Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) HUNIO 2014

Salsaludsod Dagiti Agbasbasa

Salsaludsod Dagiti Agbasbasa

Mabalin kadi ti cremation kadagiti Kristiano?

Awan nadakamat iti Kasuratan a maiparit ti cremation wenno panangpuor iti bangkay.

Adda dagiti salaysay ti Biblia maipapan iti panangpuor kadagiti bangkay ken tultulang ti natayen a tattao. (Jos. 7:25; 2 Cron. 34:4, 5) Mabalin nga ipasimudaag daytoy a saanda a maikari iti nadayaw a pannakaitabon. Ngem saan a kanayon a kasta ti kaipapanan ti pannakapuor dagiti bangkay.

Makitatayo dayta iti salaysay maipapan iti ipapatay ni Ari Saul ken dagiti tallo nga annakna idi nakigubatda kadagiti Filisteo. Ti maysa kadagiti natay ket ni Jonatan, ti nasinged a gayyem ken nasungdo a sumupsuporta ken David. Idi nadamag dagiti mamaingel nga Israelita a taga-Jabes-galaad ti napasamak, napanda innala dagiti bangkay, pinuoranda, sada inkali ti tultulang dagita. Pinadayawan ni David dagidiay nga Israelita gapu iti inaramidda.—1 Sam. 31:2, 8-13; 2 Sam. 2:4-6.

Ti namnama dagiti natay sigun iti Biblia ket isu ti panagungar—ti panangisubli ti Dios iti biag dagiti natay. Ma-cremate man wenno saan ti maysa a bangkay, kabaelan ni Jehova a pagbiagen ken ikkan iti baro a bagi dayta a tao. Dagiti tallo a matalek a Hebreo saanda a nagbuteng a matay idi imbilin ni Ari Nabucodonosor a maipuruakda iti gumilgil-ayab nga urno. Agtalekda ngamin a kabaelan a pagungaren ida ni Jehova. (Dan. 3:16-18) Kasta met laeng ti pammati dagiti matalek nga adipen ni Jehova a napapatay ken napuoran ti bangkayda kadagiti kampo konsentrasion dagiti Nazi. Adda met dagiti matalek nga adipen ti Dios a saanen a masarakan ti bangkayda, nalabit gapu iti panagbettak ti bomba wenno iti dadduma pay a rason. Ngem kaskasdi a siguradonto nga agungarda.—Apoc. 20:13.

Saan a kasapulan nga isubli ni Jehova ti paspaset ti bagi ti natay tapno mapagungarna, kas makita iti panangpagungarna idiay langit kadagiti napulotan a Kristiano. Kas ken Jesus a “napagbiag iti espiritu,” mapagungar dagitoy napulotan a Kristiano nga adda met laeng kadakuada ti dati a personalidadda ngem kas maysan nga espiritu. Awan aniaman a paset ti pisikal a bagida ti maitugotda idiay langit.—1 Ped. 3:18; 1 Cor. 15:42-53; 1 Juan 3:2.

Ti namnamatayo a panagungar ket naibatay iti pammatitayo a kabaelan ken tarigagayan ti Dios a tungpalen dagiti karina, saan ket a no ania ti mapasamak iti bangkay. (Ara. 24:15) Agpayso a saantay a naan-anay a maawatan no kasano a pinagungar ti Dios ti sumagmamano a tattao idi ugma ken no kasano nga aramidenna dayta iti masanguanan. Ngem agtalektayo ken Jehova. Ti “pammatalged” nga impaayna ket ti panagungar ni Jesus.—Ara. 17:31; Luc. 24:2, 3.

Nasayaat no ikonsiderar dagiti Kristiano ita no ania ti lokal a kostumbre, makuna dagiti kalugaranda, ken dagiti legal a pagannurotan iti pannakaitabon dagiti bangkay. (2 Cor. 6:3, 4) Kalpasanna, personal a desision wenno ikeddeng ti pamilia no ma-cremate wenno saan ti bangkay.