Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN (PAGADALAN NGA EDISION) ENERO 2014

Panagaramid iti Nainsiriban a Desision Bayat ti Kinaagtutubo

Panagaramid iti Nainsiriban a Desision Bayat ti Kinaagtutubo

‘Dakayo nga agtutubo a lallaki ken kasta met dakayo a birhen, idaydayawyo ti nagan ni Jehova.’—SAL. 148:12, 13.

1. Ania a makagunggona a trabaho ti tagtagiragsaken ti adu nga agtutubo?

AGBIBIAGTAYO iti makapagagar a tiempo. Ita laeng nga adda minilion a tattao manipud iti amin a nasion nga agdaydayaw ken Jehova. (Apoc. 7:9, 10) Adu nga agtutubo ti maragragsakan a tumulong kadagiti sabsabali a mangammo iti makaispal-biag a kinapudno iti Biblia. (Apoc. 22:17) Adda dagiti agtutubo a mangyad-adal iti Biblia ken tumultulong iti sabsabali a maaddaan iti nasaysayaat a biag. Ikagkagumaan met ti dadduma nga iranud ti naimbag a damag kadagiti tattao a naiduma ti pagsasaona. (Sal. 110:3; Isa. 52:7) Ania ti masapul nga aramidem tapno ad-adda a makagunggona ti pannakiramanmo iti daytoy a trabaho?

2. Kasano nga ipakita ti kapadasan ni Timoteo a sidadaan ni Jehova a mangitalek iti responsabilidad kadagiti agtutubo? (Kitaen ti ladawan iti rugi ti artikulo.)

2 Kas agtutubo, mabalinmo ti mangaramid kadagiti desision nga agresultanto iti ad-adu nga oportunidad iti panagserbim iti Dios. Kas pagarigan, ni Timoteo a taga-Listra ket nangaramid kadagiti nasayaat a desision a nagresulta iti panagbalinna a misionero idi agtawen iti sumurok-kumurang a 20. (Ara. 16:1-3) Nalabit sumagmamano laeng a bulan kalpasan a pinanawan ni Pablo ti baro a kongregasion idiay Tesalonica gapu iti naranggas a pannakaidadanes, imbaonna ni Timoteo nga agsubli sadiay tapno pabilgenna dagiti kakabsat. (Ara. 17:5-15; 1 Tes. 3:1, 2, 6) Panunotem laengen ti gagar  ni Timoteo idi naitalek kenkuana dayta nga annongen!

TI KAPATGAN A DESISIONMO

3. Ania ti kapatgan a desision a mabalinmo nga aramiden? Kaanom a rumbeng nga aramiden dayta?

3 Ti kasayaatan a tiempo a panagaramid iti napapateg a desision ket bayat ti kinaagtutubo. Ngem adda desision a kapatgan iti amin—isu ti panagserbi ken Jehova. Kaano ti kasayaatan a panangikeddeng iti dayta? Kuna ni Jehova: “Lagipem . . . ti Naindaklan a Namarsuam kadagiti aldaw ti kinaagtutubom.” (Ecl. 12:1) Ti kasayaatan a pamay-an a maaramidam dayta ket ti naan-anay a panagserbim ken Jehova. (Deut. 10:12) Ti panagserbim iti Dios iti amin a pusom ti kapatgan pay laeng a desision a maaramidam. Dayta ti mangapektar iti intero a masakbayam.—Sal. 71:5.

4. Ania a napapateg a desision ti mangapektar iti panagserbim iti Dios?

4 Siempre, saan laeng a ti panagserbim ken Jehova ti desision a mangapektar iti masakbayam. Kas pagarigan, mabalin a pampanunotem met no agasawaka wenno saan, no asino ti pakiasawaam, ken no anianto ti panggedam. Napateg dagitoy a desision, ngem nainsiriban nga ikeddengmo nga umuna ti agserbi ken Jehova iti amin a pusom. (Deut. 30:19, 20) Apay? Agkakanaig ngamin dagitoy a desision. Ti desisionmo mainaig iti panagasawa ken trabaho apektaranna ti panagserbim iti Dios. (Idilig ti Lucas 14:16-20.) Kasta met, ti tarigagaymo nga agserbi iti Dios apektaranna ti desisionmo mainaig iti panagasawa ken panggedan. Isu nga ikeddengmo nga umuna no ania ti kapatgan iti biagmo.—Fil. 1:10.

