Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) MARSO 2014

Panagdaydayaw ti Pamilia—Mapagbalinmo Kadi nga Ad-adda a Makaparagsak?

Panagdaydayaw ti Pamilia—Mapagbalinmo Kadi nga Ad-adda a Makaparagsak?

“Maimasanmi unay ti agsasarita bayat ti Panagdaydayaw ti Pamiliami isu a no saanko a pasardengen ti pamiliak, rabiinto unayen no malpaskami,” kuna ti maysa nga ama a taga-Brazil. Maysa met nga ulo ti pamilia ti nagkuna a ti 10-tawenna nga anakna dina mapupuotan ti panaglabas ti oras ket kayatna pay nga ituloy ti panagadal. Apay? “Magagaran unay ti anakko isu a maay-ayatan iti panagadalmi,” kuna ti ama.

Siempre, saan nga amin nga ubbing ket magagaran ken maragsakan iti panagdaydayaw ti pamiliada. Apay? Kastoy ti kuna ti maysa nga ama a taga-Togo: “Ti panagdaydayaw ken Jehova ket saan koma a makauma.” No makauma dayta, mabalin nga ipakitana a kasapulan a mabaliwan ti pamay-an a pannakaikonduktana. Natakuatan ti adu a ti panagdaydayaw ti pamiliada ket mabalin a gubuayan ti “napalalo a ragsak,” kas iti kinuna ni Isaias maipapan iti Sabbath.—Isa. 58:13, 14.

Naamiris dagiti Kristiano nga amma a no relaks ti rikrikna ti tunggal maysa, naragragsak ti panagdaydayaw ti pamilia. Ni Ralf, nga adda annakna a tallo a babbai ken maysa a lalaki, kinunana a ti panagdaydayaw ti pamiliana ket kasla gagangay laeng a panagsasarita imbes a pormal a panagadal; ket adda amin pasetda. Ngem no dadduma, mabalin a narigat a pagtalinaeden ti atension dagiti miembro ti pamilia. Inamin ti maysa nga ina: “Napalalo nga ayatko a pagbalinen a makaparagsak ti panagdaydayaw ti pamiliami ngem awan ti gaganaygayak no dadduma.” Ania ti mabalinmo nga aramiden?

MAIBAGAY KEN AGDUDUMA KOMA TI TOPIKO

“Masapul nga ibagaybagaymi ti pamay-an a panagadalmi,” kuna ti ama a taga-Germany a dua ti annakna. Sigun met ken ni Natalia a dua ti annakna: “Ti kapatgan para iti pamiliami ket mabaliwbaliwan ti aramidenmi.” Bingaybingayen ti adu a pamilia ti panagdaydayawda iti nagduduma a paset. “Dayta ti mamagbalin a naganaygay  ti panagadalmi ta adda partisipasion ti tunggal maysa,” inlawlawag ni Cleiton, ama ti dua nga agtutubo idiay Brazil. No dakkel ti baet ti edad dagiti ubbing, mabingaybingay koma iti nagduduma nga aktibidad ti oras ti panagadal tapno maasikaso ti kasapulan ti tunggal anak. Mabalin nga ikabilangan dagiti nagannak ti espesipiko a kasapulan dagiti ubbing ken mabalin nga ibagayda ti material a pilienda ken ti pamay-an ti panagadalda.

Ania ti ar-aramiden dagiti pamilia tapno agduduma ti pamay-anda nga agadal? Rugian ti dadduma ti panagdaydayaw ti pamiliada babaen ti panagkakantada iti kanta a mangidayaw ken Jehova. “Makaparelaks dayta ken isaganana ti panunotmi para iti material a pagsasaritaanmi,” kuna ni Juan a taga-Mexico. Agpili dagiti annakna kadagiti kanta a nainaig iti kayatda a topiko iti dayta a rabii.

Sri Lanka

Adu a pamilia ti agkakadua a mangbasa iti maysa a paset ti Biblia. Tapno saan a makauma, nagduduma a miembro ti pamilia ti mangbasa iti sasao ti tunggal karakter ti Biblia. Imbaga ti maysa nga ama a taga-Japan: “Idi damo, kasla saan a natural ti kasta a panagbasa.” Ngem maragragsakan ti dua nga annakna a lallaki no makitkitada a naragsak dagiti nagannakda a mangaramid iti maysa a banag a kaduada. Dadduma met a pamilia ti mangyakto kadagiti estoria ti Biblia. “Masansan nga adda makita dagiti ubbing a detalye iti basbasaenmi a salaysay ti Biblia a dimi nasiputan,” kuna ni Roger nga addaan dua nga annak ken agnanaed iti South Africa.

