Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) ABRIL 2014

Ap-apresiarem Kadi ti Panangbantay Kenka ni Jehova?

Ap-apresiarem Kadi ti Panangbantay Kenka ni Jehova?

“Dagiti mata ni Jehova addada iti amin a lugar, a sisisiput kadagidiay dakes ken kadagidiay naimbag.”—PROV. 15:3.

1, 2. Kasano a naiduma ti panagsiput ti surveillance camera no idilig iti panangbantay ni Jehova kadatayo?

ITI adu a pagilian, gagangay a maus-usar dagiti surveillance camera a mang-monitor iti trapiko ken mangirekord kadagiti aksidente. No nairekord ti camera ti maysa nga aksidente a hit-and-run, makatulong dayta iti panangbirok ken panangaresto iti naglibas a drayber. Siempre, gapu kadagiti surveillance camera a nadumaduma ti nakaipuestuanna, narigrigat itan nga itarayan dagiti kriminal ti dakes nga inaramidda.

2 Ngem ania ti malagipyo maipapan iti naayat nga Amatayo a ni Jehova no maipapan iti nasaknap a panagusar iti surveillance camera? Kuna ti Biblia a ‘dagiti mata ni Jehova ket adda iti amin a lugar.’ (Prov. 15:3) Ngem kayatna kadi a sawen a kanayon a sipsiputanna ti tunggal garawtayo? Bambantayannatayo kadi tapno laeng kitaenna dagiti kamalitayo ket kalpasanna dusaennatayo? (Jer. 16:17; Heb. 4:13) Saan! Sipsiputannatayo ni Jehova gapu ta ipatpategna ti tunggal maysa kadatayo ken maseknan iti pagimbagantayo.—1 Ped. 3:12.

3. Ania dagiti lima a pamay-an a bambantayannatayo ti Dios?

3 Ania ti makatulong kadatayo tapno maapresiartayo ti panangbantay ti Dios kadatayo? Usigentayo no kasano nga ipakpakitana  dayta. (1) Babaen ti panangpakdaarna kadatayo sakbay a makaaramidtayo iti dakes, (2) babaen ti panangilintegna kadatayo no makaaramidtayo iti di umiso, (3) babaen ti panangiwanwanna kadatayo nga usarenna dagiti prinsipio a masarakan iti Saona, (4) babaen ti panangtulongna kadatayo no maipasangotayo iti pakasuotan, ken (5) babaen ti panangbendisionna kadatayo iti panagaramidtayo iti naimbag.

PAKDAARANNATAYO TI DIOS

4. Apay a pinakdaaran ni Jehova ni Cain?

4 Umuna, usigentayo no kasano a pakpakdaarannatayo ti Dios sakbay a makaaramidtayo iti dakes. (1 Cron. 28:9) Tapno maapresiartayo daytoy nga aspeto ti panangbantay ti Dios, usigentayo ti inaramidna idi kasta unay ti panagpungtot ni Cain gapu ta saan nga inanamongan ti Dios ti datonna. (Basaen ti Genesis 4:3-7.) Pinakdaaran ni Jehova ni Cain a no saan nga ‘agaramid iti naimbag,’ ti basol ket kasla agpadpadaan iti ruangan. Insaludsod kenkuana ti Dios: “Maparukmamto kadi dayta?” Kayatna a maisubli ken Cain ti ‘paborna.’ Iti kasta masalimetmetan ni Cain ti nasayaat a relasionna iti Dios.

