Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan —Pagadalan nga Edision  |  Marso 2014

Ti Saom–“Wen ket Kaskasdi a Saan”?

Ti Saom–“Wen ket Kaskasdi a Saan”?

Panunotem daytoy nga eksena: Maysa a panglakayen a miembro ti Hospital Liaison Committee ti nangyurnos a mangkadua iti maysa nga agtutubo a lalaki iti pangasabaan iti maysa nga agsapa ti Domingo. Ngem iti dayta nga agsapa, adda maysa a kabsat a lalaki a timmawag kenkuana gapu ta naaksidente ti asawana ken naitaray iti ospital. Agpabpabirok ti kabsat iti doktor a mayat nga agopera a di agusar iti dara. Kinanselar ngarud ti panglakayen ti pannakikuyogna iti agtutubo tapno matulonganna ti pamilia nga agkasapulan iti tulong.

Kastoy ti sabali pay nga eksena: Maysa nga agsolsolo nga ina ken ti dua nga annakna ti inimbitaran ti maysa a pagassawaan iti pagtaenganda iti maysa a rabii. Maragsakan ken magagaran dagiti ubbing idi imbaga dayta ni nanangda. Ngem maysa nga aldaw sakbay dayta a rabii, imbaga dagiti agassawa nga adda di ninamnama a napasamak ket kinanselarda ti imbitasionda. Idi agangay, naammuan ti ina ti makagapu. Adda gayam gagayyem dagitoy nga agassawa a nangimbitar kadakuada kalpasan nga inawisda ti ina, ket pinatganda dayta.

Siempre, kas Kristiano, masapul a tungpalentayo ti saotayo. Saantay koma nga agsao iti “wen ket kaskasdi a saan.” (2 Cor. 1:18) Ngem ipakita dagitoy dua a nadakamat a pagarigan a saan nga agpapada ti amin a situasion. Adda dagiti kasasaad a kasla awanen ti pamuspusan no di ti panangkanselar iti tulagan. Kasta idi ti inaramid ni apostol Pablo.

NAAKUSARAN NI PABLO NGA AGBALIWBALIW TI PANUNOTNA

Idi 55 C.E., bayat nga adda ni Pablo idiay Efeso iti maikatlo a panagdaliasatna kas misionero, implanona a ballasiwen ti Baybay Aegeano a mapan idiay Corinto, sa kalpasanna, mapan idiay Macedonia. Idi agawiden idiay Jerusalem, implanona a bisitaen ti kongregasion ti Corinto iti maikadua a gundaway, nalabit tapno kolektaenna koma ti naasi a sagut nga agpaay kadagiti kakabsat idiay Jerusalem. (1 Cor. 16:3) Nalawag daytoy iti kunaen ti 2 Corinto 1:15, 16: “Buyogen itoy a panagtalek, pangpanggepek idi ti umay kadakayo, tapno maaddaankay koma iti maikadua a gundaway iti panagrag-o, ken kalpasan ti idadagasko kadakayo ti mapan idiay Macedonia, ken ti agsubli kadakayo manipud Macedonia ket ituloddak iti pangasidegen idiay Judea.”

Agparang nga iti immuna a surat ni Pablo, impakaammona kadagiti kakabsat idiay Corinto ti planona a sumarungkar kadakuada. (1 Cor. 5:9) Ngem di nagbayag kalpasan a naaramidna dayta a surat, impadamag kenkuana ti sangakabbalayan ni Cloe nga adda panna kabingbingay iti nagbabaetan dagiti kakabsat sadiay. (1 Cor. 1:10, 11) Inkeddeng ni Pablo a baliwan ti orihinal a planona, ket inaramidna ti surat a pagaammotayo itan kas 1 Corinto. Iti dayta a surat, sidudungngo a nangipaay ni Pablo iti balakad ken panangilinteg. Dinakamatna met a binaliwanna ti panagsasaganad dagiti lugar a papananna, ket impakaammona kadakuada a mapan nga umuna idiay Macedonia sa agturong iti Corinto.—1 Cor. 16:5, 6. *

Agparang nga idi naawat dagiti kakabsat idiay Corinto ti suratna, sumagmamano kadagiti ‘nalabes ti laingna nga apostol’ iti dayta a kongregasion inakusaranda ni Pablo nga awan ti maymaysa a saona, ta saanna a tinungpal ti karina. Imbaga ni Pablo ti makagapu iti desisionna, ket insaludsodna: “Ala ket, idi addaanak iti kasta a panggep, nangtagtagilag-anak kadi? Wenno ti bambanag a panggepek, panggepek aya ida a maitunos iti lasag, tapno kaniak adda koma ti ‘Wen, Wen’ ken ti ‘Saan, Saan’?”—2 Cor. 1:17; 11:5.

Nalabit maisaludsodtayo, Talaga kadi a ‘tinagtagilag-an’ ni apostol Pablo ti karina? Siempre saan! Ti sao a naipatarus a ‘tagtagilag-anen’ kaipapananna ti panagbaliwbaliw ti panunot, kas iti tao a di mapagtalkan, a saan a mangtungtungpal iti karina. Ti saludsod ni Pablo a “ti bambanag a panggepek, panggepek aya ida a maitunos iti lasag?” imbatadna la ketdi kadagiti Kristiano idiay Corinto a ti desisionna a mangbaliw iti planona ket saan a gapu ta di mapagtalkan.

