Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan—Pagadalan nga Edision  |  Pebrero 2014

‘Kitaem ti Kinamakaay-ayo ni Jehova’

‘Kitaem ti Kinamakaay-ayo ni Jehova’

Mabalin a dakkel ti epektona kadatayo dagiti narigat a kasasaad. Mabalin a dagita ti mangburibor iti panunottayo, mangibus iti pigsatayo, ken mangapektar iti mismo a panangmatmattayo iti biag. Naipasango idi ni Ari David iti nagkauna nga Israel iti adu a pakarigatan. Kasanona a nadaeran dagita? Kinunana iti maysa a makatukay-rikna a salmo: “Babaen iti timekko, ken Jehova immasugak iti tulong; babaen iti timekko, ken Jehova nagikkisak iti parabur. Iti sanguananna imbukbukbokko ti pannakaseknanko; iti sanguananna nagtultuloyak a mangibaga ti maipapan iti bukodko a rigat, idi a ti espirituk natalipungaw iti unegko. Iti kasta sika ammom ti dalanko.” Wen, sipapakumbaba a nagkararag ni David iti Dios tapno agpatulong.—Sal. 142:1-3.

No adda nadagsen a parikut ni David, sipapakumbaba nga agpatulong ken Jehova iti kararag

Inkanta ni David iti sabali pay a salmo: “Maysa a banag ti kiniddawko ken Jehova—isu dayta ti sapulekto, nga agnaedak koma iti balay ni Jehova iti amin nga al-aldaw ti panagbiagko, tapno kitaek ti kinamakaay-ayo ni Jehova ken tapno imatangak ti templona buyogen ti panangtagipateg.” (Sal. 27:4) Saan a Levita ni David, ngem iladawam isuna nga agtaktakder iti ruar ti nasantuan a paraangan iti asideg ti tabernakulo, ti mismo a sentro ti pudno a panagdaydayaw. Agyamyaman unay ni David nga uray la tinarigagayanna ti agtalinaed sadiay tapno ‘makitana ti kinamakaay-ayo ni Jehova.’

Ti sao a “kinamakaay-ayo” ket nainaig iti kasasaad a “nasayaat wenno makaay-ayo iti panunot, rikna, ken sentido.” Kanayon nga inap-apresiar ni David ti urnos ti Dios iti pudno a panagdayaw. Nasayaat ngarud nga isaludsodtayo iti bagbagitayo, ‘Marikriknak met kadi ti kas iti narikna ni David?’

‘TAGIPATGENTAYO’ TI URNOS TI DIOS

Iti kaaldawantayo, saanen a babaen ti literal a pasdek a makaadanitayo ken Jehova no di ket babaen ti naindaklan a naespirituan a templo ti Dios—ti sagrado nga urnos ti pudno a panagdayaw. * No ‘imatangantayo buyogen ti panangtagipateg’ daytoy nga urnos, ‘makitatayo met ti kinamakaay-ayo ni Jehova.’

Usigentayo ti gambang nga altar ti daton a mapuoran nga adda iti sanguanan ti pagserkan ti tabernakulo. (Ex. 38:1, 2; 40:6) Dayta nga altar irepresentarna ti sidadaan a panangawat ti Dios iti natauan a biag ni Jesus kas daton. (Heb. 10:5-10) Panunotem ti kaipapanan dayta kadatayo! Insurat ni apostol Pablo: “Idi datayo ket kabkabusor, naikappiatayo iti Dios babaen ti ipapatay ti Anakna.” (Roma 5:10) No addaantayo iti pammati iti naiparukpok a dara ni Jesus, anamongan ken pagtalkannatayo ti Dios kas gagayyemna. Kas resultana, agbalintayo a ‘nasinged ken Jehova.’—Sal. 25:14.

Gapu iti ‘pannakapunas dagiti basoltayo,’ mapasarantayo ti ‘panawen ti pannakabang-ar manipud ken Jehova.’ (Ara. 3:19) Mayarigtayo iti maysa a balud nga agbabbabawi iti naaramidanna ken naan-anay a nagbalbaliw bayat nga ur-urayenna ti pannakabitayna. Nakita daytoy ti maysa a naasi nga ukom ket natignay a mangabsuelto iti basol ti lalaki—ket maikkaten ti naipataw kenkuana a dusa nga ipapatay. Nabang-aran ken naragsakan la ketdi dayta a balud! Kas iti dayta nga ukom, kaasian ni Jehova dagiti agbabbabawi a tattao ket ikkatenna ti dusa nga ipapatay a naipataw kadakuada.

