Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan —Pagadalan nga Edision

  |  Abril 2014

 PAKASARITAAN TI BIAG

Ti Amin-Tiempo a Ministerio—No Ania ti Nangituronganna Kaniak

Ti Amin-Tiempo a Ministerio—No Ania ti Nangituronganna Kaniak

Iti las-ud ti 65 a tawen a kaaddak iti amin-tiempo a ministerio, maibagak a napnuan ti biagko iti naragsak nga al-aldaw. Saanna a kayat a sawen nga awan ti napasarak a ladingit ken pannakaupay. (Sal. 34:12; 94:19) Ngem makunak a nakaragragsak ken makapnek unay ti panagbiagko!

SEPTIEMBRE 7, 1950 idi nagbalinak a Bethelite iti Brooklyn. Ti laeng mangbukel idi iti pamilia ti Bethel ket 355 a kakabsat a lallaki ken babbai a nadumaduma ti nasionalidadda ken agedad manipud 19 agingga iti 80. Adu kadakuada ket napulotan a Kristiano.

TI PANANGRUGIK NGA AGSERBI KEN JEHOVA

Idi nabautisaranak iti edad a 10

Insuronak ni nanangko nga agserbi iti “naragsak a Dios.” (1 Tim. 1:11) Ubingak pay idi nangrugi nga agserbi ni Nanang ken ni Jehova. Idi Hulio 1, 1939, iti edadko a 10, nabautisaranak iti maysa a zone assembly (maawagan itan iti circuit assembly) iti Columbus, Nebraska, U.S.A. Agarup 100 ti bilangmi a timmabuno iti naabangan a pasilidad tapno agdengngeg iti nairekord a lektiur ni Joseph Rutherford a napauluan “Fascism or Freedom.” Iti katengngaan ti lektiur, sinerrekdakami ti maysa a bunggoy, riniribukda ti programa, sa pinapanawdakami. Isu a nagtataripnongkami iti pagtaengan ti maysa a kabsat a saan unay nga adayo iti ili ket intuloymi a dinengngeg ti nabatbati a paset ti programa. Isu a dimo pakasdaawan no apay a diak malipatan ti petsa ti pannakabautisarko!

Inkagumaan ni Nanang nga isuro kaniak ti kinapudno. Nupay nasingpet ken responsable ni Tatang, saan unay nga interesado iti relihion wenno iti espiritualidadko. Ni Nanang agraman ti dadduma pay a Saksi ni Jehova iti Omaha Congregation ti nangparparegta kaniak.

NO KASANO A NAIKEDDENGKO TI ARAMIDEK ITI BIAGKO

Dandaniak idin aggraduar iti hayskul idi kasapulan nga agdesisionak no ania ti pangusarak iti biagko. Iti kada bakasion iti eskuelaan, nagserbiak kas vacation pioneer (maawagan itan iti auxiliary pioneer), a kaduak ti dadduma pay a kasadarak.

Dua a babbaro a katurturpos laeng iti maikapito a klase ti Gilead School—da John Chimiklis ken Ted Jaracz—ti naidestino iti lugarmi kas agdaldaliasat a manangaywan. Nasdaawak idi naammuak a nasurok laeng a 20 ti tawenda. Agtawenak idin iti 18 ken dandaniakon aggraduar iti hayskul. Malaglagipko pay laeng ti panangdamag ni Kabsat Chimiklis no ania ti kayatko a pangusaran iti biagko. Idi imbagak ti planok,  imparegtana kaniak: “Wen, sumrekka a dagus iti amin-tiempo a ministerio. Dimo ammo no anianto ti pangituronganna kenka.” Immukuok iti pusok dayta a balakad, agraman ti nasayaat nga ulidan dagitoy a kakabsat. Isu a kalpasan ti panaggraduarko, nangrugiak nga agpayunir idi 1948.

NO KASANO A NAGBALINAK A BETHELITE

Idi Hulio 1950, kaduak dagiti nagannakko a timmabuno iti internasional a kombension iti Yankee Stadium iti New York City. Iti dayta a kombension, immatenderak iti miting para kadagiti interesado nga agserbi iti Bethel. Impatulodko ti aplikasionko, nga imbagak a maragsakanak nga agserbi sadiay.

