Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) HUNIO 2014

“Masapul nga Ayatem ti Padam a Tao a kas iti Bagim”

“Masapul nga Ayatem ti Padam a Tao a kas iti Bagim”

“Ti maikadua [a bilin] isu daytoy, ‘Masapul nga ayatem ti padam a tao a kas iti bagim.’”—MAT. 22:39.

1, 2. (a) Ania ti imbaga ni Jesus a maikadua a kadakkelan a bilin iti Linteg? (b) Ania dagiti saludsod nga usigentayo?

KAS panangsubok, insaludsod ti maysa a Fariseo ken Jesus: “Mannursuro, ania ti kadakkelan a bilin iti Linteg?” Kas nadakamat iti napalabas nga artikulo, kinuna ni Jesus a “ti kadakkelan ken umuna a bilin” ket: “Masapul nga ayatem ni Jehova a Diosmo buyogen ti intero a pusom ken buyogen ti intero a kararuam ken buyogen ti intero a panunotmo.” Innayon ni Jesus: “Ti maikadua, nga umasping iti dayta, isu daytoy, ‘Masapul nga ayatem ti padam a tao a kas iti bagim.’”—Mat. 22:34-39.

2 Imbaga ni Jesus a masapul nga ayatentayo ti padatayo a tao a kas iti bagitayo. Gapuna, nasayaat nga isaludsodtayo: Ania ti kayat a sawen ti panangayat iti padatayo a tao? Kasano a maipakitatayo dayta?

TI KAYAT A SAWEN TI PANANGAYAT ITI PADATAYO A TAO

3, 4. (a) Ania nga ilustrasion ti inusar ni Jesus idi naisaludsod kenkuana: “Asino a pudpudno ti padak a tao”? (b) Kasano a tinulongan ti Samaritano ti maysa a lalaki a natakawan, nakabkabil, ken agngangabiten a matay? (Kitaen ti ladawan iti rugi ti artikulo.)

3 Usigentayo ti kinuna ni Jesus idi insaludsod ti maysa a  managinlilinteg: “Asino a pudpudno ti padak a tao?” Kas sungbat, dinakamat ni Jesus ti ilustrasion maipapan iti naimbag a Samaritano. (Basaen ti Lucas 10:29-37.) Nalabit ekspektarentayo a maasian ti maysa a padi ken maysa a Levita no makakitada iti maysa a lalaki a natakawan, nakabkabil, ken agngangabiten a matay. Nupay kasta, liniklikan ken linabsanda lattan ti lalaki. Ngem tinulongan isuna ti maysa a Samaritano—maysa nga indibidual a mangraraem iti Mosaiko a Linteg ken lalaisen dagiti Judio.—Juan 4:9.

4 Ti naimbag a Samaritano binukbokanna iti lana ken arak dagiti sugat ti lalaki tapno umimbag. Impanna iti maysa a pagdagusan ken nangted iti dua a denario, a katupag ti dua nga aldaw a sueldo, iti agay-aywan iti pagdagusan. (Mat. 20:2) Nabatad nga addaan dayta a Samaritano iti pudpudno nga ayat iti padana a tao. Ipakita ngarud ti ilustrasion ni Jesus a rumbeng a kaasian ken ayatentayo ti padatayo a tao.

Dagus nga agtignay dagiti adipen ni Jehova tapno ipakitada ti ayat iti padada a tao (Kitaen ti parapo 5)