South Africa

Ti sabali pay a pamay-an a mapagduduma ti topiko ket ti panagaramid iti proyekto, kas iti bassit a daong ni Noe wenno bassit a templo ni Solomon. Makapagagar a sukimaten dagiti detalye kadagiti kasta a proyekto. Kas pagarigan, pinadas daytoy ti maysa a pamilia a taga-Asia a kaduada ti anakda a lima ti tawenna agraman ti lolana. Agkakaduada iti salas a nagay-ayam iti board game maipapan iti nadumaduma a panagdaliasat ni Pablo kas misionero. Dadduma met a pamilia ti nagaramid kadagiti board game maipapan kadagiti salaysay iti libro ti Exodo. Kuna ti 19-tawenna a ni Donald a taga-Togo: “Naragragsak itan ti panagdaydayaw ti pamiliami gapu ta baliwbaliwanmi ti pamay-an ti panagadalmi ket simminged pay ti relasionmi kas pamilia.” Adda kadi mapanunotmo a proyekto tapno naragragsak ti panagdaydayaw ti pamiliayo?

Estados Unidos ti America

NAKAPATPATEG TI PANAGSAGANA

Ti agduduma ken maibagay a topiko pagbalinenna a makapainteres ti panagdaydayaw ti pamilia. Ngem ad-adda a makagunggona dayta no nakasagana ti amin. No dadduma, mabiit a mauma dagiti ubbing isu a masapul a planuen a naimbag ti ama no ania ti pilienna a topiko ken agsagana a naimbag. Kuna ti maysa nga ama: “Magunggonaan ti amin iti panagadalmi no nakasaganaak.” Kuna met ti maysa nga ama a taga-Germany nga ibagana a nasaksakbay iti pamiliana no ania ti topiko a pagsasaritaanda iti sumaruno a lawas. Idiay met Benin, kuna ti maysa nga ama nga addaan iti innem nga annak a no iyiskediulna nga agbuyada iti DVD a naibasar iti Biblia kas paset ti panagdaydayaw ti pamiliada, nasaksakbay a mangted kadagiti saludsod. Dakkel la ketdi ti maitulong ti panagsagana tapno agbalin a makagunggona ti panagdaydayaw ti pamilia.

No ammo a nasaksakbay ti pamilia ti topiko nga usigenda, mapagsasaritaanda dayta kabayatan ti lawas, ket dayta ti mangpagagar kadakuada. Ken no adda asaynment ti tunggal maysa, mariknada a karamanda iti panagdaydayaw ti pamiliada.

IKAGUMAAN A PAGBALINEN A REGULAR

Adu a pamilia ti marigatan a maaddaan iti regular a panagdaydayaw ti pamilia.

Gapu iti rigat ti panagbiag, adu nga amma ti masapul nga ag-overtime iti trabaho. Kas pagarigan, maysa nga ama a taga-Mexico ti pumanaw iti 6:00 iti agsapa tapno mapan agtrabaho ket makaawidton iti 8:00 iti rabii. Maysa pay, nalabit kasapulan a baliwan no dadduma ti eskediul ti Panagdaydayaw ti Pamilia gapu iti sabali a naespirituan nga aktibidad.

Ngem masapul nga ikagumaantayo ti maaddaan iti regular nga eskediul ti panagdaydayaw ti pamilia. Kuna ti 11-tawenna a ni Loïs a taga-Togo maipapan iti determinasion ti pamiliana: “Nupay naladaw no dadduma a mangrugi ti panagdaydayaw ti pamiliami gapu iti maysa a pasamak iti dayta nga aldaw, kanayon latta nga adda panagdaydayaw ti pamiliami.” Dayta ti makagapu nga adda dagiti pamilia a mangyiskediul iti panagdaydayaw ti pamiliada iti rugrugi ti lawas tapno no bilang adda di ninamnama a mapasamak, mabalinda latta ti agadal iti sabali nga aldaw.

Ti termino a “panagdaydayaw ti pamilia,” ipakpakitana a paset dayta ti panagdaydayawyo ken Jehova. Linawas koma a tunggal miembro ti pamiliayo ket mangipaay ken Jehova ‘kadagiti urbon a toro dagiti bibigna.’ (Os. 14:2) Sapay koma ta agbalin a makaparagsak dayta para iti amin a kameng ti pamiliayo, “ta ti rag-o ni Jehova isu ti salindegyo.”—Neh. 8:9, 10.