna?

15 No adda nasayaat a kualidad a makitatayo iti maysa a Kristiano, komkomendarantayo kadi? Iti Roma kapitulo 16, kinomendaran ni Pablo ti nasurok a 20 a kapammatianna gapu kadagiti nagsasayaat a kualidadda. (Roma 16:3-7, 13) Kas pagarigan, kinomendaran ni Pablo da Andronico ken Junias gapu ta nabaybayagda ngem isuna nga agserserbi ken Kristo ken gapu iti panagibturda. Inapresiar met ni Pablo ti ina ni Rufo, nalabit gapu iti naayat a panangasikasona kenkuana.

Ni Frédéric (kannigid) pinaregtana ni Rico nga agbalin a determinado nga agserbi ken Jehova (Kitaen ti parapo 16)

16. Ania ti mabalin a resulta ti panangkomendar iti maysa nga agtutubo?

16 Mabalin a nasayaat ti resulta ti panangtedtayo iti naimpusuan a komendasion. Usigentayo ti kapadasan ni Rico, maysa nga ubing a taga-France. Naupay idi saan a kayat ti di manamati a tatangna nga agpabautisar isuna. Impagarup ni Rico a santo la makapagserbi ken Jehova inton agtawen iti 18. Saan met a naragsak ta pagkakatawaan isuna dagiti kaeskuelaanna gapu iti pammatina. Kinuna ni Frédéric a maysa a panglakayen a nangyad-adal ken Rico: “Kinomendarak ni Rico ken imbagak a mabusbusor gapu ta natured a mangyebkas iti pammatina.” Dagita a sasao ti nangpabileg iti determinasion ni Rico nga agtultuloy a rumang-ay, ken simmayaat ti relasionna ken tatangna. Nabautisaran ni Rico idi agtawen iti 12.

Ni Jérôme (kannawan) tinulonganna ni Ryan a makualipikar kas misionero (Kitaen ti parapo 17)

17. (a) Kasanotayo a matulongan a rumang-ay dagiti kakabsattayo a lallaki? (b) Kasano a tinulongan ti maysa a misionero ti maysa nga agtutubo a lalaki? Ania ti resultana?

17 Tunggal apresiarentayo dagiti kakabsat gapu iti nagsayaat a panangitungpalda iti annongenda, parparegtaentayo ida a naan-anay nga agserbi ken Jehova. Sigun ken Sylvie * nga adun a tawen nga agserserbi iti Bethel iti France, makaipaay met dagiti  kakabsat a babbai iti komendasion kadagiti kakabsat a lallaki. Kinunana nga adda ngamin dadduma a detalye a makita dagiti babbai. Isu a ti “makaparegta a sasaoda ket mangnayon iti komendasion nga ipapaay dagiti aduanen iti kapadasan a kakabsat a lallaki.” Innayonna: “Para kaniak, ti panangipaay iti komendasion ket maysa a pagrebbengan.” (Prov. 3:27) Ni Jérôme, a maysa a misionero iti French Guiana, ket nakatulong iti adu nga agtutubo nga agbalin a misionero. Kinunana: “Madlawko a no komendarak dagiti agtutubo a lallaki iti espesipiko a naaramidanda iti ministerio wenno iti nagsayaat a komentoda, dumakkel ti kompiansada iti bagida. Kas resultana, ad-adda a maparang-ayda dagiti abilidadda.”

18. Ania ti pagsayaatan ti pannakipagtrabaho kadagiti agtutubo a lallaki?

18 Mabalintayo met a matignay dagiti kapammatiantayo a rumang-ay iti naespirituan babaen ti panangsanay wenno pannakipagtrabaho kadakuada. Mabalin a kiddawen ti maysa a panglakayen iti maysa nga agtutubo a lalaki a nalaing iti kompiuter nga agi-print iti sumagmamano nga impormasion manipud iti jw.org a makaparegta kadagiti nataenganen a kakabsat nga awanan iti kompiuter. Wenno no adda aramidem wenno tarimaanem iti Kingdom Hall, apay a dika mangayab iti agtutubo a lalaki a tumulong kenka? No kasta ti aramidem, maobserbaram dagiti agtutubo, makaipaayka iti komendasion, ken makitam dagiti resulta.—Prov. 15:23.

PANAGPLANO PARA ITI MASANGUANAN

19, 20. Apay a rumbeng a tulongantayo a rumang-ay dagiti kakabsat a lallaki?

19 Idi dinutokan ni Jehova ni Josue a mangidaulo kadagiti Israelita, imbilinna met ken Moises a ‘paregtaen ken papigsaenna’ ni Josue. (Basaen ti Deuteronomio 3:28.) Umad-adu ti agbalbalin a managdaydayaw ken Jehova. Amin a nataengan a Kristiano—saan laeng a dagiti panglakayen—ket makatulong kadagiti agtutubo wenno nabiit pay a nabautisaran a lallaki a mangragpat iti naan-anay a potensialda. Iti kasta, ad-adu pay ti sumrek iti amin-tiempo a ministerio ken agbalin a “kualipikado a mangisuro iti sabsabali.”—2 Tim. 2:2.

20 Kamengtay man iti dakkel a kongregasion wenno iti bassit a grupo, makatulongtayo para iti masanguanan a panagkasapulan ti organisasion. Tapno maaramidantayo daytoy, nasken a tuladentayo ni Jehova ket kitaentayo dagiti nasayaat a kualidad dagiti kapammatiantayo.

^ par. 17 Nabaliwan ti nagan.