Nupay saan a kinontra ni Tatang ti panagpayunirko ken ti panagtalinaedko iti poderda, imbagana a tumulongak kadagiti magastos iti balay. Isu nga iti maysa nga aldaw iti nasapa a paset ti Agosto, idi mapanak koman agbirok iti trabaho, kinitak nga umuna ti mailbox-mi. Adda suratko a naggapu iti Brooklyn a pirmado ni Nathan H. Knorr. Kastoy ti linaonna: “Naawatmi ti aplikasionmo nga agserbi ditoy Bethel. Ammok a kayatmo ti agtalinaed iti Bethel iti unos ti panagbiagmo. Kayatko ngarud nga agreportka ditoy Bethel iti 124 Columbia Heights, Brooklyn, New York, inton Septiembre 7, 1950.”

Idi simmangpet ni Tatang iti dayta nga aldaw manipud trabahona, imbagak a nakasarakakon iti trabaho. Kunana, “Nasayaat no kasta, ket sadino?” Kinunak, “Iti Brooklyn Bethel, ket umawatak iti $10.00 iti binulan.” Nasdaaw ngem kunana a no dayta ti kayatko, masapul a saysayaatek ti agtrabaho. Di nagbayag kalpasanna, nabautisaran ni Tatang iti kombension iti Yankee Stadium idi 1953!

Kaduak ni Alfred Nussrallah, a partnerko kas payunir

Makaparagsak ta naawis met iti Bethel ti partnerko a payunir a ni Alfred Nussrallah, isu a nagkuyogkamin a nagbiahe. Idi agangay, nagasawa da Alfred ken Joan, nageskuelada iti Gilead, sa nagserbida kas misionero iti Lebanon. Idi agangay, nagsublida iti Estados Unidos kas agdaldaliasat a manangaywan.

DAGITI TRABAHOK ITI BETHEL

Ti damo a trabahok iti Bethel ket paradait iti libro iti Bindery. Ti damo a publikasion a naited a trabahuek ket ti libro a What Has Religion Done for Mankind? Kalpasan ti agarup walo a bulanko iti Bindery, nayakarak iti Service Department a ni Kabsat Thomas J. Sullivan idi ti manangaywan iti dayta. Nagsayaat ti makipagtrabaho kenkuana ta nagunggonaanak iti naespirituan a sirib ken pannakaammo a nagun-odna iti adu a tawtawen a kaaddana iti organisasion.

Kalpasan ti agarup tallo a tawenko iti Service Department, ni Max Larson a manangaywan iti paktoria imbagana kaniak a kayatnak kano a makasarita ni Kabsat Knorr. Pinampanunotko no adda ngata madi a naaramidak. Nabang-aranak idi imbaga ni Kabsat Knorr a kayatna la a maammuan no adda planok a rummuar iti Bethel iti masanguanan. Kasapulanna ngamin ti temporario nga agtrabaho iti opisinana ken kayatna a kitaen no kabaelak dayta a trabaho. Kinunak nga awan ti planok a pumanaw iti Bethel. Idi agangay, naaddaanak iti pribilehio nga agtrabaho iti opisinana iti simmaruno a 20 a tawen.

Masansan nga ibagak a diak mabaybayadan ti edukasion a naawatko manipud iti pannakipagtrabahok kada Kabsat Sullivan ken Kabsat Knorr, kasta met iti dadduma pay a Bethelite, a kas kada Milton Henschel, Klaus Jensen, Max Larson, Hugo Riemer, ken Grant Suiter. *

 Nakaor-organisado dagiti kakabsat a nakaduak iti panangitungpalda iti annongenda iti organisasion. Nakasasaet nga agtrabaho ni Kabsat Knorr ta kayatna a naan-anay a rumang-ay ti trabaho ti Pagarian. Nalaka a kasarsarita. Uray no naiduma ti panangmatmatmi iti maysa a banag, mabalinmi latta nga ibaga ti opinionmi ken agtalek kadakami.

