Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) PEBRERO 2014

Ni Jehova—Manangipaay iti Kasapulantayo ken Manangsalaknib Kadatayo

Ni Jehova—Manangipaay iti Kasapulantayo ken Manangsalaknib Kadatayo

“Agsipud ta kaniak insaadna ti panagayatna, isu ilisikto met. Salaknibakto agsipud ta naammuanna ti naganko.”—SAL. 91:14.

1, 2. Ania ti nagduduma a situasion dagiti pamilia a naggapuantayo? Ania ti nagduduma a pamay-an a naammuantayo ti kinapudno?

NI Jehova ti namunganay iti urnos ti pamilia. (Efe. 3:14, 15) Ngem uray no nagtaudtayo iti maymaysa a pamilia, nagduduma ti kababalin ken situasiontayo. Mabalin nga addaka iti poder dagiti nagannakmo sipud kinaubingmo agingga ita nga adultokan. Ngem nalabit natayen ti nagannak ti dadduma gapu iti sakit, aksidente, wenno dadduma pay a trahedia. Adda pay ketdi dagiti saan a makaam-ammo kadagiti nagannakda.

2 Kas paset ti pamilia dagiti agdaydayaw ken Jehova, nagduduma met ti pamay-an a naammuantayo ti kinapudno. Mabalin a dagiti nagannakmo ti nangisuro kenka kadagiti nadiosan a prinsipio. (Deut. 6:6, 7) Wenno mabalin a maysaka kadagiti rinibu a nakaammo iti kinapudno babaen ti panangasaba dagiti Saksi ni Jehova.—Roma 10:13-15; 1 Tim. 2:3, 4.

3. Ania ti pagpapadaantayo amin?

3 Uray adu ti nagdudumaantayo, adda banag a pagpapadaantayo. Agsagsagabatayo amin gapu iti panagsukir ni Adan ket tinawidtayo ti kinaimperpekto, basol, ken ipapatay. (Roma 5:12) Nupay kasta, kas pudno nga agdaydayaw iti Dios, mabalintay nga awagan ni Jehova kas ‘Ama.’ Idi nagkauna a tiempo, maibaga idi ti  ili a pinili ti Dios ti sasao a nailanad iti Isaias 64:8: “O Jehova, sika ti Amami.” Ket iti rugi ti modelo a kararag ni Jesus, kinunana: “Amami nga adda iti langlangit, masantipikar koma ti naganmo.”—Mat. 6:9.

4, 5. Ania dagiti punto nga usigentayo tapno umuneg ti panagayattayo iti Amatayo a ni Jehova?

4 Ay-aywanan ken salsalaknibannatayo ti nailangitan nga Amatayo kas ili nga umaw-awag iti naganna buyogen ti pammati. Sigun iti salmista, kastoy ti kinuna ni Jehova: “Agsipud ta kaniak [ti pudno a managdaydayaw] insaadna ti panagayatna, isu ilisikto met. Salaknibakto agsipud ta naammuanna ti naganko.” (Sal. 91:14) Wen, siaayat nga ispalennatayo ni Jehova a Dios kadagiti kabusortayo ken salaknibannatayo kas ilina tapno saantayo a madadael.

5 Tapno umuneg ti panagayattayo iti nailangitan nga Amatayo a ni Jehova, usigentayo no kasano nga isu ti (1) Manangipaay iti kasapulantayo, (2) Manangsalaknib kadatayo, ken (3) kasingedan a Gayyemtayo. Bayat nga us-usigentayo dagitoy a punto, makatulong no mennamennaentayo ti relasiontayo iti Dios ken ammuentayo no kasano a maidaydayawtayo ni Jehova kas Amatayo. Makatulong met no panunotentayo dagiti bendision nga ipaayna kadagidiay umadani kenkuana.—Sant. 4:8.

