Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) MAYO 2014

Makidangdanggayka Kadi iti Umab-abante nga Organisasion ni Jehova?

Makidangdanggayka Kadi iti Umab-abante nga Organisasion ni Jehova?

“Dagiti mata ni Jehova addada kadagidiay nalinteg.”—1 PED. 3:12.

1. Ania nga organisasion ti nangsukat iti apostata nga Israel kas ili a pinili ni Jehova? (Kitaen ti ladawan iti rugi ti artikulo.)

NI Jehova ti maikari a mapadayawan iti pannakabuangay ti kongregasion Kristiano idi umuna a siglo ken iti pannakaisubli ti pudno a panagdayaw iti kaaldawantayo. Iti napalabas, ti nasion ti Israel ti ili a pinili ti Dios. Ngem nagapostatada isu a nangbukel ti Dios iti maysa a baro a nasion a buklen dagiti nagkauna a pasurot ni Kristo. Nagbalin dayta kas maysa nga organisasion a mangirepresentar ken Jehova. Dayta a baro nga organisasion nga an-anamongan ti Dios ket naispal idi nadadael ti Jerusalem idi 70 C.E. (Luc. 21:20, 21) Kastanto met laeng ti mapasamak kadagiti adipen ni Jehova iti kaaldawantayo. Dandanin agpatingga ti sistema ni Satanas, ngem malasatanto ti organisasion ti Dios ti maudi nga al-aldaw. (2 Tim. 3:1) Kasano a masiguradotayo daytoy?

2. Ania ti kinuna ni Jesus maipapan iti “dakkel a rigat”? Kaano a mangrugi dayta?

2 Kinuna ni Jesus maipapan iti di makita a kaaddana ken ti panungpalan ti sistema ti bambanag: “Addanto dakkel a rigat a dayta ket saan pay a napasamak nanipud idi pangrugian ti lubong  agingga ita, saan, saanto met a mapasamak manen.” (Mat. 24:3, 21) Daytoy nga awan kapadana a rigat ket mangrugi inton dadaelen ni Jehova ti “Babilonia a Dakkel,” ti sangalubongan nga imperio ti palso a relihion, babaen kadagiti napolitikaan nga agtuturay. (Apoc. 17:3-5, 16) Anianto ti sumaruno a mapasamak?

TI IRARAUT NI SATANAS AGTURONG ITI ARMAGEDON

3. Kalpasan a madadael ti palso a relihion, anianto ti mapasamak iti ili ni Jehova?

3 Kalpasan a madadael ti palso a relihion, ni Satanas ken ti dadduma pay a paset ti lubongna rautendanto dagiti adipen ni Jehova. Kas pagarigan, maipapan iti “Gog iti daga ti Magog” impakpakauna ti Kasuratan: “Umaykanto a kas iti bagyo. Agbalinkanto a kas ul-ulep a mangabbong iti daga, sika ken dagiti amin a bunggoymo ken ti adu nga ili a maikuyog kenka.” Awan ti armado a buyot dagiti Saksi ni Jehova ken isuda ti katalnaan a tattao ditoy daga. Gapuna, agparangto a kasla awan gawgawayda. Ngem nagdakkelto a kamali dayta a panangraut!—Ezeq. 38:1, 2, 9-12.

4, 5. Anianto ti aramiden ni Jehova iti panagregget ni Satanas a mangdadael kadagiti adipenna?

4 Anianto ti aramiden ni Jehova iti panagregget ni Satanas a mangdadael iti ilina? Bumallaetto ni Jehova ket ipakitana nga isu ti Soberano iti Uniberso. Ibilang ni Jehova ti pannakaraut dagiti adipenna kas mismo a panangatakar kenkuana. (Basaen ti Zacarias 2:8.) Gapuna, madagdagusto nga agtignay ti nailangitan nga Amatayo tapno ispalennatayo. Kalpasanna, madadaelen ti lubong ni Satanas iti Armagedon, ti “gubat ti naindaklan nga aldaw ti Dios a Mannakabalin-amin.”—Apoc. 16:14, 16.

