Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan —Pagadalan nga Edision

  |  Enero 2014

“Umay Koma ti Pagariam”—Ngem Kaano?

“Umay Koma ti Pagariam”—Ngem Kaano?

“Inton makitayo dagitoy amin a banag, ammuenyo nga isu asidegen kadagiti ruangan.”—MAT. 24:33.

1, 2. (a) Ania ti mabalin a mangapektar iti panagkitatayo? (b) Ania ti masiguradotayo mainaig iti Pagarian ti Dios?

KAS mabalin a napaliiwyon, masansan nga agduduma a detalye ti malagip dagiti nakasaksi iti maysa a pasamak. Mabalin met a marigatan ti maysa a tao a manglagip iti eksakto nga imbaga ti doktor kalpasan ti panagpadayagnosna. Wenno mabalin a marigatan ti maysa a mangbirok iti tulbek wenno anteohosna nupay adda laeng gayam iti abayna. Ti mabalin a makagapu kadagitoy ket isu ti kuna dagiti managsirarak a maysa a kita ti “pannakabulsek”—di pannakadlaw iti maysa a banag, wenno pannakalipat iti dayta, gapu ta naipamaysa ti panunot iti sabali a banag. Naikuna a normal daytoy a paset ti panagandar ti utektayo.

2 Agpaspasar met ita ti adu a tattao iti umasping a “kita ti pannakabulsek” no maipapan iti kaipapanan ti paspasamak iti lubong. Mabalin nga admitirenda a dakkel ti nagbalbaliwan ti lubong nanipud 1914, ngem saanda a mabigbig ti talaga a kaipapanan dagitoy a pasamak. Kas agad-adal iti Biblia, ammotayo a dimteng ti Pagarian ti Dios idi 1914 idi naitrono ni Jesus kas Ari idiay langit. Ngem ammotayo a saan laeng a dayta ti ramanen ti sungbat iti kararag nga “Umay koma ti pagariam. Maaramid koma ti pagayatam, kas sadi langit, kasta met iti daga.”  (Mat. 6:10) Karaman iti dayta ti panagpatingga ti agdama a dakes a sistema. Inton mapasamak dayta, maaramiden ti pagayatan ti Dios ditoy daga, kas sadi langit.

3. Ania ti pagimbagan ti panangadaltayo iti Sao ti Dios?

3 Gapu ta regular nga ad-adalentayo ti Sao ti Dios, makitkitatayo a matungtungpal itan dagiti padto. Dayta ti nakaidumaantayo iti kaaduan a tattao. Adu unay ti pakakumikomanda isu a saanda a makita ti nalawag nga ebidensia nga agturturayen ni Kristo nanipud 1914 ken asidegen nga ibanagna ti panangukom ti Dios. Ngem usigem dagitoy a personal a saludsod: No nabayagkan nga agserserbi iti Dios, sipapanunotka kadi ken maseknanka pay laeng iti kaipapanan ti tiempo a pagbibiagantayo kas idi umuna a tawtawen ti panagserbim? No nabiitka pay a Saksi, ania ti nakaipamaysaan ti panunotmo? Aniaman ti sungbatmo, ammuentayo ti tallo a napateg a rason no apay a makapagtalektayo nga asidegen nga agtignay ti Ari a naan-anay a mangitungpal iti pagayatan ti Dios ditoy daga.

AGPARANG DAGITI KUMAKABALIO

4, 5. (a) Ania ti ar-aramiden ni Jesus nanipud 1914? (Kitaen ti ladawan iti rugi ti artikulo.) (b) Ania ti isimsimbolo dagiti tallo a kumakabalio? Kasano a natungpal daytoy a padto?