5. Kasano a pakpakdaarannatayo ni Jehova?

5 Kasta met laeng ti kasasaadtayo ita. Makita ni Jehova ti linaon ti pusotayo; saantayo a mailemmeng kenkuana ti pudpudno a pagannayasan ken tarigagaytayo. Kayat ti naayat nga Amatayo nga aramidentayo ti kinalinteg ngem dinatay met piliten nga agbalbaliw. Pakdaarannatayo babaen ti Saona, ti Biblia, no saanen nga umiso ti pagturturongantayo. Kasano? Iti inaldaw a panagbasatayo iti Biblia, makasaraktayo kadagiti teksto a tumulong kadatayo a mangparmek kadagiti di umiso a pagannayasantayo. Malaksid iti dayta, dagiti Nakristianuan a publikasiontayo tulongandatayo met a mangtarus iti maysa a problema a mabalin a pakaipaspasanguantayo ken ipakitada no kasano a mapagballigiantayo dayta. Kadagiti met gimong ti kongregasion, maipapaayantayo kadagiti naintiempuan a balbalakad a kasapulantayo!

6, 7. (a) Ania ti pammaneknek a maseknan ti Dios iti tunggal adipenna? (b) Ania ti aramidem tapno magunggonaanka iti naayat a pannakaseknan ni Jehova kenka?

6 Amin dagita a pakdaar manipud iti Biblia ipakitana ti naayat a pannakaseknan ni Jehova kadatayo kas indibidual. Pudno a nabayagen a mabasbasa dagiti tattao ti Biblia, minilion met ti mabembenepisiaran kadagiti publikasion ti organisasion ti Dios, ken maipapaayan met iti balakad ti intero a kongregasion bayat dagiti gimong. Ngem iti amin kadagitoy, iturturong ni Jehova ti atensionmo kadagiti pakdaar ti Biblia tapno mailintegmo dagiti di umiso a pagannayasam. Pammaneknek daytoy a maseknan kenka ni Jehova.

Ti konsiensiatayo a nasanay iti Biblia tulongannatayo a mangliklik kadagiti peggad (Kitaen ti parapo 6, 7)

7 Tapno magunggonaantayo kadagiti pakdaar ti Dios, masapul nga umuna a bigbigentayo a pudpudno a maseknan isuna kadatayo. Kalpasanna, masapul a yaplikartayo ti Saona, ket ikagumaantayo nga iwaksi ti panagpampanunot a di makaay-ayo kenkuana. (Basaen ti Isaias 55:6, 7.) No ipangagtayo dagiti pakdaarna, maliklikantayo ti adu a problema. Ngem kasanon no timmuloktayo iti dakes a pagannayasantayo? Kasanonatayo a tulongan ti naayat nga Amatayo?

ILINTEGNATAYO TI MASEKNAN NGA AMATAYO

8, 9. Kasano a ti balakad nga ipapaay ni Jehova babaen kadagiti panglakayen ipakitana a maseknan unay kadatayo? Mangted iti pagarigan.

8 Mabalin a nangnangruna a mariknatayo ti pannakaseknan ni Jehova kadatayo no tubngarennatayo. (Basaen ti Hebreo 12:5, 6.) Siempre, saan a makaparagsak ti mabalakadan wenno umawat iti disiplina. (Heb. 12:11) Ngem no adda nangipaay kadatayo iti Nainkasuratan a balakad, napateg a tarusantayo no apay nga inaramidna dayta.  Ammona la ketdi a makaapektar ti ar-aramidentayo iti relasiontayo ken Jehova a Dios, sigurado a maseknan iti marikriknatayo, ken sidadaan nga agsakripisio tapno maipakitana kadatayo ti kunaen ti Biblia no kasano a mailintegtayo ti nagkamaliantayo ket maay-ayotayo ti Dios. Ad-adda pay ngem iti dayta ti pannakaseknan kenka ti Gubuayan ti kasta a balakad, ni Jehova.