5 Kuna ti padto ti Biblia maipapan iti Armagedon: “‘Ni Jehova addaan iti pannakisubang kadagiti nasion. Isu isaadnanto ti bagina iti panangukom iti isuamin a lasag. No maipapan kadagidiay nadangkes, iyawatnanto ida iti kampilan,’ kuna ni Jehova. Daytoy ti kinuna ni Jehova ti buybuyot, ‘Adtoy! Ti maysa a didigra rummuar manipud iti nasion agingga iti nasion, ket ti met laeng nadawel a bagyo maibangonto manipud kadagiti kaadaywan a paset ti daga. Ket dagidiay pinapatay ni Jehova pudno unay a maaddanto iti dayta nga aldaw manipud iti maysa nga ungto ti daga agingga iti sabali nga ungto ti daga. Saandanto a madung-awan, saandanto met a maurnong wenno maitabon. Agbalindanto a kas ganagan iti rabaw ti daga.’” (Jer. 25:31-33) Pagpatinggaento ti Armagedon daytoy a dakes a sistema ti bambanag. Awanton ti lubong ni Satanas, ngem maispalto ti naindagaan a paset ti organisasion ni Jehova.

NO APAY A RUMANGRANG-AY ITA TI ORGANISASION NI JEHOVA

6, 7. (a) Paggapuan dagiti mangbukel iti “dakkel a bunggoy”? (b) Aniada a panagrang-ay ti napasamak iti kallabes a tawtawen?

6 Agtultuloy a rumangrang-ay ti organisasion ti Dios ditoy daga gapu ta buklen dayta dagiti nalinteg a tattao nga an-anamonganna. Ipasigurado kadatayo ti Biblia: “Dagiti mata ni Jehova addada kadagidiay nalinteg, ket dagiti lapayagna situturong iti ararawda.” (1 Ped. 3:12) Karaman kadagita a nalinteg ket ti “dakkel a bunggoy” a “naggapu iti dakkel a rigat.” (Apoc. 7:9, 14) Dagitoy a makalasat ket saan laeng a basta maysa a “bunggoy” no di ket maysa a “dakkel a bunggoy” ti tattao. Makitkitam kadi ti bagim a kaduamto ida a makalasat iti “dakkel a rigat”?

7 Daytoy a dakkel a bunggoy ket buklen dagiti tattao a naggapu iti amin a nasion. Nagkaykaysada gapu iti trabaho a panangasaba nga impadto ni Jesus kas paset ti pagilasinan ti kaaddana. Kinunana: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion;  ket iti kasta umayton ti panungpalan.” (Mat. 24:14) Di ngarud pakasdaawan a dayta ti kangrunaan a trabaho ti organisasion ti Dios. Gapu iti sangalubongan a panangasaba ken panangisuro dagiti Saksi ni Jehova, minilion a tattao ti nakasursuro nga agdayaw iti Dios “buyogen ti espiritu ken kinapudno.” (Juan 4:23, 24) Kas pagarigan, iti napalabas a 10 a tawen—bayat ti 2003 agingga’t 2012 a tawen serbisio—nasurok a 2,707,000 ti nagbautisar kas simbolo ti dedikasionda iti Dios. Iti intero a lubong, adda itan nasurok a 7,900,000 a Saksi, agraman ti minilion a makitimtimpuyog kadakuada, nangnangruna iti tinawen a pannakaangay ti Memorial. Saantayo a pagpannakkel ti kaadutayo ta ‘ti Dios ti mangpadpadakkel iti dayta.’ (1 Cor. 3:5-7) Nupay kasta, nabatad nga umad-adu ti bilang ti dakkel a bunggoy iti kada tawen.