4 Idi 1914, ni Jesus—a nailadawan a nakasakay iti puraw a kabalio—ket naitrono kas Ari idiay langit. Dagus a nagtignay tapno an-anayenna ti panangparmekna iti dakes a sistema ni Satanas. (Basaen ti Apocalipsis 6:1, 2.) Ipakita ti padto iti Apocalipsis kapitulo 6 a kalpasan a maipasdek ti Pagarian ti Dios, napartak a dumakes ti kasasaad ditoy lubong gapu iti gubat, kinakirang ti taraon, angol, ken dadduma pay a pakaigapuan ti ipapatay. Dagitoy a didigra ti isimsimbolo dagiti tallo a kumakabalio a sumarsaruno ken Jesu-Kristo.—Apoc. 6:3-8.

5 Kas naipadto, ti talna ket ‘naikkat iti daga,’ nupay ikarkari dagiti nasion nga agtitinnulongda ken itandudoda ti talna. Ti Gubat Sangalubongan I ket pangrugian laeng ti nakaam-amak a gubgubat, kas ipakita dagiti nabiit pay a paspasamak. Nupay dakkel ti rimmang-ayan ti ekonomia ken siensia nanipud 1914, saan latta a natalged ti lubong gapu iti kinakirang ti taraon. Maysa pay, minilion ti matmatay iti tinawen gapu iti amin a kita ti angol, natural a kalamidad, ken dadduma pay a ‘makapapatay a saplit.’ Iti intero a pakasaritaan ti tao, ita laeng a kastoy ti kasaknap, kasansan, ken kakaro dagitoy a pasamak. Mabigbigmo kadi ti kaipapanan dagitoy?

Bayat nga agpatpataray dagiti kumakabalio, kumarkaro a kumarkaro ti kasasaad ditoy lubong (Kitaem ti parapo 4, 5)

6. Siasino dagiti nangpadpadaan iti pannakatungpal ti padto ti Biblia? Ania ti inaramidda idi natarusanda ti kaitungpalanna?

6 Gapu iti ibebettak ti Gubat Sangalubongan I ken panagwaras ti trangkaso Espaniol, nagbaliw ti nakaiturongan ti panunot ti adu a tattao. Ngem para kadagiti napulotan a Kristiano, ninamnamada a ti tawen 1914 ti pagpatinggaan ti Panawen dagiti Gentil, wenno ti “naituding a pampanawen dagiti nasion.” (Luc. 21:24) Nupay saanda nga ammo ti eksakto a pannakatungpal daytoy a padto, ammoda nga adda napateg a mapasamak iti 1914 mainaig iti panagturay ti Dios. Idi natarusanda ti kaitungpalan ti padto, situtured nga inkasabada a nangrugin ti panagturay ti Dios. Ngem ti panagreggetda a mangiwaragawag iti Pagarian ket nagresulta iti nakaro a pannakaidadanesda. Ti kasta a pannakaidadanes a napasamak iti adu a pagilian ket maysa pay a kaitungpalan ti padto ti Biblia. Kadagiti simmaganad a dekada, dagiti bumusbusor iti Pagarian ‘nangibalabalada iti riribuk iti nagan ti linteg.’ Dinangran, imbalud, ken pinapatayda pay ketdi dagiti kakabsattayo babaen ti panangbitay, panangpaltog, wenno panangpugotda kadakuada.—Sal. 94:20; Apoc. 12:15.

7. Apay a saan a maawatan ti kaaduan a tattao ti pudno a kaipapanan ti agdama a paspasamak ditoy lubong?

 7 Nupay nakaad-adun ti ebidensia nga agturturayen idiay langit ti Pagarian ti Dios, apay nga adu latta ti saan a mangakseptar iti kaipapanan dayta? Apay a saanda a mabigbig a ti paspasamak iti lubong ket kaitungpalan dagiti espesipiko a padto iti Biblia a nabayagen nga iwarwaragawag ti ili ti Dios? Saan ngata a gapu ta naipamaysa ti panunotda iti makitkita laeng dagiti matada? (2 Cor. 5:7) Gapu ngata ta okupadoda kadagiti inaldaw a trabahoda isu a saanda a makitkita ti ar-aramiden ti Dios? (Mat. 24:37-39) Nabulsek ngata ti dadduma kadakuada gapu kadagiti propaganda ni Satanas? (2 Cor. 4:4) Kasapulan ti pammati ken naespirituan a pannakaawat tapno makitatayo no ania ti ar-aramiden ti Pagarian ti Dios. Anian a ragsaktayo ta saantayo a bulsek iti kaipapanan ti agdama a paspasamak!