ANIA TI ARAMIDEM BAYAT TI KINAAGTUTUBOM?

5, 6. Mangted iti pagarigan no kasano nga agresulta iti makapnek a biag ti panagaramid kadagiti umiso a desision. (Kitaen met ti artikulo a “Ti Desisionko Idi Ubingak” iti daytoy a ruar.)

5 No naikeddengmon ti agserbi iti Dios, panunotem no ania ti kayatna nga aramidem ken no kasano a makapagserbika kenkuana. Insurat ti maysa a Japanese a kabsat a lalaki: “Naminsan, idi agtawenak iti 14, kaduak a napan nangasaba ti maysa a panglakayen ket napaliiwna a saanak a naragsak iti ministerio. Siaalumamay nga imbagana: ‘Nasayaat sa no agawidka pay laeng, Yuichiro. Kalpasanna, agtugawka ken panunotem a naimbag no ania ti naaramidan ni Jehova para kenka.’ Inaramidko ti imbagana. No mano nga aldaw a pinampanunot ken inkarkararagko dayta. In-inut a nagbaliw ti panangmatmatko. Idi agangay, maragragsakanakon nga agserbi ken Jehova. Magusgustuak a basaen dagiti kapadasan dagiti misionero, ket pinampanunotko no kasano a makapagserbiak a naan-anay iti Dios.

6 “Inrugik ti mangaramid kadagiti desision a makatulongto kaniak nga agserbi ken Jehova iti sabali a pagilian,” kinuna pay ni Yuichiro. “Kas pagarigan, nangalaak kadagiti kurso a pakasursuruak iti Ingles. Idi nagturposakon iti hayskul, nagbalin a part-time a trabahok ti panangisuro iti Ingles tapno makapagpayunirak. Idi agtawenakon iti 20, rinugiak ti agsursuro iti Mongolian ket naaddaanak iti gundaway a makikadua iti maysa a grupo dagiti agibumbunannag a Mongolian. Dua a tawen kalpasanna, idi 2007, pimmasiarak iti Mongolia. Idi nakikaduaak iti dadduma a payunir iti ministerio ken nakitak nga adu ti interesado, kayatkon ti umakar ken tumulong. Nagsubliak ngarud idiay Japan tapno iplanok dagiti aramidek. Nangrugiak nga agpayunir ditoy Mongolia idi Abril 2008. Narigat ti biag ditoy. Ngem adu a tattao ti interesado iti naimbag a damag, ket tultulongak ida nga umadani ken Jehova. Kombinsidoak a pinilik ti kasayaatan a biag.”

7. Ania dagiti desision a masapul nga aramidentayo? Ania ti masursurotayo ken Moises?

7 Sika ti mismo nga agpili no kasano nga usarem ti biagmo kas maysa a Saksi ni Jehova. (Jos. 24:15) Saan a dakami ti agdesision no mangasawaka wenno saan, no asino ti pakiasawaam, wenno no ania ti serkam  a trabaho. Piliem kadi ti trabaho a mabiit laeng a sursuruen? Sumagmamano kadakayo ti agnanaed kadagiti napanglaw a purok; dadduma met ti adda kadagiti nabaknang a siudad. Addaankayo iti nagduduma a personalidad, abilidad, kapadasan, paginteresan, ken naespirituan a kalat. Nalabit nagduduma ti kasasaadyo, kas kadagidi Hebreo nga agtutubo iti nagkauna nga Egipto. Nanam-ay idi ti biag ni Moises iti palasio ti ari, idinto ta maad-adipen dagiti padana a Hebreo nga agtutubo. (Ex. 1:13, 14; Ara. 7:21, 22) Kas kadakayo, kasapulanda met idi ti mangaramid iti napapateg a desision. (Ex. 19:4-6) Masapul nga ikeddeng ti tunggal maysa kadakuada no ania ti aramidenna iti biagna. Pinili ni Moises ti umiso a desision.—Basaen ti Hebreo 11:24-27.