8. Ania ti makagapu iti naisangsangayan nga irarang-ay ti organisasion ni Jehova iti kaaldawantayo?

8 Naisangsangayan ti iyaadu ti bilang dagiti adipen ti Dios gapu ta ni Jehova a mismo ti tumultulong kadagiti Saksina. (Basaen ti Isaias 43:10-12.) Daytoy a panagrang-ay ket naipadto kadagitoy a sasao: “Daydiay met laeng bassit agbalinto a sangaribu, ket daydiay nagbassitan maysa a mannakabalin a nasion. Siak, ni Jehova, papardasekto dayta iti bukodna a tiempo.” (Isa. 60:22) “Bassit” laeng idi ti bilang dagiti napulotan a natda, ngem immaduda bayat a maitiptipon ti dadduma pay a naespirituan nga Israelita iti organisasion ti Dios. (Gal. 6:16) Iti pamendision ni Jehova, nagtultuloy dayta nga iyaadu gapu iti pannakaummong ti dakkel a bunggoy.

TI KALIKAGUMAN TI DIOS KADATAYO

9. Ania ti masapul nga aramidentayo tapno masagraptayo ti naraniag a masakbayan nga ikarkari ti Sao ti Dios?

9 Maysatayo man a napulotan a Kristiano wenno kameng ti dakkel a bunggoy, namnamaentayo ti naraniag a masakbayan nga inkari ti Sao ti Dios. Ngem tapno magunggonaantayo iti daytoy a kari, masapul nga annurotentayo dagiti kalikaguman ni Jehova. (Isa. 48:17, 18) Usigentayo ti kasasaad dagiti Israelita iti sidong ti Mosaiko a Linteg. Nagserbi ti Linteg kas salaknib kadakuada gapu kadagiti pagannurotanna mainaig iti panagdenna, panagnegosio, panangaywan iti annak, panangtrato iti pada a tao ken dadduma pay. (Ex. 20:14; Lev. 19:18, 35-37; Deut. 6:6-9) Kasta met laeng ita. Pagimbagantayo ti panangannurottayo kadagiti kalikaguman ti Dios. Saan a narigat a tungpalen dagita. (Basaen ti 1 Juan 5:3.) Kinapudnona, no kasano a nagserbi idi ti Linteg kas salaknib kadagiti Israelita, ti panagtulnogtayo kadagiti linteg ken prinsipio ni Jehova a Dios ti agserbi met salaknibtayo ken pagtalinaedennatayo pay a ‘nasalun-at iti pammati.’—Tito 1:13.

10. Apay a rumbeng a mangiwayatayo iti tiempo para iti panagadal iti Biblia ken iti linawas a Panagdaydayaw ti Pamilia?

10 Ti naindagaan a paset ti organisasion ni Jehova ket umab-abante iti adu a pamay-an. Kas pagarigan, lumawlawag a lumawlawag ti pannakatarustayo iti kinapudno iti Biblia. Namnamaentay a kasta, ta “ti dana dagidiay nalinteg ket kas iti naraniag a lawag a lumawlawag a lumawlawag agingga nga immaldaw unayen.” (Prov. 4:18) Ngem nasayaat nga isaludsodtayo: ‘Makidangdanggayak kadi iti aniaman a panagbalbaliw iti pannakatarus iti Kasuratan? Inaldaw kadi a basbasaek ti Biblia? Magagaranak kadi a mangbasa kadagiti publikasiontayo? Addaankami kadi iti linawas a Panagdaydayaw ti Pamilia?’ Umanamongtayo amin a saan a narigat nga aramiden dagitoy. Masansan a ti laeng kasapulan ket ti panangiwaya iti tiempo para kadagita. Ken anian a nakapatpateg ti pananggun-od iti umiso a pannakaammo iti Kasuratan, panangyaplikar iti dayta, ken irarang-ay iti naespirituan—nangnangruna ta dandanin ti dakkel a rigat!

11. Ania dagiti pagimbagan dagiti nagkauna a pipiesta, kasta met dagiti gimong, asamblea, ken kombension iti kaaldawantayo?