KUMARKARO A KUMARKARO TI KINADAKES

8-10. (a) Kasano a matungtungpal ita ti 2 Timoteo 3:1-5? (b) Apay a maikunatayo a kumarkaro ti kinadakes?

8 Ti maikadua a rason nga ammotayo nga asidegen nga agturay ti Pagarian ti Dios ditoy daga ket: Dumakes a dumakes ti kasasaad ti lubong. Iti agarup 100 a tawenen, makitkitatayo ti pannakatungpal dagiti kasasaad a naipadto iti 2 Timoteo 3:1-5. Dagiti kababalin a nailadawan iti dayta ket agsaksaknap ken kumarkaro itan iti intero a lubong. Mapalpaliiwmo kadi dayta? Usigentayo ti sumagmamano a pagarigan a mangpaneknek iti daytoy.—Basaen ti 2 Timoteo 3:1, 13.

9 Pagdiligenyo dagiti bambanag a maibilang a di umiso idi dekada 1940 wenno 1950 ken ti mapaspasamak kadagiti eskuelaan, pagtrabahuan, paglinglingayan, isports, ken kadagiti uso nga agraraira ita. Gagangay itan ti nakaro a kinaranggas ken immoralidad. Agiinnartap dagiti tattao nga agbalin nga ad-adda a naranggas, immoral, wenno naulpit. Ti maibilang a naalas a pabuya iti TV idi dekada 1950 ket maibilang itan a mayanatup a buyaen ti intero a pamilia. Ken mapalpaliiw ti kaaduan a napigsa ti impluensia dagiti homoseksual no iti lubong ti paglinglingayan ken kadagiti uso. Pagpannakkelda pay ketdi iti publiko ti kabibiagda. Anian a yamantayo ta ammotayo  ti panangmatmat ti Dios kadagita a banag!—Basaen ti Judas 14, 15.

10 Pagdiligentayo met ti maibilang a rebelioso a kababalin dagiti agtutubo idi dekada 1950 ken ti mapaspasamak ita. Madandanagan idi dagiti nagannak no dagiti annakda ket agsigsigarilio, agin-inum, wenno makagargari ti panagsalada. Iti agdama, gagangayen dagiti makapakigtot a damag kas iti: Maysa nga estudiante nga agtawen ti 15 pinaltopaltoganna dagiti kaklasena, 2 ti natay ken 13 ti nasugatan. Maysa a grupo dagiti nabartek a tin-edyer siraranggas a pinatayda ti 9 ti tawenna a balasitang sada kinabkabil ti amana ken ti kasinsinna. Iti maysa a pagilian iti Asia, naireport a dagiti agtutubo ti makinggapuanan iti 50 porsiento kadagiti krimen iti napalabas a 10 a tawen. Adda kadi asinoman a makaibaga a saan a dumakdakes ti kasasaad ita?

11. Apay nga adu a tattao ti saan a makadlaw a dumakdakes ti kasasaad?

11 Kuna ni apostol Pedro: “Kadagiti maudi nga aldaw umayto dagiti managuy-uyaw agraman ti panguy-uyawda, nga agtultuloyda maitunos iti bukodda a tartarigagay ket kunkunada: ‘Sadino ti ayan daytoy naikari a kaaddana? Ay ket, nanipud iti aldaw a naturog ken patay dagidi ammami, amin a bambanag nagtultuloyda nga isu latta nanipud idi panangrugi ti sangaparsuaan.’” (2 Ped. 3:3, 4) Apay a kastoy ti reaksion ti dadduma a tattao? Agparang a no masansan a makitkitatayo ti maysa a banag, saantay unayen a madmadlaw dayta. Gapu ta in-inut a bumabbaba ti moralidad dagiti tattao, mabalin a saan unayen a madmadlaw wenno saanen a makapakigtot dayta. Ngem nakapegpeggad daytoy nga in-inut a panagrakaya ti moral.