NI JEHOVA TI NAINDAKLAN A MANANGIPAAY

6. Ania ti maysa a pamay-an a ni Jehova ti Manangted iti “tunggal naimbag a sagut”?

6 Insurat ni adalan a Santiago: “Tunggal naimbag a sagut ken tunggal naan-anay a rangkap aggapu iti ngato, ta bumaba dayta manipud iti Ama dagiti nailangitan a lawag.” (Sant. 1:17) Ti biag ket nakaskasdaaw a sagut manipud ken Jehova. (Sal. 36:9) No usarentayo ti biagtayo a mangaramid iti pagayatanna, agsagraptayo iti adu a bendision ita ken agbiagtayto nga agnanayon iti baro a lubong. (Prov. 10:22; 2 Ped. 3:13) Ngem kasano koma a posible dayta idinto ta natawidtayo dagiti epekto ti basol ni Adan?

7. Ania ti inaramid ti Dios tapno maaddaantayo iti nasinged a relasion kenkuana?

7 Ipakpakita ni Jehova iti adu a pamay-an nga isu ti Naindaklan a Manangipaay kadagiti kasapulantayo. Kas pagarigan, gapu iti di kaikarian a kinamanangngaasina, nangipaay iti probision tapno maispaltayo. Managbasoltayo amin ken natawidtayo ti kinaimperpekto manipud iti umuna nga amatayo a ni Adan. (Roma 3:23) Ngem gapu iti ayat ni Jehova, nangaramid iti addang tapno maaddaantayo iti nasinged a relasion kenkuana. “Babaen itoy naiparangarang ti ayat ti Dios iti kasasaadtayo,” insurat ni apostol Juan, “agsipud ta ti Dios imbaonna ti bugbugtong nga Anakna ditoy lubong tapno magun-odantayo ti biag babaen kenkuana. Ti ayat adda itoy a banag, saan a gapu ta inayattayo ti Dios, no di ket gapu ta inayatnatayo ket imbaonna ti Anakna a kas pangikappia a sakripisio maipaay kadagiti basoltayo.”—1 Juan 4:9, 10.

8, 9. Idi tiempo da Abraham ken Isaac, kasano a pinaneknekan ni Jehova nga isu ti Naindaklan a Manangipaay? (Kitaen ti ladawan iti rugi ti artikulo.)

8 Agarup 1,900 a tawen sakbay a mayanak ni Jesus, adda maysa a pasamak iti biag ni Abraham a mangipakita no kasano a siaayat nga ipaayto ni Jehova ti agnanayon a biag iti amin a natulnog a tattao. Ilawlawag ti Hebreo 11:17-19: “Babaen iti pammati, idi isu nasubok, ni Abraham kaslanan indaton ni Isaac, ket ti tao a siraragsak nga immawat kadagiti kari ginandatna nga idaton ti bugbugtong nga anakna, nupay naikuna kenkuana: ‘Ti maawaganto a “bin-im” ket babaento ken Isaac.’ Ngem pinanunotna nga isu kabaelan ti Dios nga ibangon uray pay manipud kadagiti natay; ket manipud sadiay isu inawatna met iti mangiladawan a pamay-an.” Nabatad no ania ti iladladawan daytoy: Impaay ni Jehova ti Anakna, ni Jesu-Kristo, agpaay iti sangatauan.—Basaen ti Juan 3:16, 36.

9 Mailadawam kadi ti rikna ni Isaac idi isu ket saanen a kasapulan a matay tapno maidaton? Agyamyaman la ketdi iti Dios ta  nangipaay iti kasukatna—maysa a kalakian a karnero a naisalat iti kasamekan. (Gen. 22:10-13) Gapuna, naawagan dayta a lugar iti “Jehova-jireh,” kayatna a sawen, “Ni Jehova ti Mangipaay.”—Gen. 22:14.

PROBISION TAPNO MAIKAPPIA ITI DIOS

10, 11. Siasino dagiti mangidadaulo iti “ministerio ti pannakikappia,” ken kasanoda nga ar-aramiden dayta?