8. Ania ti makatulong kadagiti agtutubo a mangaramid iti nasayaat a desision?

8 Tulongannaka ni Jehova a mangaramid kadagiti nainsiriban a desision bayat ti kinaagtutubom. Nangipaay kadagiti prinsipio a mabalinmo nga usaren iti aniaman a situasion. (Sal. 32:8) Kasta met, matulongannaka dagiti nagannakmo ken dagiti panglakayen a mangyaplikar kadagitoy a prinsipio. (Prov. 1:8, 9) Usigentayo ti tallo a prinsipio ti Biblia a makatulong kenka a mangaramid kadagiti nainsiriban a desision.

TALLO A PRINSIPIO TI BIBLIA A MAKATULONG KENKA

9. (a) Apay a maikunatayo nga ipapaayannatayo ni Jehova iti dignidad iti panangtedna kadatayo iti wayawaya nga agpili? (b) Ania dagiti oportunidad a silulukat kenka no sapulem nga umuna ti Pagarian?

9 Sapulem nga umuna ti Pagarian ti Dios ken ti kinalintegna. (Basaen ti Mateo 6:19-21, 24-26, 31-34.) Ipapaayannatayo ni Jehova iti dignidad ta inikkannatayo iti wayawaya nga agpili. Saanna nga ibagbaga kenka a masapul nga usarem ti intero a panawen ti kinaagtutubom a mangasaba. Ngem insuro ni Jesus a napateg ti panangsapul nga umuna iti Pagarian. No iyaplikarmo daytoy a prinsipio, makasarakkanto iti adu nga oportunidad a maipakitam ti ayatmo iti Dios ken iti sabsabali ken ti panangipategmo iti namnama a biag nga agnanayon. Bayat a pampanunotem ti maipapan iti pannakiasawa ken panagtrabaho, tingitingem no ti desisionmo ket agresultanto iti nalabes a pannakaseknam iti material a bambanag imbes nga iti panagbalinmo a naregta maipaay iti Pagarian ti Dios ken iti kinalintegna.

10. Apay a naragsak ni Jesus? Ania dagiti desision a mangyeg kenka iti kinaragsak?

10 Tagiragsakem ti agserbi iti sabsabali. (Basaen ti Aramid 20:20, 21, 24, 35.) Insuro kadatayo ni Jesus daytoy a napateg a prinsipio ti biag. Nagbalin a naragsak ta inaramidna ti pagayatan ni Amana imbes a ti bukodna a pagayatan. Naragsakan met ni Jesus a nakakita nga ipangpangag dagiti naemma a tattao ti naimbag a damag. (Luc. 10:21; Juan 4:34) Mabalin a nariknam metten ti rag-o iti panangtulong iti sabsabali. No ibataymo dagiti kangrunaan a desisionmo iti biag kadagiti prinsipio nga insuro ni Jesus, sigurado a naragsakkanto, ken maragsakan met ni Jehova.—Prov. 27:11.

11. Apay a napukaw ni Baruc ti rag-ona? Ania ti imbalakad kenkuana ni Jehova?

11 Ti panagserbitayo ken Jehova ti gubuayan ti kadakkelan a ragsaktayo. (Prov. 16:20) Agparang a nalipatan dayta ni Baruc a sekretario ni Jeremias. Adda idi gundaway a saanen a naragsak iti panagserbina ken Jehova. Isu nga imbaga kenkuana ni Jehova: “Isapsapulam ta bagim iti naindaklan a bambanag. Dika itultuloy ti agsapul. Ta adtoy mangipagtengak iti didigra iti isuamin a lasag, . . . ket itedkonto kenka ta kararuam kas maysa a samsam kadagiti amin a disso a papanam.” (Jer. 45:3, 5) Panagkunam, ania koma ti makaipaay ken Baruc iti ragsak—ti panagsapul iti naindaklan a bambanag wenno ti pannakaispal iti pannakadadael ti Jerusalem kas matalek nga adipen ti Dios?—Sant. 1:12.