Sinupiat ni Pablo ti akusasion, ket insuratna: “Ngem ti Dios mapagkammatalkan a ti sasaomi a naiturong kadakayo saan a Wen ket kaskasdi a Saan.” (2 Cor. 1:18) Maseknan la ketdi ni Pablo kadagiti kakabsat idiay Corinto idi binaliwanna ti iskediulna. Mabasatayo iti 2 Corinto 1:23 a gapu iti ‘panangigagana kadakuada,’ binaliwanna ti orihinal a planona a bumisita iti Corinto. Kinapudnona, inikkanna ida iti gundaway a mangilinteg iti bambanag sakbay a sarungkaranna ida. Kas ninamnamana, bayat nga adda idiay Macedonia, nadamagna ken Tito a natignay dagiti taga-Corinto nga agleddaang ken agbabawi gapu iti suratna, ket dayta ti nagrag-oanna iti kasta unay.—2 Cor. 6:11; 7:5-7.

NI JESUS TI PAMMATALGED

Ti akusasion nga agbaliwbaliw ti panunot ni Pablo kasla ipampamatmatna a no saan a mapagtalkan kadagiti karina iti inaldaw a panagbiagna, saan met a mapagtalkan iti trabahona a panangasaba. Nupay kasta, impalagip ni Pablo kadagiti taga-Corinto nga isu ti nangikasaba kadakuada ken Jesu-Kristo. “Ti Anak ti Dios, ni Kristo Jesus, a naikaskasaba kadakayo babaen kadakami, kayatna a sawen, babaen kaniak ken ni Silvano ken ni Timoteo, saan a nagbalin a Wen ket kaskasdi a Saan, no di ket ti Wen nagbalin a Wen iti kasona.” (2 Cor. 1:19) Adda kadi aniaman a banag a di mapagtalkan ken Jesu-Kristo, ti ulidan a tultuladen ni Pablo? Awan! Iti intero a biag ken ministerio ni Jesus, kanayon a nagsao iti kinapudno. (Juan 14:6; 18:37) No ti inkaskasaba ni Jesus ket naan-anay a pudno ken mapagtalkan, nga isu met laeng ti inkaskasaba ni Pablo, mapagtalkan met ngarud ti inkaskasaba ti apostol.

Siempre, ni Jehova ti “Dios ti kinapudno.” (Sal. 31:5) Makitatayo dayta iti sumaganad nga insurat ni Pablo: “Uray pay no kasano ti kaadu dagiti kari ti Dios, nagbalinda a Wen babaen kenkuana,” kayatna a sawen, babaen ken Kristo. Ti awan pakababalawanna a kinatarnaw ni Jesus bayat nga adda ditoy daga ti nangikkat iti aniaman a panagduadua kadagiti kari ni Jehova. Intuloy ni Pablo: “Gapuna baeten met kenkuana [ni Jesus] a ti ‘Amen’ maikuna iti Dios a maipaay a dayag babaen kadatayo.” (2 Cor. 1:20) Ni Jesus ti mismo a pammatalged, wenno ti “Amen,” a pumudnonto ti tunggal kari ni Jehova a Dios!

No kasano a ni Jehova ken ni Jesus kanayon a sawenda ti kinapudno, kanayon met a salimetmetan ni Pablo ti saona. (2 Cor. 1:19) Saan nga agbaliwbaliw ti panunotna, nga  agkari “maitunos iti lasag.” (2 Cor. 1:17) Imbes ketdi, ‘nagna babaen ti espiritu.’ (Gal. 5:16) Maseknan iti pagimbagan ti sabsabali. Ti saona a Wen kaipapananna ti Wen!

TI KADI SAOM A WEN KAIPAPANANNA TI WEN?

Iti agdama, dagiti tattao a saan nga agbibiag maitunos kadagiti pagalagadan ti Biblia ket gagangay nga agkarida ngem dida tungpalen no adda tumaud a bassit a parikut wenno adda sabali a nagustuanda. Iti negosio, ti “wen” saan a kanayon a kaipapananna ti “wen,” uray no adda naisurat a tulagan. Adun ti saan a mangibilang iti panagasawa kas tungpal-biag a tulag. Imbes ketdi, ipakita ti napartak a panagadu ti bilang dagiti agdibdiborsio nga adun ti mangibilbilang a saan a serioso ti panagasawa ken nalaka laeng a tallikudan.—2 Tim. 3:1, 2.

Ti kadi met laeng saom a Wen kaipapananna ti Wen? Pudno a no dadduma, kas naikuna iti rugi daytoy nga artikulo, mabalin a kasapulan a kanselarem ti maysa a tulagan, saan a gapu ta nalaka nga agbaliwbaliw ti panunotmo, no di ket gapu kadagiti kasasaad a saanmo a kontrolado. Ngem no nagkari wenno nakitulagka, ikagumaam koma a tungpalen dayta. (Sal. 15:4; Mat. 5:37) No kasta ti aramidem, pagaammokanto kas maysa a mapagpiaran, manangsalimetmet iti saona, ken kanayon a pudno ti ibagbagana. (Efe. 4:15, 25; Sant. 5:12) No mapaneknekan dagiti tattao a mapagpiaranka iti amin a banag, mabalin nga ad-adda a dumngegda kenka no iranudmo kadakuada ti kinapudno maipapan iti Pagarian ti Dios. Gapuna, siguraduentayo ngarud a ti saotayo a Wen ket talaga a kaipapananna ti Wen!

^ par. 7 Di nagbayag kalpasan a naisuratna ti 1 Corinto, limmasat ni Pablo iti Troas iti panagturongna idiay Macedonia, a sadiay nga insuratna ti 2 Corinto. (2 Cor. 2:12; 7:5) Idi agangay, sinarungkaranna met laeng ti Corinto.