10 No mennamennaentayo ti amin nga impaay kadatayo ni Jehova, mabigbigtayo a ditay makapagbalin a gayyem ti Dios no saan a gapu iti sakripisio ni Jesus. Insurat ni Pablo: “Isu daytoy ti impatomi, a ti maysa a tao natay maipaay iti isuamin; no kasta, ngarud, natay ti isuamin; ket isu natay maipaay iti isuamin tapno dagidiay nga agbiag saanda koman nga agbiag nga agpaay iti bagbagida, no di ket agpaay kenkuana a natay maipaay kadakuada ken naibangon.”—2 Cor. 5:14, 15.

11 Maragsakan dagiti nagkauna a Kristiano nga immawat iti “ministerio ti pannakikappia” gapu ta ay-ayatenda ti Dios ken agyamyamanda iti nakadakdakkel a pribilehioda nga agserbi kenkuana. Gapu iti trabahoda a panangasaba ken panagaramid iti ad-adalan, naaddaan dagiti naemma a tattao iti gundaway a maikappia iti Dios, makigayyem kenkuana, ken inton agangay, agbalin a naespirituan nga annakna. Iti agdama, dayta met laeng a ministerio ti itungtungpal dagiti napulotan nga ad-adipen ni Jehova. Agserserbida kas embahador ti Dios ken ni Kristo. Kas resulta dayta a trabaho, nayadani ken Jehova dagiti naemma a tattao ken nagbalinda nga ad-adipenna.—Basaen ti 2 Corinto 5:18-20; Juan 6:44; Ara.13:48.

12, 13. Kasanotayo a maipakita nga agyamyamantayo iti adu a probision ni Jehova?

12 Amin a Kristiano nga addaan iti naindagaan a namnama ipakpakitada ti panagyamanda ken Jehova kas Naindaklan a Manangipaay babaen ti pannakitinnulongda kadagiti napulotan a mangikasaba iti Pagarian. Iti daytoy a trabaho, us-usarentayo ti Biblia, ti maysa pay a nakaskasdaaw a sagut ti Dios. (2 Tim. 3:16, 17) Babaen ti epektibo a panangusartayo iti naipaltiing a Sao ti Dios, ipapaayantayo dagiti tattao iti gundaway a maaddaan iti biag nga agnanayon. Tapno agballigitayo iti daytoy a trabaho, nasken nga agpannuraytayo iti sabali pay a probision ni Jehova—ti nasantuan nga espirituna. (Zac. 4:6; Luc. 11:13) Kas ipakita ti Tinawen a Libro Dagiti Saksi ni Jehova, nakaskasdaaw dagiti resulta ti trabaho a panangasaba. Anian a nagdakkel a pribilehio ti makipaset iti daytoy a trabaho a mangidaydayaw iti Amatayo ken Manangipaay kadagiti kasapulantayo!

13 Maigapu iti amin nga ipapaay ti Dios, nasayaat nga isaludsodtayo iti bagbagitayo: ‘Ar-aramidek kadi ti amin a kabaelak iti ministerio tapno maipakitak ken Jehova ti naimpusuan a panagyamanko kadagiti probisionna? Ania pay ti parang-ayek tapno ad-adda nga epektibo ti panangikasabak iti naimbag a damag?’ Maipakitatayo ti panagyamantayo kadagiti nakaskasdaaw a probision ti Dios no yun-unatayo dagiti interes ti Pagarian. No kasta ti aramidentayo, siguraduen ni Jehova a maipaay ti amin a kasapulantayo. (Mat. 6:25-33) Gapu iti ayat ti Dios, sigurado a kayattayo nga aramiden ti amin a kabaelantayo tapno maay-ayo ken maparag-otayo ti pusona.—Prov. 27:11.

14. Kasano a ni Jehova ti Manangispal iti ilina?

14 Inkanta ti salmista a ni David: “Naparigatanak ken napanglawak. Ni met laeng Jehova sipapanunot kaniak. Sika ti tulongko ken ti Manangilisi kaniak.” (Sal. 40:17) Namin-adun nga inispal ni Jehova dagiti adipenna kas maysa a grupo, nangruna no siuulpit ken di agressat nga idaddadanes ida dagiti kabusorda. Agyamantayo ta tultulongannatayo ti Dios kadagita a narigat a kasasaad ken kanayon nga ipapaayna ti naruay a naespirituan a kasapulantayo!