Iti maysa a gundaway, nakisarita kaniak ni Kabsat Knorr maipapan iti panangasikaso kadagiti kasla saan unay nga importante a banag. Kas pagarigan, imbagana nga idi isu ti manangaywan iti paktoria, tumawag kenkuana ni Kabsat Rutherford ket ibagana: “Kabsat Knorr, inton umayka mangaldaw kalpasan ti trabahom iti paktoria, pangngaasim man ta mangitugotka kadagiti burador ti lapis. Kasapulak dagita iti lamisaanko.” Kinuna ni Kabsat Knorr a dumagas iti burador iti pagalaan iti suplay ken ibulsana dagita. Sa iti tengnga ti aldaw, ipanna dagita iti opisina ni Kabsat Rutherford. Bassit laeng a banag dayta, ngem nakapatpateg ken Kabsat Rutherford. Kalpasanna, kinuna kaniak ni Kabsat Knorr: “Kayatko nga adda latta koma nataharan a lapis iti lamisaanko. Pangngaasim man ta binigat a mangidagaska.” Iti adu a tawtawen, siniguradok a mataharan dagiti lapis ni Kabsat Knorr.

Masansan a dakamaten ni Kabsat Knorr a kasapulan nga agimdengkami a naimbag iti instruksion no adda maipatrabaho kadakami. Naminsan, indetalyena no ania ti aramidek, ngem saanak a dimngeg a naimbag. Nagresulta daytoy iti banag a nakaibabainanna. Nadanaganak unay, isu a nangaramidak iti ababa a surat ket imbagak a pagbabbabawyak ti naaramidak ket uray iyakardak lattan iti sabali nga opisina. Iti dayta met laeng a bigat, immay ni Kabsat Knorr iti lamisaanko ket kinunana: “Robert, nabasak ti suratmo. Pudno a nagkamalika. Nagsaritaanta dayta idin, ngem siguradok a naan-annadka inton maminsan. Ala, ituloytan ti agtrabaho.” Apresiarek unay ti naasi a konsiderasionna.

TI TARIGAGAYKO A MANGASAWA

Walo a tawenko idin iti Bethel, ngem awan ti sabali a planok no di ti agtultuloy nga agserbi iti Bethel. Ngem nagbalbaliw dayta. Idi dandanin ti internasional a kombension iti Yankee Stadium ken iti Polo Grounds idi 1958, nakitak manen ni Lorraine Brookes, a naam-ammok idi 1955 bayat nga agpaypayunir idiay Montreal, Canada. Nagustuak ti panangipategna iti amin-tiempo a panagserbi ken ti kinatulokna nga agserbi iti sadinoman a pangibaonan kenkuana ti organisasion ni Jehova. Kalat ni Lorraine ti ageskuela iti Gilead. Agtawen iti 22 idi naawis nga ageskuela iti maika-27 a klase idi 1956. Kalpasan a nagturpos, naibaon kas misionero iti Brazil. Nagbalinkami a nasinged idi 1958, ket pinatganna ti kiddawko nga agkasarkami. Implanomi ti agkasar iti sumaruno a tawen ket ninamnamami nga agkaduakami nga agserbi kas misionero.

Idi imbagak ken Kabsat Knorr ti planok, insingasingna nga aguraykami pay iti tallo a tawen, sakamto agkasar, ket agserbikamto iti Brooklyn Bethel. Tapno agtalinaed iti Bethel dagiti agasawa iti daydi  a tiempo, ti maysa kadakuada ket masapul a nakapagserbin iti Bethel iti 10 a tawen wenno nasursurok pay ken masapul met a naka-tallo a tawenen iti Bethel ti agbalin nga asawana. Isu nga immanamong nga agserbi ni Lorraine iti dua a tawen iti Brazil Bethel ken maysa a tawen iti Brooklyn Bethel sakbay a nagkasarkami.