9 Usigentayo ti maysa a pagarigan no kasano nga ipakpakita dagiti mangbalbalakad a kakabsat ti pannakaseknan ti Dios. Bisio ti maysa a kabsat a lalaki ti agbuya iti pornograpia idi saanna pay a naammuan ti kinapudno, ngem naisardengnan dayta. Nupay kasta, adda pay laeng kenkuana ti sigud a pagannayasanna, a kas iti di pay naiddep a beggang. Narubroban dayta a dakes a tarigagayna idi naaddaan iti baro a selpon. (Sant. 1:14, 15) Dayta ti inaramatna nga agbuya manen iti pornograpia iti Internet. Naminsan, idi mangaskasabada iti telepono, impabulodna ti selponna iti kaduana a panglakayen tapno agbirok kadagiti adres. Idi usaren ti panglakayen ti selpon, nagparang dagiti pornograpiko a website. Dagus a binalakadan ti panglakayen daytoy a kabsat nga agpegpeggad ti espiritualidadna. Nagunggonaan ti kabsat iti dayta a naintiempuan a balakad, inawatna ti pannubngar, ket idi agangay naparmekna ti dakes a pagannayasanna. Anian a yamantayo iti maseknan a nailangitan nga Amatayo ta makitkitana uray dagiti nalimed a basoltayo ket ilintegnatayo sakbay a maladaw ti amin!

MAGUNGGONAANTAYO NO IYAPLIKARTAYO DAGITI PRINSIPIO TI BIBLIA

10, 11. (a) Kasano a makapagpaiwanwantayo iti Dios? (b) Kasano a napaneknekan ti maysa a pamilia a nainsiriban ti agpaiwanwan ken Jehova?

10 Inkanta ti salmista ken Jehova: “Babaen iti pammatigmaanmo idalannakto.” (Sal. 73:24) No kasapulantayo ti panangiwanwan, ‘imutektekantayo’ ni Jehova babaen ti panagkonsultatayo iti Saona tapno maammuantayo ti panangmatmatna iti bambanag. No iyaplikartayo dagiti prinsipio ti Biblia, saantay laeng a magunggonaan iti naespirituan no di ket matulongantayo pay no dadduma iti material a pamay-an.—Prov. 3:6.

11 Usigentayo no kasano nga inwanwan ni Jehova ti maysa a makitaltalon a kabsat a taga-Masbate iti Pilipinas. Agserserbida ken baketna kas regular pioneer ken dakkel ti pamiliada a supsuportaranda. Maysa nga aldaw, nasdaawda ta inabisuan  ida ti makinkukua iti daga a pumanawdan. Apay? Adda ngamin nangpabasol kadakuada nga agtaktakawda. Nupay madanagan ti kabsat no sadinonto ti pagyananda, kinunana: “Makaammon ni Apo Jehova. Dinatay baybay-an, aniaman ti mapasamak.” Saan a napaay ti panagtalek ti kabsat. Kalpasan ti sumagmamano nga aldaw, nabang-aran daytoy a pamilia idi naammuanda a saandan a mapapanaw. Ania ti napasamak? Nadlaw ti makinkukua iti daga nga uray siuulbod a naakusaran daytoy a Saksi a pamilia, nagtalinaedda latta a narespeto ken natalna kas resulta ti panagpaiwanwanda kadagiti prinsipio ti Biblia. Nagustuanna ti kababalinda, ket intuloyna a pinagnaed ida iti talonna ken inikkanna pay ida iti kanayonan a daga a talonen. (Basaen ti 1 Pedro 2:12.) Wen, iwanwannatayo ni Jehova babaen ti Saona tapno madaerantayo dagiti pakarigatan iti biag.

MAYSA A GAYYEM A TUMULONG KADATAYO NGA AGIBTUR

12, 13. Kadagiti ania a situasion a mabalin nga agduadua ti dadduma no maseknan met laeng ti Dios iti panagsagabada?

12 Ngem no dadduma, kasla di agpatpatingga dagiti pakarigatantayo, kas iti nakaro a sakit, ibubusor ti kapamilia, wenno pannakaidadanes. Mabalin met nga adda ditay makatunosan a kabsat iti kongregasion gapu iti nagduma a personalidadtayo.