 MANGIPAAY NI JEHOVA ITI PANNALAKNIB

15. Mangted iti pagarigan no kasano a salakniban ti naayat nga ama ti anakna.

15 Saan laeng a dagiti kasapulan ti annakna ti ipaay ti naayat nga ama no di ket salaknibanna pay ida. Natural laeng nga ikagumaanna nga ispalen ida no adda peggad. Malagip ti maysa a kabsat a lalaki ti maysa a pasamak idi isu ket ubing pay. Agaw-awidda idin ken tatangna manipud iti pangasabaan idi makadanonda iti maysa a waig. Gapu ta nagtudo iti napigsa iti dayta nga agsapa, dimmakkel ti danum ket makaballasiwda laeng babaen ti panagtalaytayda kadagiti bato. Immuna isuna nga immaddang, ngem naikaglis ket namindua a natnag iti danum. Imbag laengen ta nagammatan ni tatangna ti takiagna isu a saan a nalmes. Iti umasping a pamay-an, is-ispalennatayo ti nailangitan nga Amatayo manipud iti kasla naapres a waig daytoy a nadangkes a lubong ken iti agturturay iti dayta a ni Satanas. Wen, ni Jehova ti kasayaatan a Manangsalaknib!—Mat. 6:13; 1 Juan 5:19.

16, 17. Kasano a tinulongan ken sinalakniban ni Jehova dagiti Israelita idi nakigubatda kadagiti Amalekita?

16 Impakita ni Jehova ti naayat a pannalaknibna idi inispalna dagiti Israelita manipud pannakaadipenda idiay Egipto ken simimilagro a sinalaknibanna ida bayat ti ibaballasiwda iti Nalabaga a Baybay idi 1513 B.C.E. Iti panagdaliasatda iti let-ang nga agturong iti Bantay Sinai, nakadanon dagiti Israelita idiay Refidim.

17 Gapu iti padto ti Dios iti Genesis 3:15, mabalin a makapungpungtot ni Satanas bayat nga agbirbirok iti gundaway a mangraut kadagiti awanan gaway nga Israelita. Inaramatna dagiti Amalekita a kabusor ti ili ti Dios. (Num. 24:20) Ngem panunotem no ania ti inaramid ni Jehova babaen iti uppat a matalek a lallaki—da Josue, Moises, Aaron, ken Hur. Bayat a makigubgubat ni Josue kadagiti  Amalekita, adda met iti asideg a turod da Moises, Aaron, ken Hur. No itag-ay ni Moises dagiti imana, mangabak dagiti Israelita. Isu a no maktangan dagiti imana, tulongan da Aaron ken Hur a mangitag-ay iti dayta. Iti tulong ken pannalaknib ni Jehova, “pinarukma ni Josue ti Amalek ken dagiti tattaona.” (Ex. 17:8-13) Nangbangon ni Moises iti maysa nga altar sadiay ket inawaganna iti “Jehova-nissi,” a kaipapananna, “Ni Jehova ti Pagilasinan a Teddekko.”—Basaen ti Exodo 17:14, 15.

SALAKNIB MANIPUD ITI IRARAUT NI SATANAS

18, 19. Kasano a salsalakniban ita ti Dios dagiti adipenna?

18 Salsalakniban ni Jehova dagiti mangay-ayat ken agtultulnog kenkuana. Kas kadagiti Israelita idi addada idiay Refidim, manamnamatayo a salaknibannatayo ti Dios manipud kadagiti kabusortayo. Namin-adun a sinalaknibannatayo kas grupo, ken inispalnatayo manipud iti iraraut ti Diablo. Usigem ti adu a gundaway a sinalaknibanna dagiti kakabsattayo a nangsalimetmet iti neutral a takderda. Kasta ti napasamak bayat ti panagturay dagiti Nazi idiay Germany ken iti dadduma pay a pagilian manipud idi dekada ‘30 agingga iti nasapa a paset ti dekada ‘40. No basaen ken utobentayo dagiti kapadasan iti Tinawen a Libro ken dagiti pakasaritaan ti biag a mangipakita no kasano a salsalakniban ti Dios dagiti maidaddadanes nga adipenna, tumibker ti panagtalektayo ken Jehova kas Kamangtayo.—Sal. 91:2.

