Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) MAYO 2014

‘Ti Taraonko Isu ti Panangaramidko iti Pagayatan ti Dios’

‘Ti Taraonko Isu ti Panangaramidko iti Pagayatan ti Dios’

Ania ti pakaragsakam unay? Ti kadi relasionmo iti sabsabali, kas iti asawam, pamiliam, wenno iti gagayyemmo? Nalabit maragsakanka a mangan a kaduam dagiti ipatpategmo. Ngem kas agserserbi ken Jehova, saan kadi a ti kangrunaan a pakaragsakam ket ti panagaramid iti pagayatan ti Dios, panagadal iti Saona, ken panangikasaba iti naimbag a damag?

Iti maysa a kanta a pangidaydayaw iti Namarsua, inyebkas ni Ari David iti nagkauna nga Israel: “Ti panangaramid iti pagayatam, O Diosko, nagragsakak, ket ti lintegmo adda kadagiti makin-uneg a pasetko.” (Sal. 40:8) Uray adu a rigat ken suot ti napasaran ni David, naragsakan unay a mangaramid iti pagayatan ti Dios. Siempre, saan laeng a ni David ti agdaydayaw ken Jehova a naragsakan nga agserbi iti pudno a Dios.

Inyaplikar ni apostol Pablo ti sasao ti Salmo 40:8 iti Mesias, wenno Kristo. Insuratna: “Iti iyaay [ni Jesus] iti lubong kunana: ‘“Sakripisio ken daton saanmo a kinayat, ngem nangisaganaka iti bagi a maipaay kaniak. Saanmo nga inanamongan dagiti sibubukel a daton a mapuoran ken daton gapu iti basol.” Idin kinunak, “Adtoy! Umayak (iti lukot ti libro naisurat ti maipapan kaniak) tapno aramidek ti pagayatam, O Dios.”’”—Heb. 10:5-7.

Idi adda ditoy daga ni Jesus, naragsakan a nangpalpaliiw kadagiti parsua ti Dios, makikadua kadagiti gagayyemna, ken makipangan iti sabsabali. (Mat. 6:26-29; Juan 2:1, 2; 12:1, 2) Ngem ti kangrunaan a pakaseknan ken pakaragsakanna ket ti panangaramid iti pagayatan ti nailangitan nga Amana isu a kinunana: “Ti taraonko isu ti panangaramidko iti pagayatan daydiay nangibaon kaniak ken panangturposko iti trabahona.” (Juan 4:34; 6:38) Naammuan kenkuana dagiti adalanna ti sekreto ti pudpudno a kinaragsak. Gapu iti kasta unay a ragsakda, sidadaan ken sigagagarda a nangiranud iti mensahe ti Pagarian iti sabsabali.—Luc. 10:1, 8, 9, 17.

‘INKAYO KET MANGARAMIDKAYO ITI AD-ADALAN’

Imbilin ni Jesus kadagiti pasurotna: “Inkayo . . . ket mangaramidkayo iti ad-adalan kadagiti tattao iti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu, nga isuroyo kadakuada a tungpalenda ti amin a bambanag nga imbilinko kadakayo. Ket, adtoy! addaak kadakayo iti amin nga al-aldaw agingga iti panungpalan ti sistema ti bambanag.” (Mat. 28:19, 20) Ti panangitungpal  iti daytoy nga annongen ramanenna ti panangasaba kadagiti tattao iti sadinoman nga ayanda, panangsarungkar kadagiti nangipakita iti interes, ken panangyadal kadakuada iti Biblia. Mangibunga daytoy nga annongen iti dakkel a rag-o.

Tignayennatayo ti ayat nga agtultuloy a mangasaba uray adu ti di mangikankano

Interesado man wenno saan dagiti tattao iti mensahetayo, ti ragsaktayo iti ministerio ket nakadepende iti panangmatmattayo. Apay nga itultuloytayo nga ideklara ti naimbag a damag uray adda dagiti tattao a saan nga interesado wenno di mangikankano? Gapu ta bigbigentayo a ti panangikasaba iti Pagarian ken panagaramid iti adalan ket ebkas ti ayattayo iti Dios ken iti padatayo a tao. Wen, agpegpeggad ti biag—ti biagtayo ken ti biag ti sabsabali. (Ezeq. 3:17-21; 1 Tim. 4:16) Usigentayo ti sumagmamano a punto a nakatulong iti adu a katrabahuantayo a mangtaginayon wenno mangpabaro iti regtada uray kadagiti narigat a teritoria.