5. Kasano nga impakita dagiti Saksi ni Jehova ti ayatda iti padada a tao iti kallabes a kalamidad?

5 Manmano itan ti naasi a tattao a kas iti naimbag a Samaritano. Nangnangruna a kasta kadagitoy ‘maudi nga al-aldaw’ ta adu dagiti tattao nga awanan iti nainkasigudan nga ayat, naranggas, ken awanan panagayat iti kinaimbag. (2 Tim. 3:1-3) Kas pagarigan, usigentayo ti napasamak idi Oktubre 2012 idi dinidigra ti Hurricane Sandy ti New York City. Iti maysa a napalaluan a lugar, dagiti mananggundaway tinakawanda dagiti residente nga agsagsagaba gapu iti kaawan ti koriente, pagpapudot, ken dadduma pay a kasapulan. Ngem dagiti Saksi ni Jehova iti dayta a lugar nangaramidda iti urnos a tumulong kadagiti kakabsat ken iti sabsabali. Ar-aramiden dayta dagiti Kristiano ta ay-ayatenda ti padada a tao. Ania ti dadduma pay a pamay-an a maipakitatayo ti ayattayo iti padatay a tao?

NO KASANO A MAIPAKITATAYO TI AYAT ITI PADATAYO A TAO

6. Ania a tulong manipud iti Biblia ti maipaaytayo iti padatayo a tao?

6 Tulongan dagiti tattao iti naespirituan. Ar-aramidentayo daytoy babaen ti panangipaaytayo kadakuada iti “liwliwa manipud iti Kasuratan.” (Roma 15:4) Ipakpakitatayo a maseknantayo iti padatayo a tao no iranranudtayo ti kinapudno iti Biblia. (Mat. 24:14) Anian a nagsayaat a pribilehio ti panangiwaragawag iti mensahe ti Pagarian manipud iti ‘Dios a mangipapaay iti namnama’!—Roma 15:13.

7. Ania ti Nabalitokan a Bilin? Kasanotayo a mabendisionan no surotentayo dayta?

7 Suroten ti Nabalitokan a Bilin. Inyebkas daytoy ni Jesus idi kinunana iti Sermonna iti Bantay: “Amin a bambanag . . . a kayatyo nga aramiden kadakayo dagiti tattao, masapul a kasta met ti aramidenyo kadakuada; iti kinapudnona, daytoy ti kaipapanan ti Linteg ken dagiti Mammadto.” (Mat. 7:12) No tratuentayo ti sabsabali maitunos iti imbalakad ni Jesus, tungtungpalentayo ti “Linteg” (Genesis agingga’t Deuteronomio) ken “dagiti Mammadto” (dagiti libro iti Hebreo a Kasuratan nga insurat dagiti mammadto). Nalawag manipud kadagita a surat a bendisionan ti Dios dagidiay mangipakpakita iti ayat iti sabsabali. Kas pagarigan, kinuna ni Jehova babaen ken Isaias: “Salimetmetanyo ti kinahustisia, ket agaramidkayo iti nalinteg . . . Naragsak ti . . . tao a mangaramid iti daytoy.” (Isa. 56:1, 2) Talaga a mabendisionantayo no tratuentayo ti sabsabali buyogen ti ayat ken kinalinteg.

8. Apay a rumbeng nga ayatentayo dagiti kabusortayo? Ania ti nalabit resultana no aramidentayo dayta?

8 Ayatem dagiti kabusormo. “Nangngegyo a naikuna, ‘Masapul nga ayatem ti padam a tao ket guraem ti kabusormo,’” kinuna ni Jesus. “Nupay kasta, kunak kadakayo: Itultuloyyo nga ayaten dagiti kabusoryo ken  ikararagan dagidiay mangidaddadanes kadakayo; tapno mapaneknekanyo ti bagbagiyo nga annak ni Amayo nga adda iti langlangit.” (Mat. 5:43-45) Kasta met ti punto ni apostol Pablo idi insuratna: “No ti kabusormo mabisin, pakanem; no mawaw, ikkam iti mainum.” (Roma 12:20; Prov. 25:21) Sigun iti Mosaiko a Linteg, masapul a tulongan ti maysa a tao ti kabusorna a nakusbo ti animalna gapu iti nadagsen nga awitna. (Ex. 23:5) Posible nga agbalin nga aggayem dagiti sigud nga agkabusor no agtinnulongda. Gapu ta ipakpakitatayo ti ayat kas Kristiano, limmukneng ti puso ti adu kadagiti kabusortayo. No ayatentayo dagiti kabusortayo—uray siuulpit nga idaddadanesdatayo—nalabit agbalinto nga ad-adipen ni Jehova ti dadduma kadakuada!