13 Kas pagarigan, amangan no adda naibaga ti maysa a kabsat a nakasair iti riknatayo. ‘Saan a rumbeng a kastoy ti mapaspasamak iti organisasion ti Dios!’ nalabit maikunam. Ngem ti kabsat a nakasair kenka ket naipaayan kadagiti kanayonan a pribilehio iti kongregasion, ken raraemen met dagiti kakabsat. Nalabit maisaludsodmo, ‘Apay a kastoy? Saan ngata a makitkita ni Jehova ti mapaspasamak? Apay a di agtignay?’—Sal. 13:1, 2; Hab. 1:2, 3.

14. Ania ti nalabit maysa a rason a saan a bumallaet ni Jehova a mangsolbar kadagiti personal a problematayo?

14 Mabalin nga adda nainkalintegan a rason no apay a saan a bumallaet ni Jehova. Kas pagarigan, nupay ipagarupmo a ti kabsat a nakasair kenka ti talaga a nagkamali, amangan no iti panangmatmat ni Jehova, sika ti ad-adda a nakabasol. Ti ipagarupmo a makasair a komento ket nalabit maitutop laeng a balakad a masapul nga ikabilangam. Iti pakasaritaan ti biag ni Kabsat Karl Klein, a nagserbi kas miembro ti Bagi a Manarawidwid, inyestoriana nga iti naminsan sipaprangka a tinubngar isuna ni Kabsat J. F. Rutherford. Iti sumaganad a panagkitada, siraragsak a kinablaawan ni Kabsat Rutherford, a kunana: “Hello, Karl!” Gistay di mangngeg ti sungbat ni Kabsat Klein. Nadlaw ni Kabsat Rutherford nga adda pay laeng sakit ti nakem ni Kabsat Klein, isu a pinakdaaranna nga agannad di la ket ta matnag iti silo ti Diablo. Insurat ni Kabsat Klein idi agangay: “No ing-ingpentayo ti sakit ti nakemtayo iti maysa a kabsat a nangbalakad kadatayo, nangruna no adda karbenganna a mangibaga iti dayta, isarsaraktayo ti bagitayo iti silo ti Diablo.” *

15. Ania koma ti aramidem tapno maanusam ti aguray iti tulong nga ipaay ni Jehova iti narigat a kasasaadmo?

15 Kaskasdi, mabalin a ditayon maanusan ti kasla di met la agpatpatinggan a problematayo. Ania ti mabalin nga aramidentayo? Ipapanmon nga agmanmanehoka iti haywey sa natrapikka. Dimo ammo no kasano ti kapautna. No dikan makauray ket agsapulkan iti sabali a dalan, baka mayaw-awanka ket ad-adda laeng a bumayag ti biahem nga agturong iti papanam. Umasping iti dayta, no agtalinaedka iti dalan nga ibagbaga ti Sao ti Dios, di agbayag, makadanonkanto met laeng iti papanam.

16. Ania pay ti sabali a rason a nalabit saan a dagus a bumallaet ni Jehova kadagiti mapaspasarantayo a suot?

 16 Mabalin a saan a dagus a bumallaet ni Jehova kadagiti pakasuotantayo gapu ta kayatnatayo a sanayen. (Basaen ti 1 Pedro 5:6-10.) Ngem ditay koma pulos panunoten a ti Dios ti makinggapuanan kadagiti mapaspasarantayo a suot. (Sant. 1:13) Imbes ketdi, “ti kabusoryo, ti Diablo,” ti pakaigapuan ti adu a pakarigatan. Ngem mabalin nga ipalubos ti Dios dagiti narigat a situasion tapno rumang-aytayo iti naespirituan. Makitkitana dagiti panagsagabatayo, ket gapu ta “maseknan,” siguraduenna a saanto nga agpaut dagita. Apresiarem kadi ti panangbantay kenka ni Jehova no agsagsagabaka, nga agtalekka nga ipaayannaka iti bileg a mangibtur iti dayta?—2 Cor. 4:7-9.