Iti umuna a dua a tawen a panagnobiomi, ti laeng komunikasionmi ket babaen iti surat. Nangina ngamin ti itatawag iti telepono, ken awan pay idi ti e-mail! Idi nagkasarkami idi Septiembre 16, 1961, anian a nagdakkel a pribilehiomi ta ni Kabsat Knorr ti nangipaay iti palawag ti kasar. Kasla nagbayag ti tallo a tawen a panaguraymi. Ngem no lagipenmi ti napalabas a nasurok a 50 a tawen a makapnek ken naragsak a panagasawami, umanamongkami a saan a sayang daydi a panagur-uraymi!

Idi nagkasarkami. Manipud kannigid: Nathan H. Knorr, Patricia Brookes (kabsat ni Lorraine), Lorraine ken siak, Curtis Johnson, Faye ken Roy Wallen (dagiti nagannakko)

DAGITI PRIBILEHIOMI

Idi 1964, naaddaanak iti pribilehio a bumisita iti sabali a pagpagilian kas zone overseer. Iti daydi a tiempo, saan a kumuyog dagiti assawa a babbai kadagita a panagbisita. Ngem nabaliwan dayta nga urnos idi 1977. Iti dayta a tawen, kinaduami ken Lorraine dagiti agassawa a da Grant ken Edith Suiter iti ibibisitada kadagiti sanga nga opisina iti Germany, Austria, Greece, Cyprus, Turkey, ken Israel. Amin-amin, adda agarup 70 a pagilian a nabisitak iti intero a lubong.

Iti maysa nga ibibisitak iti Brazil idi 1980, ti maysa kadagiti napananmi ket ti siudad ti Belém, maysa a lugar iti equator a nagserbian idi ni Lorraine kas misionero. Bimmisitakami met kadagiti kakabsat iti siudad ti Manaus. Iti maysa a palawag iti istadium, nakitami ti maysa a naiputputong a grupo a saan a sumursurot iti nakairuaman a panangabrasa dagiti Braziliano a panagiinnagek dagiti babbai ken panagiinnalamano dagiti lallaki. Apay?

Isuda dagiti patpatgentayo a kakabsat a naggapu iti leper colony iti kabakiran ti Amazon. Tapno dida mayakar ti sakitda a leprosy, saanda a nakiinnabrasa kadagiti timmabuno. Ngem natukay ti riknami iti pannakakitami kadakuada, ket diminto malipatan ti naragsak a ruprupada! Pudno ti kinuna ni Isaias: “Dagiti bukodko nga adipen agdir-idanto a sirarag-o gapu iti nasayaat a kasasaad ti puso.”—Isa. 65:14.

NARAGSAK KEN MAKAPNEK A BIAG

Masansan a pagsaritaanmi ken Lorraine ti nasurok nga 60 a tawen nga amin-tiempo a panagserbimi ken Jehova. Nakaragragsakkami kadagiti sinagrapmi a bendision iti panagpaiturongmi ken Jehova babaen ti organisasionna. Nupay saanakon a makapagbiahe iti sabali a pagpagilian kas iti dati, kabaelak pay ti inaldaw nga agtrabaho kas maysa a katulongan iti Coordinators’ Committee ken Service Committee ti Bagi a Manarawidwid. Naimpusuan nga apresiarek ti pribilehiok a mangsuporta iti sangalubongan a panagkakabsat iti kastoy a pamay-an. Makapaamanga a makita ti nakaad-adu nga agtutubo a lallaki ken babbai a simrek iti amin-tiempo a panagserbi ken addaan iti kababalin a kas ken Isaias, a nagkuna: “Adtoyak! Ibaonnak!” (Isa. 6:8) Paneknekan dagitoy a kakabsat a pudno ti kinuna ti manangaywan iti sirkito a nabayagen a nangibaga kaniak: “Sumrekka a dagus iti amin-tiempo a ministerio. Dimo ammo no anianto ti pangituronganna kenka.”

^ par. 20 Para iti pakasaritaan ti biag ti sumagmamano kadagitoy a kakabsat, kitaen dagiti sumaganad a ruar ti The Watchtower: Klaus Jensen (Oktubre 15, 1969); Thomas J. Sullivan (Agosto 15, 1965); Hugo Riemer (Septiembre 15, 1964); ken Ti Pagwanawanan: Max Larson (Septiembre 1, 1989) ken Grant Suiter (Marso 1, 1984).