12, 13. (a) Apay a saantayo koma a maupay kadagiti paspasamak iti lubong? (b) Ania ti makatulong kadatayo a mangsango kadagiti kasasaad ita a “narigat a pakilangenan”?

12 Pinakdaarannatayo ni apostol Pablo nga iti ‘maudi nga al-aldaw,’ dagiti kasasaad ket “narigat a pakilangenan.” (2 Tim. 3:1) Ngem kabaelantayo a sanguen dagita ket saantayo a kasapulan a liklikan ti realidad. Babaen iti tulong ni Jehova, ti espirituna, ken ti kongregasion Kristiano, kabaelantayo a parmeken ti aniaman a pannakaupay wenno buteng ket makapagtalinaedtayo a matalek. Ipaayannatayo ti Dios iti “pannakabalin a nalablabes ngem ti gagangay.”—2 Cor. 4:7-10.

13 Paliiwentayo ta inaramat ni Pablo ti sasao nga “ammuem daytoy” iti rugi ti padtona mainaig iti maudi nga al-aldaw. Ipasigurado dagita a sasao a talaga a matungpal dayta a padto. Ammotayo a dumakes a dumakes dagiti kasasaad agingga a bumallaet ni Jehova a mamagpatingga iti daytoy a lubong. Sigun kadagiti historiador, nadadael dagiti kagimongan wenno nasion gapu ta nagbalin a nakababbaba ti moralda. Ngem ita pay laeng a napasamak ti kastoy kakaro a panagrakaya ti moral iti intero a lubong. Mabalin a di ikankano ti adu a tattao ti kaipapanan dagitoy a pasamak, ngem silalawag nga ipakita ti paspasamak nanipud 1914 nga asidegen a pagpatinggaen ti Pagarian ti Dios ti amin a kinadakes.

SAANTO A LUMABAS DAYTOY A KAPUTOTAN

14-16. Ania ti maikatlo a rason no apay a mamatitayo nga asidegen nga “umay” ti Pagarian ti Dios?

14 Ti maikatlo a rason a makapagtalektayo nga asidegen ti panungpalan ket ti pakasaritaan ti ili ti Dios. Kas pagarigan, sakbay a nangrugi nga agturay ti Pagarian ti Dios idiay langit, adda grupo dagiti matalek a napulotan nga aktibo nga agserserbi iti Dios. Ania ti inaramidda idi saan a natungpal ti dadduma a ninamnamada a mapasamak idi 1914? Adu kadakuada ti nagtalinaed a matalek iti laksid dagiti pakasuotan ken pannakaidadanes ket intultuloyda latta  ti agserbi ken Jehova. Iti panaglabas ti tawtawen, kaaduan kadagidiay a napulotan—no saanda man nga amin—ti simamatalek a nakaturposen iti biagda ditoy daga.

15 Impadto ni Jesus maipapan iti panagpatingga daytoy a sistema ti bambanag: “Daytoy a kaputotan saanto a pulos lumabas agingga a mapasamak amin dagitoy a banag.” (Basaen ti Mateo 24:33-35.) Maawatantayo a ti sasao ni Jesus a “daytoy a kaputotan” ket tumukoy iti dua a grupo dagiti napulotan a Kristiano. Ti umuna a grupo ket addan idi 1914 ken dagus a nabigbigda ti tanda ti kaadda ni Kristo iti daydi a tawen. Pinulotan ida ti espiritu kas annak ti Dios idi 1914 wenno sakbay pay dayta.—Roma 8:14-17.