12. Ania a desision ti nakatulong ken Ramiro nga agbalin a naragsak?

 12 Maysa kadagiti nagbalin a naragsak iti panagserbina iti sabsabali ket ni Ramiro. Kinunana: “Narigat ti biagmi ken agnanaedkami iti maysa a purok iti Kabambantayan ti Andes. Isu nga idi imbaga ni manongko a pagadalennak iti kolehio, dakkel daytoy nga oportunidad. Ngem nabiit pay idi a nabautisaranak kas maysa a Saksi ni Jehova, ket adda payunir a nangawis kaniak a mapan iti maysa a bassit nga ili tapno mangasaba sadiay. Inkeddengko ti sumurot kenkuana. Sinursurok ti agpukis ken nangipatakderak iti barbershop tapno masuportarak ti bagik. Adu a tattao iti dayta nga ili ti nagpayadal iti Biblia. Idi agangay, immakarak iti kabubuangay a kongregasion nga agus-usar iti katutubo a lengguahe. Sangapulo a tawen itan nga agserserbiak kas amin-tiempo a ministro. Awanen ti sabali pay a trabaho a makaipaay kaniak iti rag-o no di ti panangtulongko iti sabsabali a mangammo iti naimbag a damag iti mismo a pagsasaoda.”

Maragragsakan ni Ramiro nga agserserbi ken Jehova sipud kinaagtutubona (Kitaen ti parapo 12)

13. Apay a ti kinaagtutubo ti kasayaatan a panagserbi ken Jehova a naan-anay?

13 Tagiragsakem ti agserbi ken Jehova bayat ti kinaagtutubom. (Basaen ti Eclesiastes 12:1.) Saan a kasapulan nga adda natalged a panggedam sakanto agpayunir. Ti kinaagtutubo ti kasayaatan a tiempo a rugiam ti agserbi ken Jehova iti amin a pusom, bayat nga awan pay ti adu a responsabilidadmo iti pamilia ken kapigpigsaam pay a mangaramid kadagiti narigat nga annongen. Ania ti kayatmo nga aramiden para ken Jehova ita ta agtutuboka pay? Nalabit kalatmo ti agpayunir wenno kayatmo ti mangasaba kadagiti tattao a sabali ti lengguahena. Wenno baka kayatmo nga ad-adu pay ti maaramidam iti mismo a kongregasionyo. Aniaman ti kalatmo, masapul a kabaelam a suportaran ti bagim. Isaludsodmo iti bagim: ‘Ania ngata a trabaho ti piliek, ken kasano kaadu a panagsursuro ti kasapulak?’

 USAREM DAGITI PRINSIPIO TI BIBLIA ITI PANAGDESISIONMO

14. Ania ti masapul a pagannadam no agplamplanoka para iti masanguanan?

14 Dagiti tallo a prinsipio ti Biblia nga inusigtayo ket makatulong iti panagpilim iti trabaho. Ammo la ketdi dagiti guidance counselor iti eskuelaanyo no ania dagiti trabaho iti lugaryo. Wenno amangan no adda ahensia ti gobierno a makaibaga kenka no ania a trabaho ti alisto a serkan iti lugaryo wenno iti lugar a kayatmo a pagserbian. Mabalin a matulongandaka—ngem agannadka. Amangan no padasen dagidiay saan nga agserserbi ken Jehova nga itukit dita pusom ti panagayat iti lubong. (1 Juan 2:15-17) No dagiti ididiaya daytoy a lubong ti kitkitaem, amangan no allilawennaka ta pusom.—Basaen ti Proverbio 14:15; Jer. 17:9.