MARAGSAKAN ITI PUDNO A PANAGDAYAW

Ti sumagmamano nga aspeto ti pudno a panagdayaw a nakita ni David iti balay ni Jehova ket ti dadakkel a taripnong dagiti padana nga Israelita, ti publiko a pannakaibasa ken pannakailawlawag ti Linteg, ti pannakapuor ti insienso, ken ti panangipaay dagiti papadi ken Levita iti sagrado a panagserbi. (Ex. 30: 34-38; Num. 3:5-8; Deut. 31:9-12) Dagitoy nga aspeto ti pudno a panagdayaw iti nagkauna nga Israel ket adda kaibatoganda iti kaaldawantayo.

Kas idi un-unana, maibagatayo met nga “anian a nagimbag ken anian a makaay-ayo a dagiti agkakabsat agnaedda a sangsangkamaysa buyogen ti panagtutunos!” (Sal. 133:1) Dakkel ti panagrang-ay ti sangalubongan a ‘timpuyog ti panagkakabsattayo.’ (1 Ped. 2:17) Maibasbasa ken mailawlawag ti Sao ti Dios kadagiti gimongtayo. Babaen ti organisasionna, mangyur-urnos ni Jehova iti makagunggona a programa ti panangisuro. Makagun-odtay met iti aglaplapusanan a naespirituan a taraon kadagiti nayimprenta a publikasion para iti personal a panagadaltayo ken iti pamiliatayo. Kinuna ti maysa a miembro ti Bagi a Manarawidwid: “Gapu iti panangmennamennak iti Sao ni Jehova, panangut-utobko iti kaipapananna, ken panangbirokko iti pannakatarus ken pannakaawat, nakagun-odak iti naruay a naespirituan a kinabaknang ken kinatalged.” Wen, posible a ‘ti pannakaammo agbalin a makaay-ayo iti kararuatayo.’—Prov. 2:10.

Iti kaaldawantayo, inaldaw a dumandanon ken Jehova dagiti makaay-ayo a kararag dagiti adipenna. Ibilangna dagita kas nabanglo a sayamusom ti insienso. (Sal. 141:2) Anian a makaay-ayo a panunoten a maragsakan ni Jehova a Dios no sipapakumbaba nga umadanitayo kenkuana babaen ti kararag!

Inkararag ni Moises: “Ti kinamakaay-ayo ni Jehova a Diosmi adda koma kadakami, ken ti aramid dagiti imami ipasdekmo a sititibker.” (Sal. 90:17) Bendisionan ni Jehova ti aramidtayo bayat a sireregta nga itungtungpaltayo ti ministeriotayo. (Prov. 10:22) Mabalin nga addan natulongantayo a mangammo iti kinapudno. Mabalin nga adun a tawen a nakapagibturtayo iti ministerio iti laksid ti panangyaleng-aleng dagiti tattao, pisikal a sakit, emosional a saem, wenno pannakaidadanes. (1 Tes. 2:2) Nupay kasta, saan kadi a makitkitatayo latta ti “kinamakaay-ayo ni Jehova” ken ammotayo a maay-ayo isuna kadagiti panagreggettayo?

“Ni Jehova ti bingay ti naituding a binglayko ken ti kopak,” inkanta ni David. “Petpetpetam a siiirut ti pannaka-bunotko [wenno, tawidko]. Dagiti met laeng pagrukod a banteng naitumpong kaniak kadagiti makaay-ayo a disso.” (Sal. 16:5, 6) Agyamyaman ni David gapu iti ‘bingayna,’ ti naanamongan a relasionna ken Jehova ken ti pribilehiona a makapagserbi kenkuana. Kas ken David, mabalin nga adda met dagiti pakarigatantayo, ngem nakaad-adu ti sagsagrapentayo a naespirituan a bendision! Gapuna, itultuloytayo koma a pakaragsakan ti pudno a panagdayaw ken kanayon a ‘kumitatayo buyogen ti panangtagipateg’ iti naespirituan a templo ni Jehova.

^ par. 6 Kitaen Ti Pagwanawanan a Hulio 1, 1996, panid 14-24.