 11 Pagimbagantayo ti masansan a panangiparegta ti organisasion ni Jehova a tungpalentayo ti balakad ni apostol Pablo nga: “Agpipinnanunottayo koma iti maysa ken maysa tapno mangparegta iti ayat ken nasayaat nga ar-aramid, a saantay a baybay-an ti panagtataripnongtayo a sangsangkamaysa, kas iti kaugalian ti dadduma, no di ket agpipinnaregtatayo, ket nangnangruna a kasta bayat a makitkitayo nga umas-asidegen ti aldaw.” (Heb. 10:24, 25) Dagiti tinawen a piesta ken dadduma a panagtitipon ti nangpabileg idi iti espiritualidad dagiti Israelita. Karaman kadagita a naragsak nga okasion ket ti espesial a Piesta Dagiti Abong-abong idi kaaldawan ni Nehemias. (Ex. 23:15, 16; Neh. 8:9-18) Addaantay met ita kadagiti gimong, asamblea, ken kombension. Naan-anay koma nga aprobetsarentayo dagitoy a naespirituan a probision a pakapabilgan ti relasiontayo ken Jehova ken mangparagsak iti panagserbitayo kenkuana.—Tito 2:2.

12. Ania ti rumbeng a panangmatmattayo iti trabaho a panangikasaba iti Pagarian?

12 Kas kadagidi nagkauna a kameng ti organisasion ti Dios, naragsaktayo met a makiramraman iti “nasantuan a trabaho iti naimbag a damag ti Dios.” (Roma 15:16) No makipaspasettayo iti daytoy a “nasantuan a trabaho,” agbalbalintayo a ‘katrabahuan’ ni Jehova, “Daydiay Santo.” (1 Cor. 3:9; 1 Ped. 1:15) Maidaydayawtayo pay ti nasantuan a nagan ni Jehova. Anian a nagdakkel a pribilehio ti panangikasaba iti “nadayag a naimbag a damag ti naragsak a Dios”!—1 Tim. 1:11.

13. Ania ti pagpannurayan ti nasayaat nga espiritualidad ken biagtayo?

13 Kayat ti Dios ti kasayaatan para kadatayo. Isu a kayatna nga agtalinaedtayo a nasinged kenkuana ken iti organisasionna. Imbaga ni Moises kadagiti Israelita: “Aramatek ti langlangit ken ti daga kas saksi maibusor kadakayo ita nga aldaw, nga inkabilko ti biag ken patay iti sangom, ti bendision ken ti lunod; ket masapul a piliem ti biag tapno makapagtalinaedka a sibibiag, sika ken ti putotmo, babaen ti panangayat ken Jehova a Diosmo, babaen ti panagimdeng iti timekna ken babaen ti panagtalinaed kenkuana; ta isu ti biagmo ken ti kaatiddog ti al-aldawmo, tapno makapagnaedka iti daga nga insapata ni Jehova kadagidi ammam a da Abraham, Isaac ken Jacob nga ited kadakuada.” (Deut. 30:19, 20) Wen, ti biagtayo ket agpannuray iti panangaramidtayo iti pagayatan ni Jehova, iti panangayattayo kenkuana, iti panagtulnogtayo iti timekna, ken iti kinasungdotayo kenkuana.

14. Ania ti naibaga ti maysa a kabsat maipapan iti makitkita a paset ti organisasion ti Dios?

14 Naammuan ni Kabsat Pryce Hughes ti kinapudno sakbay ti 1914 ket nagtalinaed a nasungdo iti Dios ken iti organisasionna. Kinunana: “Ti kapatgan kaniak ket ti panagtalinaed a nasinged iti makitkita a paset ti organisasion ni Jehova. Nasursurok iti kapadasak a saan a nainsiriban ti panagtalek iti natauan a pannakaawat. Isu a determinadoak nga agtalinaed a matalek iti organisasion. Adda kadi pay sabali a pamay-an a magun-od ti anamong ken pamendision ni Jehova?”

AGTULTULOY A MAKIDANGGAY ITI UMAB-ABANTE NGA ORGANISASION TI DIOS

15. Ania a Nainkasuratan a pagarigan ti mangipakita iti rumbeng a panangmatmattayo kadagiti panagbalbaliw iti pannakatarustayo iti Kasuratan?