MAGUN-ODTAYO TI ANAMONG TI DIOS

17. Apay a suksukimaten ni Jehova ti puso ti amin a tattao?

17 Adda nasayaat a rason a suksukimaten ti Dios ti pusotayo. Babaen ken mammadto Hanani, imbaga ni Jehova ken Ari Asa: “Mapan nga agsublisubli dagiti mata [ni Jehova] iti intero a daga tapno ipakitana ti pigsana maigapu kadagidiay a ti pusoda naan-anay kenkuana.” (2 Cron. 16:9) “Ipakita [ni Jehova] ti pigsana” agpaay kenka no itultuloymo nga aramiden ti umiso.

18. No mariknam a kasla saan a maap-apresiar ti maar-aramidam, ania ti laglagipem maipapan ken Jehova? (Kitaen ti ladawan iti rugi ti artikulo.)

18 Kayat ti Dios a ‘birokentayo ti naimbag,’ ‘ayatentayo ti naimbag,’ ken ‘aramidentayo ti naimbag,’ iti kasta anamongannatayo. (Amos 5:14, 15; 1 Ped. 3:11, 12) Sipsiputan ni Jehova dagiti nalinteg ken bembendisionanna ida. (Sal. 34:15) Panunotenyo kas pagarigan dagiti dua a Hebreo a partera (midwife) a da Sifra ken Pua. Idi naadipen dagiti Israelita idiay Egipto, ad-adda a nagtulnog dagitoy a babbai ken Jehova imbes a ken Faraon, a nangibilin a papatayenda ti amin a maipasngay nga ubbing a lallaki a Hebreo. Nabatad a ti panagbutengda iti Dios ti nangtignay kadakuada a mangispal kadagiti maladaga. Idi agangay, ‘impaayan ida ni Jehova iti bukodda a pamilia.’ (Ex. 1:15-17, 20, 21) Nakita ni Jehova ti naimbag nga aramidda ket binendisionanna ida. No dadduma, nalabit mariknatayo a kasla awan ti mangap-apresiar kadagiti naimbag a maar-aramidantayo. Ngem tagipatgen dagita ni Jehova. Sipsiputanna ti tunggal naimbag a banag a maaramidantayo, ket supapakannatayo.—Mat. 6:4, 6; 1 Tim. 5:25; Heb. 6:10.

19. Kasano a napaneknekan ti maysa a kabsat a makitkita ni Jehova ti naimbag a maar-aramidantayo?

19 Napaneknekan ti maysa a kabsat a babai iti Austria a makitkita ti Dios dagiti panagreggettayo. Naited kenkuana ti adres ti maysa a babai a padana a Hungarian ti pagsasaona tapno sarungkaranna. Bimmisita a dagus, ngem awan nadanonna. Namin-adu a nagsublisubli. No dadduma, madmadlawna nga adda tao iti uneg ngem awan ti sumungsungbat. Nagibatbati kadagiti literatura, surat, ken dadduma pay, pakairamanan ti adres ken numero ti teleponona. Kalpasan ti maysa ket kagudua a tawen, adda met laengen nanglukat iti ridaw! Nainggayyeman a kinablaawan ti babai ti kabsattayo, ket kinunana: “Sumrekka. Nabasak amin nga intedmo ket ur-urayenka nga agsubli.” Agpakpa-chemotherapy gayam idi ket saanna a kayat ti makisango kadagiti tattao. Inrugina ti makipagadal iti Biblia. Wen, binendisionan ti Dios ti kinapinget ti kabsattayo!

20. Ania ti panagriknam iti panangbantay ni Jehova kenka?

20 Makitkita ni Jehova ti amin nga ar-aramidentayo ket sigurado a supapakannatayto. Nupay ammom a kitkitaennaka ti Dios, dimo koma panunoten a sipsiputanna laeng dagiti kamalim a kas iti ar-aramiden ti surveillance camera. Imbes ketdi, ad-adda koma a suminged ti riknam kenkuana kas naayat a Dios a pudpudno a maseknan kenka!

^ par. 14 Naipablaak ti pakasaritaan ti biag ni Kabsat Klein iti Pagwanawanan nga Abril 1, 1985.