15, 16. Siasino ti makaipaay kenka iti nainsiriban a balakad maipapan iti panagpili iti trabaho?

15 No ammomon dagiti trabaho a pagpiliam, kasapulam ti praktikal a balakad. (Prov. 1:5) Siasino ti mabalin a makatulong kenka nga agpili maibatay kadagiti prinsipio ti Biblia? Dumngegka kadagidiay mangay-ayat ken Jehova, mangay-ayat kenka, ken makaammo iti situasionmo. Matulongandaka a mangusig iti kapasidadmo ken motibom. Nalabit makatulong dagiti ibagada iti panangusigmo kadagiti kalatmo. Dakkel ti maitulong dagiti nagannakmo no ay-ayatenda ni Jehova. Makaipaay met kenka iti nasayaat a balakad dagiti panglakayen iti kongregasionyo. Makisaritaka met kadagiti payunir ken kadagiti agdaldaliasat a manangaywan. Apay a pinilida ti amin-tiempo a panagserbi? Kasano nga inrugida ti agpayunir, ken kasanoda a sinuportaran ti bagida? Ania dagiti bendision nga inawatda?—Prov. 15:22.

16 Dagidiay talaga a makaam-ammo kenka ti makaipaay iti nainsiriban a balakad. Kas pagarigan, amangan no kayatmon ti agsardeng nga ageskuela iti hayskul ket agpayunirka laengen gapu ta saanmo a maanusan ti adu nga ipapaaramidda iti eskuelaan. Daydiay mangipatpateg kenka maawatanna ti motibom ket matulongannaka a mangipateg iti panageskuela ken saan a nalaka a maupay. Napateg daytoy a kualidad no kayatmo ti naan-anay a makapagserbi ken Jehova.—Sal. 141:5; Prov. 6:6-10.

17. Aniada a desision ti masapul a liklikantayo?

17 Amin nga agserserbi ken Jehova ket maipasango kadagiti situasion a mabalin a mangpakapuy iti pammatida ken mangyadayo kadakuada ken Jehova. (1 Cor. 15:33; Col. 2:8) Ngem adda dagiti kita ti trabaho a mamagpeggad iti espiritualidadmo. Adda kadi am-ammom a ‘narba ti pammatina’ gapu iti pinilina a trabaho? (1 Tim. 1:19) Nainsiriban a liklikam ti agaramid kadagiti desision a mamagpeggad iti relasionmo ken Jehova.—Prov. 22:3.

TAGIRAGSAKEM TI KINAAGTUTUBOM KAS MAYSA A KRISTIANO

18, 19. Ania ti masapul nga aramidem tapno maaddaanka iti tarigagay a mangaramid iti ad-adu pay iti panagserbim ken Jehova?

18 No talaga a kayatmo ti agserbi ken Jehova, gundawayam dagiti oportunidad a silulukat kenka kas agtutubo nga adipen ti Dios. Ita ti tiempo a mangaramidka kadagiti desision a makatulong kenka a mangtagiragsak iti panagserbi ken Jehova.—Sal. 148:12, 13.

19 Ngem ania ti masapul nga aramidem no awan ti tarigagaymo a mangaramid iti ad-adu pay iti panagserbim ken Jehova? Itultuloymo a patibkeren ti pammatim. Kalpasan nga inladawan ni apostol Pablo ti panagreggetna a gumun-od iti bendision ti Dios, insuratna: “No agannayas ti isipyo iti sabali iti aniaman a pamay-an, ti Dios ipalgaknanto kadakayo ti kababalin nga adda iti ngato. Uray no kasta, aniaman ti nagtengantayon a panagrang-ay, agtultuloytayo koma a magna a siuurnos iti daytoy met laeng a rutina.” (Fil. 3:15, 16) Laglagipem nga ay-ayatennaka ti Dios ken pagsayaatam dagiti balakadna. Ni Jehova ti kasayaatan a makatulong kenka a mangaramid kadagiti nainsiriban a desision bayat ti kinaagtutubom.