15 Tapno magun-odtayo ti anamong ken pamendision ni Jehova, masapul a suportarantayo ti organisasionna ken awatentayo ti aniaman a panagbalbaliw iti pannakatarustayo iti Kasuratan. Usigem daytoy: Kalpasan ti ipapatay ni Jesus, rinibu a Judio a Kristiano ti marigatan a mangiwaksi iti panangannurotda iti Linteg. (Ara. 21:17-20)  Ngem iti tulong ti surat ni Pablo kadagiti Hebreo, naawatanda a nasantipikarda, saan a babaen kadagiti sakripisio a “maidaton sigun iti Linteg,” no di ket “babaen ti pannakaidaton ti bagi ni Jesu-Kristo a namimpinsanen.” (Heb. 10:5-10) Adu kadagidiay a Judio a Kristiano ti nangilinteg iti panagpampanunotda ket rimmang-ayda iti naespirituan. Masapul met a sipipinget nga adalentayo ti Biblia ken dagiti publikasiontayo, ket no adda dagiti panagbalbaliw iti pannakatarustayo iti Biblia, sipapakumbaba koma nga awatentayo dagita.

16. (a) Aniada a bendision ti mamagbalinto a nakasaysayaat ti biag iti baro a lubong? (b) Ania ti segseggaam iti baro a lubong?

16 Ti amin nga agtalinaed a nasungdo ken Jehova ken iti organisasionna agtultuloy a sagrapenda dagiti bendisionna. Dagiti matalek a napulotan tagiragsakendanto ti naindaklan a pribilehio a makipagturay ken Kristo idiay langit. (Roma 8:16, 17) No ti namnamam ket agbiag nga agnanayon ditoy daga, panunotem no kasano karagsak ti agbiag idiay Paraiso. Kas paset ti organisasion ni Jehova, nakaragragsaktayo a mangipadamag iti sabsabali maipapan iti kari ti Dios a baro a lubong. (2 Ped. 3:13) “Dagidiay naemma tagikuaendanto ti daga,” kuna ti Salmo 37:11, “ket pudno a maragsakandanto iti napalalo iti kinaruay ti talna.” “Mangbangondanto iti balbalay ket agnaedda” kadagita ket tagiragsakendanto ti “aramid dagiti bukodda nga ima.” (Isa. 65:21, 22) Awanton ti mairurumen, napanglaw, ken agbisin. (Sal. 72:13-16) Saanton a mangallilaw ti Babilonia a Dakkel agsipud ta awanton. (Apoc. 18:8, 21) Mapagungarto dagiti natay ken maaddaanda iti gundaway nga agbiag nga agnanayon. (Isa. 25:8; Ara. 24:15) Anian a makapagagar dayta a namnama para iti minilion a nangidedikar iti biagda ken Jehova! Tapno masagraptayo dagita a kari iti Biblia, masapul nga itultuloytayo ti rumang-ay iti naespirituan ken kanayontayo a makidanggay iti umab-abante nga organisasion ti Dios.

Makitkitam kadi ti bagim nga addakanto idiay Paraiso? (Kitaen ti parapo 16)

17. Ania ti rumbeng a mariknatayo maipapan ken Jehova ken iti organisasionna?

17 Bayat nga umad-adanin ti panungpalan daytoy a lubong, pagtalinaedentay koma a natibker ti pammatitayo ken ipakitatayo ti naimpusuan a panagyamantayo iti organisasion ti Dios. Kasta ti rikna ni salmista David idi inkantana: “Maysa a banag ti kiniddawko ken Jehova—isu dayta ti sapulekto, nga agnaedak koma iti balay ni Jehova iti amin nga al-aldaw ti panagbiagko, tapno kitaek ti kinamakaay-ayo ni Jehova ken tapno imatangak ti templona buyogen ti panangtagipateg.” (Sal. 27:4) Sapay koma ta agtalinaedtayo a nasinged ken Jehova ken agtultuloytayo a makidanggay iti umab-abante nga organisasionna.