Mabalin nga usaren ni Jehova dagiti kapammatiantayo a tumulong kadatayo nga agtalinaed a matalek kadagiti narigat a kasasaad (Kitaen ti parapo 18-20)

19 Salsalaknibannatayo met ni Jehova babaen ti panangipaayna kadagiti naayat a pammalagip manipud iti organisasionna ken kadagiti publikasiontayo. Panunotem no kasano a dagitoy a palagip sinalaknibannatayo iti napalabas a tawtawen. Bayat a mailumlumlom daytoy a lubong iti nalulok a kababalin ken iti panagbuya iti pornograpia, mangipapaay ni Jehova kadagiti palagip ken praktikal a tulong tapno masalaknibantayo manipud kadagiti moral a peggad. Kas pagarigan, ipapaayannatayo iti naamaan a balakad no kasano a liklikan ti dakes a pannakitimpuyog iti panagusar iti Internet. *1 Cor. 15:33.

20. Ania a panangiwanwan ken pannalaknib ti maaw-awattayo iti uneg ti kongregasion?

20 Kasanotay a maipakita a talaga a “sinursuruan[natayo] ni Jehova”? Babaen ti panagtulnogtayo kadagiti bilinna. (Isa. 54:13) Ti kongregasion ket maysa a natalged a lugar a pakaaw-awatantayo iti panangiwanwan ken pannalaknib. Dagiti matalek a lallaki nga agserserbi kas papanglakayen ipapaayandatayo iti Nainkasuratan a balakad ken tulong. (Gal. 6:1) Babaen kadagitoy a “sagut a tattao,” siaayat nga ay-aywanannatayo ni Jehova. (Efe. 4:7, 8) Ania koma ti reaksiontayo no balakadandatayo dagiti panglakayen? Situtuloktayo koma nga agtulnog tapno bendisionannatayo ni Jehova.—Heb. 13:17.

21. (a) Ania koma ti determinasiontayo? (b) Ania ti mausig iti sumaruno nga artikulo?

21 Determinadotayo koma nga agpannuray iti tulong ti nasantuan nga espiritu ken agpaiwanwan iti nailangitan nga Amatayo. Masapul met nga utobentayo ti biag ti Anakna a ni Jesu-Kristo, nga ikagumaantayo a tuladen ti nakasaysayaat nga ulidanna. Gapu iti panagtulnogna agingga iti ipapatayna, inawat ni Jesus ti dakkel a gunggona. (Fil. 2:5-11) Kas kenkuana, magunggonaantayo met no agtalektayo ken Jehova iti isuamin a pusotayo. (Prov. 3:5, 6) Isu a kanayon koma nga agpannuraytayo ken Jehova kas awan kaaspingna a Manangipaay iti kasapulantayo ken Manangsalaknib kadatayo. Anian a rag-o ken dakkel a pribilehio ti agserbi kenkuana! Umuneg ti panagayattayo iti Amatayo bayat nga usigentayo ti maikatlo a pamay-an nga ipakpakitana ti panangipategna kadatayo—ti pannakigayyemna. Ilawlawag ti sumaruno nga artikulo no kasano a ni Jehova ti kasingedan a Gayyemtayo.

^ par. 19 Ti dadduma kadagita a pammalagip ket masarakan iti artikulo nga “Usaren a Nainsiriban ti Internet” iti Pagwanawanan nga Agosto 15, 2011, panid 3-5 ken iti artikulo nga “Agannad Kadagiti Silo ti Diablo!” ken “Agtakder a Sititibker ken Liklikan Dagiti Palab-og ni Satanas!” iti Pagwanawanan nga Agosto 15, 2012, panid 20-29.