Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) HUNIO 2014

Malagipyo Kadi?

Malagipyo Kadi?

Binasayo kadi a naimbag dagiti nabiit pay a ruar Ti Pagwanawanan? Bueno, kitaentayo no masungbatantayo dagiti sumaganad a saludsod:

Ania a paset ti aldaw ti Nisan 14 a maparti ti kordero ti Paskua?

Sigun iti dadduma a bersion ti Biblia, maparti ti kordero iti “nagbaetan ti dua a rabii,” kayatna a sawen, kalpasan ti ilelennek ti init ngem saan pay simmipnget. (Ex. 12:6)—12/15, panid 18-19.

Ania dagiti prinsipio ti Biblia a mabalin nga usaren dagiti agtutubo tapno makaaramidda iti nainsiriban a desision?

(1) Panangsapul nga umuna iti Pagarian ti Dios ken iti kinalintegna. (Mat. 6:19-34) (2) Panagserbi iti sabsabali nga agresulta iti kinaragsak. (Ara. 20:35) (3) Panagserbi iti Dios bayat ti kinaagtutubo. (Ecl. 12:1)—1/15, panid 19-20.

Ania nga uppat a kumakabalio ti agpatpataray sipud idi 1914?

Ni Jesus, kas nakasakay iti puraw a kabalio, pinaksiatna ni Satanas ken dagiti demoniona idiay langit. Ti nakasakay iti maris-apuy a kabalio ipamatmatna dagiti gubat a mangdiddidigra iti sangatauan. Ti nakasakay iti nangisit a kabalio irepresentarna ti bisin. Ti nakasakay iti nabessag a kabalio ket mangyeg iti makapapatay a sakit, a pakatkatayan ti minilion a tattao. (Apoc. 6:2-8)—2/1, panid 6-7.

Kaanonto ti “panagkasar ti Kordero”? (Apoc. 19:7)

Maangay ti “panagkasar ti Kordero” kalpasan a ti Ari, ni Jesu-Kristo, maan-anayna ti panagballigina, kayatna a sawen, kalpasan ti pannakadadael ti Babilonia a Dakkel ken ti gubat ti Armagedon.—2/15, panid 10.

Apay a ‘ninamnama’ dagiti Judio idi kaaldawan ni Jesus nga agparang ti Mesias? (Luc. 3:15)

Awan ti pammaneknektayo a naawatan dagiti Judio idi umuna a siglo ti padto ni Daniel maipapan iti Mesias a kas iti agdama a pannakaawattayo. (Dan. 9:24-27) Ngem nalabit nadamagda ti impakaammo ti maysa nga anghel iti sumagmamano a pastor wenno ti kinuna ni propeta Anna maipapan ken maladaga a Jesus iti templo. Adda met idi dagiti astrologo a mangbirbirok iti “nayanak nga ari dagiti Judio.” (Mat. 2:1, 2) Idi agangay, impasimudaag ni Juan a Manangbautisar nga asidegen nga agparang ti Kristo.—2/15, panid 26-27.

Ania ti aramidentayo tapno ti imbagatayo a Wen ket saan nga agbalin a Saan? (2 Cor. 1:18)

Bigbigentayo a ditay matungpal no dadduma ti sao wenno karitayo gapu ta saantayo a kontrolado ti kasasaad. Ngem no agkari wenno makitulagtayo, ikagumaantay koma a tungpalen dayta.—3/15, panid 32.

Kasanotayo a malabanan ti sulisog nga agbuya iti pornograpia?

(1) Baliwantayo a dagus ti kitaentayo no adda mataldiapantayo a makaparasuk a ladawan. (2) Saluadantayo ti panunottayo babaen ti panangipamaysatayo kadagiti positibo a bambanag ken panagkararag iti Dios. (3) Liklikantayo dagiti pelikula ken site iti Internet a naglaon iti pornograpia.—4/1, panid 10-12.

Ania dagiti di ninamnama a resulta ti panangpanaw ti maysa a Kristiano iti pamiliana tapno agtrabaho iti abrod?

No ikeddeng dagiti nagannak a panawan ti pamiliada, mabalin a maapektaran ti emosion ken kababalin dagiti annak. Mabalin nga agsakit ti nakemda kadagiti nagannakda. Ken mabalin a maipasango iti sulisog dagiti aginnaddayo nga agassawa.—4/15, panid 19-20.

Apay a tukkolenda idi ti saka dagiti kriminal a maibitin iti kayo?

Adda dagiti kriminal a pinapatay dagiti Romano iti kayo. Kiniddaw dagiti Judio a matukkol ti saka dagiti kriminal iti sibay ni Jesus. Dayta ti mangparigat iti panaganges dagiti kriminal ken mangpapartak iti ipapatayda. Iti kasta, saanen a kasapulan nga agpatnag a nakabitinda iti kayo. (Deut. 21:22, 23)—5/1, panid 11.

Ania nga uppat a saludsod ti laglagipentayo no makisarsaritatayo kadagiti tattao iti ministerio?

Siasino ti kasarsaritak? Sadino ti pakisarsaritaak kadakuada? Kaano a kasaritak ida? Kasano ti pannakisaritak kadakuada?—5/15, panid 12-15.

Kasano kaadu ti matmatay gapu iti panagsigarilio?

Bayat ti napalabas a siglo, 100,000,000 a tattao ti natay gapu iti panagsigarilio. Iti agdama, agarup 6,000,000 ti matmatay iti kada tawen.—6/1, panid 3.