9. Ania ti imbaga ni Jesus maipapan iti pannakikappia iti kabsattayo?

9 Makikappia iti amin a tattao. (Heb. 12:14) Siempre, karaman ditoy dagiti kakabsattayo, ta kinuna ni Jesus: “No . . . ip-ipanmo ti sagutmo iti altar ket sadiay malagipmo a ti kabsatmo addaan iti maysa a banag a maibusor kenka, panawam ti sagutmo sadiay sanguanan ti altar, ket mapanka; umuna a makikappiaka ken kabsatmo, ket kalpasanna, inton nakasublikan, idatonmo ti sagutmo.” (Mat. 5:23, 24) Bendisionannatayo ti Dios no ayatentayo ti kabsattayo ken dagus a makikappiatayo kenkuana.

10. Apay a saantay koma a manangbabalaw?

10 Saantay koma a manangbabalaw. “Isardengyo ti mangukom tapno saankayo a maukom,” kinuna ni Jesus, “ta iti panangukom a panguk-ukomyo, maukomkayto; ket ti rukod a pangrukrukodyo, pangrukoddanto kadakayo. Apay, ngarud, a matmatam ti garami iti mata ni kabsatmo, ngem saanmo nga imutektekan ti pasanggir iti bukodmo a mata? Wenno kasano a maikunam ken kabsatmo, ‘Palubosannak a mangikkat iti garami iti matam’; idinto ta, adtoy! maysa a pasanggir ti adda iti bukodmo a mata? Managinsisingpet! Umuna nga ikkatem ti pasanggir iti bukodmo a mata, ket kalpasanna makitamto a silalawag no kasano nga ikkaten ti garami iti mata ni kabsatmo.” (Mat. 7:1-5) Anian a nagsayaat a pammalagip a ditay koma kritikaren dagiti babassit a biddut ti sabsabali ta amangan no daddadakkel pay dagiti bidduttayo!

 NAISANGSANGAYAN A PANANGIPAKITA ITI AYAT

11, 12. Kasano a maipakitatayo ti ayat iti padatayo a tao iti naisangsangayan a pamay-an?

11 Kayattayo nga ipakita ti ayat iti padatayo a tao iti naisangsangayan a pamay-an. Kas ken Jesus, ikaskasabatayo ti naimbag a damag ti Pagarian. (Luc. 8:1) Imbilin ni Jesus kadagiti pasurotna a ‘mangaramidda iti ad-adalan kadagiti tattao iti amin a nasion.’ (Mat. 28:19, 20) No itungtungpaltayo dayta nga annongen, tultulongantayo ti padatayo a tao a pumanaw iti nalawa ken akaba a dalan nga agturong iti pannakadadael ket magna iti nailet a dalan nga agturong iti biag. (Mat. 7:13, 14) Masiguradotayo a bendisionan ni Jehova ti kasta a panagregget.

12 Kas ken Jesus, tultulongantayo dagiti tattao nga agbalin a sipapanunot iti naespirituan a kasapulanda. (Mat. 5:3) Babaen ti panangiranudtayo iti “naimbag a damag ti Dios,” tultulongantayo dagidiay mayat a mangpennek iti naespirituan a kasapulanda. (Roma 1:1) No awatenda ti mensahe ti Pagarian, maikappiada iti Dios babaen ken Jesu-Kristo. (2 Cor. 5:18, 19) Isu a babaen ti panangikasabatayo iti naimbag a damag, maipakitatayo ti ayattayo iti padatayo a tao iti nakapatpateg a pamay-an.