16 Ti maikadua a grupo a karaman iti “daytoy a kaputotan” ket dagidiay napulotan iti nasantuan nga espiritu bayat nga adda pay laeng ditoy daga ti dadduma a mangbukel iti umuna a grupo. Isu a saan nga amin a napulotan ita ket karaman iti “daytoy a kaputotan” a dinakamat ni Jesus. Lallakay ken babbaket itan dagiti mangbukel iti maikadua a grupo. Kaskasdi, ipanamnama dagiti sasao ni Jesus iti Mateo 24:34 a ti dadduma iti ‘daytoy a kaputotan ket saanto a pulos lumabas’ sakbay a mangrugi ti dakkel a rigat. Gapu iti dayta, ad-adda a tumibker ti panagtalektayo nga asidegen nga agtignay ti Ari ti Pagarian ti Dios tapno dadaelenna dagiti nadangkes ken iyegnan ti nalinteg a baro a lubong.—2 Ped. 3:13.

ASIDEGEN NGA AN-ANAYEN NI JESUS TI PANAGBALLIGINA

17. Ania ti maibagatayo maipapan kadagiti tallo nga ebidensia nga inusigtayo?

17 Ania ti maibagatayo maipapan kadagiti tallo nga ebidensia nga inusigtayo? Impakpakauna ni Jesus a saantayo nga ammo—ken saantayo a kabaelan nga ammuen—ti eksakto nga aldaw wenno oras nga idadateng ti panungpalan. (Mat. 24:36; 25:13) Ngem imbaga ni Pablo nga ammotayo ti “panawen” a pannakatungpal dayta. (Basaen ti Roma 13:11.) Agbibiagtayon iti dayta a panawen, ti maudi nga al-aldaw. No sipapanunottayo kadagiti padto ti Biblia ken no ania ti ar-aramiden itan ni Jehova a Dios ken ni Jesu-Kristo, makitatayo ti nalawag nga ebidensia nga asidegen nga agngudo daytoy a sistema ti bambanag.

18. Ania ti mapasamak kadagidiay saan a mangbigbig iti Pagarian ti Dios?

18 Iti mabiiten, dagidiay saan a mangbigbig iti autoridad a naited ken Jesu-Kristo—ti agbalballigi a Nakasakay iti puraw a kabalio—ket mapilitandanto a mangbigbig iti biddutda. Saandanto a malisian ti pannakaukomda. Iti dayta a tiempo, adunto ti agsangit gapu iti butengda, a kunkunada: “Siasino ti makabael nga agtakder?” (Apoc. 6:15-17) Sungbatan dayta ti sumaruno a kapitulo ti Apocalipsis. Dagiti napulotan ken dagidiay addaan iti namnama nga agbiag ditoy daga ‘agtakderdanto’ iti dayta nga aldaw a naanamongan iti sanguanan ti Dios. Kalpasanna, ti “dakkel a bunggoy” dagiti sabsabali a karnero makalasatdanto iti dakkel a rigat.—Apoc. 7:9, 13-15.

19. Ania ti segseggaam kas maysa a mangbigbigbig iti ebidensia nga asidegen ti panungpalan?

19 No agtultuloy a sipapanunottayo iti kaitungpalan dagiti padto ti Biblia maipapan iti daytoy makapagagar a tiempo, saannatayo a masinga ti lubong ni Satanas ken saantayo nga agbalin a bulsek no maipapan iti talaga a kaipapanan dagiti agdama a paspasamak ditoy lubong. Asidegen nga an-anayen ni Kristo ti panangparmekna iti daytoy nadangkes a lubong iti maudi a pannakigubatna buyogen ti kinalinteg. (Apoc. 19:11, 19-21) Anian a nakaragragsak a masanguanan ti agur-uray kadatayo!—Apoc. 20:1-3, 6; 21:3, 4.