GUNDAWAYAM TI AMIN NGA OPORTUNIDAD

Masansan a nagsayaat ti resulta ti panagusar kadagiti epektibo a saludsod. Maysa nga agsapa, adda nakita ni Amalia a lalaki nga agbasbasa iti diario iti parke. Inasitganna ken dinamagna no adda aniaman a naimbag a damag a nabasana. Idi insungbat ti lalaki nga awan, kinuna ni Amalia, “Adda naimbag a damag a kayatko nga ibaga maipapan iti Pagarian ti Dios.” Naginteres ti lalaki ket nagpayadal iti Biblia. Nakairugi ni Amalia iti tallo a panangyadal iti Biblia iti dayta a parke.

Mangaskasaba ni Janice iti lugar a pagtrabtrabahuanna. Idi naginteres ti maysa a guardia ken ti sabali pay a katrabahuanna iti maysa nga artikulo iti Pagwanawanan, imbaga ni Janice nga ikkannanto manen ida kadagiti sumarsaruno nga isyu ti magasin. Kasta met ti inaramidna iti sabali pay a katrabahuanna, a maay-ayatan kadagiti nadumaduma a topiko iti Pagwanawanan ken Agriingkayo! Gapu iti daytoy, nagkiddaw met iti magasin ti sabali pay a katrabahuanna. “Bendision dayta manipud ken Jehova!” kuna ni Janice. Idi agangay, addan 11 a regular nga ik-ikkanna iti magasin iti pagtrabtrabahuanna.

AGBALINKA A POSITIBO

Inrekomenda ti maysa a manangaywan iti sirkito a tunggal agpakadatayo iti bumalay a kaskasabaantayo, saantay laeng koma a basta ibaga nga agsublitayto iti sabali nga aldaw. Imbes ketdi, mabalintay nga isaludsod: “Kayatmo kadi nga ipakitak kenka no kasano ti panagadal iti Biblia?” wenno, “Ania nga aldaw ken oras ti kayatmo a panagsublik tapno ituloyta ti agsarita?” Inreport ti manangaywan iti sirkito a babaen iti kastoy a pamay-an, dagiti kakabsat iti maysa a kongregasion a bisbisitaenna ket nakairugida iti 44 a panangyadal iti Biblia iti uneg laeng ti makalawas.

Epektibo unay ti madagdagus a panagsubli kadagiti nakasaritatayo, uray sumagmamano pay laeng nga aldaw ti napalabas. Apay? Gapu ta ipakpakitatayo a talaga nga interesadotayo a tumulong kadagiti napasnek nga indibidual a mayat a mangtarus iti Biblia. Kastoy ti kinuna ti maysa a babai idi napagsaludsodan no apay a nakipagadal iti Biblia kadagiti Saksi ni Jehova: “Nakipagadalak gapu ta impakitada ti naimpusuan a pannakaseknan ken ayat kaniak.”

Mabalinmo nga isaludsod iti bumalay, “Kayatmo kadi nga ipakitak no kasano ti panagadal iti Biblia?”

 Di nagbayag kalpasan ti panageskuela ni Madaí iti Pioneer Service School, naaddaan iti 15 nga iyad-adalan iti Biblia ken nakaipasa pay iti 5 iti dadduma nga agibumbunannag. Regularen a makigimgimong ti sumagmamano nga iyad-adalanna. Ania ti nakatulong ken Madaí a makairugi iti adu a panagadal iti Biblia? Nasursurona iti panageskuelana a masapul a saanna nga inggaan ti agsarungkar agingga a madanonna daydiay nangipakita iti interes. Maysa met a Saksi nga adun ti natulonganna a mangammo iti kinapudno ti nagkuna, “Naadalko a masapul a naanustayo nga agsarungkar tapno matulongantayo dagiti tattao a mayat a mangam-ammo ken Jehova.”

Ti madagdagus nga isasarungkartayo ipakitana a pudpudno nga interesadotayo kadagidiay mayat a mangtarus iti Biblia

Masapul a napingettayo tapno makapagsarungkar ken makapangyadaltayo iti Biblia. Ngem saan a sayang ti panagreggettayo. No naregtatayo a mangikasaba iti Pagarian, matulongantayo ti sabsabali a maaddaan iti “umiso a pannakaammo iti kinapudno,” ket kaipapanan dayta ti pannakaisalakanda. (1 Tim. 2:3, 4) Mangibunga met dayta kadatayo iti awan kapadana a pannakapnek ken rag-o.