13. Ania ti riknam iti pannakiramanmo iti trabaho a panangiwaragawag iti Pagarian?

13 Babaen ti epektibo a panagsarungkar ken panangyadal iti Biblia, masursuruantayo dagiti tattao a mangsurot kadagiti nalinteg a pagalagadan ti Dios. Gapu iti daytoy, mabalin a matignay ti iyad-adalantayo a mangaramid iti nasken a panagbalbaliw iti biagna. (1 Cor. 6:9-11) Anian a makaparagsak a makita a tultulongan ti Dios dagidiay “siuumiso nga agannayas iti agnanayon a biag” a mangaramid iti kasapulan a panagbalbaliw tapno agbalinda a nasinged kenkuana. (Ara. 13:48) Adu a dati a maup-upay ken madandanagan unay ti nagbalinen a naragsak ken agtaltaleken iti nailangitan nga Amatayo. Makaparagsak a makita ti naespirituan nga irarang-ay dagiti kabbaro! Saan kadi a maysa a bendision ti panangipakita iti ayat iti padatayo a tao iti naisangsangayan a pamay-an kas manangiwaragawag iti Pagarian?

NAIPALTIING A PANNAKAILADAWAN TI AYAT

14. Mangdakamat iti sumagmamano nga aspeto ti ayat a nailanad iti 1 Corinto 13:4-8.

14 No iyaplikartayo ti insurat ni Pablo maipapan iti panangipakita iti ayat iti padatayo a tao, maliklikantayo ti adu a problema, agbalintayo a naragsak, ken bendisionannatayo ti Dios. (Basaen ti 1 Corinto 13:4-8.) Repasuentayo biit ti imbaga ni Pablo ken kitaentayo no kasanotayo a maipakita dayta iti pannakilangentayo iti sabsabali.

15. (a) Apay a naanus ken naasitayo koma? (b) Apay a rumbeng a liklikantayo ti agimon ken agpangas?

15 “Ti ayat mabayag-panagituredna ken manangngaasi.” No kasano a naanus ken naasi ti Dios kadagiti imperpekto a tattao, naanus ken naasitayo met koma kadakuada no nagbiddutda wenno nakapagsao ken nakaaramidda iti di nasayaat kadatayo. “Ti ayat saan a managimon,” isu a ti pudno nga ayat lapdannatayo nga umapal iti sanikua ti sabsabali wenno iti pribilehioda iti kongregasion. Kasta met, no adda ayattayo, saantay nga agpangas wenno agpannakkel. Kunaen ti Biblia a kagura ni Jehova “dagiti natangsit a mata ken ti napangas a puso, [a] pagsilawan dagidiay nadangkes, ket basol.”—Prov. 21:4.

16, 17. Kasanotayo a mayaplikar ti 1 Corinto 13:5, 6?

16 Gapu iti ayat, nasayaat ti pannakilangentayo iti padatayo a tao. Saantay a pagulbodan ken saantay a takawan wenno pagaramidan ida iti aniaman a banag a di maitunos iti linlinteg ken pagalagadan ni Jehova. Gapu iti ayat, sipapanunottayo iti pagimbagan ti sabsabali imbes a ti laeng pagimbagantayo.—Fil. 2:4.

 17 Ti pudpudno nga ayat ket saan nga alisto nga agpungtot ken ‘saan nga aging-ingpen’ iti sakit ti nakem. Ditay koma ilislista ti nagbasolan kadatayo ti sabsabali. (1 Tes. 5:15) No ing-ingpentayo ti sakit ti nakemtayo, saan a maay-ayo ni Jehova kadatayo, ket kaslatayo mangpaypaypay iti beggang a mabalin a bigla a sumged, a pakadangrantayo ken ti sabsabali. (Lev. 19:18) Gapu iti ayat, pagrag-oantayo ti kinapudno, ket ditay ‘agrag-o iti kinakillo,’ uray no ti tao a manggurgura kadatayo ket mairurumen wenno agsagaba.—Basaen ti Proverbio 24:17, 18.

18. Ania ti maadaltayo maipapan iti ayat iti 1 Corinto 13:7, 8?

18 Usigentayo ti kanayonan a panangdepinar ni Pablo iti ayat. Kinunana a ti ayat “anusanna ti amin a bambanag.” No adda nakasair kadatayo a dumawdawat iti pammakawan, matignaytayo a mangpakawan gapu iti ayat. Ti ayat “patienna ti amin a bambanag” iti Sao ti Dios ken tignayennatayo nga agyaman iti naespirituan a taraon a maipapaay kadatayo. Ti ayat “inanamaenna ti amin a bambanag” a nailanad iti Biblia ken tignayennatayo a mangiranud iti namnamatayo. (1 Ped. 3:15) No adda parikuttayo, agkararagtayo ket mangnamnamatayo a sumayaatto ti kasasaad. Ti ayat “ibturanna ti amin a bambanag,” dagitoy man ket nagbasolan ti sabsabali, pannakaidadanes, wenno dadduma pay a pakasuotan. Kangrunaan ti amin, “ti ayat saan a pulos aggibus.” Agnanayonto nga iparangarang dayta dagiti natulnog a tattao.

ITULTULOYMO NGA AYATEN TI PADAM A TAO A KAS ITI BAGIM

19, 20. Ania a Nainkasuratan a balakad ti mangtignay koma kadatayo a mangipakita iti ayat iti padatayo a tao?

19 No iyaplikartayo ti balakad ti Biblia, maitultuloytayo a maipakita ti ayat iti padatayo a tao. Masapul nga ayatentayo ti amin a tao, aniaman ti pulida. Masapul met a laglagipentayo ti kinuna ni Jesus: “Masapul nga ayatem ti padam a tao a kas iti bagim.” (Mat. 22:39) Namnamaen kadatayo ti Dios ken ni Kristo nga ayatentayo ti padatayo a tao. No marigatantayo a mangipakita iti ayat, ikararagtayo iti Dios a tulongannatayo ti nasantuan nga espirituna. Iti kasta, bendisionannatayo ni Jehova ken tulongannatayo a mangipakita iti ayat.—Roma 8:26, 27.

20 Ti bilin nga ayatentayo ti padatayo a tao a kas iti bagitayo ket naawagan iti “naarian a linteg.” (Sant. 2:8) Kinuna ni Pablo kalpasan a nadakamatna ti dadduma a bilin iti Mosaiko a Linteg: “Aniaman a sabali pay a bilin ti adda, magupgop iti daytoy a sao, nga isu ti, ‘Masapul nga ayatem ti padam a tao a kas iti bagim.’ Ti ayat di agaramid iti dakes iti padana a tao; gapuna ti ayat isu ti kaitungpalan ti linteg.” (Roma 13:8-10) Masapul ngarud nga itultuloytayo nga ipakita ti ayat iti padatayo a tao.

21, 22. Apay a masapul nga ayatentayo ti Dios ken ti padatayo a tao?

21 Bayat a mennamennaentayo no apay a masapul nga ipakitatayo ti ayat iti padatayo a tao, nasayaat a panunotentayo ti kinuna ni Jesus a “pagleggaken [ni Amana] ti initna kadagiti nadangkes a tattao ken kadagiti naimbag ket pagtuduenna kadagiti nalinteg a tattao ken kadagiti nakillo.” (Mat. 5:43-45) Masapul nga ipakitatayo ti ayat iti padatayo a tao, nalinteg man dayta wenno nakillo. Kas nadakamaten, ti maysa a napateg a pamay-an a maipakitatayo ti ayat ket ti panangiranud iti mensahe ti Pagarian. Nakaad-adu a bendision ti agur-uray kadatayo ken iti sabsabali no awatenda ti naimbag a damag!

22 Adu ti panggapuantayo a naan-anay a mangayat ken Jehova. Adu met ti pamay-an a maipakitatayo ti ayat iti padatayo a tao. Babaen ti panangipakitatayo iti ayattayo iti Dios ken iti padatayo a tao, tungtungpalentayo ti kinuna ni Jesus a dua a kapatgan a bilin. Kangrunaanna, maay-ayotayo ti naayat a nailangitan nga Amatayo, ni Jehova.